Te haamoriraa ta te Atua e farii

1. Eaha ta tatou e fanaˈo mai te peu e e haamori tatou i te Atua ma te tano?

TE HAAPAO roa nei te Atua ra o Iehova ia tatou e te hinaaro nei oia ia faufaahia tatou i ta ˈna aratairaa î i te here. Mai te peu e e haamori tatou ia ˈna ma te tano, e oaoa ïa tatou e e ape tatou e rave rahi fifi i roto i te oraraa. E fanaˈo atoa tatou i ta ˈna haamaitairaa e ta ˈna tauturu. (Isaia 48:17) E mau hanere râ haapaoraa teie e parau nei e te haapii nei ratou i te parau mau no nia i te Atua. Mea ê roa râ ta ratou mau haapiiraa no nia i te Atua e ta ˈna e tiai ra ia tatou.

2. E nafea tatou e nehenehe ai e ite i te ravea tano e haamori ai ia Iehova, e eaha te hiˈoraa e tauturu ia tatou ia taa i te reira?

² E nafea outou e nehenehe ai e ite i te ravea tano e haamori ai ia Iehova? Aita e faufaa ia haapii e ia faaau outou i te mau haapiiraa a te mau haapaoraa atoa. E mea tia noa râ ia ite outou eaha ta te Bibilia e haapii mau ra no nia i te haamoriraa mau. Ei hiˈoraa: I roto e rave rahi fenua, te vai ra te moni haavare. Mai te peu e ua faauehia outou ia maimi i te moni haavare, e nafea ïa outou? E tamau aau anei outou i te mau huru moni haavare atoa? Eita ïa. E hoona aˈe to outou taime mai te peu e e haapii outou eaha te moni mau. Ua taa anaˈe ia outou mai te aha te huru o te moni mau, e nehenehe ïa outou e ite eaha te moni haavare. Oia atoa, ia haapii tatou i te ite eaha te haapaoraa mau, e nehenehe tatou e ite eaha te mau haapaoraa hape.

3. Ia au ia Iesu, e mea tia ia aha tatou ia hinaaro tatou i te farii maitai a te Atua?

³ Mea faufaa ia haamori tatou ia Iehova mai ta ˈna e farii. Mea rahi te taata e tiaturi nei e mea au na te Atua te mau haapaoraa atoa, aita râ te Bibilia e haapii nei i te reira. Eita atoa e navai ia parau noa e e Kerisetiano tatou. Ua parau Iesu e: “E ore te feia e parau mai ia ˈu ra e, E te Fatu, e te Fatu, e hope paatoa i te tae i te basileia ra o te ao, o te taata râ i haapao i te hinaaro o tau Metua i te ao ra.” No reira, ia farii te Atua ia tatou, e mea tia ia haapii tatou eaha ta ˈna e titau ra ia tatou e ia rave i te reira. Ua parau Iesu i te feia aita e rave ra i te hinaaro o te Atua ei “feia rave parau ino.” (Mataio 7:21-23) Mai te moni haavare, aita e faufaa mau to te haapaoraa hape. Te mea ino roa ˈtu, e faaino mau â tera huru haapaoraa.

4. Eaha te auraa o ta Iesu i parau no nia i na eˈa e piti, e e tae atu te eˈa taitahi ihea?

⁴ Te horoa nei Iehova na te taata atoa i te fenua nei i te ravea e noaa ˈi ia ratou te ora mure ore. No te ora râ e a muri noa ˈtu i roto i te paradaiso, e titauhia ia haamori tatou i te Atua ma te tano e ia ora i teie nei ma te auhia e ana. Te vahi peapea, mea rahi aita e hinaaro nei e na reira. No reira Iesu i parau ai e: “E tomo na te uputa pirihao; te atea nei hoi te uputa e te aano nei te eˈa e tae atu ai i te pohe; e e rave rahi tei na reira i te tomo. Te apǐapǐ râ o te uputa e te piri hoi o te eˈa e tae atu ai i te ora, e te iti hoi o te feia i ite atu i te reira!” (Mataio 7:13, 14) E aratai atu te haapaoraa mau i te ora mure ore ra. E aratai atu te haapaoraa hape i te haamouraa ra. Aita Iehova e hinaaro nei ia mou te tahi noa ˈˈe taata, e no reira oia e horoa ˈi na te taata i te mau vahi atoa i te ravea e haapii ai no nia ia ˈna. (Petero 2, 3:9) No reira, tei ta tatou huru haamoriraa i te Atua ïa to tatou ora aore ra to tatou pohe.

E NAFEA E ITEHIA ˈI TE HAAPAORAA MAU

5. E nafea tatou e nehenehe ai e ite o vai ma te faaohipa ra i te haapaoraa mau?

⁵ E nafea e itehia ˈi “te eˈa e tae atu ai i te ora”? Ua parau Iesu e e itehia te haapaoraa mau i roto i te oraraa o te taata o te faaohipa i te reira. “E ite outou ia ratou i to ratou hoturaa,” ta ˈna ïa i parau. “E faahotu mai te mau raau maitatai atoa i te huero maitai.” (Mataio 7:16, 17) Te auraa atoa, e itehia o vai ma te faaohipa ra i te haapaoraa mau maoti ta ratou mau tiaturiraa e to ratou haerea. E ere ratou i te taata tia roa e e hape na ratou, e tutava râ te feia haamori mau ei pǔpǔ i te rave i te hinaaro o te Atua. E hiˈopoa na tatou e ono tuhaa o te faaite o vai ma te faaohipa ra i te haapaoraa mau.

6, 7. Eaha te manaˈo o te mau tavini a te Atua no nia i te Bibilia, e mea nafea to Iesu horoaraa mai i te hiˈoraa i roto i taua tuhaa ra?

⁶ Te niu nei te mau tavini a te Atua i ta ratou mau haapiiraa i nia i te Bibilia. Te na ô ra te Bibilia iho e: “Te mau parau moˈa atoa i papaihia ra e mea faaurua mai ïa e te Atua, e e mea maitai ei haapiiraa, ei aˈoraa, ei faaiteraa hapa, ei faaite mai i te parau-tia ra; ia au roa te taata [aore ra vahine] no te Atua i te mau ohipa maitatai atoa ra.” (Timoteo 2, 3:16, 17) Ua papai te aposetolo Paulo i to ˈna mau hoa Kerisetiano e: “A farii mai ai outou i te parau a te Atua i ta outou i ite ia matou nei, aore outou i farii ei parau na te taata, ei parau râ na te Atua, e oia mau â hoi.” (Tesalonia 1, 2:13) No reira, aita te mau tiaturiraa e te mau ohipa a te haapaoraa mau i niuhia i nia i te mau manaˈo aore ra i te tutuu a te taata. Ua niuhia râ i nia i te Parau faaurua a te Atua, te Bibilia.

⁷ Ua horoa mai Iesu Mesia i te hiˈoraa tano ma te niu i ta ˈna mau haapiiraa i nia i te Parau a te Atua. A pure ai oia i to ˈna Metua i te raˈi, ua parau oia e: “O to parau na te parau mau.” (Ioane 17:17) I tiaturi na Iesu i te Parau a te Atua, e i tuati na te mau mea atoa ta ˈna i haapii atu i te mau Papai. E pinepine Iesu i te parau e: “Ua papaihia.” (Mataio 4:4, 7, 10) I muri iho, e faahiti oia i te hoê irava. Eita atoa te nunaa o te Atua i teie mahana e haapii atu i to ratou iho mau manaˈo. Te tiaturi nei ratou e e Parau na te Atua te Bibilia, e te niu papu nei ratou i ta ratou mau haapiiraa i nia i ta te Bibilia e parau ra.

8. E titau atoa te haamoriraa ia Iehova i te aha?

⁸ Te haamori nei te feia o te faaohipa nei i te haapaoraa mau ia Iehova anaˈe e te faaite haere nei ratou i to ˈna iˈoa. Ua parau Iesu e: “O to Atua o Iehova ta oe e haamori, e oia anaˈe ra ta oe e faaroo.” (Mataio 4:10) No reira, o Iehova anaˈe ta te mau tavini a te Atua e haamori, aita ˈtu. E titau atoa teie haamoriraa ia faaite haere i te taata o vai te iˈoa o te Atua mau e mai te aha to ˈna huru. Te na ô ra te Salamo 83:18 e: “O Iehova to oe iˈoa, e o oe anaˈe tei Teitei i te fenua atoa nei.” Ua horoa mai Iesu i te hiˈoraa i roto i te tautururaa ia vetahi ê ia ite i te Atua, ia ˈna i pure e: “Ua faaite atu vau i to iˈoa i te mau taata o teie nei ao ta oe i ho mai no ˈu ra.” (Ioane 17:6) Te haapii atoa nei te feia haamori mau i teie mahana ia vetahi ê i te iˈoa o te Atua, ta ˈna mau opuaraa e to ˈna mau huru maitatai.

9, 10. E nafea te mau Kerisetiano mau e faaite ai i te here te tahi i te tahi?

⁹ Te faaite nei te nunaa o te Atua i te here mau e te miimii ore te tahi i te tahi. Ua parau Iesu e: “O te mea teie e ite ai te taata atoa e, e pǐpǐ outou na ˈu, ia aroha outou ia outou iho.” (Ioane 13:35) Tera te huru aroha, aore ra here, e vai ra i rotopu i te mau Kerisetiano matamua. E na nia iho te here ta te Atua e faaue ra ia tatou ia faahotu, i te mau haafifiraa nunaa, totiare e aiˈa e e tahoê te reira i te taata i roto i te hoê tatua mutu ore o te autaeaeraa mau. (A taio i te Kolosa 3:14.) Aita tera autaeaeraa î i te here i rotopu i te mau melo o te mau haapaoraa hape. Mea nafea to tatou iteraa i te reira? Te haapohe nei ratou te tahi i te tahi no te mau taa-ê-raa i te pae aiˈa aore ra opu fetii. Eita te mau Kerisetiano mau e rave i te mau mauhaa tamaˈi no te haapohe i to ratou mau taeae aore ra i te tahi atu mau taata. Te parau ra te Bibilia e: “O te mea teie e itea ˈi te tamarii a te Atua, e te tamarii a te diabolo: o tei ore i rave i te parau-tia ra, e ere ïa i to te Atua; e ere atoa tei ore i aroha i tana taeae. . . . Ia aroha tatou ia tatou iho. Eiaha mai ia Kaina ra, no taua varua ino ra oia, e taparahi pohe roa ˈtura i to ˈna teina.”—Ioane 1, 3:10-12; 4:20, 21.

¹⁰ Parau mau, e ere noa te here mau i te oreraa e haapohe ia vetahi ê. Te faaohipa atoa nei te mau Kerisetiano mau i to ratou taime, to ratou puai e ta ratou mau ravea no te tauturu e no te faaitoito te tahi i te tahi. (Hebera 10:24, 25) Te tauturu nei ratou ia ratou iho i te mau taime fifi, e e haerea tia to ratou i nia ia vetahi ê. Oia mau, te faaohipa nei ratou i roto i to ratou oraraa i te aˈoraa Bibilia e “hamani maitai . . . i te taata atoa.”—Galatia 6:10.

11. No te aha e mea faufaa ˈi ia farii ia Iesu Mesia ei ravea na te Atua no te faaora ia tatou?

¹¹ Te farii nei te mau Kerisetiano mau ia Iesu Mesia ei ravea na te Atua no te faaora ia tatou. Te na ô ra te Bibilia e: “Aore roa . . . e ora ia vetahi ê, aita ˈtu hoi e iˈoa i faaitehia mai i te taata i raro aˈe i teie nei raˈi, e ora ˈi tatou nei.” (Ohipa 4:12) Mai ta tatou i ite i roto i te pene 5, ua horoa Iesu i to ˈna ora ei hoo no te taata faaroo. (Mataio 20:28) Hau atu â, o Iesu ta te Atua i faatoroa ei Arii i roto i te Basileia i te raˈi o te faatere i te fenua taatoa. E te titau maira te Atua ia faaroo tatou ia Iesu e ia faaohipa i ta ˈna mau haapiiraa mai te peu e e hinaaro tatou i te ora mure ore. No reira te Bibilia e parau ai e: “O tei faaroo i te Tamaiti ra e ora mure ore to ˈna; e o tei ore i faaroo i te Tamaiti ra, e ore oia e ite i te ora.”—Ioane 3:36.

12. Eaha te auraa e ere tatou i to teie nei ao?

¹² E ere te feia haamori mau i to teie nei ao. A haavahia ˈi oia i mua ia Pilato, te tavana Roma, ua parau Iesu e: “E ere i to teie nei ao to ˈu basileia.” (Ioane 18:36) Noa ˈtu eaha te fenua ta ratou e parahi nei, e melo huiraatira te mau pǐpǐ mau a Iesu no to ˈna Basileia i te raˈi e te tapea maite nei ratou i te hoê tiaraa amui ore i roto i te mau ohipa poritita a teie nei ao. Aita ratou e faaô nei i roto ta ˈna mau aroraa. Aita râ te feia haamori o Iehova e haafifi nei ia vetahi ê ia apiti i te hoê pǔpǔ poritita, ia horo no te hoê tiaraa poritita, aore ra ia maiti. Hau atu â i te oreraa e faaô i roto i te mau ohipa poritita, mea faatura te feia haamori mau o te Atua i te ture. No te aha? No te mea te faaue ra te Parau a te Atua ia ratou ia “auraro maite . . . i te feia [faatere] mana toroa.” (Roma 13:1) Ia ore e tuati ta te Atua e titau ra e ta te hoê faanahoraa poritita e titau ra, e pee te feia haamori mau i te hiˈoraa o te mau aposetolo, tei parau e: “O te Atua ta matou e faaroo e tia ˈi eiaha te taata.”—Ohipa 5:29; Mareko 12:17.

13. Eaha te manaˈo o te mau pǐpǐ mau a Iesu no nia i te Basileia o te Atua, e te aha nei ïa ratou?

¹³ Te poro nei te mau pǐpǐ mau a Iesu i te Basileia o te Atua ei tiaturiraa hoê roa o te huitaata. Ua tohu Iesu e: “E parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” (Mataio 24:14) Aita te mau pǐpǐ mau a Iesu Mesia e faaitoito nei i te taata ia tiaturi i te feia faatere no te faaafaro i to ratou mau fifi, te poro haere nei râ ratou i te Basileia i te raˈi o te Atua ei tiaturiraa hoê roa o te huitaata. (Salamo 146:3) Ua haapii Iesu ia tatou ia pure no taua faatereraa tia roa ra ia ˈna i parau e: “Ia tae to oe ra hau. Ia haapaohia to oe hinaaro i te fenua nei, mai tei te ao atoa na.” (Mataio 6:10) Ua tohu te Parau a te Atua e “e hope roa . . . taua mau basileia ra [e vai nei] i te parari e e pau” i teie Basileia i te raˈi e “e vai tera e a muri noa ˈtu.”—Daniela 2:44; Apokalupo 16:14; 19:19-21.

14. I to outou manaˈo, eaha te pǔpǔ faaroo e faaohipa nei i te mau titauraa atoa no te haamoriraa mau?

¹⁴ Ia au i ta tatou i hiˈopoa mai nei, a ui ia outou iho: ‘Eaha te pǔpǔ faaroo e niu nei i ta ˈna mau haapiiraa atoa i nia i te Bibilia e e faaite nei i te iˈoa o Iehova? Eaha te pǔpǔ e faaite nei i te here ta te Atua e faaue ra ia tatou ia faahotu, e faahotu nei i te faaroo ia Iesu, e ere i to teie nei ao, e e faaite haere nei i te Basileia o te Atua ei tiaturiraa mau hoê roa o te huitaata? I roto i te mau pǔpǔ faaroo atoa i te fenua nei, eaha te pǔpǔ e faaohipa nei i teie mau titauraa atoa?’ Te faaite maitai nei te mau tupuraa e o te mau Ite no Iehova ïa.—A taio i te Isaia 43:10-12.

EAHA TA OUTOU E RAVE?

15. Eaha ta te Atua e titau ra hau atu i te tiaturiraa e te vai mau ra oia?

¹⁵ Eita e navai noa ia tiaturi i te Atua ia au mai o ˈna ia tatou. Te parau ra hoi te Bibilia e te tiaturi nei te mau demoni atoa e te vai mau nei te Atua. (Iakobo 2:19) Papu maitai râ e aita ratou e rave nei i te hinaaro o te Atua e aita te Atua e farii nei ia ratou. Ia fariihia tatou e te Atua, eiaha noa tatou e tiaturi i to ˈna vai-mau-raa, e rave atoa râ tatou i to ˈna hinaaro e tia ˈi. E mea tia atoa ia faarue tatou i te haapaoraa hape e ia farii i te haamoriraa mau.

16. Ia aha tatou i mua i te apitiraa i te haapaoraa hape e tia ˈi?

¹⁶ Ua faaite te aposetolo Paulo e eiaha tatou e apiti i te haamoriraa hape. Ua papai oia e: “Te na ô maira Iehova, E haere mai outou i rapae au mai roto mai ia ratou ra, ia taa ê outou, e eiaha e rave noa ˈtu i te mea viivii ra; e na ˈu e farii atu ia outou.” (Korinetia 2, 6:17; Isaia 52:11) No reira te mau Kerisetiano mau e ape ai i te mau mea atoa i taaihia i te haamoriraa hape.

17, 18. Eaha te “Babulonia rahi,” e no te aha e mea ru ai ia “haere ê mai . . . i rapae” ia ˈna?

¹⁷ Te faaite ra te Bibilia e e tuhaa anaˈe te mau huru haapaoraa hape atoa no “Babulonia rahi.”a (Apokalupo 17:5) Te haamanaˈo maira tera iˈoa i te oire o Babulonia i tahito ra, i reira te haapaoraa hape i te haamauraahia i muri aˈe i te diluvi i te tau o Noa. Mea rahi te haapiiraa e te ohipa matauhia i teie nei i roto i te haapaoraa hape no ǒ mai ia Babulonia ra mea maoro aˈenei. Ei hiˈoraa, i haamori na to Babulonia i te mau atua toru tahi. I teie mahana, o te Toru tahi te haapiiraa tumu a te haapaoraa e rave rahi. Te haapii maitai ra râ te Bibilia e hoê anaˈe Atua mau, o Iehova, e e Tamaiti na ˈna o Iesu Mesia. (Ioane 17:3) I tiaturi atoa na to Babulonia e e varua pohe ore to te taata o te ora ˈtu ia pohe te tino e o te nehenehe e mauiui i te hoê vahi haamauiuiraa. I teie mahana, te haapii nei te rahiraa o te mau haapaoraa i te tiaturiraa i te tahi mea pohe ore aore ra varua pohe ore o te nehenehe e mauiui i roto i te po auahi.

¹⁸ I te mea e ua parare te haamoriraa a Babulonia i tahito ra e ati aˈe te fenua nei, e tano ïa ia faataa ia Babulonia rahi no teie tau mai te hau emepera o te ao atoa o te haapaoraa hape. E ua tohu te Atua e e mou taue teie hau emepera o te haapaoraa hape. Te ite ra anei outou no te aha e mea faufaa roa ˈi ia faarue roa outou i te mau tuhaa atoa o Babulonia rahi? Te hinaaro nei te Atua ra o Iehova ia ru outou i te “haere ê mai . . . i rapae” ia ˈna, e taime â teie.—A taio i te Apokalupo 18:4, 8.

19. Eaha ta outou e fanaˈo ma te tavini ia Iehova?

¹⁹ Ia faaoti outou e faarue i te haapaoraa hape, eita paha ve-tahi e amuimui faahou ia outou. Ma te tavini râ ia Iehova e to ˈna nunaa, mea rahi aˈe ta outou e fanaˈo i ta outou e nehenehe e ere. Mai te mau pǐpǐ matamua a Iesu, o tei faarue i te tahi atu mau mea no te pee ia ˈna, e noaa ia outou e rave rahi taeae e tuahine pae varua. E riro outou ei melo o te hoê fetii rahi i te ao nei o te mau mirioni Kerisetiano mau, o te here mau nei ia outou. E e fanaˈo outou i te tiaturiraa faahiahia o te ora mure ore “i te ao to muri ra.” (A taio i te Mareko 10:28-30.) Peneiaˈe i muri aˈe e hiˈopoa te feia o tei faarue ia outou no ta outou mau tiaturiraa, eaha ta te Bibilia e haapii ra e e riro mai ei feia haamori ia Iehova.

20. Eaha te tiai maira i te feia o te faaohipa nei i te haapaoraa mau?

²⁰ Te haapii ra te Bibilia e e fatata te Atua i te haamou i teie nei ao ino e i te haamau i te hoê ao apî parau-tia faaterehia mai e to ˈna Basileia. (Petero 2, 3:9, 13) Auê ïa ao faahiahia e! E i roto i taua ao parau-tia ra, hoê anaˈe haapaoraa, hoê anaˈe huru haamoriraa mau. E ere anei ïa i te haerea paari ia rave outou i te mau taahiraa titauhia no te apiti i te feia haamori mau i teie nei?