Ua ite anei oe e te vai ra hoê video apî?
I nia jw.org, ua faaineinehia no e rave rahi taata te video poto No te aha e haapii ai i te Bibilia? Te fa o teie video, no te turai i te mau taata tei anaanatae ia farii i te hoê haapiiraa Bibilia tamoni ore. E nehenehe e hiˈo i te reira i te omuaraa o te jw.org. A haere i raro roa e a pata i nia “Ani i te hoê haapiiraa Bibilia.” E nehenehe atoa e hiˈo i tera video ma te faaohipa i te hohoˈa e vai ra i nia i te mau api parau iti apî. E itehia tera hohoˈa i raro roa i te api hopea e i te pae atau. Teie te tahi mau ravea no te faaohipa maitai i tera video.
A hoˈi faahou ai e farerei i te hoê taata, a parau atu: “E nehenehe anei taua e hiˈo i te tahi video poto? E faataa te reira e nafea ia ite i te mau pahonoraa i ta oe mau uiraa Bibilia.” Ia farii te taata, a faaite atu i te video ma te faaohipa i ta oe niuniu afaifai, ta ˈna iho matini roro uira aore ra te tahi atu ravea.
A poro ai ma te faanaho-ore-hia aore ra i te vahi taata, ia pûpû tatou i te mau api parau iti apî, a faaite atu i te hohoˈa e vai ra i raro roa i te api hopea. A faaitoito i te taata ia faaohipa i te reira i nia i ta ˈna matini afaifai. Na roto i e rave rahi reo, e nehenehe e faaohipa i tera hohoˈa no te haere i nia i ta tatou reni Internet e mataitai i te video. E nehenehe atoa paha oe e faaite roa ˈtu i tera video i te taata ma te faaohipa i ta oe matini afaifai.
A faaite i te mau hoa ohipa, hoa haapiiraa, fetii e te feia ta oe i matau e te vai ra tera video. A parau atu e e nehenehe oe e mataitai i te reira e o ratou. E nehenehe atoa e hapono i te hoê e-mail, e pata noa ïa ratou i nia i te reira no te hiˈo i te video. A faaitoito atu ia mataitai i te reira o ratou anaˈe.
Ma te faaohipa i tera ravea apî, e rave rahi atu â haapiiraa Bibilia te nehenehe e haamata. E tauturu ïa tatou i te feia e aau farii e tano no te ora mure ore.—Ohi. 13:48.