Ua aro o ˈna no to ˈna faaroo

E TORU matahiti i teie nei, ua titau-ru-hia e ia tâpûhia o Caridad Bazán Listán, te hoê o te mau Ite no Iehova i Cádiz, Paniora. Ua faatupu te toto i paari i roto ia ˈna i te fiva e ua faataero i to ˈna ravea opereraa toto. A ô atu ai oia i roto i te fare maˈi o to ˈna oire, ua faataa ˈtura oia i to ˈna tiaraa i niuhia i nia i te Bibilia, oia eita o ˈna e farii e ia pâmûhia te toto i roto ia ˈna. Ua farii te mau taote e rave i taua tâpûraa ma te ore e pâmû i te toto i roto ia ˈna. Tera râ, na mua noa ˈˈe oia e arataihia ˈtu ai i roto i te piha tâpûraa, ua ani maira te mau taote ia ˈna e tarima i te hoê parau. Te faaite ra taua parau ra i to ratou hinaaro e ia faaturahia ta ˈna opuaraa no nia i te toto tera râ ia ru noa ˈtu, te hinaaro ra ratou e ia faatia o ˈna e faatupuhia i nia i te mau huru rapaauraa atoa e titauhia.

Tei te fare maˈi atoa te hoê matahiapo o te amuiraa e ua faaara maira hoi te tamaiti a Caridad, e Ite no Iehova atoa hoi, eaha te mau faahopearaa ia tarima o Caridad i te hoê parau mai teie te huru. E farii hoi ta ˈna tarimaraa i te mau taote e pâmû i te toto i roto ia ˈna, ia ru noa ˈtu. Ia tii mai te mau utuutu maˈi ia ˈna e putô atu i roto i te piha tâpûraa, ua faataa ˈtura oia e eita o ˈna e tarima i te parau. Ua faahoˈihia maira oia i roto i to ˈna piha e ua faahepo-uˈana-hia aˈera oia e taui i to ˈna manaˈo.

I muri aˈe i te tahi mau paraparauraa, ua opua aˈera ratou e pii i te haava i te pae no te rapaauraa no te tauaparau maitai ia ˈna, ia nehenehe oia e taui i to ˈna manaˈo, aita râ oia i faufaahia. Ua faataa ˈtura o Caridad e e hapa o ˈna i mua i te Atua ia faatia o ˈna ia ratou e horoa i to ˈna toto. Ua haapapu atura oia e i raro aˈe i te Ture a Mose, ia hamani-ino-hia te hoê vahine, eita o ˈna e faautuahia, ia patoi atu oia ma te tuô i te tauturu. (Deuteronomi 22:23-27) “Aita te mau taote e tâuˈa ra i to ˈu hinaaro e te tamata ra ratou e hamani ino i to ˈu haava manaˈo,” o ta ˈna ïa i parau, “no reira e tia ia ˈu ia patoi mai te huru ra ïa e te hamani ino ra ratou ia ˈu.”

E rave rahi hora i mairi, e inaha ua opua aˈera te mau taote e tâpû ia ˈna ma te ore e pâmû i te toto. I roto i te piha tâpûraa, ua ani aˈera o Caridad e ia faatiahia mai oia e pure ia Iehova. Ua na reira oia, e ua manuïa te tâpûraa.

Tera râ, ua ino faahou te huru o Caridad, e ua opua aˈera te mau taote e ore e faatura i to ˈna mau hinaaro e ua faahepo hoi e ia pâmûhia te toto i roto ia ˈna. No reira, ua faaineine aˈera te hoê taote e te hoê utuutu maˈi e pâmû ia ˈna i te toto. Noa ˈtu to ˈna paruparu, ua patoi atu o Caridad ma to ˈna puai atoa. Ua nehenehe râ te pute e na reira mai te toto i te tahe, e puta ia ˈna. I te pae hopea, no to ˈna haama i te ohipa ta ratou e rave ra, i taui ai te taote i to ˈna manaˈo. “Eita ta ˈu e nehenehe e tomo i roto e teie mea. Eita vau e rave faahou!” ta ˈna ïa i parau.

Ua ora mai o Caridad i taua ati ra e ora roa mai ma te ore e fifi. Ua faahiahia roa te mau taote e te mau utuutu maˈi i to ˈna faaroo e i to ˈna itoito. E ua tupu hoi taua mau mea atoa nei, e 94 matahiti to Caridad.