Te tahi mau ripene video o te horoa ra i te faaiteraa
1 “Ua haamata ta mâua tamaiti . . . i te mataitai i te ripene video hou oia e nehenehe ai e haere. Mai reira mai, e mataitai noa oia i te reira . . . Mea faahiahia ia fanaˈo i teie mau ravea o te oomo i te here ia Iehova i roto i ta mâua mau tamarii!” Eaha te ripene video ta teie nau metua Kerisetiano e manaˈo ra? O te ripene ra Noé: il marchait avec Dieu. Ua hapono te hoê vahine, e ere i te Ite e ua mataitai ta ˈna tamaiti i te ripene ra Noé i ǒ i te hoê taata, e 90 dala Marite ei ô i te Betela ma te ui e te vai ra anei te tahi atu mau ripene video na te tamarii. E haaputapû te mau ripene video tei tavirihia e te faanahonahoraa a Iehova i te feia apî e te feia paari e rave rahi.
2 I roto i te utuafare: Teie ta te hoê tuahine i faatia i muri aˈe i te mataitairaa i te ripene ra La fermeté des Témoins de Jéhovah face à la persécution nazie e to ˈna utuafare e: “Ua feruriruri au i te mahana taatoa nafea to Iehova vaiihoraa i te taata au noa ia faaruru i te mau mea maere mau! Ua haamanaˈo mai te reira e mea iti roa to ˈu iho mau fifi ia faaauhia. Ua tauturu te mataitairaa i teie ripene video e ta mâua mau tamahine e i muri aˈe te aparauraa e o ratou ia taa maitai aˈe ia ratou te faufaaraa ia tiaturi ia Iehova e ia ineine maitai aˈe i mua i te mau faaheporaa e te mau hamani-ino-raa.”
3 I te fare haapiiraa: I roto i ta ˈna vauvauraa parau, ua faaite te hoê taurearea Ite i te hoê tuhaa o te ripene ra Fermeté i ta ˈna piha haapiiraa. Na mua ˈˈe, ua parau te orometua haapii e mea au ore na ˈna te mau Ite. Teie ta ˈna i parau i muri aˈe i te mataitairaa i te ripene video: “Ua taui roa to ˈu manaˈo no nia i te mau Ite no Iehova. Te fafau nei au e i mua nei, ia haere mai ratou i to ˈu uputa, e faaroo vau ia ratou e e haamata vau i te haapii i te Bibilia e o ratou.” Na te aha i taui i to ˈna manaˈo? Ia au ia ˈna, na to tatou “here mau” e to tatou “taiva ore.”
4 I roto i te taviniraa: Ua farerei te hoê tuahine i te hoê vahine o te uiui ra no nia i ta tatou mau tiaturiraa noa ˈtu e te taiâ ra oia i te rave i te tahi mau papai. Ua hoˈi faahou te tuahine e farerei ia ˈna e te ripene ra Les Témoins de Jéhovah: un nom, une organisation e ua haamataitai atu i te vahine e ta ˈna tane. No to raua putapû mau, ua farii raua toopiti i te hoê haapiiraa bibilia. Maoti te faaiteraa maitai i horoahia ia raua, ua haamata raua i te faaau i to raua oraraa i nia i te hinaaro o te Atua.
5 Te faaohipa maitai atu â ra anei outou i ta tatou mau ripene video?