E titauhia te hopoia ia ite anaˈe i te haapaoraa mau

“O tei faaroo â e ua haapao i te parau a te Atua, o ratou tei [oaoa].”—LUKA 11:28.

1. Ia ite ratou e teihea te haapaoraa mau, o vai te feia o te patu i to ratou oraraa i nia iho?

EITA noa e navai ia faataa e teihea te haapaoraa mau. Mai te peu e mea faufaa na tatou te mea tia e te parau mau, ia itea mai ia tatou te haapaoraa mau, e patu tatou i to tatou oraraa i nia ia ˈna. E ere noa te haapaoraa mau i te tahi tatararaa philosopho o te feruriraa; o te hoê huru oraraa râ.—Salamo 119:105; Isaia 2:3; a faaau e te Ohipa 9:2.

2, 3. (a) Mea nafea to Iesu haafaufaaraa i te raveraa i te hinaaro o te Atua? (b) Eaha te hopoia e vai ra i nia i te taata atoa o tei ite i te haapaoraa mau?

² Ua tuu o Iesu Mesia i te tapao i nia i te faufaaraa o te raveraa i te mea ta te Atua i faaite mai e tera to ˈna hinaaro. I to ˈna faaotiraa i te oreroraa i piihia te Aˈoraa i nia i te Mouˈa, ua faaite o Iesu e e ore te feia atoa o te parau mai ia ˈna e te Fatu (oia hoi o te parau e e kerisetiano ratou) e parahi i te Basileia; o te feia anaˈe o te rave i te hinaaro o to ˈna Metua. Area vetahi ra, o ta ˈna ïa i parau, e faaruehia ratou ei “feia rave parau ino.” No te aha e na ôhia ˈi e parau ino? No te mea, mai ta te Bibilia e faaite ra, ua riro te oreraa e rave i te hinaaro o te Atua ei hara, e te hara atoa e faahaparaa ïa i te ture [parau ino]. (Mataio 7:21-23; Ioane 1, 3:4; a faaau e te Roma 10:2, 3.) Ua ite paha te hoê taata i te haapaoraa mau, e haapopou paha oia i te feia e haapii ra i te reira, e e paraparau maitai paha oia i te feia e rave ra i teie haapaoraa, tera râ, tei ia ˈna atoa ra te hopoia e faaohipa i te reira i roto i to ˈna iho oraraa. (Iakobo 4:17) Mai te peu e e farii oia i teie hopoia, e ite oia e e maitaihia to ˈna oraraa, e e fanaˈo oia i te oaoa o te ore e noaa mai na roto i te tahi ravea ê.

³ I roto i te tumu parau na mua ˈtu, ua tuatapapa mai tatou e ono o na tapao haapapuraa i te haapaoraa mau. Eita noa teie mau tapao tataitahi e tauturu ia tatou ia ite teihea te haapaoraa mau, te tuu atoa maira ia tatou tataitahi i mua i te mau haapaiumaraa e te mau ravea. Nafea ïa?

Nafea outou ia farii i te Parau a te Atua?

4. (a) Ia haamata anaˈe te feia apî i te amuimui e te mau Ite no Iehova, eaha ta ratou e ite oioi noa ia faaohipa te mau Ite i te Bibilia? (b) Eaha te faahopearaa o te tamaa-maitai-raa i te pae varua i nia i te mau tavini a Iehova?

⁴ A haapii ai te mau Ite no Iehova i te Bibilia e te mau taata i anaanatae apî mai, e rave rahi o teie feia apî o te ite oioi noa e no roto mai te mea e haapiihia ra i te Bibilia ra. Ei pahonoraa i ta ratou mau uiraa, eita e vauvauhia mai te mau haapiiraa faaroo a te ekalesia, te mau tutuu a te taata, aore ra te mau manaˈo o te mau taata teitei. O te Parau a te Atua iho te mana. Ia haere ratou i te Piha no te Basileia, te ite nei ratou e i reira atoa, o te Bibilia te buka matamua e faaohipahia. Eita e maoro roa e taa ˈi i te feia maimi haavare ore i te parau mau e te hoê tumu rahi o te oaoa o ta ratou e ite nei i rotopu i te mau Ite no Iehova, no te mea ïa e te faaamu-maitai-hia ra ratou i te pae varua na roto i te Parau a te Atua.—Isaia 65:13, 14.

5. (a) Eaha te haapaiumaraa e vai ra i mua i te feia o te hiˈopoa nei i te mau Ite no Iehova? (b) Nafea ratou ia apiti i roto i te oaoa o te mau Ite?

⁵ Mai te peu e te farii ra outou i te reira, eaha to outou huru? Mai te peu e te taa ra ia outou i te auraa, eita ta outou e nehenehe e mataitai noa, e eita atoa outou e hinaaro e na reira. Te faaite ra te Bibilia e te feia o te ‘faaroo noa’ eita râ ‘e rave i te parau,’ ‘te haavare ra ïa ia ratou iho i te mau haaferuriraa hape.’ (Iakobo 1:22) Te haavare nei ratou ia ratou iho no te mea aita ratou e farii ra e noa ˈtu eaha ta ratou e parau, ia ore anaˈe ratou e auraro i te Atua, te faaite ra ïa ratou e aita ratou e here mau ra ia ˈna. Te taata e parau e e faaroo to ˈna aita râ e ohipa, e faaroo pohe ïa to ˈna. (Iakobo 2:18-26; Ioane 1, 5:3) Taa ê atu râ, te taata e turaihia e te here no Iehova ia riro ei taata ‘rave i te ohipa,’ ‘e oaoa ïa oia i ta ˈna raveraa.’ E, mai ta Iesu Mesia i faataa, “o tei faaroo â e ua haapao i te parau a te Atua, o ratou tei [oaoa].”—Iakobo 1:25; Luka 11:28; Ioane 13:17.

6. Mai te peu e e haafaufaa mau tatou i te Parau a te Atua, eaha te mau ravea o ta tatou iho e tutava i te faaohipa?

⁶ E rahi noa ˈtu taua oaoa ra a paari ai outou i roto i te ite i te hinaaro o te Atua e a faaohipa ˈi outou i te mau mea apî o ta outou e haapii ra. Eaha te faito o te mau tutavaraa o ta outou e horoa no te haapii i te Parau a te Atua? E mau ahuru tausani taata o tei ore i ite i te papai e i te taio, o tei rohi no te haapii i te taio, e ua na reira ratou ia nehenehe ratou e taio i te mau Papai e e haapii atu ia vetahi ê. Te tia nei vetahi i te poipoi roa ia nehenehe ratou e horoa i te tahi taime i te mau mahana atoa no te taio i te Bibilia e te mau tauturu no te haapii i te Bibilia, mai Te Pare Tiairaa. A tamau noa ˈi outou i roto i te taioraa o te Bibilia aore ra ia hiˈo outou i te mau irava faahitihia i roto i te tahi atu buka haapiiraa, a haapao maite i te mau ture e te mau faaueraa a Iehova, e a tutava i te taa i te mau faaueraa tumu e rave rahi e te reira no te aratai ia tatou. A feruri hohonu i nia i te mea ta te tuhaa tataitahi e faaite maira no nia i te Atua, ta ˈna opuaraa, e ta ˈna mau huru raveraa e te huitaata nei. A vaiiho i te taime ia tarai te reira i to outou mafatu. A hiˈopoa mai te peu e te vai ra anei te tahi mau ravea e nehenehe ai outou e faaohipa hau atu â i te mau aˈoraa a te Bibilia i roto i to outou iho oraraa.—Salamo 1:1, 2; 19:7-11; Tesalonia 1, 4:1.

Ua pûpû taatoa anei outou ia outou no Iehova?

7. (a) Mea nafea te haapiiraa o te Toru Tahi i te ohiparaa i nia i te mau tutavaraa a te taata no te haamori i te Atua? (b) Eaha te ohipa e nehenehe e tupu ia haapii anaˈe te hoê taata i te parau mau no nia ia Iehova?

⁷ E rave rahi mau mirioni taata o tei mâmâhia i to ratou iteraa e ere te Atua mau i te hoê Toru Tahi. Aita hoi te parau ra “e miterio te reira” i haamâha ia ratou. Nafea ratou ia haafatata ˈtu i te hoê Atua taa-ore-hia? Ei faahopearaa no taua haapiiraa ra, e riro ratou i te haamoe i te Metua (aita hoi ratou i faaroo aˈenei i to ˈna iˈoa i roto i te ekalesia) e i te haamori ia Iesu ei Atua aore ra i te faatae atu i ta ratou haamoriraa ia Maria ra (tei haapiihia mai hoi e o ˈna te “Metua vahine o te Atua”). Teie râ, ua farii to ratou mafatu ma te oaoa i to te hoê Ite no Iehova iritiraa i te Bibilia e to ˈna faaiteraa ia ratou e o Iehova te iˈoa o te Atua. (Salamo 83:18) No to ˈna oaoa rahi i te taime a faaitehia mai ai ia ˈna te iˈoa o te Atua, ua tauahi roa te hoê vahine no Venezuela i te taurearea vahine Ite no Iehova o tei faaite mai i taua parau mau faufaa ra ia ˈna e ua farii oia i te hoê haapiiraa bibilia i to ˈna fare. Ia haapii anaˈe teie mau taata e ua faahiti o Iesu i to ˈna Metua mai “tau Atua ra e to outou Atua ra” e ua parau atu oia i to ˈna Metua e “te Atua mau,” e taa ia ratou e e ere te mea ta te Bibilia e haapii ra no nia i te Atua i te mea taa-ore-hia. (Ioane 17:3; 20:17) Ia ite anaˈe ratou i te mau huru maitatai o Iehova, e turaihia ratou ia haafatata ˈtu ia ˈna, e haamata ratou i te pure ia ˈna, e e hinaaro ratou e faaoaoa ia ˈna. Eaha te faahopearaa?

8. (a) No to ratou here ia Iehova e to ratou hinaaro e faaoaoa ia ˈna, eaha ta te mau mirioni taata i rave? (b) No te aha e mea faufaa roa te bapetizoraa kerisetiano?

⁸ I na matahiti e hoê ahuru i mairi aˈenei, e 2 528 524 taata i nia e ono fenua rarahi e e rave rahi mau motu o tei pûpû i to ratou ora no Iehova e o tei faataipe i muri iho i teie pûpûraa na roto i te bapetizoraa i roto i te pape. Tei roto anei outou ia ratou, aore ra te faaineine ra anei outou i teie nei i te bapetizo? E taahiraa avae faufaa roa te bapetizoraa i roto i te oraraa o te mau kerisetiano mau atoa. Ua faaue Iesu i ta ˈna mau pǐpǐ ia faariro i te mau taata no te mau nunaa atoa ei pǐpǐ e ia bapetizo ia ratou. (Mataio 28:19, 20) E mea anaanatae atoa ia tapao e i muri noa ˈˈe i to Iesu iho bapetizoraa to Iehova paraparauraa mai mai nia mai i te raˈi ra, i te na ôraa e: “Tau Tamaiti here oe, ua mauruuru roa vau ia oe.”—Luka 3:21, 22.

9. No te tapea i te mau taairaa fariihia e o Iehova, eaha te titauhia ia tatou?

⁹ Te mau taairaa fariihia e o Iehova, e taoˈa te reira te tia ia poiherehia. Mai te peu e ua faatupu outou i teie huru taairaa na roto i te pûpûraa ia outou e te bapetizoraa, a ape i te mau mea atoa o te nehenehe e faaino i taua taairaa ra. Eiaha e vaiiho i te mau haapeapearaa o te oraraa e te tapitapiraa i te mau mea materia ia turai atu i te reira i te pitiraa o te parahiraa. (Timoteo 1, 6:8-12) A ora mau ia au maite i teie aˈoraa a te Maseli 3:6: “Eiaha e haamoe ia [Iehova] i to oe atoa ra mau haerea; e na ˈna e faaite ia oe i to oe ra mau haerea.”

I roto i teihea faito te here o te Mesia e ohipa ˈi i nia ia outou?

10. No te aha e ore to tatou haamoriraa ia Iehova e aratai ia tatou ia haamoe ia Iesu?

¹⁰ Oia mau, eita te fariiraa ma te tano ia Iehova ei Atua mau hoê roa, e turai i te hoê taata ia haamoe ia Iesu Mesia. Area ra, te na ô ra te Apokalupo 19:10 e: “O te parau hoi ia Iesu ra, o te varua ïa o te tohu.” Mai te Genese tae atu i te Apokalupo, te horoa maira te mau parau tohu faauruahia i te mau haamaramaramaraa no nia i te tiaraa o Iesu Mesia i roto i te opuaraa a Iehova. Ia ite maitai anaˈe te hoê taata i teie mau haamaramaramaraa atoa, e fa mai te hoê hohoˈa faahiahia mau e aita faahou te mau tano-ore-raa e te mau manaˈo haavare no roto mai i te mau haapiiraa hape a te amuiraa faaroo kerisetiano.

11. Mea nafea te iteraa eaha ta te Bibilia e haapii mau ra no nia i te Tamaiti a te Atua i te ohiparaa i nia i te hoê vahine no Polonia?

¹¹ E riro te taaraa i te parau mau no nia i te Tamaiti a te Atua i te faatupu i te hoê mana hohonu i nia i te hoê taata. O tei ohipa ïa i tupu i nia ia Danuta, te hoê vahine no Polonia. E vau matahiti to ˈna farerei-noa-raa i te mau Ite no Iehova, ua oaoa roa oia i te mea o ta ratou i haapii mai, tera râ, aita oia i faariro i te haamoriraa mau ei huru oraraa no ˈna. Ua horoahia maira te buka ra Te taata rahi roa ˈˈe i ora aˈenei, o te vauvau ra i te oraraa o te Mesia ma te ohie roa ia taa.a Mea maoro i taua po ra, ua tatara maira oia i te buka, ma te opua e taio i te hoê noa pene. Tera râ, i te aahiata roa i te otiraa ia ˈna i te taio, to ˈna vaiihoraa i te buka. Ua tahe atura to ˈna pape mata. “E Iehova e, a farii i to ˈu tatarahapa,” o ta ˈna ïa i taparu. Ei faahopearaa i te mea o ta ˈna i taio, ua papu aˈe ia ˈna i te here i faaitehia mai e Iehova e ta ˈna Tamaiti ia faaauhia i mutaa iho. Ua taa ia ˈna e e vau matahiti to ˈna fariu-ê-raa ma te mauruuru ore i te tauturu ta te Atua i faatae noa mai ia ˈna ra ma te faaoromai. I te matahiti 1993, ua bapetizohia o ˈna ei taipe no to ˈna pûpûraa ia ˈna no Iehova maoti te faaroo i roto ia Iesu Mesia.

12. Mea nafea te ite papu no nia ia Iesu Mesia ia ohipa i nia i to tatou oraraa?

¹² Ua taaihia te “ite papu o to tatou Fatu ra o Iesu Mesia” e te riroraa ei kerisetiano itoito e te faahotu. (Petero 2, 1:8) Te apiti ra outou i roto i teie ohipa i roto i teihea faito, i roto i te tufaraa i te poroi o te Basileia e o vetahi ê? E au te faito e maraa i te taata tataitahi i te mau huru tupuraa e rave rau. (Mataio 13:18-23) Te vai ra vetahi mau huru tupuraa eita ta tatou e nehenehe e taui; te vai ra vetahi oia. Eaha te mea e turai ia tatou ia faataa e ia rave i te mau tauiraa e nehenehe e ravehia? Ua papai te aposetolo Paulo e: ‘Te riro nei tatou i te here o te Mesia ra’; oia hoi, no te faahiahia o te here o ta ˈna i faaite na roto i te pûpûraa i to ˈna ora no tatou nei, inaha a rahi noa ˈi to tatou mauruuru no te reira, e putapû hohonu roa to tatou nei mafatu. Ei faahopearaa, e taa ia tatou e eita roa e tano e ia tamau noa tatou i te tapapa i te mau tapao miimii e ia ora noa tatou no te faaoaoa ia tatou iho. Maoti râ, e faatano tatou i ta tatou mau ohipa ia horoa tatou i te parahiraa matamua na te ohipa ta te Mesia i haapii i ta ˈna mau pǐpǐ ia rave.—Korinetia 2, 5:14, 15.

A faataa ê i teie nei ao—I roto i teihea faito?

13. No te aha tatou e ore e amui atu i te hoê haapaoraa o tei riro ei tuhaa no teie nei ao?

¹³ E ere i te mea fifi ia ite i te ohipa i ravehia e te amuiraa faaroo kerisetiano e te tahi atu mau haapaoraa no te mea ua hinaaro ratou e riro ei tuhaa no teie nei ao. Ua faaohipahia te mau faufaa a te ekalesia no te aufau i te mau ohipa orure hau. Ua riro mai te mau perepitero ei mau faehau tamaˈi. I te mau mahana atoa, te faahiti nei te mau vea i te parau no te mau pǔpǔ faaroo i roto e rave rau mau fenua o te aro ra i te tahi e te tahi. Ua î to ratou rima i te toto. (Isaia 1:15) Te tamau noa nei te mau upoo faatere haapaoraa na te ao nei i te tamata i te faatere i te tahua politita. Eita te feia haamori mau e apiti atu i roto i teie mau ohipa.—Iakobo 4:1-4.

14. (a) Eaha te tia ia tatou tataitahi ia ape no te faataa ê mai ia tatou i teie nei ao? (b) Eaha te nehenehe e tauturu ia tatou ia ape i te toparaa i roto i te marei o te mau haerea e te mau peu a teie nei ao?

¹⁴ E titau ra te faataa-ê-raa mai i teie nei ao hau atu i te reira. Ua tapaohia teie nei ao i te nounou moni e te mea ta te moni e nehenehe e hoo mai, te hinaaroraa i te tiaraa teitei, e te tapaparaa hopea ore i te mau mea navenave, apitihia e te mau huru mai te tâuˈa-ore-raa ia vetahi ê, te haavare e te parau ino, te orureraa i te mana, e te oreraa e faatupu i te hitahita ore. (Timoteo 2, 3:2-5; Ioane 1, 2:15, 16) No to tatou nei huru tia ore, e nehenehe tatou i te tahi mau taime e faaite i te tahi o teie mau huru i roto i te tahi faito. Eaha te nehenehe e tauturu ia tatou i roto i to tatou aroraa no te ape i teie mau marei? E tia ia tatou ia haamanaˈo e o vai to muri mai i teie mau mea. “Te vai noa nei to te ao atoa i raro aˈe i taua varua ino ra.” (Ioane 1, 5:19) Noa ˈtu eaha te faahemaraa o te tahi haerea, noa ˈtu e ehia rahiraa taata e ora ra mai te reira te huru, ia ite anaˈe tatou e o te enemi matamua o Iehova, te Diabolo ra o Satani, tei muri mai i te reira, e taa ia tatou i to ˈna hairiiri mau.—Salamo 97:10.

E tae roa to outou here i nia i teihea faito?

15. Nafea te here aore e haapao noa ia ˈna iho o ta outou i haapii i te tautururaa ia outou ia ite i te haapaoraa mau?

¹⁵ I to outou haamataraa i te amuimui atu e te mau Ite no Iehova, eita e ore e ua aratohia outou i te here e itehia ra i rotopu ia ratou no te mea e mea taa ê roa e te huru feruriraa o teie nei ao. Te faataa ê nei te faufaaraa i tuuhia i nia i te here aore e haapao ia ˈna iho i te haamoriraa viivii ore a Iehova i te tahi atu mau haamoriraa. Peneiaˈe na te reira i haapapu ia outou e o te mau Ite no Iehova mau te faaohipa ra i te haapaoraa mau. Ua parau o Iesu Mesia iho e: “O te mea teie e ite ai te taata atoa e, e pǐpǐ outou na ˈu, ia aroha outou ia outou iho.”—Ioane 13:35.

16. Eaha te mau ravea e vai nei i mua ia tatou tataitahi no te haamahora i to tatou here?

¹⁶ Te haapapu atoa ra anei teie huru maitai e e pǐpǐ outou na te Mesia? Te vai ra anei te tahi mau ravea e nehenehe ai outou e haamahora â i to outou faaiteraa i te here? Papu maitai e nehenehe hoi ta tatou paatoa. E ere noa teie here i te tahi huru auhoa i nia i te taata i te Piha no te Basileia. E mai te peu e e faaite tatou i te here i te feia anaˈe e here maira ia tatou, eaha ïa te taa-ê-raa e te feia no teie nei ao? “O te aroha, ia uˈana maite ïa ia outou outou iho,” o ta te Bibilia ïa e faaue maira. (Petero 1, 4:8) E tia ia tatou ia faaite i te here rahi atu â i nia ia vai? I nia anei i te hoê taeae aore ra tuahine kerisetiano e mea taa ê te vahi no reira mai oia i to tatou e e mea riri roa na tatou vetahi o ta ˈna mau huru raveraa? I nia anei i te hoê taata o te ore e tae tamau mai nei i te mau putuputuraa, o te maˈi te tumu aore ra te ruhiruhiaraa? I nia anei i to tatou hoa faaipoipo? Aore ra i nia paha i to tatou mau metua paari? Ua ite vetahi o tei faaohipa maitai i te mau hotu o te varua, oia atoa te here, e mai te mea e te haapii faahou ra ratou na nia iho i teie mau hotu atoa i to ratou faarururaa i te mau huru tupuraa fifi mau o te nehenehe e fa mai ia titauhia ia aupuru taatoa i te hoê fetii o tei hapepa roa. Oia mau, noa ˈtu e e farerei tatou i teie mau huru tupuraa, e tia atoa i to tatou here ia naea atu i te feia i rapaeau atu i to tatou iho utuafare.

Te faaiteraa i te Basileia—Eaha te faufaaraa no outou?

17. Mai te peu e ua maitaihia tatou iho i te mau farereiraa a te mau Ite no Iehova, eaha te turaihia ia tatou ia rave i teie nei?

¹⁷ Te hoê ravea faufaa e faaite ai tatou i te here no to tatou taata-tupu, o te faaiteraa ïa ia ratou i te Basileia o te Atua. Hoê noa pǔpǔ taata o te rave nei i teie ohipa o ta Iesu i tohu. (Mareko 13:10) O te mau Ite no Iehova ïa. Ua maitaihia tatou iho i te reira. I teie nei, tei ia tatou te hopoia taa ê e tauturu ia vetahi ê. Mai te peu e hoê â to tatou manaˈo e to te Atua i roto i teie tuhaa, e riro teie ohipa ei mea faufaa roa i roto i to tatou oraraa.

18. Nafea ta tatou taioraa i te buka Te mau Ite no Iehova—Feia poro i te Basileia (farani) ia ohipa i nia i ta tatou iho tuhaa i roto i te faaiteraa i te Basileia?

¹⁸ Te horoahia ra te faatiaraa putapû e mea nafea te poroi o te Basileia i te afairaahia i te mau vahi atea roa ˈˈe o te fenua nei i teie mau mahana hopea i roto i te buka Te mau Ite no Iehova—Feia poro i te Basileia o te Atua (farani). Mai te peu e te vai ra na roto i to outou reo, eiaha e mairi i te taio. E ia taio anaˈe outou, a tapao taa ê i te mau ravea atoa mea na reira te mau taata i te horoaraa i te hoê faaiteraa no nia i te Basileia. Te vai ra anei vetahi mau taata e nehenehe outou e pee i to ratou mau hiˈoraa? E rave rahi mau ravea e vai ra i mua ia tatou pauroa. Ia turai to tatou here ia Iehova ia faaohipa maitai tatou i teie mau ravea.

19. Nafea tatou ia maitaihia ia farii tatou i te hopoia apitihia i te iteraa i te haapaoraa mau?

¹⁹ Ia tutava anaˈe tatou i te rave i te hinaaro o Iehova, e itea mai ia tatou i te pahonoraa i te uiraa ra, Eaha te auraa o te oraraa? (Apokalupo 4:11) Eita tatou e imi haere faahou, ma te manaˈo haafaufaa ore. Aita e toroa o ta tatou e pûpû ia tatou e hopoi mai i te mauruuru rahi maoti râ to tatou tutavaraa ma to tatou mafatu atoa i te taviniraa i te Atua ra o Iehova. Auê ïa oraraa faahiahia no a muri aˈe! Te hoê oraraa mauruuru e a muri noa ˈtu i roto i ta ˈna ao apî, i reira tatou e nehenehe ai e faaohipa i to tatou mau aravihi atoa ma te au maite e te opuaraa here mau no reira te Atua i poiete ai i te huitaata nei.

[Nota i raro i te api]

Nafea outou ia pahono?

◻ No te aha e mea faufaa no te hoê haapao- raa ia farii i te Bibilia ei Parau a te Atua e ia faahanahana oia ia Iehova mai te Atua mau?

◻ Eaha ta te haapaoraa mau e haapii ra no nia i te tiaraa o Iesu ei Taata i pûpû i te hoo?

◻ No te aha te mau kerisetiano e faataa ê ai ia ratou i teie nei ao e e faaohipa ˈi i te here aore e haapao ia ˈna iho?

◻ Eaha te tuhaa o te faaiteraa i te Basileia i roto i te haapaoraa mau?

[Hohoˈa i te api 16]

Ua riro te bapetizoraa ei taahiraa avae faufaa roa i roto i te fariiraa i te mau hopoia o te haamoriraa mau. I te mau avaˈe atoa, tau 25 000 taata na te ao atoa o te rave nei i teie taahiraa avae

Rusia

Senegal

Papua Niu Guinea

Hau amui no Marite

[Hohoˈa i te api 17]

Ua riro te tufaraa i te parau mau a te Bibilia e o vetahi ê ei tuhaa no te haamoriraa mau

Hau amui no Marite

Beresilia

Hau amui no Marite

Hong Kong