Te ite ra te feia i faatuitehia no Gileada “i te oaoa hau aˈe ia horoa ˈtu”
I TE sabati 6 no mati 1994, ua haaputuputu te fetii o te Betela o te pu rahi a te mau Ite no Iehova e te mau taata i titau-manihini-hia no te hoê oroa—te faatuiteraa i te pǔpǔ 96 o te Haapiiraa Bibilia a te Watchtower no Gileada. I roto i ta ˈna mau parau omuaraa, ua parau te peretiteni o te porotarama ra o Karl F. Klein, o tei tavini i te Tino Aratai a te mau Ite no Iehova fatata e piti ahuru matahiti, i na 46 feia i haapiihia e: “Ua parau o Iesu e mea maitai i te horoa ˈtu i te rave mai. Tera ïa o te itehia i roto i te tuhaa mitionare i haapaohia no outou—hau a horoa ˈi outou, e hau atoa to outou oaoa.”—Ohipa 20:35.
Te tahi mau faaararaa hopea
Ua faahitihia i muri iho e rave rahi mau oreroraa parau no te feia i haapiihia. Ua vauvau o Leon Weaver, te hoê melo o te Tomite o te Taviniraa, i te tumu parau “E faahanahana te faaoromai ia Iehova.” Te faaruru nei tatou pauroa i te mau tamataraa. (Korinetia 2, 6:3-5) “I raro aˈe tatou i te faateimaharaa,” ta te taeae Weaver ïa i faataa, “mea ohie roa hoi ia turui i nia ia tatou iho.” Teie râ, ua faahaamanaˈo o ˈna i te feia i haapiihia e: “Noa ˈtu eaha te mau faateimaharaa matauhia o te tia ia outou ia faaruru, te anaanatae ra o Iehova i te reira. E ore roa o ˈna e vaiiho noa ia outou ia ati, maori râ o te tia ia outou ia faaoromai.”—Korinetia 1, 10:13.
“A haafaufaa noa i te tuhaa i haapaohia no outou” tera ïa te upoo parau o te oreroraa parau i muri iho, i horoahia e Lyman Swingle no te Tino Aratai. Aita te mau ati Iseraela i maiti noa ihea roa ratou e ora ˈi e eaha ta ratou e hinaaro e rave. Ua faataahia no te mau opu tataitahi i te hoê tuhaa fenua, e ua horoahia i te mau ati Levi i te mau hopoia taa maitai tei tia ia ratou ia rave. Oia atoa, aita e rave rahi i roto i te taviniraa taime taatoa i teie mahana—mai te mau mitionare e te mau melo o te fetii no te Betela—e faaoti no ratou iho ihea ratou e ora ˈi e eaha te ohipa ta ratou e hinaaro e rave. Eaha ïa mai te peu e e tupu te mau manaˈo feaa no nia i te vahi e tonohia? “Mai te peu e e tiatonu maite to outou mata i nia i te Tumu o to outou faaroo ra o Iesu, e e haapao maite i to ˈna hiˈoraa, eita outou e faarue,” ta te taeae Swingle ïa i parau.—Hebera 12:2, 3.
Ua paraparau mai i muri iho o Leonard Pearson, no te Tomite a te Fare faaapuraa e faaamuraa animala a te Watchtower, i nia i te tumu parau “A hiˈo noa i te hoê anaˈe ohipa.” Ua parau oia e: “Te vai ra paha ia outou i te pata hohoˈa faahiahia roa ˈˈe, te hoê vahi nehenehe roa ˈˈe no te pata, te hoê huru tupuraa nahonaho maitai, e e vai noa râ outou ei hoê taata pata hohoˈa faahiahia ore—mai te peu e aita ta outou pata hohoˈa i haamauhia i te hoê noa vahi.” Mai te hiˈo aano o te hoê pata hohoˈa, e tia ia faaô i roto i ta tatou hiˈoraa te ohipa pororaa na te ao nei. Eita roa tatou e haamoe i te hohoˈa rahi. “Eita te feia o te tuu ra i te tapao i nia ia ratou iho e oaoa i roto i te tuhaa i haapaohia no ratou,” ta te taeae Pearson ïa i parau. “E manuïa te feia e haamau ra i to ratou feruriraa i nia ia Iehova e i nia i te ohipa o ta ˈna i horoa no ratou ia rave.”
“E rave rahi tumu no te mauruuru” i te upoo parau ïa o te oreroraa parau i muri iho, horoahia e John E. Barr, te tahi atu melo o te Tino Aratai. “Eiaha roa e haamoe i to outou mauruuru ia Iehova,” ta te taeae Barr ïa i aˈo atu i te feia i haapiihia. “E riro te reira ei hoê o te mau tumu rahi roa ˈˈe o te oaoa, noa ˈtu eaha te tuhaa i haapaohia no outou.” Ua turai te mauruuru ia Davida ia papai e: “Ua mairi aˈenei to ˈu kelero i te vahi maitai; e te maitai nei au i ta ˈu nei tufaa.” (Salamo 16:6) “Te vai ra ia outou i teie huru tufaa poiherehia i roto i to outou ati-maite-raa ˈtu ia Iehova i roto i to outou oraraa,” ta te taeae Barr ïa i parau. “Eita roa o Iehova e iriti i teie taairaa e o outou a tamau noa ˈi outou i te faariro i te reira mai te hoê mea au mau o ta outou e mauruuru ra.”
O Jack Redford te orometua haapii i Gileada tei orero mai i muri iho i nia i te tumu parau “Nafea outou e faaohipa ˈi i to outou arero?” Auê ïa faahopearaa ino ta te hoê parau feruri-ore-hia e nehenehe e faatupu! (Maseli 18:21) Nafea ia haavî i te arero? “E tia ia outou ia haamataro na mua i to outou feruriraa,” ta te taeae Redford ïa i pahono, “no te mea te faaite ra te arero i te mea i roto i te feruriraa e te mafatu.” (Mataio 12:34-37) Ua horoa o Iesu i te hoê hiˈoraa maitai roa; ua faaohipa oia i to ˈna arero no te faahanahana i te iˈoa o Iehova. “Te vai ra i teie mahana i te hoê oˈe i te faarooraa i te mau parau a Iehova,” ta te taeae Redford ïa i parau i te pǔpǔ haapiiraa. “Te ite ra outou i te mau parau a Iehova. Te vai ra ia outou ‘te arero o te mau taata e haapii ra.’ No reira, a vaiiho noa i to outou arero ia arataihia e te hoê feruriraa e te hoê mafatu tei pûpû-atoa-hia no Iehova.”—Isaia 50:4.
Ua haapapuhia te faufaaraa o te pure i roto i te oreroraa parau “Te haere ra anei outou mai te huru ra e tei reira o Iehova?” Ua tapao o Ulysses Glass, te taeae papai parau o te haapiiraa, e: “Mai te peu e ua rohi te hoê metua tane no te turu i to ˈna utuafare fetii e aita râ i paraparau noa ˈˈe ia ratou e aita i faahiti noa ˈˈe i te mau tapao o te here, e faaoti maitai ïa to ˈna utuafare e te mea i turai ia ˈna ia rohi oia hoi te hoê hopoia au ore maoti i te here. O tatou atoa ïa. E ohipa paha ta tatou i roto i te taviniraa a te Atua. Mai te peu râ e eita tatou e pure, ua pûpû noa ïa tatou ia tatou no te hoê ohipa maoti no te hoê Metua here i te raˈi ra.”
Ua paraparau o Theodore Jaracz, no te Tino Aratai, i nia i te tumu parau “No te aha ua amui-atoa-hia mai i te mau nahoa rahi i te nunaa a te Atua.” I te mau matahiti atoa te amui mai ra e mau hanere tausani taata i te faanahonahoraa a Iehova. (Zekaria 8:23) Eaha te mea e haapapu ra i te mau Ite no Iehova ei nunaa a te Atua? A tahi, te farii nei ratou i te Bibilia taatoa ei Parau na te Atua. (Timoteo 2, 3:16) A piti, e tiaraa-amui-ore to ratou i te pae o te politita. (Ioane 17:16) A toru, te tamau nei ratou i te faaite i te iˈoa o te Atua. (Ioane 17:26) A maha, te faatupu nei ratou i te here faatusia. (Ioane 13:35; 15:13) E teie mau parau haapapuraa, e nehenehe tatou ma te mǎtaˈu ore e ‘faaite hua i to ˈna maitai, tei parau ia tatou i to roto i te pouri, ia tae i to ˈna ra maramarama umerehia.’—Petero 1, 2:9.
I muri aˈe i teie mau oreroraa parau putapû, ua horoahia i na 46 feia atoa i haapiihia i te mau parau tuite. Ua tonohia ratou i roto e 16 fenua o te ao nei.
Te hoê porotarama huru rau i te avatea
I te avatea, ua arataihia te hoê haapiiraa poto noa o Te Pare Tiairaa na Donald Krebs no te Tomite o te Betela. I muri iho, ua faaite te feia faatuitehia i te hoê porotarama i nia i te tumu parau “Te pii hua nei te paari i roto i te mau aroâ.” (Maseli 1:20) Ua hauti faahou ratou i te tahi mau tupuraa faahiahia mau ia ratou i poro i roto i te mau oire e te mau vahi tapihooraa tauihaa. Parau mau, te haamaitai ra o Iehova i te feia o te faaite ra i to ratou itoito atoa no te poro i te taime faanaho-ore-hia. “Mea au na ˈu ia manaˈonaˈo e mai te mau tipi tatou i roto i te rima o te mau melahi ooti,” ta te hoê ïa taata faatuitehia i parau. “Te haamaitairaa i to tatou aravihi, te ohipa hau ïa ta taua mau melahi ra e nehenehe e faaohipa ia tatou no te rave.” (Faaau e te Apokalupo 14:6.) Ua faaô atoa te porotarama haapiiraa i te hoê pataraa hohoˈa o tei faaite i te feia e mataitai ra i te hoê tere haapiiraa i Bolivia, Malta, e Taiwan—e toru o te mau fenua i reira te feia faatuitehia no teie pǔpǔ e tonohia.
I muri iho, ua uiuihia te manaˈo o Wallace e o Jane Liverance—e mau mitionare a 17 matahiti i teie nei. I atopa 1993, ua titau-manihini-hia raua i te Fare faaapuraa e faaamuraa animala a te Watchtower, i reira te taeae Liverance e tavini ai i teie nei mai te hoê o te mau orometua haapii i Gileada.
Ua tupu i muri iho e maha tuhaa hautiraa taata ora, i nia i te tumu parau “A faatura te feia e au i te tura i roto i to ratou ruhiruhiaraa.” Ia ruau te mau taata, e aatiatihia paha ratou e te mǎtaˈu ia riro ei mea faufaa ore e ia faaruehia ratou i to ratou tiaturiraa ia ratou iho. (Salamo 71:9) Ua faaite teie hautiraa putapû nafea te taata atoa i roto i te amuiraa e nehenehe ai e turu i teie feia ruhiruhia haapao maitai.
I muri aˈe i te hoê himene e te hoê pure faaotiraa, ua tamǎrû-roa-hia te mau 6 220 taata atoa i tae mai i te Piha Tairururaa o te Oire no Jersey e te mau piha i pihai iho. Ua faatae tatou i ta tatou mau pure i te feia faatuitehia i roto i te mau tuhaa haapaohia na ratou. Ia tamau noa ratou i te faatupu i te oaoa hau aˈe na roto i te horoaraa ˈtu.
[Tumu parau tarenihia i te api 26]
Te faito o te pǔpǔ
Rahiraa fenua i tiahia mai: 9
Rahiraa fenua e terehia ˈtu: 16
Rahiraa feia i haapiihia: 46
Faito matahiti au noa: 33,85
Faito matahiti au noa i roto i te parau mau: 16,6
Faito matahiti au noa i roto i te taviniraa taime taatoa: 12,2
[Tumu parau tarenihia i te api 27]
Te horoahia ra i te hoê ara-maite-raa taa ê i Malta
UA OPANI te amuiraa faaroo kerisetiano i te parau mau o te Bibilia i Malta e rave rahi matahiti. Ua faatuitehia te mau mitionare hopea tei tonohia i reira, o Frederick Smedley e o Peter Bridle, i te pǔpǔ vau no Gileada i te matahiti 1947. Teie râ, ua tapeahia e ua tiavaruhia raua mai Malta mai i muri noa ˈˈe i to raua taeraa ˈtu. Te faatia ra te Buka matahiti a te mau Ite no Iehova 1948 e: “Ua tuea te taime o nau piti mitionare i mua i te haavaraa e te feia mana toroa o te fenua i te taime ta raua i rave i roto i ta raua mau hopoia taviniraa, no te patoiraa noa a te Upoo faatere a te Ekalesia Roma Katolika. Te parau ra te mau perepitero e na te mau katolika te fenua Malta e e tia i te mau taata ê atu ia haere i rapae.” I teie nei, tau 45 matahiti i muri iho, ua tonohia e maha mitionare no te pǔpǔ 96 no Gileada i Malta.
[Hohoˈa i te api 26]
Te pǔpǔ 96 i faatuitehia a te Haapiiraa Bibilia Watchtower no Gileada
I roto i te tabula i muri nei, ua numerahia te mau anairaa taata mai mua mai e haere atu ai i muri, e ua tapaohia te mau iˈoa na te pae aui mai te haamataraa e haere atu ai i te pae atau no te anairaa taitahi.
(1) Ehlers, P.; Giese, M.; Sellman, S.; Zusperregui, J.; Rowe, S.; Jackson, K.; Scott, T. (2) Liehr, T.; Garcia, I.; Garcia, J.; Fernández, A.; Davidson, L.; Liidemann, P.; Gibson, L.; Juárez, C. (3) Fouts, C.; Pastrana, G.; Claeson, D.; Fernández, L.; Walls, M.; Dressen, M.; Pastrana, F.; Burks, J. (4) Burks, D.; Scott, S.; Jackson, M.; Mauray, H.; Juárez, L.; Zusperregui, A.; Brorsson, C.; Rowe, C. (5) Sellman, K.; Liidemann, P.; Davidson, C.; Mauray, S.; Walls, D.; Dressen, D.; Schaafsma, G.; Liehr, S. (6) Claeson, T.; Gibson, T.; Giese, C.; Ehlers, D.; Fouts, R.; Schaafsma, S.; Brorsson, L.