Te mau Ite no Iehova na te ao nei—Colombia

COLOMBIA, e fenua taa ê roa ïa no Marite Apatoa. Te haaati ra te moana Ataranitita e te moana Patitifa i te pae miti o teie mouˈa auahi parahurahu. E taui te ahuaraˈi veavea o te pae miti e te mau vahi papu no raro i te ahuaraˈi toetoe o te mau mato teitei i tapoˈihia e te hiona o te mau Andes.a

Noa ˈtu e ua tuiroo o Colombia no ta ˈna auro e ta ˈna mau semaradino, o te taata ta ˈna faufaa rahi roa ˈˈe. I teie mahana, te faaî nei Iehova i to ˈna fare i te pae varua i te hanahana. Te haere ra te feia haamori nehenehe mau, e te hinaarohia i reira, mai roto mai i te mau tuhaa atoa o te fenua nei, oia atoa i Colombia.—Hagai 2:7.

Ua putapû te mau paoti tapihoo

Ua riro te mahana sabati 1 no novema 1992 ei mahana avariraa no te amaa e te fare neneiraa apî a te Taiete Watch Tower i Facatativá, 42 kilometera i te pae apatoerau tooa o te râ no Bogotá. Ua faatupu te mau tere mataitai i te amaa i te hoê faahopearaa rahi i nia i te feia i tae mai. I to ˈna hoˈiraa i te fare neneiraa i reira o ˈna e ohipa ˈi, ua faaitoito maite te hoê taata mataitai i to ˈna mau paoti ia haere e ia hiˈopoa i te faanahonahoraa o tei riro ei mea ‘maere mau no te aravihi, te nahonaho, e te huru morare o te feia rave ohipa.’ I te pitiraa o to ratou tere mataitai, ua faaite te mau paoti i te hoê anaanatae rahi mau e ua tuu ratou e rave rahi mau uiraa.

Ua hinaaro teie mau paoti e afai atu i to ratou iho mau taata faatere, mau taata haapao, e mau taata rahi—inaha, te taatoaraa o to ratou feia rave ohipa—no te faamataitai. I te mau hebedoma atoa, ua tabula ratou e 15 tae roa ˈtu e 25 feia rave ohipa i roto i te tere mataitai e hope roa ˈtu te taatoaraa o te feia rave ohipa o taua fare neneiraa ra, e 1 300 o tei nehenehe e hiˈopoa i teie huru aravihiraa i te pae o te faanahonahoraa.

Ua mataitai tau hanere o ta ratou feia rave ohipa i te mau fare o te amaa e ua hiˈo ratou i te ripene vidéo Te mau Ite no Iehova—Te faanahonahoraa i muri mai i te iˈoa. Ma te haaputapûhia e te rahi o te faanahonahoraa e te aanoraa o te ohipa pororaa i te Basileia na roto i te ao taatoa nei, ua hitimahuta roa ratou i te mau ravea aravihi teitei faaohipahia no te faatereraa a te Taiete. I to ratou hoˈiraa, ua faaite e rave rahi o ratou i to ratou manaˈo, e au ra e, ua ‘vaiiho ratou i te Paradaiso no te hoˈi atu i roto i te hoê ao nahonaho ore.’

Te naeahia ra te mau huru taata atoa e te parau mau

Te naeahia ra te mau huru taata atoa e te parau apî maitai. (Timoteo 1, 2:3, 4) Ei hiˈoraa, ua farii te hoê taata papai himene aratai i te hoê pǔpǔ heavy-metal rock i te parau mau o te Bibilia, ua rave oia i te tahi mau tauiraa i roto i to ˈna oraraa, e ua riro i muri iho noa mai ei hoê pionie tamau. I muri aˈe ua nominohia o ˈna ei tavini tauturu. Ua haapii e rave rau mau taata tei riro na mua ˈˈe ei mau melo o te tahi mau pǔpǔ orure hau i te tuu i to ratou haapapuraa e to ratou tiaturiraa i roto i te Basileia o Iehova. I teie nei, ua faaô ratou ia ratou ma te itoito i roto i te pororaa i te poroi o te hoê ao apî e te hau.

Ua fariu atoa te feia rave i te raau taero e te feia opere i te mau raau taero opanihia e te ture i nia i te parau mau. Ua faanaho te hoê taata apî, e Ite o ˈna i teie nei, i te hoê faaapu raau taero e te hoê fare faaineineraa i te cocaïne i roto i te ururaau e pae matahiti na mua ˈˈe a faarue ai o ˈna i teie huru oraraa. Ua ite o ˈna i te oaoa na roto i te haapiiraa e te faaohiparaa i te mau faaueraa tumu a te Bibilia. I roto i te hoê fare auri, te pure nei te tahi feia taparahi taata ma te aau mehara turaihia e te hoê haapiiraa Bibilia tae mau ia faaore Iehova i ta ratou mau hara e ia farii o ˈna ia ratou mai to ˈna ra mau tavini.

No reira, o teie mau huru taata atoa ïa o te pahono ra i te poroi o te Basileia. I Colombia, mai te tahi atu mau vahi, te faaî ra o Iehova i to ˈna fare i te hanahana.

[Nota i raro i te api]

[[Tumu parau tarenihia i te api 8]

TABULA O TE FENUA

Matahiti taviniraa 1993

NUMERA RAHI ROA ˈˈE O TE FEIA PORO: 60 854

FAITO: 1 Ite no e 558

FEIA I TAE MAI I TE OROA HAAMANAˈORAA: 249 271

NUMERA AU NOA O TE MAU PIONIE: 8 487

NUMERA AU NOA O TE MAU HAAPIIRAA BIBILIA: 100 927

RAHIRAA FEIA BAPETIZOHIA: 5 183

RAHIRAA AMUIRAA: 751

AMAA: FACATATIVÁ

[Hohoˈa i te api 9]

Feia rave ohipa o te amaa e te mau mitionare i te matahiti 1956

[Hohoˈa i te api 9]

Hohoˈa o te amaa patahia na nia mai