Ua farii oia i te aratairaa a te Atua

AHIRI e e anihia oe e haapao i te hoê tamarii tia roa e te titauhia ra oe e haapii maitai ia ˈna. Auê ïa hopoia fifi rahi e! E nahea râ te hoê taata hara? Ia farii ïa oia i te aratairaa a te Atua ma te faaohipa i te reira i te mau mahana atoa o te oraraa.

Ua na reira mau â o Iosepha, oia te metua tane i faaamu ia Iesu. Taa ê atu i te mau parau rii atoa a te mau tutuu no nia ia Iosepha, e mea iti roa ta te Bibilia e faaite ra no nia i to ˈna tiaraa haehaa i to Iesu vai-tamariirii-raa ra. Ua ite tatou e ua haapao o Iosepha e ta ˈna vahine o Maria ia Iesu, e e maha atu â hoi tamaroa, e te tahi atoa mau tamahine.—Mareko 6:3.

No roto mai o Iosepha i te huaai a te Arii Iseraela o Davida na roto ia Solomona. Oia te tamaiti a Iakoba e te hunoa tane a Heli. (Mataio 1:16; Luka 3:23) Ei tamuta i te oire no Nazareta i Galilea, e taata veve o Iosepha. (Mataio 13:55; Luka 2:4, 24; a faaau e te Levitiko 12:8.) Ua taoˈahia ra oia i te pae varua. (Maseli 10:22) Mea papu no te mea ua farii oia i te aratairaa a te Atua.

Ma te feaa ore, e ati Iuda mǎrû e te haehaa o Iosepha o tei tiaturi i te Atua ma te hinaaro e rave i te mea maitai. Te faaite ra te mau tupuraa rii no to ˈna oraraa i faatiahia i roto i te mau Papai e ua auraro tamau oia i te mau faaueraa a Iehova. Noa ˈtu e no roto mai te reira i te Ture aore ra ua parau-roa-hia ˈtu ia Iosepha iho e te mau melahi.

Te hoê taata parau-tia e to ˈna mau fifi

Eaha te tia i te hoê taata paieti ia rave ia faaruru anaˈe o ˈna i te hoê fifi rahi? E tia iho â ia ˈna ia ‘tuu i ta ˈna hopoia i nia ia Iehova’ e ia pee i te aratairaa a te Atua! (Salamo 55:22) Ua na reira mau o Iosepha. Ua momoˈahia o Maria ia ˈna, “aore râ raua i apiti i hapu ai oia i te [varua moˈa].” No te mea “e taata parau-tia” o Iosepha “aore i hinaaro i te faaite hua ia ˈna; manaˈo aˈera râ e haapae huna noa ia ˈna.” I muri iho i to ˈna feruri-noa-raa i taua mau mea nei, ua fa maira te melahi a Iehova ma te faaheitaoto ia ˈna e na ô maira: “E Iosepha a Davida ra, eiaha e mǎtaˈu i to vahine ra ia Maria ia aratai mai i te utuafare, no te [varua moˈa] hoi i hapu ai oia. E te tamaiti ta ˈna e fanau, o ta oe ïa e topa ˈtu ia IESU; e faaora hoi oia i to ˈna taata i ta ratou hara.” Ara aˈera o Iosepha “haapao atura i ta te melahi a te Fatu i parau mai ia ˈna ra, tii atura e aratai mai i tana vahine. Aita râ i rave atu e fanau noa maira ta ˈna tamaiti matahiapo ra, topa ˈtura oia i to ˈna iˈoa o IESU.” (Mataio 1:18-25) Ua farii o Iosepha i te aratairaa a te Atua.

Ua faaue o Kaisara Auguso e ia haere te taata e papai i to ratou iˈoa i roto i to ratou oire tumu. Ma te auraro i te reira, haere atura o Iosepha e o Maria i Betelehema i Iudea. I reira fanau atura o Maria ia Iesu ma te tuu atu ia ˈna i roto i te vairaa maa a te animala no te mea aita e faaearaa vata faahou. I taua po ra, ua haere maira te mau tiai mamoe tei faaroo i te poroi a te melahi e hiˈo i te aiû. Fatata e 40 mahana i muri iho, ua auraro o Iosepha e o Maria i te Ture ma te hopoi ia Iesu i te hiero i Ierusalema e ta raua atoa tusia. Ua maere raua toopiti i te faarooraa ˈtu i te mau parau tohu a te taata ruhiruhia o Simeona no nia i te mau ohipa faufaa rahi ta Iesu e rave.—Luka 2:1-33; a faaau e te Levitiko 12:2-4, 6-8.

Noa ˈtu e te faaite ra te Luka 2:39 e ua haere o Iosepha e o Maria i Nazareta i muri noa iho i to raua hopoiraa ia Iesu i te hiero, e tuhaa hoi teie papai no te hoê faatiaraa i haapotohia. Ua itehia maa taime huru maoro i muri iho i te faaiteraa i te hiero, e ua haere mai te feia hiˈo fetia (Magoi) e hiˈo ia Maria e ia Iesu i roto i te hoê fare i Betelehema. Auaa te faaararaa a te Atua i ore ai teie farereiraa i hope na roto i te pohe o Iesu. I te revaraa te feia hiˈo fetia, ua fa maira te hoê melahi ma te faaheitaoto ia Iosepha e ua na ô oia e: “E imi hoi Heroda i te tamaiti iti na e taparahi.” Mai tei matauhia ua pee Iosepha i te aratairaa a te Atua ma te reva e to ˈna utuafare i Aiphiti.—Mataio 2:1-14.

I te poheraa o Heroda, ua fa maira te hoê melahi ia Iosepha i Aiphiti ma te faaheitaoto ia ˈna, na ô atura: “A tia, a rave i te tamaiti iti e te metua vahine, a hoˈi i te fenua o Iseraela.” I to ˈna faarooraa e te arii ra o Arehelau te tamaiti a Heroda i nia i te parahiraa a to ˈna metua tane, mǎtaˈu aˈera Iosepha e hoˈi i Iudea. Ma te pee i te faaararaa a te Atua ma te faaheitaotohia, ua haere oia i te pae au o Galilea e ua faaea i roto i te oire o Nazareta.—Mataio 2:15-23.

Te hoê taata paari i te pae varua

Ua faanaho o Iosepha i te mau mea ia nehenehe to ˈna utuafare e auraro i te ture a te Atua e ia faaamuhia ratou i te pae varua. I te mau matahiti atoa ua rave oia i ta ˈna utuafare taatoa na muri iho ia ˈna no te oroa Pasa i Ierusalema. I te hoê o taua mau tere ra, te hoˈi ra o Iosepha e o Maria i Nazareta e ua ratere i te hoê atearaa hoê mahana i te haerea i to raua iteraa e aore o Iesu e 12 matahiti hoi te paari, i reira. Hoˈi atura raua i Ierusalema, ma te imi maite ia ˈna e i te pae hopea ua ite raua ia ˈna i roto i te hiero, ma te faaroo e ma te ui atu i te mau orometua.—Luka 2:41-50.

E au ra e e vaiiho o Iosepha i ta ˈna vahine ia rave i te tahi mau mea mai ta ˈna e hinaaro. Ei hiˈoraa, i to raua hoˈiraa ˈtu i Ierusalema e i to raua iteraa ˈtu ia Iesu i roto i te hiero, o Maria tei parau atu i ta ˈna tamaiti iti no nia i te ohipa i tupu. (Luka 2:48, 49) I to ˈna paariraa mai ei “tamaiti a te tamuta,” ua haapiihia o Iesu i te pae varua. Ua haapii atoa o Iosepha i te toroa tamuta ia Iesu, no reira oia i piihia ˈi “te tamuta, te tamaiti a Maria.” (Mataio 13:55; Mareko 6:3) E tia i te mau metua paieti no teie tau ia haafaufaa i te mau tupuraa mai te reira te huru no te haapii atu i ta ratou mau tamarii, ma te faaineine taa ê atu ia ratou i te pae varua.—Ephesia 6:4; Timoteo 2, 1:5; 3:14-16.

To mua ia Iosepha

Aita rea e parau e vai ra i roto i te mau Papai no nia i te pohe o Iosepha. E tia râ ia tapaohia e i roto i te Mareko 6:3 te piihia ra Iesu “te tamaiti a Maria,” eiaha râ a Iosepha. Te faaite ra te reira e ua pohe ïa o Iosepha. Hau atu â, ahiri e te ora noa ra o Iosepha e tae noa ˈtu i te matahiti 33 o to tatou nei tau, eita ïa o Iesu tei patǐtǐhia i nia i te pou e ani i te aposetolo Ioane e haapao ia Maria.—Ioane 19:26, 27.

Tei rotopu ïa o Iosepha i te feia pohe e faaroo i te reo a te Tamaiti a te taata e o te tia faahou mai. (Ioane 5:28, 29) Ma te haapii i te mau haamaitairaa ta Iehova i faaherehere no nia i te ora mure ore, ma te feaa ore e haafaufaa o Iosepha i te reira ma te oaoa e e riro mai oia ei taata auraro i te Arii rahi ra o Iesu Mesia i nia i te raˈi, mai ta ˈna atoa i pee i te aratairaa a te Atua e 1 900 matahiti i teie nei.

[Hohoˈa i te api 31]

Ua haapii o Iosepha ia Iesu i te pae varua e ua haapii atoa ia ˈna i te toroa tamuta