Te tauturu ia taa ia tatou te Bibilia
E BUKA otahi te Bibilia. Ua parau te feia tei papai i tera buka e ua faauruahia ratou e te Atua, e te haapapu maitai ra te mau mea i papaihia i roto e e parau mau iho â. (Timoteo 2, 3:16) Taa ê atu i te tahi mau mea, te faaite ra te Bibilia nohea mai tatou, eaha te tumu o to tatou oraraa, e eaha to tatou oraraa no a muri aˈe. Papu mau e e buka tera e au ia hiˈopoa tatou!
Peneiaˈe ua tamata outou i te taio i te Bibilia e ua ite râ outou e mea paari ia taa ˈtu. Peneiaˈe aita outou i ite ihea e itea mai ai te mau pahonoraa i ta outou mau uiraa. Mai te peu e e, e ere o outou anaˈe. E au to outou huru tupuraa e to te hoê taata i ora na i te senekele matamua. Tei nia oia i te hoê pereoo mai Ierusalema mai e tere ra i to ˈna fenua tumu o Etiopia. Te taio ra teie taata toroa Etiopia ma te reo puai i te buka tohu bibilia a Isaia, tei papaihia hau atu i te 700 matahiti na mua ˈtu.
Ua aroha taue atura te hoê taata e horo ra na pihai i te pereoo, ia ˈna. O Philipa taua taata ra, e pǐpǐ na Iesu, e ua ui atura oia i te taata Etiopia e: “Te ite na oe i ta oe e taio na?” Ua pahono atura te taata Etiopia e: “Eaha vau e ite ai, ahiri e taata te faaite mai ia ˈu ra?” Ia oti, titau manihini atura oia ia Philipa ia paiuma i nia i te pereoo. Ua faataa ˈtura Philipa i te auraa o te irava ta te taata i taio e faaite atura i “te parau no Iesu” ia ˈna.—Ohipa 8:30-35.
Mai ta Philipa i tauturu i te taata Etiopia ia taa ia ˈna te Parau a te Atua mea maoro aˈenei, te tauturu ra te mau Ite no Iehova i te taata ia taa ia ratou te Bibilia i teie mahana. E oaoa ratou i te tauturu ia outou atoa. E pinepine, mea maitai aˈe e haapii ma te nahonaho i te Bibilia, i te mau haapiiraa tumu o te mau Papai na mua. (Hebera 6:1) A haere ai outou i mua, e nehenehe ta outou e rave i te mea ta te aposetolo Paulo i parau “te maa etaeta”—oia hoi, te mau parau mau hohonu aˈe. (Hebera 5:14) Noa ˈtu e o te Bibilia ta outou e haapii ra, e nehenehe te tahi atu â mau papai—te mau papai bibilia—e tauturu ia outou ia itea mai e ia taa ia outou te mau irava bibilia no nia i te mau tumu parau e rave rau.
E nehenehe noa e faanaho i te hoê haapiiraa i te hoê taime e te hoê vahi e tano ia outou. E haapii atoa vetahi pae na roto i te niuniu paraparau. Eita e faaterehia te haapiiraa i roto i te hoê piha haapiiraa; e faanahoraa taa ê teie e faatanohia i to outou huru tupuraa, tae noa ˈtu i to outou huru oraraa e to outou faito ite. Eita e titauhia ia aufau outou i taua haapiiraa bibilia ra. (Mataio 10:8) Aita e hiˈopoaraa, e eita outou e huru ê. E pahonohia ta outou mau uiraa, e e haapii outou nafea ia haafatata ˈtu i te Atua. Teie râ, no te aha e tia ˈi ia haapii outou i te Bibilia? E ite mai outou i te tahi mau tumu e nehenehe ai te hoê haapiiraa bibilia e faaoaoa ˈtu â i to outou oraraa.