“O Iesu Mesia te Fatu”—Nafea e afea?
“UA PARAU atura te FATU i ta ˈu Fatu, E parahi oe i ta ˈu rima atau nei, e ia faarirohia e au to mau enemi ei taahiraa avae no oe.” Teie te huriraa o te Salamo 110:1 ia au i te Tatararaa a te Arii Iakobo. O vai “te FATU” i ǒ nei, e o vai ta ˈna e parau atura?
E pahono oioi noa te hoê huriraa papu aˈe o te papai Hebera i te uiraa matamua. “Teie te parau a Iehova i ta ˈu Fatu: . . . ” No reira, “FATU” na roto i te mau reta rarahi o te Atua mana hope ïa, o Iehova iho. Noa ˈtu e te farii ra te Tatararaa a te Arii Iakobo i te iˈoa o te Atua na roto i te faaohiparaa i te parau “FATU” e mea taa ê ïa ia “Fatu,” e ere oia te tatararaa matamua o tei anoi i teie mau tiaraa iˈoa, inaha ua faaohipa te tatararaa tahito Heleni o te Septante, i te parau “Fatu” no Iehova i roto i ta ˈna mau buka hopea. No te aha? No te mea ua mono te tiaraa iˈoa “Fatu” i te iˈoa o te Atua, na reta Hebera e maha (יהוה). Te na ô ra te taata ite ra o A. E. Garvie e: “Mea ohie aˈe e mea papu atoa ia faataa te faaohiparaa i te tiaraa iˈoa Fatu [kyʹri·os] na roto hoi i te faaohiparaa i taua tiaraa iˈoa nei i roto i te sunago ati Iuda maoti i te iˈoa o te faufaa ra o Yahveh [Iehova], ia taiohia na te mau Papai.”
Te faataa ra te Bibilia ia Iehova mai te “Fatu [Mana hope].” (Genese 15:2, 8; Ohipa 4:24; Apokalupo 6:10) Ua pii-atoa-hia oia “te Fatu [mau]” e “te Fatu o te ao atoa nei.” (Exodo 23:17; Iosua 3:13; Apokalupo 11:4) O vai ïa te tahi atu “Fatu” i roto i te Salamo 110:1, e mea nafea to ˈna fariiraahia ei “Fatu” e Iehova?
Iesu Mesia ei “Fatu”
Te piihia ra o Iesu e “Fatu” i roto i na Evanelia e maha, mea pinepine aˈe i roto i te Luka e te Ioane. I te senekele matamua o to tatou nei tau, e mea faatura e e peu maitai teie tiaraa iˈoa, e tuea noa e “Tane.” (Ioane 12:21; 20:15, Kingdom Interlinear) I roto i te Evanelia a Mareko, mea pinepine aˈe te parau “Orometua,” aore ra Rab·boʹni, i te faaohipahia no nia ia Iesu. (A faaau Mareko 10:51 e te Luka 18:41.) Oia atoa te uiraa a Saulo i nia i te purumu no Damaseko, “E te Fatu, o vai oe?” te vai atoa ra i roto teie huru aniraa ma te peu maitai. (Ohipa 9:5) Teie râ, i to te mau pǐpǐ a Iesu iteraa i to ratou Fatu, e mea papu e ua faaite to ratou faaohiparaa i te tiaraa iˈoa “Fatu” hau atu i te tahi noa faatura.
I muri noa ˈˈe i to ˈna poheraa e to ˈna tia-faahou-raa, e na mua ˈˈe râ i to ˈna revaraa ˈtu i nia i te raˈi, ua fa maira o Iesu i mua i ta ˈna mau pǐpǐ e ua horoa maira i teie faaiteraa maere mau: “O te mana atoa i te raˈi e te ao atoa nei ua pûpûhia mai tei ia ˈu anaˈe.” (Mataio 28:18) I muri iho, i te mahana Penetekose, i raro aˈe i te mana o te varua moˈa i niniihia mai, ua faahiti o Petero i te Salamo 110:1 i te na ôraa e: “E teie nei, ia ite atoa te fetii o Iseraela e, ua faariro-mau-hia oia e te Atua ei Fatu e ei Mesia, o Iesu mau nei â ta outou i faasatauro nei.” (Ohipa 2:34-36) Maoti to ˈna haapao maitai e tae noa ˈtu i te pohe haama i nia i te pou haamauiuiraa, ua faatiahia mai o Iesu e ua horoahia ˈtu i te hoê haamauruururaa teitei aˈe. Ua noaa maira ia ˈna to ˈna tiaraa fatu i nia i te raˈi.
Ua haapapu te aposetolo Paulo i te mau parau a Petero ia ˈna i papai e ua “haaparahi ihora [te Atua] ia ˈna [te Mesia] i to ˈna iho rima atau i te basileia ra i te ao; i nia ê roa i te mau arii, e te feia mana, e te puai, e te rahi, e te mau iˈoa atoa i faahitihia nei, eiaha i teie nei ao anaˈe ra, i te ao atoa râ a muri atu.” (Ephesia 1:20, 21) Tei nia aˈe te tiaraa fatu o Iesu Mesia i te tahi atu mau tiaraa fatu, e e tamau noa te reira e tae roa ˈtu i roto i te ao apî. (Timoteo 1, 6:15) Ua ‘faateitei-roa-hia’ oia e ua horoahia na ˈna “te iˈoa i hau ê roa i te mau iˈoa atoa nei” ia farii te mau taata atoa “e o Iesu Mesia te Fatu, e hanahana ˈtu te Atua Metua ra.” (Philipi 2:9-11) Ua tupu ïa te tuhaa matamua o te Salamo 110:1, e ua auraro “te mau melahi, e te feia mana, e te feia hau” i te tiaraa fatu o Iesu—Petero 1, 3:22; Hebera 8:1.
I roto i te mau Papai Hebera, e tano noa te parau ra “te Fatu o te mau fatu” i nia ia Iehova anaˈe. (Deuteronomi 10:17; Salamo 136:2, 3) Teie râ, ua parau o Petero tei faauruahia no nia ia Iesu Mesia e: “[O] Iesu Mesia (o te Fatu no te mau mea atoa ra) [aore ra, “te Fatu o tatou atoa nei,” Goodspeed].” (Ohipa 10:36) Ua riro mau â oia “ei Fatu no tei pohe e no tei ora hoi.” (Roma 14:8, 9) Te farii popou nei te mau kerisetiano ia Iesu Mesia mai to ratou Fatu e No ˈna hoi ratou, e ua ineine ratou i te faaite i to ratou auraro ia ˈna ei mau tavini no ˈna, tei hoohia mai maoti to ˈna toto faufaa rahi. E ua faatere mai o Iesu Mesia ei Arii o te mau arii e ei Fatu o te mau fatu i nia i ta ˈna amuiraa mai te Penetekose mai o te matahiti 33 o to tatou nei tau. I teie nei râ, mai te matahiti 1914 mai â, ua horoahia na ˈna te mana arii no te faatere maoti teie nei toroa e e tuuhia to ˈna mau enemi ei ‘taahiraa avae no ˈna.’ Ua tae i te taime i teie nei no ˈna no te ‘haere e mana i nia ia ratou,’ ia au maite i te Salamo 110:1, 2.—Hebera 2:5-8; Apokalupo 17:14; 19:16.
Eaha ïa te auraa o te mau parau a Iesu “ua hope roa te mau mea atoa i te pûpûhia mai e tau Metua ia ˈu nei,” tei faahitihia na mua ˈˈe i to ˈna poheraa e to ˈna tia-faahou-raa? (Mataio 11:25-27; Luka 10:21, 22) E ere teie i te hoê faaiteraa auraa rahi mai tei tuatapapahia iho nei. I roto i na buka a Mataio e o Luka, te faaite ra te mau irava tapiri e te paraparau ra o Iesu no nia i te ite hunahia i te feia paari o teie nei ao, o tei faaitehia râ na roto ia ˈna no te mea ua “ite” oia i te Metua. I to ˈna bapetizoraahia i roto i te pape e to ˈna faatavairaahia ei Tamaiti varua a te Atua, ua iho faahou mai i roto ia Iesu to ˈna ite no nia i to ˈna oraraa i nia i te raˈi hou oia a riro mai ai ei taata e te ite atoa i taaihia e te reira, teie râ, e mea taa ê te reira e to ˈna tiaraa fatu no a muri aˈe.—Ioane 3:34, 35.
Te faatoroaraa ia Iesu Mesia ei Fatu
E tupu mai te fifi ia huri vetahi mau tatararaa o te mau Papai Heleni Kerisetiano i te mau faahitiraa no roto mai i te mau Papai Hebera o te pii ra i te Atua ra o Iehova e “FATU.” Ei hiˈoraa, a faaau na i te Luka 4:19 e te Isaia 61:2 i roto i te Tatararaa a te Arii Iakobo aore ra Te Bibilia no Ierusalema Apî. Te parau nei vetahi mau taata e no ǒ mai ia Iehova ra te tiaraa iˈoa “Fatu” to Iesu e, o Iesu tei riro mai ei taata ra, o Iehova mau ïa, e manaˈo noa râ teie o tei ore i turuhia e te mau Papai. E mea taa ê iho â te Atua ra o Iehova e ta ˈna Tamaiti, o Iesu Mesia, i te mau taime atoa i roto i te mau Papai. Ua faaite o Iesu i te iˈoa o to ˈna Metua e ua riro oia ei tia no ˈna.—Ioane 5:36, 37.
I roto i te mau hiˈoraa i muri nei, a tapao na i te mau faahitiraa no roto mai i te mau Papai Hebera ia au i to ratou tapaoraahia i roto i te mau Papai Heleni. Te faahitihia ra te Atua ra o Iehova e ta ˈna i Faatavai, aore ra Mesia, i roto i te Ohipa 4:24-27, e faahiti ra i te Salamo 2:1, 2. Te faahiti papu ra te tuhaa irava tapiri a te Roma 11:33, 34 i te Atua, te Pu o te paari e te ite atoa, ma te faahiti i te Isaia 40:13, 14. I to ˈna papairaa ˈtu i te amuiraa no Korinetia, ua faahiti faahou o Paulo i teie irava, “O vai hoi te ite i te aau o [Iehova] ra?” e ua parau oia i muri iho e: “Tei ia matou râ te [manaˈo] o te Mesia.” Ua faaite te Fatu ra o Iesu i ta ˈna mau pǐpǐ te manaˈo o Iehova i nia e rave rahi mau tumu parau faufaa roa.—Korinetia 1, 2:16.
I te tahi mau taime, e tano te hoê irava i roto i te mau Papai Hebera i nia ia Iehova, tera râ maoti te puai e te mana i horoahia mai No ˈna, ua tupu atoa te reira i nia ia Iesu Mesia. Ei hiˈoraa, te titau mai nei te Salamo 34:8 ia tatou ia “tamata na ia ite i te maitai o Iehova.” Tera râ, te faaau ra Petero i te reira i nia i te Fatu ra o Iesu Mesia ia ˈna i parau e: “Ua ite hoi outou e, e hamani maitai to te Fatu ra.” (Petero 1, 2:3) Te rave ra o Petero i te hoê manaˈo tumu e te faaite ra oia e nafea te reira e tano atoa ˈi no Iesu Mesia. Na roto i te raveraa i te ite o te Atua ra o Iehova e o Iesu Mesia atoa e te faaohiparaa, e nehenehe te mau kerisetiano e fanaˈo i te mau haamaitairaa faufaa rahi no ǒ mai i te Metua e ta ˈna Tamaiti atoa. (Ioane 17:3) Eita te faaauraa a Petero e faariro ra te Fatu Manahope ra o Iehova ei hoê â taata e te Fatu ra o Iesu Mesia.—A hiˈo i te nota i raro i te api no nia i te Petero 1, 2:3.
Te haapapu maitai ra te aposetolo Paulo i te mau tiaraa taa ê o te Atua ra o Iehova e ta ˈna Tamaiti, o Iesu Mesia, ia ˈna i parau e: “Area ia tatou nei hoê roa ïa Atua, o te Metua, no reira mai te mau mea atoa nei, e no ˈna hoi tatou; hoê hoi Fatu o Iesu Mesia, na ˈna te mau mea atoa nei, e na ˈna atoa hoi tatou.” (Korinetia 1, 8:6; 12:5, 6) Ia ˈna i papai atu i te amuiraa kerisetiano no Ephesia, ua haapapu o Paulo e mea taa ê roa te “hoê hoi Fatu,” o Iesu Mesia, e te “hoê Atua o te Metua o te taata atoa ra.”—Ephesia 4:5, 6.
O Iehova tei teitei aˈe i nia i te taatoaraa
Mai te matahiti 1914 mai â, ua tupu mau â te mau parau a te Apokalupo 11:15: “O te basileia ra o teie nei ao ua riro ei basileia no to tatou Fatu [te Atua ra o Iehova] e no ta ˈna ra Mesia, e e vai ïa te hau ia ˈna e a muri noa ˈtu.” Te na ô ra te hoê titionare (The New International Dictionary of New Testament Theology [Buka 2, api 514]) e: “Ia hope anaˈe te mau mana atoa i te auraro ia Iesu (Kor. 1, 15:25), e auraro atu oia iho i te Atua Metua ra. E naeahia ïa te tiaraa fatu o Iesu i ta ˈna tapao e e riro te Atua ei mau mea atoa no te mau mea atoa (Kor. 1, 15:28).” I te hopea o ta ˈna Faatereraa Tausani matahiti, e faahoˈi atu o Iesu Mesia i to ˈna Metua ra, te Atua Manahope, te puai e te mana tei horoahia mai na ˈna na mua ˈtu. No reira, e pûpûhia ˈtu te hanahana e te haamoriraa atoa ma te tia ia Iehova ra, “te Atua o to tatou Fatu ra o Iesu Mesia.”—Ephesia 1:17.
Noa ˈtu e ua riro o Iesu i teie nei ei Fatu o te mau fatu, eita roa oia e piihia e Atua o te mau atua. O Iehova noa iho â tei teitei aˈe i nia i te taatoaraa. No reira, e riro o Iehova ‘ei mau mea atoa no te mau taata atoa.’ (Korinetia 1, 15:28) Te horoa nei te tiaraa fatu o Iesu na ˈna i te parahiraa e tano no ˈna ei Upoo no te amuiraa kerisetiano. Noa ˈtu e te ite nei tatou i te mau “fatu” mana rahi i nia i te mau tiaraa teitei o teie nei ao, e tapea noa tatou i to tatou tiaturiraa i roto i te Fatu o te mau fatu. Teie râ, e auraro noa iho â o Iesu Mesia, i nia i to ˈna tiaraa teitei e te hanahana, i to ˈna Metua, “taua Atua ra o te faatere i nia i te taatoaraa.” (Korinetia 1, 15:28, The Translator’s New Testament) Auê ïa hiˈoraa maitai roa no te haehaa ta Iesu i vaiiho mai na ta ˈna mau pǐpǐ ia pee, noa ˈtu e te farii nei ratou ia ˈna ei Fatu no ratou!
[Tumu parau tarenihia i te api 30]
“Ia parau anaˈe te feia papai i te Faufaa Apî no te Atua, te manaˈo ra ratou i te Atua e te Metua o to tatou Fatu o Iesu Mesia. Ia parau anaˈe ratou no Iesu Mesia, eita ratou e faahiti ra ia ˈna, aore ra e manaˈo noa ˈˈe e o ˈna te Atua. O ˈna te Mesia a te Atua, te Tamaiti a te Atua, te Paari o te Atua, te Parau a te Atua. E tia atoa ia taiohia te Omuaraa parau a Ioane Peata, tei fatata roa ˈˈe hoi i te Haapiiraa faaroo no Nicée, ia au i te tatararaa papu maitai o te auraroraa te Mesia i te Fatu e vauvauhia ra i roto i te taatoaraa o te Evanelia; e aita te Omuaraa parau e faahiti tahaa ra i te parau aore e faataa iˈoa [the·osʹ] na roto i te reo Heleni ia faaauhia i te reo Beretane.”—“Te huru atua o Iesu Mesia,” papaihia e John Martin Creed.