O vai te vahine a Kaina?
Te pahonoraa a te Bibilia
O Kaina te tamarii matahiapo a Adamu raua Eva, ua faaipoipo o ˈna i te hoê o to ˈna mau tuahine aore ra te hoê fetii piri. E hiˈopoa anaˈe eaha ta te Bibilia e parau ra no nia i te aamu o Kaina e to ˈna utuafare.
Ta tatou e ite ra no nia ia Kaina e to ˈna utuafare
Pauroa te taata, e huaai ratou no roto mai ia Adamu raua Eva. Te parau ra te Bibilia no te Atua e “i te hoê noa taata [Adamu], ua hamani oia i te mau nunaa atoa ia parahi ratou i nia i te fenua taatoa.” (Ohipa 17:26) Ua riro Eva te vahine a Adamu, ei “metua vahine no te mau taata ora atoa.” (Genese 3:20) No reira, ua faaipoipo Kaina i te hoê tamarii a Adamu raua Eva.
O Kaina e to ˈna taeae Abela o na tamarii matamua fanauhia e Eva. (Genese 4:1, 2) I to Kaina taparahiraa i to ˈna taeae, ua tiahihia o ˈna. E ma te amuamu, ua na ô oia: “E papu roa e pohe au i te taata e farerei noa mai ia ˈu.” (Genese 4:14) O vai ta Kaina i riaria? Te parau ra te Bibilia no Adamu e ua “fanau mai ai ta ˈna e tamaiti e e tamahine.” (Genese 5:4) Papu maitai, e nehenehe te mau tamarii a Adamu raua Eva e haapohe ia Kaina.
I mutaa iho ra, e peu matauhia ia faaipoipo i te fetii piri. Ei hiˈoraa, ua faaipoipo te taata haapao maitai o Aberahama i to ˈna tuahine, oia hoi e tamahine na to ˈna metua tane, e ere râ i te tamahine na to ˈna metua vahine. (Genese 20:12) Tau matahiti i muri iho i te tau o Kaina, i roto i te ture a Mose ua opani-etaeta-hia ia faaipoipo i te fetii piri. (Levitiko 18:9, 12, 13) I tera ra tau, e au ra e aita i itehia te fifi i te pae o te ea i nia i te tamarii fanauhia e te fetii piri mai ta tatou e ite nei i teie mahana.
Te faaite ra te Bibilia e mea papu te aamu o Adamu raua Eva e to raua utuafare. E itehia te mau pǎpǎraa tupuna mai Adamu mai â i roto i te buka Genese papaihia e Mose, i roto atoa i te buka papaihia e Ezera e ta Luka i papai. (Genese 5:3-5; Paraleipomeno 1, 1:1-4; Luka 3:38) Te haapapu ra te mau taata papai Bibilia e mea mau te aamu o Kaina ma te faahiti i te reira.—Hebera 11:4; Ioane 1, 3:12; Iuda 11.