Te faatia ra te feia poro i te Basileia

E puai rahi to te parau a te Atua

“E MEA ora hoi te parau a te Atua, e te puai rahi.” (Hebera 4:12) Ua haapapuhia te tanoraa o teie nei mau parau e rave rahi taime i to te mau taata o tei haavarehia e te haapaoraa hape iteraa i te parau mau o te Bibilia. Mai te faaitehia e te tupuraa i muri nei no te Repubilita Dominicaine, e nehenehe te puai o te Bibilia e taui i te oraraa o te mau taata e e horoa i te tiaturiraa.

Ua haere te mau Ite no Iehova e farerei i te hoê vahine katolika rahi e aita i maoro aˈenei ua pohe ta ˈna e piti tamarii nainai. Ua peapea roa oia e ua oto oia i te mau mahana atoa. Ua faaite te mau Ite ia ˈna eaha ta te Bibilia e parau ra i roto i te Ioane 5:28, 29 no nia i te tiaturiraa o te tia-faahou-raa. I muri aˈe e rave rahi aparauraa e te mau Ite, aita noa oia i ite i te tamahanahanaraa i roto i te tiaturiraa o te tia-faahou-raa, ua taa atoa ia ˈna e ua haavare ta ˈna mau aratai haapaoraa katolika ia ˈna.

Aita oia i tiai no te tatara i to ˈna iˈoa i roto i te Ekalesia katolika, e ua farii oia i te hoê haapiiraa bibilia tamau e te mau Ite no Iehova. Teie nei râ, aita ta ˈna tane i farii i ta ˈna huru hiˈoraa. I te mea e e katolika rahi atoa oia, ua faanaho atu oia e ia haere mai te tahi mau hoa matau-maitai-hia i te pae politita e te mau hoa i te pae faaroo e farerei i ta ˈna vahine no te tamata i te taui i ta ˈna opuaraa e no te faahoˈi ia ˈna i roto i te haapaoraa katolika. I muri iho, ua haamǎtaˈu oia e faataa ê, tae roa i te otia e ua faaara oia i to ˈna mau fetii e i te mau melo piri roa o te ekalesia e e faataa raua.

Tera râ aita ta ˈna huru raveraa i manuïa. Taa ê atu, ua haapaari hau atu â te reira e ia tamau noa oia i ta ˈna haapiiraa bibilia. No to ˈna haereraa i mua i te pae varua e to ˈna faaohiparaa i te mau huru kerisetiano maitai, ua faaoti aˈera ta ˈna tane e faaea noa raua maoti i te faataa ê. I te hoê mahana, ua farii atoa oia e hiˈopoa i te buka bibilia ta ˈna e haapii ra—teie râ te titauraa. Ua hinaaro oia e faaohipa i ta ˈna iho tatararaa bibilia katolika.

I to ˈna maere rahi, e te tauturu o te mau buka a te mau Ite no Iehova, ua haamata oia i te haapii i te ohipa apî no roto roa mai i ta ˈna iho bibilia. Ua taa ia ˈna e ua maiti ta ˈna vahine i te haerea tano, e aita i maoro ua ineine oia i te apee i to ˈna hiˈoraa. Ua ite râ oia e e tia ia ˈna ia rave i te mau tauiraa rahi i roto i to ˈna iho oraraa. Te hoê o te mau fifi rahi roa o te faaoreraa ïa i ta ˈna peu puhipuhi i te avaava. I muri aˈe i to ˈna taioraa i te A ara mai na! o te 8 no tiurai 1989, e te tumu parau i te api matamua “Te hooraa i te pohe—Ahuru ravea no te faaea i te puhipuhi i te avaava,” ua opua papu oia e faaore i taua peu e patoi ra i te mau papai. I te vahi matauhia e e tuu oia i ta ˈna puohu avaava i roto i to ˈna pute ahu, ua haamata oia i te hopoi i taua vea ra o te A ara mai na! I te mau taime atoa e hinaaro ai oia e puhipuhi i te avaava, e taio oia i te mau tumu parau no nia i te puhipuhiraa avaava. Ua manuïa te huru raveraa! I muri aˈe i to ˈna taioraa i te mau tumu parau e rave rahi taime, ua nehenehe oia e faaea i te puhipuhi i te avaava.

I teie mahana, te tavini ra te tane e te vahine ei mau tia i bapetizohia. Ia afaro anaˈe te tupuraa, e rave oia i te taviniraa taime taatoa, ma te pûpû i te rahiraa o to ˈna taime no te pororaa i te parau apî maitai o te Basileia o te Atua, e te amo ra oia i te hopoia tavini tauturu i roto i te amuiraa a te mau Ite no Iehova o taua vahi ra. Te tiai nei oia e ta ˈna vahine i te tia-faahou-raa ia nehenehe raua e farii i ta raua nau tamarii ia faatiahia mai raua i roto i te hoê ao apî. Oia mau, mea ora te parau a te Atua, te Bibilia e e puai rahi to te reira!