Mau uiraa a te feia taio

Ua faaara te Atua ia Kaina e ‘te tapuni ra te hara i te uputa, e tei ia oe ra to ˈna ra hinaaro,’ e au ra hoi e e faahohoˈaraa teie i te hoê animala oviri e te animala e pau ia ˈna. (Genese 4:7) No te aha taua huru parau ra e faaohipahia ˈi mai te peu e na mua ˈˈe i te diluvi, e amu noa na te mau animala i te raau tupu?

I roto i te mau buka i papaihia e Mose, te vai ra vetahi mau irava o te faahiti ra i te tahi mau tupuraa aore ra te mau ohipa o te aamu e au ra e aita roa e tano ra e te tau o te aamu.

Ei hiˈoraa, te horoa ra te faatiaraa i roto i te Genese 2:10-14 i te mau haapapuraa i te pae teotarafia no nia i te ô i Edene ra. Ua papai o Mose e hoê anavai “o tei tahe tia i te pae i te hitia o te râ i Asura ra.” Tera râ, no roto mai te iˈoa o te fenua no Asura ra ia Asura, te tamaiti a Sema i fanauhia i muri aˈe i te diluvi. (Genese 10:8-11, 22; Ezekiela 27:23; Mika 5:6) E au ra ïa e, i roto i ta ˈna faatiaraa papu e tei faauruahia mai, ua faaohipa noa o Mose i te parau ra “Asura” no te hoê fenua o tei matauhia e to ˈna feia taio.

A rave na i te tahi atu hiˈoraa no roto i te mau pene matamua o te Genese. I muri aˈe i to Adamu raua Eva hararaa e to raua tiavaruraahia i te ô, ua opani Iehova ia raua ia hoˈi atu i reira. Nafea? Te na ô ra te Genese 3:24 e: “Tiahi atura oia i te taata i rapae, ua tuu ihora, i te pae i te hitia o te râ i taua ô i Edene ra, te kerubi ma te ˈoˈe ura e fariuriu haere, ei tiai i te eˈa i te raau ora ra.” A tapao na, “te ˈoˈe ura.” Na te Atua anei i hamani matamua i te mau ˈoˈe?

Eiaha tatou e faaoti e o to tatou Poiete aroha te taata matamua i hamani i te mauhaa ta tatou e pii ra e ˈoˈe. Ua ite o Adamu e o Eva i te tahi mea ura e ohu ra i mua i te mau melahi. Eaha ïa taua mea ra? I te tau a papai ai o Mose i te buka Genese, ua matau-maitai-hia te mau ˈoˈe e ua faaohipahia i roto i te tamaˈi. (Genese 31:26; 34:26; 48:22; Exodo 5:21; 17:13) No reira, ua tauturu te mau parau a Mose “te ˈoˈe ura” i ta ˈna feia taio ia tamata i te taa e eaha te mea i vai na i te uputa o te ô i Edene. Maoti te ite i noaa mai i te tau o Mose ra, ua faaohiehia te papuraa i teie mau tumu parau. E ua tano iho â te mau parau i faaohipahia e Mose, inaha ua rave o Iehova e ia papaihia i roto i te Bibilia.—Timoteo 2, 3:16.

Eaha ˈtura ïa no te Genese 4:7? I reira, ua faaara te Atua ia Kaina (ia au i te Tatararaa a te ao apî) e: “Ia fariu oe no te rave i te maitai, aita anei e faateiteiraa? Mai te peu râ e eita oe e fariu no te rave i te maitai, te tapuni ra te hara i te uputa, e tei ia oe ra to ˈna ra hinaaro; e e vî anei oia ia oe?” Mai tei tapaohia, e au ra e te faahohoˈa ra teie huru parau i te hoê animala oviri poia o te tapuni ra no te ouˈa ˈtu e no te amu i te tahi animala.

Noa ˈtu râ, te haapapuhia ra i roto i te Bibilia e te parahi hau noa ra o Adamu e o Eva e te mau animala atoa. Aita vetahi o te mau mea ora i mǎtaˈu i te faaea na pihai iho i te mau taata, e ua fanaˈo atoa ratou i teie huru oraraa. E animala oviri vetahi, o tei faaatea ê ia ratou i te taata. (Genese 1:25, 30; 2:19) Teie râ, aita te Bibilia e faaite ra e ua haru te hoê animala i te tahi atu animala aore ra i te taata. I te omuaraa ra, ua faataa te Atua e e amu te taata e te animala i te raau tupu. (Genese 1:29, 30; 7:14-16) Aita te reira i taui e tae roa i muri aˈe i te diluvi, mai ta te Genese 9:2-5 e faaite ra.

Eaha ïa no te faaararaa a te Atua ia Kaina, o ta tatou e taio ra i roto i te Genese 4:7? Mea papu maitai e e ohie noa te hohoˈa o te animala taehae e tapuni ra e tei ineine i te ouˈa ˈtu i nia i te hoê animala i te taahia i te tau o Mose, e te taa atoa ra ia tatou. No reirâ, ua faaohipa o Mose i te mau parau o tei tano i te feia taio o tei matau i te ao i muri aˈe i te diluvi. E noa ˈtu e aita o Kaina i ite aˈe i teie huru animala, e taa ia ˈna te tumu o te faaararaa o tei faaau i te hiaai rave hara i roto ia ˈna i te hoê animala taehae tei poia roa.

Teie te mau tuhaa matamua te tia ia haaferuri ia tatou: te hamani maitai o te Atua i to ˈna faaararaa ia Kaina, te faufaa o te farii-haehaa-raa i te aˈoraa, te ohieraa te pohehae i te faaino i te hoê taata, e to tatou haafaufaaraa i te tahi atu mau faaararaa ta te Atua i tuu i roto i te mau mau Papai no tatou nei.—Exodo 18:20; Koheleta 12:12; Ezekiela 3:17-21; Korinetia 1, 10:11; Hebera 12:11; Iakobo 1:14, 15; Iuda 7, 11.