Mau uiraa a te feia taio

I te papuraa mau o te parau, te vai ra anei te hoê taa-ê-raa i rotopu i te mau parau bibilia ra “mamoe ê atu” e “feia rahi roa”?

E, eita râ tatou e hinaaro e faaetaeta roa i nia i te faaohiparaa o te taˈo aore ra e riri mai te peu e te faaohipa ra te hoê taata i te mau parau ma te tauiui haere.

Ua matau te rahiraa o te mau kerisetiano i te mau irava i reira teie mau taˈo e itehia ˈi. Ei hiˈoraa, i roto i te Ioane 10:16. Ua parau o Iesu i reira e: “E mamoe ê atu â ta ˈu, e ere i to teie nei aua, e aratai atoa mai au ia ratou e tia ˈi, e faaroo mai hoi ratou i to ˈu reo, ia hoê aˈe nǎnǎ, e hoê hoi tiai.” E itehia te tahi atu parau, “feia rahi roa,” i roto i te Apokalupo 7:9. Te taiohia ra e: “E i muri aˈe i te reira, hiˈo atura vau, e inaha e feia rahi roa, e ore roa e pau ia taio, no te mau fenua atoa, e te mau opu atoa, e te mau nunaa atoa, e te mau reo atoa, i te tia-noa-raa i mua i te terono, e i mua i te Arenio, ma te ahu teatea i te ahuraa e ma te amaa tamara i to ratou rima.”

E rave anaˈe na tatou i te Ioane 10:16 na mua roa. O vai te mau mamoe? Mea maitai e ia haamanaˈo tatou e ua faaauhia te mau pǐpǐ taiva ore atoa a Iesu i te mau mamoe. I roto i te Luka 12:32, ua pii oia i ta ˈna mau pǐpǐ o tei haere atu i nia i te raˈi e te “nǎnǎ iti.” E nǎnǎ o te aha? E nǎnǎ mamoe ïa. E riro te mau “mamoe” o te “nǎnǎ iti” ei mau melo no te Basileia i nia i te raˈi. Teie nei râ, te vai nei te tahi atu pǔpǔ taata, e tiaturiraa ê to ratou, o ta Iesu e faariro atoa ra ei mau mamoe.

E nehenehe tatou e taio i te reira i roto i te Ioane pene 10. I muri aˈe i to ˈna paraparauraa no nia i te mau mamoe mai ta ˈna mau aposetolo o ta ˈna e titau manihini atu no te ora i nia i te raˈi, ua parau faahou o Iesu i roto i te irava 16 e: “E mamoe ê atu â ta ˈu, e ere i to teie nei aua, e aratai atoa mai au ia ratou e tia ˈi.” Ua faˈi ê na te mau Ite no Iehova e i roto i teie nei irava te faahiti ra o Iesu i te parau no te mau taata e tiaturiraa to ratou no te ora i nia i te fenua nei. E rave rahi na o tei ora na mua ˈtu i te tau kerisetiano, mai ia Aberahama, Sara, Noa, e Malaki, o tei fanaˈo i te hoê â tiaturiraa. No reira e nehenehe tatou ma te tia e faariro ia ratou ei mau melo atoa o te mau “mamoe ê atu” o te Ioane 10:16. I te roaraa o te Mileniuma, e faatiahia mai teie mau ite haapao maitai tei ora na mua ˈtu i te tau kerisetiano e i muri iho mai e haapii ratou e e farii ratou ia Iesu Mesia, ma te riro mai ei mau “mamoe ê atu” no te Tiai mamoe maitai.

Ua ite tatou e i te taime i hope ai te piiraa o te toea o te pǔpǔ e haere i nia i te raˈi, e mau mirioni taata tei riro mai ei mau kerisetiano mau. E mea tano atoa ia pii ia ratou e mau “mamoe ê atu,” i te mea e e ere ratou no te “nǎnǎ iti.” Teie râ, te tiai nei te mau mamoe ê atu i teie nei mahana no te ora roa ˈtu i roto i te hoê paradaiso i nia i te fenua nei.

I teie nei, eaha ïa no te tiaraa taata o te “feia rahi roa” faahitihia i roto i te Apokalupo 7:9? A hiˈo na i te irava 13 e te uiraa e, “O vai eie nei feia e ahu i te ahu teatea nei? e mai hea mai â ratou?” Te itehia ra te pahonoraa i roto i te Apokalupo 7:14: “O te feia i haere mai mai roto mai i te ati rahi ra.” No reira te “feia rahi roa” o te feia ïa o te haere mai mai roto mai, aore ra o te ora mai, i te ati rahi. Mai ta te irava 17 e parau ra, ‘e arataihia ratou i te mau pape ora pihaa’ i nia i te fenua nei.

Papu maitai râ, no te feia e ora mai i te ati rahi e fatata maira, e tia ia ratou ia horoi ê na i to ratou ahu i roto i te toto o te Arenio, ma te riro ei feia haamori mau. No reira, noa ˈtu e te faataa ra te Apokalupo 7:9 i teie nahoa i muri aˈe i te ati, e faaohipa tatou i te parau ra “feia rahi roa” no te feia atoa e tiaturiraa to ratou no te ora i nia i te fenua o te pûpû nei i te hoê taviniraa moˈa ia Iehova i teie nei, na mua noa ˈˈe a tupu ai te ati rahi ia aro te mau nunaa i te haapaoraa hape.

Ei haapotoraa, e haamanaˈo anaˈe tatou e e parau aano te parau ra “mamoe ê atu,” e faaô oia i te mau tavini atoa o te Atua e tiaturiraa to ratou no te ora e a muri noa ˈtu i nia i te fenua. E ô atoa mai te rahiraa o te pǔpǔ taata taotiahia e au i te mamoe i teie nei mahana o te haaputuputuhia ra ei “feia rahi roa” ma te tiaturiraa e ora tia mai i te ati rahi e fatata maira. Te rahiraa o teie mau kerisetiano taiva ore e ora noâ i teie nei mahana o te mau “mamoe ê atu” ïa ratou, e e mau melo o te “feia rahi roa.”

E mea tano ia parau faahou na nia iho e, ua navai noa te haapapuraa i teie mau faataaraa, eita e titauhia i te hoê kerisetiano ia etaeta roa no nia i te taˈo—ia vahavaha i te taˈo. Ua faaara o Paulo no nia i te tahi feia “teoteo” o te faaô nei i roto i te “mârôraa parau.” (Timoteo 1, 6:4) Mai te peu e te taa ra ia tatou i te tahi mau taa-ê-raa i rotopu i teie mau parau, mea maitai ïa. Teie râ, eita tatou e faahapa, ma te tahaa aore ra i roto noa ia tatou, i te tahi o tei ore paha i faaohipa ma te papu maitai i te mau parau bibilia.