Te Apooraa a te mau haapaoraa o te ao nei—E manuïa anei?
E MAU hanere tia faaroo o tei haaputuputu i te pitiraa o te Apooraa a te mau haapaoraa o te ao nei i tupu i Chicago, i te hau no Illinois, i te mau Hau amui no Marite, i te tau veavea o te matahiti 1993 ra. Ua tae pauroa mai te mau tia o te haapaoraa Bouddhisme, te amuiraa faaroo kerisetiano, te Hindouisme, te haapaoraa ati Iuda, e te haapaoraa Mahometa. Ua tae atoa mai te feia tahutahu e te feia haamori ruahine. Ua paraparau ratou no nia i ta ratou tuhaa e rave no te faahoperaa i te tamaˈi. Ua farii te peretiteni o te apooraa e “e piti i nia i te toru o te mau aroraa rarahi e tupu ra na te ao nei i teie mahana, ua ô atoa ïa te faaroo i roto.”
Hoê hanere matahiti i teie nei
Ua manuïa anei te apooraa? A hiˈo na i te ohipa i tupu hoê hanere matahiti i teie nei i te Apooraa matamua a te mau haapaoraa o te ao nei. Ua tupu atoa i Chicago, i te tau veavea o te matahiti 1893, e hau atu i te 40 tia haapaoraa o tei tae mai. Te farii ra te Rururaa no te hoê Apooraa a te mau haapaoraa o te ao nei e “ua tiaturi” te feia o tei tia ˈtu i te matahiti 1893 “e tera te putuputuraa matamua o te mau putuputuraa faaroo tahoê a te ao nei, o te turu i te taaraa, te hau e te haereraa i mua. Aita râ i tupu. Ua itehia te au-ore-raa e te haavîraa uˈana i te pae faaroo i roto i te mau tamaˈi o tei tupu i na 100 matahiti i mairi aˈenei, e hoê â huru i teie mahana.” No te aha i ore ai i manuïa? No te mea aita te manaˈo taatoa o te tahoêraa o te mau faaroo e fariihia ra e te Atua. Te na ô ra te Bibilia e: “Eiaha outou ia amui-au-ore-hia i te feia faaroo ore ra.”—Korinetia 2, 6:14-17
Ma te tano roa, ua haamatara te vea no setepa 1893 a te Zion’s Watch Tower e aita te mau Papai e turu ra i te Apooraa a te mau haapaoraa o te ao nei, ia ˈna i parau, ma te faaooo rii hoi e: “Ua iriti mai [te feia ihipǎpǎ] e rave rahi mau taoˈa menemene repo araea tunuhia faahiahia roa mai roto mai i te mau vahi paparari no Babulonia e vetahi atu mau oire tahito, aita râ vetahi i itehia mai. . . . Aita i itehia te tahi e parau ra no Mose e no Iosua i to raua titauraa i te hoê ‘Apooraa a te mau haapaoraa,’ no Moabi e no Amona, e no Edoma . . . Aita i itehia te tahi e parau ra no te taata paari itoito ra o Samuela i te poroiraa ˈtu ia Gata e ia Ekerona no te titau i te mau tahuˈa a Dagona ia haere mai i Silo no te hoê rururaa e te mau tahuˈa a Iehova . . . Aita i itehia te tahi e parau ra no te taata paari tatuahia i te hatua iri puaa ra o Elia i te faaauraa i te hoê ‘tairururaa’ e te mau tahuˈa a Baala e a Moloha no te hoê aparauraa hoê hebedoma no nia i te mau tiaturiraa a to ratou mau faaroo tataitahi, ma te hinaaro e faarahi atu â i te faatura no ta te tahi e ta te tahi haapaoraa.”
Te Basileia a te Atua—Te tiaturiraa hoê roa
Eita te Apooraa a te mau haapaoraa o te ao nei e manuïa. Ua faaohipa te mau vea e te mau tia i te mau parau mai te “huanane,” “te arepurepuraa,” e “te ahoaho” no nia i taua apooraa ra. Ia au i te hoê tumu parau, ua haere atoa mai te mau mutoi no te tamǎrû e piti faahuehueraa i tupu no te tahi mau amahamaharaa politita. I roto i te hoê papai no te matahiti 1952, ua faahiti te apooraa ei hoê o ta ˈna mau tapao: “E haamau i te hoê Apooraa tamau na te ao nei a te mau haapaoraa o te rave i te ohipa e te mau NUNAA AMUI ia naeahia te hau na te ao nei e te taaraa i rotopu i te mau nunaa atoa.” Mea taa ê roa râ to Iesu manaˈo ia ˈna i parau e e ere to ˈna Basileia no teie nei ao. Te faataa ra te Bibilia e o te Basileia a te Atua te ravea hoê roa no te faatitiaifaro i te mau fifi a te huitaata nei.—Daniela 2:44; Ioane 18:36.