Eaha te huru oraraa no a muri aˈe o te mau mamoe e te mau puaaniho?

“E na ˈna e faataa ia ratou mai te tiai mamoe e faataa te mamoe i te puaaniho.”—MATAIO 25:32.

1, 2. No te aha tatou e anaanatae ai i te parabole o te mau mamoe e te mau puaaniho?

O IESU Mesia iho â te Orometua rahi roa ˈˈe i ora aˈenei i nia i te fenua nei. (Ioane 7:46) Te hoê o ta ˈna mau ravea no te haapiiraa o te faaohiparaa ïa i te mau parabole, aore ra te mau faahohoˈaraa. (Mataio 13:34, 35) Te vai ra te mau faahitiraa ohie ia taa mea puai râ no te horoa i te mau parau mau hohonu i te pae varua e i te pae o te mau tohu.

² I roto i ta ˈna parabole o te mau mamoe e te mau puaaniho, ua faataa o Iesu i te hoê taime oia e ohipa ˈi i roto i te hoê aravihi taa ê mau: “Ia tae maira te Tamaiti a te taata ma ta ˈna hanahana, e . . .” (Mataio 25:31) E anaanatae tatou i te reira no te mea o te faahohoˈaraa hoi i reira to Iesu faahoperaa i ta ˈna pahonoraa i te uiraa: “[Eaha] te tapao o to oe [vairaa] mai e te hopea o [te mau mea e vai nei]?” (Mataio 24:3) Eaha râ te auraa no tatou?

3. I te omuaraa i roto i ta ˈna oreroraa parau, eaha ta Iesu e parau ra o te tupu oioi i muri aˈe te ati rahi e haamata ˈi?

³ Ua tohu o Iesu i te rahiraa ohipa anaanatae mau o te tupu “i muri iho â” te tupuraa o te ati rahi, ohipa o ta tatou e tiai ra. Ua parau oia e e iteahia ˈi “te tapao no te Tamaiti a te taata.” E roo-roa-hia “te mau fetii atoa o te fenua nei” o te “hiˈo i te Tamaiti a te taata nei i te haerea mai na nia i te ata o te raˈi ra, ma te mana e te hanahana.” E apeehia mai te Tamaiti a te taata nei e “ta ˈna ra mau melahi.” (Mataio 24:21, 29-31)a Eaha ïa no nia i te parabole o te mau mamoe e te mau puaaniho? Te horoa nei te mau tatararaa apî o te Bibilia i roto i te Mataio pene 25, e tuhaa hoi o te pahonoraa a Iesu, i te tahi atu â mau tuhaa rii no nia i to ˈna hoˈiraa mai i roto i te hanahana e te aratairaa i ta ˈna haavaraa o “te mau fenua atoa.”—Mataio 25:32.

Mau hohoˈa i roto i te parabole

4. Nafea ia faataahia o Iesu i roto i te parabole o te mau mamoe e te mau puaaniho, e o vai â te faahitihia i roto i te hohoˈa?

⁴ Ua haamata o Iesu i ta ˈna parabole ma te parau e: “Ia tae maira te Tamaiti a te taata.” Ua ite iho â outou e o vai ra “te Tamaiti a te taata” nei. E faatano pinepine te feia papai i te Evanelia i taua faahitiraa i nia ia Iesu. Ua na reira atoa o Iesu iho, papu maitai te vai ra i roto i to ˈna feruriraa i te orama a Daniela no nia “te hoê mai te Tamaiti a te taata ra” e haafatata ˈtura i To te mau mahana tahito ra e ua horoahia na ˈna te “mana, e te hinuhinu, e te basileia.” (Daniela 7:13, 14; Mataio 26:63, 64; Mareko 14:61, 62) Noa ˈtu e o Iesu te taata matamua i roto i taua parabole ra, e ere râ o o ˈna anaˈe iho. I roto i te omuaraa o ta ˈna oreroraa parau, mai tei papaihia i roto i te Mataio 24:30, 31, ua parau atu oia e ia tae maira te Tamaiti a te taata nei ‘ma te mana e te hanahana rahi,’ e hauti ta ˈna mau melahi i te tuhaa faufaa roa. I te hoê â huru, te faaite atoa ra te parabole o te mau mamoe e te mau puaaniho i te mau melahi e o Iesu ia ‘parahi oia i nia i to ˈna terono hanahana’ no te haava. (A faaau e te Mataio 16:27.) Tei roto râ te Haava e ta ˈna mau melahi i te raˈi, te faahitihia ra anei te parau o te mau taata i roto i te parabole?

5. Nafea tatou e nehenehe ai e ite i te mau “taeae” o Iesu?

⁵ Te faaite ra te hoê hiˈopoaraa iti i te parabole e toru pǔpǔ te tia ia tatou ia ite. No nia i te mau mamoe e te mau puaaniho, ua tuu faahou mai te Tamaiti a te taata nei i te toruraa o te pǔpǔ e mea faufaa ia taa e o vai ra no te ite e o vai ra te mau mamoe e te mau puaaniho. Ua pii o Iesu i taua toruraa o te pǔpǔ o to ˈna mau taeae i te pae varua. (Mataio 25:40, 45) E tia ia ratou ia riro ei mau taata haamori mau, no reira o Iesu i parau ai e: “O tei haapao i te hinaaro o tau Metua . . . , o to ˈu ïa taeae, o to ˈu ïa tuahine, e o to ˈu ïa metua vahine.” (Mataio 12:50; Ioane 20:17) Ma te papu roa ˈtu râ, ua papai o Paulo no nia i te mau kerisetiano tei riro ei “huaai o Aberahama” e o tei riro ei mau tamaiti a te Atua. Ua pii oia ia ratou te mau “taeae” o Iesu e tei “noaa atoa te parauraa no te raˈi maira.”—Hebera 2:9–3:1; Galatia 3:26, 29.

6. O vai te mau taeae iti “haihai” o Iesu?

⁶ No te aha o Iesu i parau e “te hoê taeae iti haihai roa” i rotopu i to ˈna mau taeae? Te faahiti ra taua mau parau ra i ta te mau aposetolo i faaroo aˈena. I to ˈna faaauraa e o Ioane Bapetizo, o tei pohe na mua ˈˈe ia Iesu e e tiaturiraa ïa to ˈna no te ora i nia i te fenua nei, i te feia e tiaturi e ora i nia i te raˈi, ua parau hoi o Iesu e: “I ta te vahine i fanau nei aita ˈtu ïa peropheta rahi i itea ia Ioane Bapetizo nei, o tei iti roa râ i te basileia o te ao ra, e rahi ïa ia ˈna.” (Mataio 11:11) E tia i te feia o te haere i nia i te raˈi ia riro ei feia itoito i roto i te amuiraa, mai te mau aposetolo ra, e vetahi feia iti, ua riro râ ratou paatoa ei mau taeae varua no Iesu. (Luka 16:10; Korinetia 1, 15:9; Ephesia 3:8; Hebera 8:11) No reira, tae noa ˈtu i te feia faufaa iti noa i roto i teie nei ao, ua riro ratou ei mau taeae e e haapaohia ratou ia au i to ratou tiaraa.

O vai te mau mamoe e te mau puaaniho?

7, 8. Eaha ta Iesu i parau no nia i te mau mamoe, no reira eaha ta tatou e faaoti no nia ia ratou?

⁷ Te taio nei tatou no nia i te haavaraa i te mau mamoe e: “Ei reira [Iesu] e parau aˈe ai i tei tana rima atau ra, A haere mai outou, e te feia i faaorahia e tau Metua, e parahi i te basileia i haapaohia no outou mai te hamaniraa mai o te fenua nei ra: i poia na hoi au, e ua horoa mai outou i te maa na ˈu; i poihâ na vau e ua faainu mai outou ia ˈu; e taata ê au, e ua ite mai outou ia ˈu: i veve na vau, e ua faaahu mai outou ia ˈu; i pohe na vau i te maˈi, e ua utuutu mai outou ia ˈu; i roto vau i te tapearaa, e ua haere mai outou ia ˈu ra. Ei reira te feia parau-tia ra e na ô aˈe ai [i] te parau ia ˈna, E te Fatu, i nafea matou i ite ai ia oe i te poiaraa, e ua faaamu ia oe? e te poihâraa, e ua faainu atu ia oe? i nafea matou i ite atu ai ia oe, e e taata ê, e ua ite atu ia oe? e te veveraa, e ua faaahu ia oe? i nafea matou i ite atu ia oe i te poheraa i te maˈi, e i roto i te tapearaa, e ua haere atu ia oe ra? E na ô aˈe te arii i te parau ia ratou, na ô aˈera, Oia mau ta ˈu e parau atu ia outou nei, O outou i na reira i te hoê taeae iti haihai roa i roto i tau mau taeae nei, ua na reira mai ïa outou ia ˈu.”—Mataio 25:34-40.

⁸ Ma te papu, e pǔpǔ taata te mamoe i haavahia e au ia ratou ia parahi i te rima atau hanahana e fariihia o Iesu. (Ephesia 1:20; Hebera 1:3) Eaha ta ratou i rave e afea râ? Ua parau o Iesu e ua horoa ratou ma te hamani maitai, ma te faatura, e ma te horoa maitai i te maa, te inu, e te ahu na ˈna, e ua tauturu ia ˈna i to ˈna maˈiraa, to ˈna vairaa i roto i te fare tapearaa. I to te mau mamoe parauraa e aita ratou i rave i te reira i nia ia Iesu iho, ua tapao oia e ua na reira ratou no te turu i to ˈna mau taeae varua, te toea kerisetiano i faatavaihia, mea na reira to ratou ohiparaa i nia ia ˈna.

9. No te aha eita te parabole e tano i te roaraa o te Mileniuma?

⁹ Eita te parabole e tupu i te roaraa o te Mileniuma, eita te feia i faatavaihia e mauiui faahou i te poia, te poihâ, te maˈi, aore ra te fare tapearaa. E rave rahi o ratou o tei ite atu i te reira i te roaraa o te hopea o te faanahonahoraa o te mau mea e vai nei. Mai te taime o Satani i te huriraahia i nia i te fenua nei, ua faariro oia te toea ei tumu taa ê no to ˈna riri, ma te aratai ia ratou e ia faaooohia, ia hamani-ino-hia, e ia pohe.—Apokalupo 12:17.

10, 11. (a) No te aha eita e tano ia manaˈo e te mamoe o te feia atoa o te rave ra i te mau ohipa maitai a te mau taeae o Iesu? (b) Te faahohoˈa ra ma te tano te mau mamoe ia vai?

¹⁰ Te hinaaro ra anei o Iesu e parau e e rave te mau taata atoa i te tahi maitai i te hoê o to ˈna mau taeae, mai te horoaraa i te hoê tâpû faraoa aore ra te hoê hapaina pape, o te haapapu e tei roto ratou i te mau mamoe? Parau mau roa, ma te faatupu i taua mau huru maitai, te faaite ra ïa te aroha o te taata, tera râ e rave rahi atu â te titauhia i te mau mamoe i roto i taua parabole ra. Papu maitai aita o Iesu e parau ra, ei hiˈoraa, no te feia e aita e faaroo aore ra te mau upoo faatere haapaoraa o te faahua ra i te rave i te mau ohipa maitai no te hoê o to ˈna mau taeae. I te taa-ê-raa, e piti taime to Iesu piiraa i te mau mamoe “te feia parau-tia.” (Mataio 25:37, 46) E tia râ i te mau mamoe ia horoa i te tauturu i roto i te hoê area tau—te tururaa ma te itoito—i te mau taeae o te Mesia e ia faatupu i te faaroo a tiai noa ˈi e ia roaa ia ratou i te tiaraa parau-tia i mua i te Atua.

¹¹ I te roaraa o te mau senekele, ua fanaˈo e rave rahi mai ia Aberahama i te tiaraa parau-tia. (Iakobo 2:21-23) Tei roto atoa o Noa, o Aberahama e te tahi atu mau taata haapao maitai o te mau “mamoe ê atu” o te ora i roto i te Paradaiso i nia i te fenua i raro aˈe i te basileia o te Atua. I teie nei tau, ua hau atu i te mirioni tei farii i te haamoriraa mau ei mau mamoe ê atu e tei riro ei “hoê aˈe nǎnǎ” e te feia i faatavaihia. (Ioane 10:16; Apokalupo 7:9) Te farii nei teie mau taata o te tiaturi e ora i nia i te fenua i te mau taeae o Iesu ei mau tia o te Basileia e te tauturu nei ia ratou—i roto i te auraa mau e i te pae varua. Te farii nei Iesu e te ravehia ra te reira no ˈna te ohipa ta te mau mamoe ê atu e rave ra no ta ˈna mau taeae i nia i te fenua nei. E faarirohia taua mau taata e ora noa ra ia haere mai oia no te haava i te mau nunaa ei mau mamoe.

12. No te aha te mau mamoe e ani ai e afea râ ratou i hamani maitai ai ia Iesu?

¹² Mai te peu e e poro te mau mamoe ê atu i teie nei i te parau apî maitai e te feia i faatavaihia e e tauturu atu ia ratou, no te aha ratou e ani ai e: “E te Fatu, i nafea matou i ite ai ia oe i te poiaraa, e ua faaamu ia oe? e te poihâraa, e ua faainu atu ia oe?” (Mataio 25:37) Te vai ra e rave rahi tumu ê atu. E parabole hoi teie. Na roto i taua ravea ra, ua faaite o Iesu e te haapao mau nei oia i to ˈna mau taeae varua; te manaˈo nei oia mai ia ratou, te mauiui nei oia e o ratou. Ua parau aˈena o Iesu e: “O tei ite mai ia outou na, ua ite ïa ia ˈu, e o tei ite mai ia ˈu nei, ua ite ïa i tei tono mai ia ˈu nei ra.” (Mataio 10:40) I roto i taua faahohoˈaraa ra, te faarahi nei o Iesu i te faaueraa tumu, e faaite ra e te mea (maitai aore ra ino) i ravehia i nia i to ˈna mau taeae e tae roa i nia i te raˈi; mai te huru ra e ravehia i nia ia ˈna i nia i te raˈi. Oia atoa, te haapapu nei o Iesu i te tiaraa o Iehova no te haava, ma te haamaramarama e mea faufaa e te tano te haavaraa a te Atua, noa ˈtu e ua fariihia aore ra ua faautuahia. Aita te mau puaaniho e nehenehe e horoa i te hororaa e, ‘Auê, ahiri matou i ite roa ˈtu ia ˈna.’

13. No te aha te feia e au i te mau puaaniho e faahiti ai ia Iesu mai te “Fatu”?

¹³ Ia taa anaˈe ia tatou afea e tupu ai te haavaraa i faaitehia i roto i teie parabole, e papu maitai ia tatou e o vai ra te mau puaaniho. E tupu te reira i te taime “te tapao no te Tamaiti a te taata e fa mai i roto i te raˈi ra; ei reira te mau fetii atoa o te fenua nei e oto ai, ia hiˈo ratou i te Tamaiti a te taata i te haerea mai . . . ma te mana e te hanahana rahi.” (Mataio 24:29, 30) Te pii uˈana ra te feia e ora ˈtu i te ati rahi i nia ia Babulonia Rahi o tei tâuˈa i te mau taeae o te Arii, i te Haava ei “Fatu,” ma te tiai noa ˈtu ai e e ora ratou.—Mataio 7:22, 23; a faaau e te Apokalupo 6:15-17.

14. I nia i teihea niu e haava ˈi o Iesu i te mau mamoe e te mau puaaniho?

¹⁴ Teie nei râ, eita te haavaraa a Iesu e niuhia i nia i te piiraa mauiui o te feia e haere i te pure i mutaa ihora, te feia e aita e tiaturi i te Atua, aore ra te tahi atu. (Tesalonia 2, 1:8) Maoti râ, e hiˈopoa faahou te haava i te huru mafatu e te mau ohipa ta te mau taata i rave i mutaa ihora i nia atoa “i te hoê taeae iti haihai roa [o to ˈna mau taeae].” Ma te farii, te topa noa ra te numera o te mau kerisetiano i faatavaihia e vai ra i nia i te fenua. Teie nei râ, a tamau noa ˈi te feia i faatavaihia, e faatupu ra i “te tavini haapao maitai e te paari,” i te horoa mai i te maa i te pae varua e te aratairaa, tei te mau mamoe te haamaitairaa e faatupu i te maitai i te pǔpǔ o te mamoe, mai ta te ‘nahoa rahi o te mau fenua atoa e te mau opu atoa e te mau nunaa atoa’ e rave nei.—Apokalupo 7:9, 14.

15. (a) Mea nafea vetahi i te faaiteraa e e au ratou i te mau puaaniho? (b) No te aha e tia ia tatou ia patoi atu i te parau e e mamoe aore ra e puaaniho te tahi pae?

¹⁵ Nafea e tâuˈahia ˈi te mau taeae o te Mesia e na mirioni mamoe ê atu e tahoê ra ia ratou mai te hoê nǎnǎ? Aita te rahiraa taata e aro nei i te mau tia o te Mesia, e aita atoa ratou e tâuˈa nei ia ratou ma te here. Mea au aˈe na ratou i te ao iino, te patoi nei te mau taata mai te puaaniho ra te huru i te poroi o te Basileia, peneiaˈe ua faaroo roa ˈtu ratou aore ra na roto i te tahi atu ravea. (Ioane 1, 2:15-17) Oia mau, i roto i te hiˈopoaraa hopea, o Iesu noa te nehenehe e horoa ˈtu i te haavaraa. E ere na tatou e faaoti e o vai ra te mau mamoe e o vai ra te mau puaaniho.—Mareko 2:8; Luka 5:22; Ioane 2:24, 25; Roma 14:10-12; Korinetia 1, 4:5.

Eaha te oraraa no a muri aˈe no na pǔpǔ tataitahi?

16, 17. Eaha te oraraa no a muri aˈe no te mau mamoe?

¹⁶ Ua horoa o Iesu i ta ˈna haavaraa i nia i te mau mamoe: “A haere mai outou, e te feia i faaorahia e tau Metua, e parahi i te basileia i haapaohia no outou mai te hamaniraa mai o te fenua nei ra.” Auê hoi titauraa mahanahana mau—“A haere mai”! Ihea? E rave i te ora mure ore, mai tei faahitihia i roto i te aniraa: “Te feia parau-tia ra, [e rave] ïa i te ora mure ore.”—Mataio 25:34, 46.

¹⁷ I roto i te parabole o te mau taleni, ua faaite o Iesu eaha te titauhia i te feia e faatere atu e o ˈna i roto i te raˈi, tera râ i roto i teie parabole ua faaite oia eaha te titauhia i te mau melo o te Basileia. (Mataio 25:14-23) Ma te putapû, no te mea e te turu nei ratou ma to ratou mafatu atoa i te mau taeae o te Mesia, e roaa i te mau mamoe i te hoê vahi i roto i te tuhaa o te fenua nei a to ˈna ra Basileia. E fanaˈo ratou i te ora i nia i te fenua e faarirohia ei paradaiso—te hoê tiaturiraa ta te Atua i faaineine no ratou ‘mai te hamaniraahia mai te fenua’ o te mau taata i hoohia.—Luka 11:50, 51.

18, 19. (a) E horoa o Iesu i teihea haavaraa no te mau puaaniho? (b) Nafea tatou e nehenehe ai e papu e aita te mau puaaniho e faaruru i te mauiui mure ore?

¹⁸ Auê hoi taa-ê-raa e te haavaraa i faatupuhia i nia i te mau puaaniho! “Ei reira oia e parau aˈe ai i tei te rima aui, E haere ê outou, e te feia faainohia, i roto i te auahi pohe ore i haapaohia no te diabolo e ta ˈna ra mau melahi: i poia na hoi au, e aore outou i horoa mai i te maa na ˈu; i poihâ na vau, e aore outou i faainu mai ia ˈu; e taata ê au, e aore outou i ite mai ia ˈu; i veve na vau, e aore outou i faaahu mai ia ˈu; i maˈihia na vau, e i roto vau i te tapearaa, e aore outou i haapao mai ia ˈu. Ei reira atoa ratou e parau ai ia ˈna, i te na ôraa e, E te Fatu, i nafea matou i ite atu ai ia oe i te poiaraa, e te poihâraa, e te taata-ê-raa, e te veveraa, e te poheraa i te maˈi, e i roto i te tapearaa, e aore i turu atu ia oe? Ei reira oia e na ô aˈe ai i te parau ia ratou, Oia mau ta ˈu e parau ia outou na, o outou aore i na reira i te hoê taeae iti haihai roa i roto i tau mau taeae nei, aore atoa ïa i na reira mai ia ˈu.”—Mataio 25:41-45.

¹⁹ Ua ite te Feia haapii Bibilia e ere te auraa e e mauiui te nephe o te mau taata mai te puaaniho ra te huru i roto i te auahi pohe ore. Aita, e mau nephe te mau taata; aita to ratou e nephe pohe ore. (Genese 2:7; Koheleta 9:5, 10; Ezekiela 18:4) Na roto i te faautuaraa i te mau puaaniho no te “auahi pohe ore,” te hinaaro ra te haava e parau i te haamouraa e aita e tiaturiraa maitai no a muri aˈe, o te riro atoa ei hopea tamau no te Diabolo e ta ˈna mau demoni. (Apokalupo 20:10, 14) No reira, te faanaho nei te Haava a Iehova i te hoê haavaraa taa ê. Ua parau oia i te mau mamoe, “A haere mai”; i te mau puaaniho, “E haere ê outou.” E noaa i te mau mamoe te “ora mure ore.” Te mau puaaniho e noaa ïa ia ratou te “pohe mure ore.”—Mataio 25:46.b

Eaha ïa te auraa no tatou?

20, 21. (a) Eaha te ohipa faufaa roa te tia i te mau kerisetiano ia faatupu? (b) Eaha te faataa-ê-raa e faatupuhia ra? (c) Eaha te huru tupuraa o te mau taata ia haamata anaˈe te parabole o te mau mamoe e te mau puaaniho i te tupu?

²⁰ E rave rahi te tia i na aposetolo e maha o tei faaroo i te pahonoraa no nia i te tapao o to ˈna taeraa mai e te hopea o te faanahonahoraa o te mau mea, ia hiˈopoa. E tia ia ratou ia vai ara noa e ia tamoemoe. (Mataio 24:42) E tia atoa ia ratou ia horoa i te faaiteraa i faahitihia i roto i te Mareko 13:10. Te faatupu nei te mau Ite no Iehova ma te itoito i taua ohipa ra i teie nei mahana.

²¹ Eaha ïa te auraa no tatou te tatararaa api o teie parabole o te mau mamoe e te mau puaaniho? Oia mau, te rave noa nei â te mau taata i te hoê maitiraa. Tei nia vetahi i ‘te eˈa aano e aratai ra i te haamouraa,’ area vetahi râ te tamata nei i te faaea i nia i ‘te eˈa apǐapǐ e aratai i te ora.’ (Mataio 7:13, 14) Ua piri roa te taime Iesu e faahiti ai i te haavaraa hopea i nia i te mau mamoe e te mau puaaniho i faataahia i roto i te parabole. Ia tae mai te Tamaiti a te taata i roto i to ˈna tiaraa Haava, e faaoti oia e e rave rahi kerisetiano mau—“e feia rahi roa” i teie nei o te mau mamoe i pûpûhia—e nehenehe ratou e tomo atu na roto i te tuhaa hopea o “te ati rahi” e tae atu ai i roto i te ao apî. Ua riro taua tiaturiraa ra i teie nei ei pu no te oaoaraa. (Apokalupo 7:9, 14) I te tahi aˈe pae, e haapapu e rave rahi mau taata o “te mau fenua atoa” e ua riro mau ratou ei mau puaaniho faaroo ore. E “haere ê ratou e rave i te pohe mure ore.” Auê hoi tamahanahanaraa no te fenua nei!

22, 23. I te mea e no a muri aˈe te tupuraa o te parabole, no te aha e mea faufaa ta tatou ohipa pororaa i teie nei mahana?

²² Noa ˈtu e ua fatata roa te haavaraa mai tei faataahia i roto i te parabole, te haamau-atoa-hia ra i teie nei te hoê ohipa faaora. Tei roto tatou te mau kerisetiano i te hoê ohipa faaoraraa no te faaite i te hoê poroi o te faatupu i te amahamaharaa i rotopu i te mau taata. (Mataio 10:32-39) Ua papai o Paulo e: “O te tiaoro atoa hoi i te iˈoa o Iehova ra, e hope roa ïa i te ora. Eaha ra te taata nei e tia ˈi ia tiaoro atu ia ˈna, i tei ore i faaroohia e ratou ra? e eaha hoi ratou e tia ˈi ia faaroo ia ˈna, i tei ore ratou i ite ia ˈna? e eaha hoi ratou i ite ai i te faaite ore?” (Roma 10:13, 14) E tapae ta tatou ohipa i mua i te huiraatira e tae atu i na hau atu e 230 fenua e te iˈoa o te Atua e ta ˈna poroi faaora. Tei mua noa te mau taeae i faatavaihia o te Mesia i roto i teie ohipa. Fatata te tahi tau pae mirioni o te mau mamoe ê atu tei apiti atu na muri ia ratou i teie nei. E te pahono nei te mau taata ati aˈe teie nei ao i te poroi e faaitehia ra e te mau taeae o Iesu.

²³ Te faaroo nei e rave rahi i ta tatou poroi mai te porohia ra i tera e tera fare aore ra ma te faanaho-ore-hia. E haapii vetahi no nia i te mau Ite no Iehova e o vai ra tatou ia au i ta ratou iho huru hiˈoraa ta tatou i ore i ite. Ia tae mai te tau o te haavaraa, tae roa i teihea otia e faarirohia ˈi e Iesu ei hopoia na te taatoaraa e ei hopoia na te utuafare? Aita tatou e nehenehe e parau, e e mea faufaa ore ia hamani i te manaˈo. (A faaau e te Korinetia 1, 7:14.) Te tâuˈa ore nei e rave rahi ma te hinaaro mau, te faaooo ra, aore ra te apiti nei i roto i te hamani-ino-raa tano ore o te mau tavini a te Atua. No reira, e tau ru teie; te paari nei te tahi pae i rotopu i te feia ta Iesu e haava e e mau puaaniho ratou.—Mataio 10:22; Ioane 15:20; 16:2, 3; Roma 2:5, 6.

24. (a) No te aha e mea faufaa no te mau taata ia pahono ma te tano i ta tatou ohipa pororaa? (b) Ua tauturu teie haapiiraa ia outou iho ia faatupu i teihea huru i nia i ta tatou taviniraa?

²⁴ Ma te oaoa râ, te pahono nei e rave rahi ma te tano, ma te haapii i te Parau a te Atua, e ma te riro ei mau Ite no Iehova. E nehenehe vetahi tei riro na hoi ei puaaniho e taui e e riro ei mau mamoe. Te horoa nei te feia o te pahono ra e o te turu ra ma te itoito i te toea o te mau taeae a te Mesia i te haapapuraa e e tuuhia iho â ratou i te rima atau o Iesu i te mau tau i mua, ia parahi oia i nia i to ˈna terono no te haava. Te haamaitai-noa-hia ra ratou e e haamaitai-tamau-hia ratou. No reira, e faaitoito teie parabole ia tatou ia faatupu i te ohipa ieie roa ˈtu â i roto i te taviniraa kerisetiano. Na mua ˈˈe e taere roa, te hinaaro nei tatou e rave hau atu â no te parau apî maitai o te Basileia e ma te na reira te horoa nei i te haamaitairaa ia vetahi ê no te pahono atu. Ua tae i te taime no Iesu ia horoa i te haavaraa, te faautuaraa e te haavaraa tano.—Mataio 25:46.

[Nota i raro i te api]

Te haamanaˈo ra anei outou?

◻ Eaha te faaauraa i rotopu i te Mataio 24:29-31 e te Mataio 25:31-33 e faaite ra e no a muri aˈe te tupuraa o te parabole o te mau mamoe e te mau puaaniho, e afea râ te reira?

◻ O vai te “iti haihai” o te mau taeae o Iesu?

◻ Mea nafea to Iesu faaohiparaa i te parau ra “parau-tia” ia tauturu ia tatou ia ite e te faahohoˈa ra ratou i te aha e aita ratou e faahohoˈa ra i te aha?

◻ Noa ˈtu e e tupu te parabole a muri aˈe, no te aha e mea faufaa e e ohipa ru ta tatou pororaa i teie nei mahana?

[Tumu parau tarenihia/Hohoˈa i te api 24]

A TAPAO I TE MAU FAAAURAA

Mataio 24:29-31 Mataio 25:31-33

I muri aˈe te haamataraa o te ati rahi, E tae mai te Tamaiti a

e haere mai te Tamaiti a te taata nei te taata nei

E haere mai ma te hanahana rahi E tae mai na roto i te

hanahana e e parahi i

nia i to ˈna terono

hanahana

Tei pihai iho te mau melahi ia ˈna E tae te mau melahi e o

ˈna

E ite te mau nunaa atoa E putuputu te mau nunaa

o te fenua ia ˈna atoa; e haavahia te mau

puaaniho i te pae hopea

(e hope te ati rahi)

[Faaiteraa i te tumu]

Garo Nalbandian