Ua hapû Maria, aita râ i faaipoipo

A haamanaˈo e i faaea na Maria i ǒ Elisabeta to ˈna fetii i te tuhaa fenua mouˈa no Iudea i te pae apatoa, i na toru avaˈe matamua i hapû ai oia. A maha ˈtura avaˈe to ˈna. Ua hoˈi oia i to ˈna fare i Nazareta. E ite oioi te taata e ua hapû oia. Eaha paha oia i te haapeapea!

Hau atu â, ua momoˈahia Maria i te hoê tamuta no Nazareta o Iosepha te iˈoa. E ua ite oia e ia au i te ture a te Atua ia Iseraela, e pehihia te hoê vahine momoˈahia o te taoto i te tahi atu tane. (Deuteronomi 22:23, 24) No reira, noa ˈtu e aita Maria i taoto i te tahi atu tane, ua feruri paha oia e nafea o ˈna e faataa ˈi ia Iosepha mea nafea o ˈna i te hapûraa e eaha te tupu.

E toru hoi avaˈe to Maria faaearaa i ǒ Elisabeta. Papu roa ïa e te tiai ru ra Iosepha i te ite ia ˈna. I to raua farereiraa, ua faaite iho â Maria ia ˈna e ua hapû oia, a faataa maitai atu ai e maoti te varua moˈa o te Atua i hapû ai oia. Tera noa râ, mea fifi roa no Iosepha ia taa i te reira e ia tiaturi.

Ua ite Iosepha e e vahine maitai Maria e e roo maitai roa to ˈna. E mea here roa na ˈna ia Maria. Noa ˈtu râ ta Maria parau, e au ra e no Iosepha ua taoto Maria i te tahi atu tane i hapû ai oia. Aita Iosepha i hinaaro ia pehihia Maria i te ofai aore ra e faahaama ia Maria. Opua ihora oia e faataa huna noa ia raua. I tera tau, e hiˈohia te feia momoˈahia ei feia faaipoipohia, e e titauhia te hoê parau faataaraa e mutu ai taua taatiraa ra.

Feruri ihora Iosepha i taua mau parau ra e taoto ihora. Fa maira ta Iehova melahi ia ˈna na roto i te moemoeâ e na ô maira: “Eiaha oe e mǎtaˈu i te faaipoipo ia Maria [“i te rave i to vahine ia Maria i ǒ oe,” nota i raro i te api], maoti hoi te varua moˈa i hapû ai oia. E fanau oia i te hoê tamaiti e ia topa oe i to ˈna iˈoa o Iesu, e faaora hoi oia i te taata i ta ratou hara.”—Mataio 1:20, 21.

I to Iosepha araraa mai, mauruuru roa ihora oia i te taa-maitai-raa i te tupuraa! Ma te haamarirau ore, rave ihora oia ia Maria i ǒ ˈna, mai ta te melahi i faaue ia ˈna. E oroa faaipoiporaa teie ohipa ei faaiteraa i te taata e ua faaipoipo Iosepha raua Maria. Tera râ, aita Iosepha i taoto ia Maria a hapû ai oia ia Iesu.

Tau avaˈe i muri aˈe, ua titauhia ia faaineine Iosepha e o Maria ua rahi roa hoi to ˈna opu, i te faarue i to raua fare i Nazareta. Ihea ïa to raua haereraa ua fatata hoi Maria i te fanau?