Te Bibilia—E buka te tia ia taahia to ˈna auraa

TE TIATURI nei te tahi mau taata e o te Bibilia te Parau iho a te Atua o te tia ia apeehia mai tei papaihia. No te tahi atu pae, “ua rau te auraa o te poroi o te Bibilia.” O te parau ïa o na 12 melo apooraa faaroo e haapiiraa no te haapaoraa porotetani i Kanada. Te manaˈo ra te tia faatere haapaoraa o Clifford Elliott no te Amuitahiraa o te mau Ekalesia e no te vetahi pae “ua riro te Bibilia ei mea papu ore, haaputapû ore, e te tano ore.”

E faatupu teie mau huru hiˈoraa i te mau uiraa tano maitai te tia ia pahonohia ˈtu. Teie ïa te mau uiraa faufaa, no te aha te Bibilia i papaihia ˈi? E mea fifi roa anei ia tatara e ia taa i te reira? E nehenehe noa anei te taata e taa i te reira? Eaha te tauturu hinaarohia ia ite te hoê taata i te auraa o te mau Papai? E no te aha e mea faufaa roa te hoê ite papu o te Bibilia i teie nei tau arepurepu?

No te aha te Bibilia i papaihia ˈi?

E titauraa matamua iho â te haapiiraa i te Parau a te Atua no te feia o tei haamaitaihia e o tei auhia mai e te Atua ra o Iehova, Tei Teitei roa ˈˈe. Ua faauehia te arii, te tahuˈa, te tane, te vahine, e te tamarii—ona e te veve atoa—ia faaherehere i te taime e pau i te mau ohipa no te oraraa o te mahana taitahi ia haapao maitai ma te paieti i te Parau a te Atua i papaihia ra.—Deuteronomi 6:6, 7; 17:18-20; 31:9-12; Nehemia 8:8; Salamo 1:1, 2; 119:7-11, 72, 98-100, 104, 142; Maseli 3:13-18.

Ei hiˈoraa, ua anihia Iosua e: “Ia papu ia oe e te taio-noa-hia ra te buka o te Ture i to haamoriraa. A tuatapapa i te reira i te po e te ao, e ia auraro maite oe i te mau mea atoa i papaihia i roto. I reira oe e maitai ai e e manuïa ˈi.” (Iosua 1:8, Today’s English Version) Ia tuatapapa-maite-hia e ia faaohipahia mai teie huru te Ture a te Atua e manuïa ˈi e e oaoa ˈi. Ua opua atea o Iehova e eita noa “te taata atoa” e taa i te auraa o ta ˈna Parau, te Bibilia, e auraro atoa râ ratou i te reira, ma te tiaturi e e noaa ia ratou te ô o te ora.—Timoteo 1, 2:3, 4; Ioane 17:3.

E mea fifi roa anei ia taa i te Bibilia?

Hou Iesu a haere ai i nia i te raˈi, ua faaite papu e te hinaaro ra o ˈna ia vai tamau noa te hoê porotarama rahi haapiiraa Bibilia na te fenua taatoa nei. (Ohipa 1:8) Ua ite oia e e tia ia taahia te auraa o te Bibilia. I muri aˈe i to ˈna faataaraa e ua horoa mai Iehova i te mana taatoa i te raˈi e te fenua atoa no ˈna, ua horoa ˈtura oia i te faaueraa e: “E haere outou e faariro i te mau fenua atoa ei pǐpǐ, a bapetizo atu ai ia ratou i roto i te iˈoa o te Metua, e no te Tamaiti, e no te varua moˈa; ma te haapii atu ia ratou i te haapao i te mau mea atoa ta ˈu i parau atu ia outou na.”—Mataio 28:19, 20.

Hou te mau pǐpǐ apî e bapetizohia ˈi, e tia ia haapiihia ratou no nia ia Iehova, ta ˈna Tamaiti, e te huru ohiparaa a te varua moˈa. Hau atu, e tia ia haapiihia ratou no nia i te ture o te faanahoraa o te mau mea kerisetiano. (Korinetia 1, 9:21; Galatia 6:2) No te faahope roa, e tia i te feia au ia tiaturi e, a tahi e no ǒ mai te Bibilia ia Iehova e, a piti e e tia ia taahia to ˈna auraa.—Mataio 10:11-13.

Eaha te titauhia ra ia taa ia oe te auraa o te Bibilia? Ua tutava taa ê mau te Tamaiti a te Atua no te tatara i te auraa o te Papai. Ua papu ia ˈna e e parau mau te mau Papai Moˈa e te faaitehia ra i roto te hinaaro o Iehova. (Ioane 17:17) No nia i ta ˈna tuhaa ohipa, ua parau Iesu Mesia e: “Ua fanauhia mai au e ua haere mai au i te ao nei no teie opuaraa hoê roa, no te paraparau no nia i te parau mau. Noa ˈtu o vai te taata e no te parau mau oia, e faaroo mai ïa ia ˈu.” (Ioane 18:37, TEV; Luka 4:43) Aita Iesu i haataupupu i te haapii i te feia e aau e e feruriraa tae mau. I roto i te Luka 24:45, te parauhia ra tatou e: “Ua faaite maira oia [Iesu Mesia] i to ratou [feruriraa] ia ite ratou i te parau i papaihia ra.”

I to Iesu taviniraa ua faaite pinepine oia i te Parau i papaihia ra, ma te faataa e ma te faahiti i te mau irava e vai ra i roto “te ture a Mose, e te mau peropheta, e te salamo.” (Luka 24:27, 44) Ua putapû roa te feia tei faaroo i ta ˈna mau faataaraa no nia i te Bibilia i te huru o to ˈna ite maramarama, e to ˈna atoa aravihi i te haapii. (Mataio 7:28, 29; Mareko 1:22; Luka 4:32; 24:32) No ˈna, e mea ohie ïa ia taa i te auraa o te parau o te mau Papai.

Te Bibilia e te mau pǐpǐ a Iesu

Ua ite te aposetolo Paulo, tei pee na ia Iesu Mesia, i te faufaaraa ia haapii ia vetahi ê i te mau parau o te mau Papai. Ua ite atoa hoi oia e e tia ia taahia to ˈna auraa. No reira oia i haapii ai i te vahi taata ma te faataa papu atoa i te mau Papai i te fare o te feia e hinaaro ra e taa i to ratou auraa. Ua faaite o Paulo i to ˈna tiaraa i te na ôraa e: “Ua ite outou e aita vau i tapea i te tahi noa ˈˈe mea maitai no outou i to ˈu pororaa e i to ˈu haapiiraa i te vahi taata e i roto i to outou mau fare.” (Ohipa 20:20, TEV) I roto i ta ˈna mau paraparauraa e haaferuri oia ia au i te mau Papai, ma te faataa e ma te haapapu i to ˈna mau manaˈo ma te rave i te mau faahitiraa. (Ohipa 17:2, 3) Ua anaanatae o ˈna i te tautururaa ia vetahi ê ia taa ia ratou te auraa o te mau Papai.

Te hiaai maite ra anei outou ia taa i te mau mea i haapiihia e Iesu e ta ˈna mau pǐpǐ? (Petero 1, 2:2) Hoê â huru hinaaro to te feia no Berea i tahito ra, e ua anaanatae roa ratou i te tiaturiraa i ta te aposetolo Paulo e haapii ra ia ratou no nia i te Mesia. Itoitohia ihora ratou i te tuatapapa i te mau Papai i te mau mahana atoa ia papu maitai ïa ia ratou e parau mau iho â te parau apî maitai o ta ratou i faaroo. No te mea e feruriraa farii maitai to ratou, “e feia rahi maira to ratou i faaroo.”—Ohipa 17:11, 12.

Ia taahia te auraa o te Bibilia, ei mafatu maitai ïa, e tia ˈi, ei hinaaro aau tae mau no te haapii, e ia ‘ite i to ˈna iho hinaaro i te pae varua.’ (Mataio 5:3) I te aniraahia Iesu e: “Eaha oe i parau parabole atu ai ia ratou?” ua pahono oia e: “Ua horoahia ia outou te ite i te parau aroaro i te basileia o te ao ra, aita râ i horoahia ia ratou.” Ua tohu-atea-hia mai e ‘e parau parabole e e parau i tei ore i parauhia.’ (Mataio 13:10, 11, 35) Ua parau parabole o Iesu no te faataa ê i te taata e faaroo ra ma te tâuˈa ore e te hiˈo haere noa i te taata maimi ma te aau tae mau. Ua faaite te mau pǐpǐ a Iesu i te aau tae mau i to ratou apeeraa ia ˈna i roto i te fare ma te ani e: “A faaite mai na ia matou i te parabole o to zizania i roto i te aua ra.”—Mataio 13:36.

Mea papu maitai e e hinaaro iho â tatou i te tauturu ia taa ia tatou te auraa o te Bibilia. Ua parau te tia faatere haapaoraa o Hal Llewellyn, te papai parau no nia i te ite i te parau a te Atua, te faaroo, e te eukumene o te Amuitahiraa o te Ekalesia e: “E mea faufaa roa ia papu ia tatou nei eaha mau te auraa o te Bibilia e mea nafea ia taio e ia tatara i te reira.” Noa tu â râ e aita te taatoaraa e taa papu ra i te reira, teie te mea mau oia hoi eita tatou e taa i te auraa o te Bibilia tatou anaˈe iho. Ia tauturuhia tatou, e tia ˈi.

Eaha te tauturu e vai ra?

Te vai ra i roto i te Bibilia te tahi mau parau huru fifi, te tahi mau uiraa maere, e te tahi mau faˈiraa parau hohonu te tia ia haamaramaramahia. E opuaraa to tena mau parau aroaro, ma te rave i te mau faaauraa parau o te ore e tia ia taahia te auraa i to ratou papairaahia. E tuhaa te reira no te opuaraa a Iehova. Ei hiˈoraa, te parau ra te Apokalupo 13:18 e “te taio i te puaa nei” e “e ono hanere, e ono auhuru, e ono tiahapa.” I to te irava parauraa e “tei ǒ nei te paari,” aita ïa oia e faataa ra i te auraa o taua numera ra. Na roto râ i ta ˈna faanahonahoraa, ua faatia Iehova i to ˈna mau tavini haapao maitai ia taa ratou i to ˈna auraa i teie nei mahana. (Hiˈo i te upoo parau, “Arai ia taahia te auraa o te Bibilia.”) E roaa atoa ia oe te auraa o te parau na roto i te tauturu o te feia ite te “tia hoi i te tufa i te parau mau ra.”—Timoteo 2, 2:2, 15, 23-25; 4:2-5; Maseli 2:1-5.

Ua faaohipa Iesu i te tahi mau taime i te mau parabole no te faaite i te huru farii aore ra farii ore i te poroi o te Basileia. Ua faaite oia e eita te tahi pae e haere i mua e hiˈa ratou i te patoiraa a te mau hoa e te mau fetii. E vaiiho te tahi pae i te “[ati] e te hamani ino” ia faatopa i to ratou anaanatae i te poroi o te Basileia. E faatia te tahi pae i te mau ohipa o te oraraa no te mahana taitahi, “te titau rahi i to teie nei ao ra, te haavare o te taoˈa,” ia faaore i to ratou here matamua no te parau apî maitai. I te tahi atu pae, te vai ra tei farii ma te oaoa e o tei hinaaro e faaroo i te mau parau faufaa rahi e ia noaa ia ratou te auraa o te reira. O ratou te “autâ noa e ua pii hua, i te mau parau faufau atoa i ravehia” i roto i te amuiraa faaroo kerisetiano i te iˈoa o Iesu Mesia. Te onoono ra teie huru taata e ia haapiihia ratou i te mau eˈa o Iehova e ia taa ratou i ta ratou e taio ra i roto i te Bibilia.—Mataio 13:3-9, 18-23; Ezekiela 9:4; Isaia 2:2-4.

No te feia e hinaaro ra ia maramarama i te mau opuaraa a Iehova ratou anaˈe iho, e nehenehe Iehova e haapao i te reira e ia horoahia ˈtu te tauturu au ra. Ei hiˈoraa, te faatia ra te Bibilia e ua aratai te varua o Iehova i te taata poro evanelia o Philipi no te tauturu i te hoê taata no Etiopia e taio ra i te buka Bibilia a Isaia i to ˈna ratereraa na Ierusalema mai. I te hoˈiraa ˈtu i to ˈna fenua, te taio râ oia i te reira i nia iho i ta ˈna pereoo puaahorofenua. Ma te auraro i te aratairaa o te varua moˈa a Iehova, ua horo o Philipa na pihai iho i te pereoo ma te ui atu e: ‘Te taa ra anei ia oe te auraa o te parau o ta oe e taio ra?’ E taata haehaa oia e te haavare ore e ua faˈi oia e te hinaaro ra o ˈna i te tauturu. Ma te oaoa ua haapii o Philipa i teie taata e poiâ ra i te pae varua e o te hinaaro ra e ite. Na te haapiiraa i tauturu ia ˈna ia taa i te auraa o te mau Papai. Ua itehia ia ˈna i teie nei eaha te tia ia ˈna i te rave ia fanaˈo oia i te taairaa maitatai e o Iehova e ia noaa ia ˈna te ora mure ore. Ua riro mai oia ei tavini bapetizohia oaoa a Iehova, o te tamau i te hoê oraraa o ta te Atua i mauruuru.—Ohipa 8:26-39.

Peneiaˈe e Bibilia ta oe i te fare, e ua taio paha oe i te reira e rave rahi taime. Mea papu ua ite atoa oe i te hoê â huru fifi e te taata aau tae mau e te haehaa no Etiopia. Aita oia e taa ra i te auraa o ta ˈna e taio ra. Te hinaaro ra oia i te tauturu e aita i haataupupu i te farii i te tauturu o ta te Atua ra o Iehova i oaoa i te horoa ˈtu. Mai ia Philipa te huru, te oaoa nei te mau Ite no Iehova i te tauturu ia oe ia taa i te auraa o te mau mea no nia i te Atua tei papaihia i roto i ta ˈna Parau, te Bibilia. Ua ite ratou e ua horoa o Iehova i te Bibilia o te tia ia taahia to ˈna auraa.—Korinetia 1, 2:10; Ephesia 3:18; Petero 2, 3:16.

No te aha e mea faufaa roa te Bibilia?

Te ora ra tatou i roto i te tau ru roa ˈˈe o te aamu o te huitaata nei. Te faahiti ra te Bibilia i te reira mai “te hopea o te faanahoraa o te mau mea.” (Mataio 24:3, T.a.a.) Te faaite ra te mau tupuraa e rave rahi te ite-mata-hia ra e o te faatupu ra i te parau tohu a te Bibilia mai te matahiti 1914 mai â e i teie nei ua fatata roa ‘te mau faatereraa atoa i te parari e e pau’ i te Basileia o te raˈi a te Atua.—Daniela 2:44.

A taio na i te ohipa i tohuhia i roto i te Bibilia i te Mataio pene 24, Mareko pene 13, e Luka pene 21. E ite oe e ua tupu i te ao atoa nei te mau ohipa i faataahia. Te vai ra te mau tamaˈi rahi—taa ê roa i te tahi atu mau tamaˈi. Mai te Tamaˈi rahi matamua o te ao mai â, ua ite mata tatou i te tupuraa te oˈe, te aueueraa fenua, e te hoê tau arepurepu taa ê i tohuhia mai. E i teie nei e au ra e ua ineine roa te mau nunaa i te tuu i te hoê pii tei riro ei tapao maramarama roa e ua piri roa te haamouraa o teie nei ao. No nia i te reira, ua papai te aposetolo Paulo e: “Te haere maira taua mahana o te Fatu ra, mai te haerea mai o te eiâ i te po ra. E parau hoi te taata e, E hau, e aita e ino, ei reira ra ratou e roohia-noa-hia mai ai e te pohe oioi, . . . e e ore roa ratou e ora.” (Tesalonia 1, 5:2, 3) O vai ma te ore roa e ora? Te faataa ra o Paulo e: “Te feia aore i ite i te Atua, e tei ore e faaroo i te evanelia o to tatou Fatu o Iesu Mesia ra.” (Tesalonia 2, 1:7-9) O te feia auraro i te faaueraa i roto i te Mataio 24:14 e o te poro ra i te “evanelia o te basileia nei e ati noa ˈˈe teie nei ao” o ratou teie e faatupu ra i teie tuhaa o te tapao e rave rahi mau tupuraa.

Te haapao ra te mau mirioni Ite no Iehova i teie faaueraa i roto e 231 fenua e motu. Te haere ra ratou i te fare o te taata ma te titau manihini ia ratou ia tuatapapa i te parau no te faatereraa o te Basileia a te Atua. Ma te mǎrû te faaite ra ratou i te haerea te tia i te taata taitahi ia rave ia vai ratou i rotopu i te feia o te ora mai mai roto mai i teie faanahoraa o te mau mea e ia ora ratou i roto i te hoê paradaiso i te fenua nei ei reira e ore roa te oto, te autâ, te mauiui, e te pohe.—Apokalupo 21:3, 4.

Te piri oioi atura teie ao ino i to ˈna hopea, e e titauraa ru teie i te feia atoa e hinaaro ra e ora mai i te hopea o teie nei ao ia haapii eaha te auraa o te parau ‘e ia faaroo i te evanelia’ e ia ora mai ratou i te haamouraa. Ia haere faahou mai anaˈe te mau Ite no Iehova i to oe fare, no te aha e ore ai oe e farii i te aniraa e haapii i te Bibilia hoê taime i te hebedoma? Hau atu i te maitai, no te aha e ore ai oe e ani atu ia ratou e haapii i te Bibilia e oe no te mea te hinaaro ra oe e taa i te auraa o te Bibilia?

[Tumu parau tarenihia i te api 8]

ARAI IA TAAHIA TE AURAA O TE BIBILIA

UA HAAPAPU mai Iesu e i muri aˈe i to ˈna poheraa e to ˈna tia-faahou-raa, e faatupu oia i te hoê “tavini haapao maitai e te paari” o te faaohipahia ei arai no te faaite mai i te parau. (Mataio 24:45-47) Ua faaau te aposetolo Paulo i te mau kerisetiano no Ephesia i teie arai i to ˈna papairaa e “ia faaitehia e te ekalesia i teie nei te paari huru rau a te Atua i te hui hau e te feia mana i te ao ra; i te opua na ˈna mai te matamua mai â, ta ˈna i opua i te Mesia ra i to tatou Fatu ia Iesu.” (Ephesia 3:10, 11) O te amuiraa o te mau kerisetiano faatavaihia, fanauhia i te mahana Penetekose no te matahiti 33 o to tatou nei tau, tei horoahia te “parau moe ra.” (Deuteronomi 29:29) Ei pǔpǔ, te ohipa ra te mau kerisetiano faatavaihia ei tavini haapao maitai e te paari. (Luka 12:42-44) Ta ratou hopoia, no ǒ mai i te Atua ra, o te horoaraa ˈtu i te auraa i te pae varua o te “parau moe ra.”

Noa ˈtu â e ua huti te parau tohu o te Bibilia i te ara-maite-raa i nia i te Mesia, te aratai atoa ra te reira ia tatou i nia i te tino tahoê maitai o te mau Ite kerisetiano faatavaihia o te ohipa ra i teie nei ei tavini haapao maitai e te paari.a E tauturu te reira ia tatou ia taa i te auraa o te Parau a te Atua. Te feia atoa e hinaaro nei e taa i te auraa o te Bibilia e tia ia ratou ia mauruuru e nehenehe e itehia mai te “paari huru rau a te Atua” na roto noa i te arai a Iehova no te faaite mai i te parau, oia hoi te tavini haapao maitai e te paari.—Ioane 6:68.

[Nota i raro i te api]