Te faatia ra te feia poro i te Basileia
Ua haapii te hoê taurearea anaanatae i te mau pereoo auahi i te parau mau
MAI te peu e e mafatu parau-tia to te hoê taata, e haapao iho â te Atua ra o Iehova, ma te faaohipa ia Iesu Mesia e te mau melahi o te raˈi ra, e ia faaroo teie taata e au i te mamoe ra i te parau apî maitai o te Basileia. I te taime e au, e riro teie taata i te haere mai i te pae atau o te farii maitai o Iesu. (Mataio 25:31-33) E parau mau te reira no te hoê taurearea no Auteteria mea au na ˈna te mau pereoo auahi, o tei ite i te parau mau na roto i te hoê ravea otahi roa.
Te vahi anaanatae roa ˈˈe o teie ohipa auhia e teie taurearea, o te haereraa ïa i roto i te piha faahororaa i te pereoo auahi, ma te parau faatia a te taiete pereoo auahi. E taviri na oia i ta ˈna mau tere atoa i te hohoˈa video ia nehenehe oia e mataitai faahou i te fare. I nia i te tere mai Vienne tae atu i Salzburg, e Ite no Iehova te taata faahoro pereoo auahi. Ua faaohipa oia i teie ravea no te paraparau no nia i te Basileia i teie taurearea e anaanatae ra i te mau pereoo auahi. I te omuaraa, ua maere roa te taurearea i te faarooraa i te taata faahoro pereoo auahi i te paraparauraa no nia i te Atua e te Bibilia, i roto râ i te tere, ua haapao rahi aˈe oia i rapaeau maoti hoi i ta te taata faahoro e parau maira ia ˈna.
I to ˈna hoˈiraa ˈtu i te fare, ua mataitai teie taurearea i ta ˈna hohoˈa video eiaha hoê noa taime, hoê ahuru râ taime, no te mea ua au roa oia i to ˈna tere. I te mea e ua haruharu atoa oia i te maniania, ua na nia iho noa oia i te faaroo i te mea ta te Ite i parau mai ia ˈna. Rahi atu oia i te mataitai i te video, rahi atu oia i te matau i te mea o tei parauhia mai ia ˈna. Ua haamata ˈtura oia i te feruri i teie mau parau, e i te pae hopea ua anaanatae roa oia i te mau haamaramaramaraa faahiahia mau i vauvauhia i roto i te Bibilia. Ua hinaaro oia e ite hau atu â.
Ua haamanaˈo oia i te iˈoa o te taata faahoro e ua ite oia e te ora ra oia i te hoê vahi i Vienne. No reira, ua haere atura oia i te fare rata e ua taniuniu atura oia i te mau rahiraa numera niuniu i papaihia i raro aˈe i tera iˈoa i roto i te buka niuniu. Teie hoi ta ˈna uiraa e ui atu i te taata e pahono mai i te niuniu: “E taata faahoro pereoo auahi anei oe?” Mai te peu e aita ra, e taniuniu atu oia i te tahi atu numera. I te pae hopea, ua itehia mai ia ˈna taua taata faahoro ra. Ua faatia ˈtura oia i to ˈna aamu e ua anaanatae roa oia i te poroi a te Bibilia o ta ˈna i faaroo i roto i te ripene video.
Ua rave aˈera te Ite i te tahi mau faanahoraa na roto i te amaa ia haere atu te hoê taata e faaea ra i pihai iho e farerei i teie taurearea. E i roto i te amuiraa no taua vahi ra, te vai ra te tahi atu Ite e taata faahoro pereoo auahi atoa oia. Ua haere atura te piti o te taata faahoro e farerei i te taurearea anaanatae i te pereoo auahi, e ua haamata ˈtura te hoê haapiiraa bibilia. I te tau veavea o te matahiti 1991, ua bapetizohia te taurearea.
Ua ite Iehova, o te hiˈo ra i te mau mafatu atoa, e e here haavare ore to teie taata no te parau-tia. No reira, ua rave oia e ia faaroo oia i te parau mau a te Bibilia—noa ˈtu e mea na roto i te hoê ravea otahi roa.—Paraleipomeno 1, 28:9; Ioane 10:27.
[Faaiteraa i te fatu o te hohoˈa i te api 9]
Ma te parau faatia a te Austrian Railways