Te faatia ra te feia poro i te Basileia
Te faatiamâraa i te pae varua i Colombia
MAI te tau mai â o te feia haru fenua Paniora, ua faaohipa te faaroo katolika i te hoê mana rahi i Marite Apatoa. I Colombia, mea maoro to ˈna riroraa ei haapaoraa na te Hau. I roto i te mau 105 matahiti i mairi aˈenei, ua fanaˈo te Vaticana i te hoê parau faaau e te hau faatere no Colombia o te paruru i te ekalesia e o te horoa ˈtu i te mau faufaa taa ê i te pae no te haapiiraa e te faaipoiporaa.
I te avaˈe titema 1990, ua maiti te nunaa no Colombia i te hoê apooraa no te haamau i te hoê pǎpǎ ture apî, o tei hope i te afaraa o te matahiti 1991. Ua taui te pǎpǎ ture apî i te huru tupuraa i te pae faaroo i Colombia. I teie nei, hoê â tiaraa to te mau haapaoraa atoa i mua i te ture, e eita te haapiiraa faaroo e nehenehe e faahepohia i te mau tamarii i te mau fare haapiiraa a te hau. E hiˈopoa-faahou-hia te parau faaau e te Vaticana ia au i teie mau tauiraa i te pae pǎpǎ ture.
E faaiti teie tiamâraa rahi aˈe i te pae faaroo i te mana o te Ekalesia Katolika, e e faaohie te reira i te feia aau mehara ia fanaˈo i te ite o te Bibilia e ia naeahia i te tiamâraa i te pae varua.
A tiai noa ˈtu ai i teie tiamâraa i te pae varua, ua faaineine te mau 51 000 Ite no Iehova o teie fenua no te haapao i te feia e imi i te haapuraa i te pae varua. Fatata roa ta ratou amaa apî tei faaaanohia, e te vai atoa ra te hoê matini neneiraa vitiviti peni rau, i te oti. Ua tonohia te mau pionie taa ê no te hoê taime i te mau oire iti no te maimi i te mau mamoe a Iehova tei moe e ua rave ratou i te hoê ohipa haapiiraa bibilia faahiahia mau. I roto e 63 oire, e 10 000 taata i te oire tataitahi, e 47 amuiraa apî e mau pǔpǔ o tei faanahohia.
A tamau noa ˈi te varua o Iehova i te turai i te feia aau mehara, e rave rahi mau taurearea o te farii maitai atoa nei. Ua riro mau â te buka Te uiui nei te mau taurearea—Mau pahonoraa ohie ei tauturu faufaa no te mau taurearea e no ta ratou mau metua. I to ˈna haereraa na te mau fare, ua farerei te hoê Ite i te hoê taata o tei taio i te tahi tuhaa o teie buka, ua horoa mai hoi te hoê taata tapiri i te hoê buka na ˈna. Ua putapû roa oia i te paari o teie buka i te pae no te tuatapaparaa i te mau fifi o te utuafare. Ua anaanatae iho â râ oia i te pene 4, “No te aha o Papa e o Mama i taa ˈi?” inaha te opua ra raua ta ˈna vahine e taa. Ua parau oia e ua faaora teie buka ia ˈna i te hoê ati rahi. I teie nei, te haapii nei oia e ta ˈna utuafare i te Bibilia e te mau Ite no Iehova e te haere nei ratou pauroa i te mau putuputuraa a te amuiraa. Te mauruuru nei ratou no te paari ta Iehova e horoa mai nei na roto i te Bibilia e ta ˈna faanahonahoraa.
Te faaite ra teie aamu i te faatiamâraa i te pae varua e itehia ra i Colombia a tauturu ai te mau Ite no Iehova i te feia e poia ra i te pae varua ia haapii i te mau opuaraa faahiahia mau a Iehova e ta ˈna ao apî, tei fatata roa mai.—Petero 2, 3:13.