Te faatia ra te feia poro i te Basileia

Eita te Atua e haapao i te huru o te taata

HAU atu i te 1 900 matahiti i teie nei, ua faaite atu te aposetolo Petero i te raatira a te nuu ra o Korenelio e: “Ua ite mau atura vau e ore te Atua e haapao i te huru o te taata. O tei mǎtaˈu ra ia ˈna, e o tei rave i te parau-tia i te mau fenua atoa ra, o te itehia mai ïa e ana.” (Ohipa 10:34, 35) Ua faaite o Korenelio i te mǎtaˈu i te Atua e te here i te parau-tia. Ua farii oia i te faaiteraa i horoahia e Petero e ua riro maira oia ei kerisetiano.

E parau mau atoa te reira i teie mahana—eita te Atua e haapao i te huru o te taata. E tapao mai tatou i te reira i roto i teie faatiaraa no Helemani mai. Te na ô ra te faatiaraa e:

“I roto i te tuhaa fenua a ta matou amuiraa, te vai ra te hoê aua faehau Rusia rahi. I te matahiti 1989, i muri iti noa ˈˈe i te toparaa o te Patu no Berlin, ua ani te mau matahiapo mai te peu e ua ite anei te tahi taata poro i te paraparau i te reo Rusia. Ua ite vetahi i rotopu ia matou, e ua haere atura matou e poro i roto i taua tuhaa fenua ra, e ua riro mau â ei oaoaraa rahi. Teie hoê o te mau ohipa e rave rahi i farereihia e matou.

“Tei na muri iho vau i te hoê taata poro bapetizo-ore-hia (o tei bapetizohia râ i teie nei) i to ˈu paraparauraa i te hoê raatira a te nuu. Ua faaroo mai teie raatira i ta mâua parau e ua titau maira oia ia mâua ia paraparau i ta ˈna mau faehau. Ua parau oia e e tia atoa ia ratou ia faaroo i te parau no te Atua e te Bibilia, e ua faataa ˈtura matou i te hoê taime farereiraa no te hoˈi faahou mai.

“Ua ani mâua i te hoê tuahine e mea ite roa o ˈna i te paraparau Rusia ia haere mai na muri iho ia mâua ei auvaha. I te vahi farereiraa o te aua faehau, ua faaineine matou i te hoê amuraa maa apaparaa i te mau buka e ua nehenehe matou e paraparau i mua e 68 faehau e e pahono i ta ratou mau uiraa. I muri aˈe, ua farii popou ratou e 35 buka e fatata e 100 vea. I to matou faarueraa i te vahi farereiraa, ua ite matou i te mau pǔpǔ iti e tauaparau ra no nia i te mau buka e te mau vea.

“Ua faataa matou i te hoê taime farereiraa no te hoˈi atu i te 4 no tiurai 1992. I to matou taeraa ˈtu i te hora 10:50 i te poipoi, ua parau mai te tiai i te uputa o te aua faehau, e te tiai maira te mau faehau ia matou. Ua aratai atura te hoê ofitie ia matou i roto i te vahi farereiraa, e ua ite atura matou e ua faaara te hoê vahine, o ta matou i hapono na mua ˈtu i te tahi mau buka no te fare buka, i to matou taeraa mai na roto i te tapiripiriraa i te mau parau na roto i te aua faehau. Ua horoa e toru taeae i te mau oreroraa parau poto no nia i ta tatou ohipa na te ao nei e ua faaite ratou e no te aha e nehenehe ai e tiaturi i te Bibilia. I muri iho, ua tuatapapa matou i te mau uiraa a te feia i ruru mai, ma te horoa ˈtu i te mau pahonoraa no roto i te Bibilia. Hoê o te mau uiraa oia hoi, Eaha te tiaraa o te mau Ite no Iehova i mua i te tau faehau, e te vai ra anei te mau Ite no Iehova e faehau ratou? Ua horoa te reira i te taata poro bapetizo-ore-hia o tei haere mai na muri iho ia ˈu na mua ˈtu i te ravea no te faataa i ta ˈna toroa e 25 matahiti i roto i te nuu faehau no Helemani Hitia o te râ, i te mau matahiti hopea ei raatira tapao toru a te nuu manureva. Ua faatia oia e mea nafea to ˈna iteraa no nia i te Atua e te Bibilia e i teie nei te hinaaro ra oia e riro mai ei Ite no Iehova. Ua putapû roa te mau faehau i te mea o ta ratou i faaroo. E hitu minuti i muri iho, tei roto pauroa te mau buka o ta matou i afai mai i te rima o te mau faehau, e e rave rahi o tei hinaaro i te mau Bibilia. I te hoê fare hooraa buka ua noaa mai e hitu Bibilia na roto i te reo Rusia, e ua oaoa roa te mau faehau i te horoaraahia ˈtu. Ua riro mau â ei oaoaraa mau i te horoaraa na teie feia e poia ra i te pae varua te mau haamaramaramaraa no nia i te Bibilia, e te tiaturi nei matou e e ohipa ratou ia au i te reira.”

Eita mau â te Atua e haapao i te huru o te taata. Na roto i ta ˈna Parau, te ume nei oia i te mau taata aau haavare ore noa ˈtu e o vai ra e teihea ra ratou. Te titau nei oia ia ratou ia haapii no nia ia ˈna e ta ˈna Tamaiti, o Iesu Mesia, e e rave rahi o te na reira nei noa ˈtu e eaha to ratou oraraa.—Ioane 17:3.