Te faaineineraa a Gileada i roto i to ˈna faaroo moˈa roa ˈˈe

“UA FAAINEINE-MAITAI-HIA to tatou feia i haapiihia, i roto i te faaroo moˈa [roa ˈˈe].” O teie te mau parau omuaraa o te porotarama a faatuitehia ˈi te pǔpǔ 95 o te Haapiiraa Bibilia a te Watchtower no Gileada, i tupu i te sabati 12 no setepa 1993. I taua poipoi ra, ua arataihia te rahiraa e 4 614 taata i titau-manihini-hia e tae noa ˈtu te mau melo o te Betela, tei haaputuputuhia i te Piha Tairururaa o te Oire no Jersey, na te hoê pure haamataraa i haapaohia mai e George Gangas. E melo o taeae Gangas no te fetii o te Betela e 65 matahiti te maoro e e 97 matahiti to ˈna i teie nei e o ˈna atoa te melo paari roa ˈˈe o te Tino Aratai.

Ua na ô aˈera hoi o Albert Schroeder, melo atoa no te Tino Aratai e peretiteni o te porotarama, e: “I roto i na avaˈe e pae, ua niuhia te mau haapiiraa a Gileada i nia i te faaroo moˈa [roa ˈˈe].” Inaha, eaha hoi te “faaroo moˈa [roa ˈˈe]”? Te faataa ra oia e taua “faaroo moˈa [roa ˈˈe]” i faahitihia e Iuda 20, o te taatoaraa ïa o te parau mau a te Bibilia. No reira, ua niuhia te haapiiraa i Gileada i nia i te Parau a te Atua, te Bibilia, oia hoi ta ˈna buka matamua.

E ite rahi aˈe tei noaa i te feia i haapiihia

O John Stuefloten te taata orero matamua o te Tomite a te Watchtower Farms, tei paraparau mau i nia i te tumu parau ra “Te fanaˈoraa i te huru o te mau taata i noaa ia ratou i te paari.” Te na ô ra te Bibilia e te feia “e amui atoa to [ratou] haerea i te feia paari ra, e paari atoa ïa.” (Maseli 13:20) I roto i te mau haapiiraa Gileada, ua horoa te feia i haapiihia ˈtu hau atu i te 900 hora i te haapiiraa i te Bibilia. Ua ani atura o taeae Stuefloten i te feia i haapiihia e: “Nafea ïa te huru o Iehova ia ohipa mai i nia ia outou i te mau tau i mua nei? E haere outou i roto 18 rahiraa fenua e tau 170 milioni taata i reira. No reira nafea ïa to outou huru ia ohipa ˈtu i nia i taua mau taata ra?” Na roto i te faatupuraa ratou i te paari o Iehova, te mau mitionare apî e nehenehe ai e tauturu atu i te tahi pae ia riro atoa mai ei feia haamori no Iehova, te Pu o te paari otia ore.

“Te faaauraa i te mau mea atoa i te taata atoa nei” o te tumu parau ïa o te oreroraa i muri noa mai, i vauvauhia mai e Lloyd Barry, melo no te Tino Aratai. (Korinetia 1, 9:22) Tau 45 matahiti i teie nei, e taata i haapiihia atoa o taeae Barry no te pǔpǔ 11 no Gileada. I teie nei, te farii popou nei te pǔpǔ 95 i te mau aˈoraa faufaa mau a te hoê mitionare tahito tei noaa ehia roaraa matahiti aravihi i roto i te hoê fenua ěê. Ua faaitoito oia i te feia i haapiihia e ia matau oioi ratou i te taata i roto i ta ratou tuhaa fenua apî i te fenua ěê, i te iteraa ratou i ta ratou mau peu tumu e te haapiiraa i te reo o te fenua. Te parau ra oia e, e ohie aˈe te reira ia amui atu ratou e ia ohipa roa ˈtu i roto i te mau taata o te fenua na roto paha i te haapiiraa i ta ratou mau peu tumu e te fariiraa ia ratou i te mau taime atoa e au.

I muri iho, ua paraparau mai o Dean Songer no te Tomite o te Fare hamaniraa taoˈa, no nia i te hoê tumu parau taa ê mau, oia hoi “Ia tiamâ mai na outou i te ohipa.” I muri aˈe hau atu i te 35 matahiti i roto i te taviniraa taime taatoa, ua taa ia taeae Songer eaha te auraa o te oraraa i haamauhia i nia i te hoê tapao taa maitai, i te hoê oraraa au noa, te haapao-maite-raa i te ohipa e ravehia ra, te tiamâraa mai i te mau taoˈa materia. E tera te parau tumu o ta ˈna aˈoraa i te feia i haapiihia. Ua tiamâ mai te feia himene i te hiero o Iehova i te mau hopoia i haapaohia na te tahi atu mau ati Levi, ia nehenehe ratou e rave maitai i te hopoia taa ê i haapaohia na ratou. (Paraleipomeno 1, 9:33) Oia atoa te mau mitionare no Gileada, ua tiamâ mai ratou i te mau ohipa matauhia mai te ohipa pae tino ia nehenehe ratou ia haamau i to ratou feruriraa i nia i ta ratou taviniraa taa ê. Ua faaoti aˈera o taeae Songer i te na ô-faahou-raa e: “Ei hiˈoraa papu maitai to outou no nia i te oraraa e ei oraraa au noa to outou e tia ˈi. Ta outou hopoia mai te mau hopoia e faatiamâ mai ia outou i te ohipa, te raveraa ïa outou i te ohipa i te ao e te po, ma te haamaitai ia Iehova.”

O Daniel Sydlik, melo no te Tino Aratai tei orero mai i muri iho i nia i te tumu parau ra “Te haapiiraa ia vetahi ê nafea râ ia huti mai i te tuhaa maitai roa ˈˈe o te oraraa nei.” Ua faaitoito o ˈna i te feia i haapiihia “eiaha noa ratou e haapii i te haapiiraa, ia itoito atoa râ ratou i te faaite i te taata eaha te tia ia ratou ia rave no te faaau i to ratou oraraa i nia i te hinaaro o te Atua.” E ohipa te huru o te mau orometua maitai i nia ia vetahi ê e e turai atoa hoi ia ratou ia haa. “E ara maitai i te haapii atu i te taata ia faatupu i te mau faufaa keristiano maoti hoi i te haapii noa ˈtu i te mau ture e i te mau faaueraa,” o ta ˈna ïa i parau e ua na ô faahou aˈera oia ei faaotiraa i ta ˈna parau e: “Te mea faufaa roa, e te mau taeae here e, ia haapii ïa outou ia outou iho e ia haapii outou ia vetahi ê i te here, inaha e tatua maitai roa te reira no te tahoê.”—Korinetia 1, 13:1-3; Kolosa 3:14.

I muri aˈe i na pae avaˈe faaineineraa, ua tupu te taairaa here mau i roto i te feia i haapiihia, no ta ratou na orometua haapii toopiti, no Gileada. O Jack Redford, te hoê mitionare tahito tei paraparau na mua mai, i nia i te tumu parau ra “E opuaraa tano mau ta outou i rave.” I roto i te ao tahito ati iuda, hou aˈe oia e riro mai ai ei kerisetiano, e tiaraa to Paulo, ua ite mai oia i te hanahana, e te maitai i te paeau no te moni. I roto râ i te Philipi 3:8, te faariro ra o Paulo i taua mau mea atoa nei ei “mea faufaa ore,” aore ra ei “pehu,” ia au i te tatararaa a Phillips. Mea faufaa roa na ˈna te taviniraa, e ua rave o ˈna i te opuaraa maitai roa ˈˈe. Taa ê atu, te faaite nei te rahiraa o te taata i teie mahana na roto i te mau opuaraa ta ratou e rave i roto i te oraraa e mea faufaa aˈe na ratou, ta ratou mau taoˈa materia i te ora mure ore. E opuaraa tano roa ta te mau mitionare no Gileada i rave. Ua faaoti aˈera o Jack Redford i ta ˈna parau i te na ôraa e: “Aita e mea ta te ao a te Diabolo e pûpû mai nei na outou, e nehenehe e faaauhia i te taviniraa mitionare. A haapao maitai i taua haamaitairaa faahiahia mau ra, e a vaiiho noa ˈtu i te ao nei ia haapao noa na i ta ˈna mau pehu!”

I roto i na matahiti e 32 i mairi, ua riro o Ulysses Glass ei orometua haapii i Gileada. Ua horoa mai oia na te feia i haapiihia i te tahi aˈoraa taa maitai i roto i te tumu parau ra “O te Atua anaˈe te nehenehe e hamani i te hoê tumu raau,” ma te niu i ta ˈna oreroraa i nia i te Salamo 1:3. Aita aˈenei te mau ravea o teie nei tau apî i aro aˈenei i te parau no te paturaa i te hoê tumu raau, i hamanihia e te Atua. Inaha e nehenehe e parau e ua riro te mau kerisetiano mau mai te mau tumu raau te huru, i tanuhia e i pîpîhia e Iehova. Ua faataa maira o taeae Glass e e pae avaˈe te maoro to te feia i haapiihia “pîpî-tamau-raahia i te pape” no roto mai i te pape o te taheraa pape ora o te Parau a te Atua,” mai te mau tumu raau i roto i te hoê paradaiso pae varua. Tera râ, ma to ratou tiaraa mitionare, e tia ia ratou ia haapao maitai “ia ore to ratou mau aˈa i te pae varua ia roohia i te fifi.” Ua aˈohia ratou e ‘tamau noâ i te inu i te pape ora no ǒ mai ia Iehova ra no te mea o te Atua anaˈe te nehenehe e hamani i te hoê tumu raau.’

Na Carey Barber i haapao mai i te oreroraa parau hopea, te hoê teie melo o te Tino Aratai. I muri aˈe e 70 matahiti i roto i te taviniraa taime taatoa, e nehenehe o taeae Barber e parau no nia i te tumu parau ra “O Iehova anaˈe te haamori.” Aita te paeau rahi o te huitaata nei i haamori ia Iehova anaˈe ra. (Deuteronomi 5:9) Tera râ, mai ta taeae Barber e haapapu ra, noa ˈtu to tatou huru taata tia ore, “e nehenehe mau â e haamori i te Atua anaˈe ra.” Te na ô râ oia e: “Aita e taata e nehenehe e parau e: ‘Na te Diabolo i turai mai ia ˈu e rave i tera ohipa.’” Inaha, e nehenehe te Diabolo e upootia i nia ia tatou ia ore tatou e manuïa i te patoi atu ia ˈna. (Iakobo 4:7) Te tamau-noa-raa i te ohipa i roto i te taviniraa a Iehova, o te ravea maitai roa ˈˈe ïa no te patoi atu ia Satani e to ˈna ao e no te haamori ia Iehova anaˈe ra.

Nominohia ei mitionare

Ua faaoti te porotarama o taua poipoi ra na roto i te nominoraahia te taatoaraa o te feia i haapiihia, oia hoi e 46 rahiraa. Ua horoahia i roto i te rima o na utuafare faaipoipo e 23, te mau parau tuite e haaparu ra e “ua noaa ia ratou i te aravihi taa ê no te faatupu i te ohipa haapiiraa i te taata, te faahaereraa i te manaˈo maitai e te ohiparaa no te hau e vai tamau mai e no te ture nahonaho maitai e te haere tia i roto i te mau taata atoa.” Papu maitai e faaitoito te pǔpǔ 95 i te faatupu i taua ohipa faufaa mau i roto i te mau rahiraa 18 fenua i haapaohia na ratou. E taua mau vahi o te mau fenua ïa o te ao nei mai te mau fenua Asia, Afirika, Europa, Marite latino e te Caraïbes.

I te avatea, i muri aˈe i te hoê tuatapaparaa poto no nia i Te Pare Tiairaa i arataihia mai e Charles Woody, melo no te Tomite e haapao i te mau tuhaa fenua, ua faaite maira te feia i faatuite-apî-hia i ta ratou porotarama, i nia i te tumu parau ra “Ua faaineine o Gileada ia matou ei mitionare.” Ua faaoti te rururaa na roto i te darama ra “Te mau maitiraa i mua ia matou.”

I muri aˈe i teie porotarama faaitoito mau, ua ineine roa te mau mitionare i te tavini i roto i na poro e maha o te fenua nei, i te haere atu e opere i te “faaroo [moˈa roa ˈˈe].”

[Tumu parau tarenihia i te api 26]

Te faito o te pǔpǔ

Rahiraa fenua i tiahia mai: 7

Rahiraa fenua e terehia ˈtu: 18

Rahiraa feia i haapiihia: 46

Rahiraa utuafare faaipoipo: 23

Faito matahiti au noa: 30,06

Faito matahiti au noa i roto i te parau mau: 12,92

Faito matahiti au noa i roto i te taviniraa taime taatoa: 9,4

[Hohoˈa i te api 26]

Te pǔpǔ 95 i faatuitehia a te Haapiiraa Bibilia Watchtower no Gileada

I roto i te tabura i muri nei, ua numerahia te mau anairaa taata mai mua mai e haere atu ai i muri, e ua tapaohia te mau iˈoa na te pae aui mai te haamataraa e haere atu ai i te pae atau no te anairaa taitahi.

(1) Buelow, D.; Donzé, V.; Innes, S.; Fulk, N.; Billingsby, M.; Hoddinott, L.; Nygren, B.; Eriksson, L. (2) Boker, J.; Thomas, M.; Stedman, S.; Billingsby, D.; Waugh, I.; Purves, M.; Luttrell, M. (3) Jacobsen, T.; Boker, J.; Martínez, L.; Nilsson, E.; Purves, P.; Holt, L.; Larsen, M.; Jones, L. (4) Numminen, P.; Numminen, H.; Buelow, M.; Olson, W.; Holt, S.; Donzé, G.; DesJardins, C.; DesJardins, D. (5) Larsen, K.; Martínez, D.; Nygren, P.; Waugh, P.; Jones, D.; Hoddinott, J.; Thomas, G. (6) Innes, B.; Fulk, R.; Eriksson, A.; Nilsson, S.; Stedman, J.; Olson, K.; Jacobsen, F.; Luttrell, J.