Te Bibilia—Te hoê aratai ohie no te taata i teie nei tau

“Ua faauruahia mai te papai atoa e te Atua e e nehenehe e faaohipahia ma te faufaa . . . ei aratai i roto i te oraraa o te taata.”—Timoteo 2, 3:16, “Te Bibilia no Ierusalema.”

TE FAATAA ra teie irava i te tumu matamua no reira te Bibilia e riro ai ei taoˈa faufaa no to tatou nei tau. Mea faauruahia mai oia e te Atua. I te mea e ua poiete te Atua ia tatou, aita e taata ê atu ia ˈna o tei ite maitai aˈe i to tatou tino, to tatou feruriraa, to tatou mau manaˈo hohonu, e to tatou mau hinaaro. Ua parau te arii Iseraela ra o Davida no nia i te Atua ra o Iehova e: “Ua ite to mata ia ˈu i to ˈu vai-oti-ore-raa ra; e ua oti to ˈu mau melo atoa ra i te papaihia i roto i te buka na oe.” (Salamo 139:16) Mai te peu e e ite hau aˈe to to tatou Poiete no nia ia tatou, mea papu e e faufaahia tatou ia maimi i ta ˈna mau aˈoraa e to ˈna mau manaˈo e faataa ra nafea tatou e oaoa ˈi e e manuïa ˈi i roto i te oraraa.

Te faaite ra te mau ohipa i itehia mai e e mea ohie ia faaohipa e mea papu atoa te mau faaueraa tumu a te Bibilia no to tatou nei tau. Te faahiti atoa ra ratou i te mau tuhaa taa maitai. Teie e maha hiˈoraa e haapapu ra i te tanoraa o te Bibilia i te mau mahana atoa.

Te mau taairaa i rotopu i te taata e te haerea tataitahi: Te faateitei nei te Bibilia i te mau ture maitatai no te taata taitahi o te nehenehe e faatupu i te mau taairaa au maitai, e te manuïa e o vetahi ê. Ei hiˈoraa, ua faauehia te nunaa o Iseraela e: “Eiaha oe e tahoo, eiaha e tairoiro . . . e aroha râ oe i te taata tupu mai to aroha ia oe iho na.” (Levitiko 19:18) Noa ˈtu e aita tatou i raro aˈe i te ture Iseraela, e tauturu te peeraa i ta ˈna mau faaueraa tumu bibilia ia tatou ia parahi hau noa e to tatou taata-tupu. Ei hiˈoraa, a feruri na e ehia rahiraa fifi o te nehenehe e faaafarohia mai te peu e e tamata te mau taata atoa i te faatupu i te mau huru maitatai i te pae varua e vai ra i roto i te Galatia 5:22, 23: “Area te hotu o te varua ra, o te here ïa, te oaoa, te hau, te faaoromai, te hamani maitai, te maitai, te faaroo, te mǎrû, te hitahita ore. Aore roa e ture e patoi i te reira.”—A faaau e te Roma 8:5, 6.

Tera râ, ia rahi roa anaˈe te mau faateimaharaa o te oraraa, mea pinepine te iria e te feii i te tupu mai. I roto i teie mau huru tupuraa, e paruru te faaohiparaa i te mau parau faaara e vai ra i roto i te Maseli 29:11 e paruru ia tatou i te fifi. “E faahope te maamaa i to ˈna manaˈo i rapae; area te taata paari e tapeapea ïa e ia maoro iti aˈe.”—A faaau e te Maseli 15:1; Mataio 7:12; Kolosa 3:12-14.

E aˈoraa maitai roa teie—tera râ e manuïa anei i roto i te oraraa mau? A rave na i te hiˈoraa o te hoê taata no Farani o tei fifihia e to ˈna huru iria. E rave rahi taime to ˈna farereiraa i te fifi, e ua tapea-atoa-hia oia i te fare auri, no to ˈna faaôraa i roto i te mau taputôraa. I te mea e e taata moto aravihi oia, aita ïa te mau ohipa i maitai atu. I te hoê taime, ua tatamaˈi teie taata e to ˈna metua tane. Hou oia e taa ˈi i te ohipa o ta ˈna e rave ra, hoê noa tupairaa, ua hee to ˈna metua tane i nia i te tahua. Ua peapea ˈtura raua.

I muri aˈe, ua farerei aˈera teie taata i te mau Ite no Iehova e ua haamata ˈtura oia i te haapii i te mau faaueraa tumu a te Bibilia. Ua turai te reira ia ˈna ia hiˈopoa maite i to ˈna haerea i nia ia vetahi ê. Ma te tutavaraa rahi, ua haamata ˈtura to ˈna huru i te taui, e ua riro maira oia ei taata mǎrû aˈe. I te hoê mahana, ua haere atura teie taata e farerei i to ˈna metua tane no te faahau ia raua. Ua maere roa to ˈna metua tane i te mau tauiraa ta ta ˈna tamaiti i rave, e ua ore atura to raua peapea.

Hoê noa teie hiˈoraa i rotopu e rave rahi e haapapu ra i te parau mau o teie faahitiraa a te aposetolo Paulo: “E mea ora hoi te parau a te Atua, e te puai rahi, e te ooi rahi hoi to te reira i to te ˈoˈe mata piti ra, . . . e te hiˈopoa hoi i te manaˈo e te opua o te aau ra.”—Hebera 4:12.

Te oraraa utuafare: Mea oaoa anei to outou utuafare? E rave rahi mau utuafare o te ore e oaoa nei. “Te haamǎtaˈuhia ra te faanahoraa o te utuafare fetii, e ohipa papu ïa te reira,” o ta te hoê vea no Afirika Apatoa, The Natal Witness, ïa e faataa ra ma te parau atoa e “te fanauhia nei te mau tamarii i teie nei tau i roto i te hoê orureraa hau totiale.”

I roto râ i te Bibilia, mea rahi roa te mau aˈoraa ohie o tei faaineinehia no te tauturu i te mau utuafare ia manuïa noa ˈtu e e tupu mai te mau fifi. Ei hiˈoraa, no nia i te tiaraa o te mau tane, te na ô ra te Bibilia e: “E aroha atoa to mau tane i ta ratou iho mau vahine e tia ˈi mai ta ratou i aroha i te ratou iho tino ra.” Ia faaî anaˈe te tane i teie titauraa, mea oaoa na ta ˈna vahine ia pahono atu ma te ‘faatura hohonu atu i ta ˈna tane.’ (Ephesia 5:25-29, 33) Te faataahia ra te mau taairaa i rotopu i te mau metua e te mau tamarii i roto i te Ephesia 6:4: “O outou hoi, e te feia metua ra, eiaha e faaooo atu i ta outou tamarii ia riri, e haapii râ ia ratou e ia paari ma te aˈo a [Iehova] ra.” E faatupu ïa te reira i te hoê huru i roto i te utuafare o te faaohie i te mau tamarii ia pee i te faaueraa a te Bibilia ia auraro i to ratou mau metua.—Ephesia 6:1.

Ua riro noa te mau faataaraa i nia nei ei hiˈoraa no te tatararaa a te Bibilia no nia i te oraraa utuafare. I to ratou fariiraa i te aratairaa a te Atua, e rave rahi o tei itea mai i te manuïa e o te fanaˈo nei i te oaoa i roto i to ratou utuafare. Te faataa ra o Edward, e piti ta ˈna tamarii, i te mau haamaitairaa o ta ˈna i fanaˈo na roto i te faaohiparaa i te mau faaueraa tumu a te Bibilia. “Te amahamaha ra to ˈu faaipoiporaa,” o ta ˈna ïa e haamanaˈo ra. “Aita to ˈu e taime no te atuatu i te mau taairaa papu e ta ˈu mau tamarii. Hoê noa mea o tei tahoê faahou ia matou, o te faaohiparaa ïa i ta te Bibilia e parau ra no nia i te oraraa utuafare.”—Maseli 13:24; 24:3; Kolosa 3:18-21; Petero 1, 3:1-7.

Te oraora-maitai-raa i te pae feruriraa, te pae tino, e te pae no te mau manaˈo hohonu: Ua faaite te mau maimiraa e, i roto i te hoê faito, ua taaihia te oraora-maitai-raa o te hoê taata i te huru o to ˈna oraora-maitai-raa i te pae no te feruriraa e no te mau manaˈo hohonu. “I roto i te mau tapao matauhia o te hepohepo,” o ta Te buka parau paari a te ao (beretane) e faaite ra, “te vai ra te hoê maraaraa o te tupairaa mafatu, te neˈiraa toto teitei aˈe, te etaetaraa o te uaua, te hepohepo o te feruriraa, e te oreraa e haamau i to ˈna feruriraa i nia i te hoê mea.” Te tiaturi nei râ vetahi e ua riro te rave-haavarevare-raa i te tahi mau ohipa haavî uˈana, ei ravea no te tamǎrû i te hepohepo. “E nehenehe te motoraa e riro ei ravea faaitiraa mai i te hepohepo,” o ta te hoê vea no Afirika Apatoa, The Star, ïa e faataa ra. Te faahiti ra oia i te mau parau a te hoê taote i te pae faaetaetaraa tino, o Jannie Claasens: “Mai te peu e ua faaruru te hoê vahine i te hoê mahana teimaha mau, e nehenehe oia e faaore i to ˈna iria na roto i te tupairaa i te hoê pute motoraa.”

E ere anei i te mea maitai aˈe ia haapii i te arai i te tumu mau o te inoino? I roto i te vea Te hepohepo—Te ati no teie nei tau (beretane), te na ô ra te taote Michael Slutzkin e “mea faufaa . . . ia farii i te hepohepo, no te mea e nehenehe e arai e rave rahi mau tumu.” Te na ô râ oia e “e nehenehe te arairaa i te hepohepo . . . e faatupu i te ravea rapaauraa i roto e rave rahi mau tupuraa.”

Te faataa ra te Bibilia i te hoê ravea maitai roa no te arai i te hepohepo: “Eiaha outou e ahoaho noa ˈtu i te mau mea atoa nei; e faaite hua râ i to outou hinaaro i te mau mea atoa nei i te Atua, . . . E na te hau a te Atua, o tei hau ê atu i te ite taata nei, e faaitoito mai i to outou aau, e to outou manaˈo i te Mesia nei ia Iesu.” (Philipi 4:6, 7) Mea rahi te mau vahi maitatai ia araihia te hepohepo mai teie te huru—i te pae tino atoa. Te na ô ra te hoê maseli a te Bibilia e: “Tei te maˈi ore to te aau, o to te tino ïa ora.” (Maseli 14:30) Te na ô ra te tahi atu maseli e: “E maitai to te aau rearea mai te raau maˈi atoa ra; e mǎrô râ te ivi i te aau taiâ.”—Maseli 17:22.

No te tamata i te ape i te hepohepo e te faateimaharaa, te fariu nei vetahi i nia i te avaava, te ava, e te raau taero. Ua faataa-papu-hia te ino o teie faatîtîraa. Inaha, ua faaitoito noa te Bibilia e ia haapae i te “mau viivii atoa o te tino.” (Korinetia 2, 7:1; a faaau e te Maseli 23:29-35.) Ma te papu, ua riro te aperaa i teie mau peu iino ei parururaa ohie i roto i teie nei ao.

Te ohipa, te moni, e te haerea parau-tia: Eita e hoonahia i te hupehupe. “E ore te faatau ra e arote i te tau vero; e taparu râ oia i te tau auhune ra, e e ore ta ˈna e noaa,” o ta te Maseli 20:4 ïa e faaite ra. Area ra, e hoonahia i te rave-puai-raa i te ohipa. “O tei eiâ na, eiaha e eiâ faahou,” o ta te Ephesia 4:28 ïa e faataa ra. Te na faahou ra teie irava e mea au aˈe ia “rave râ to ˈna iho rima i te mea maitai, ia faufaahia ta ˈna ia horoa na tei ere ra.”—A faaau e te Maseli 13:4.

Ua ite anei outou e e nehenehe atoa e faaohipahia te mau faaueraa a te Bibilia i roto i te mau taairaa i te vahi raveraa ohipa? E tano ia “faaroo” te mau rave ohipa, mai te mau “tavini” ra i te mau tau bibilia, “i to [ratou] mau fatu i te tino nei i te mau mea atoa ra.” Area te mau paoti ohipa ra, oia hoi “te mau fatu,” “e horoa ˈtu [ratou] i te mea tia e te au maitai” i ta ratou mau rave ohipa.—Kolosa 3:22-24; 4:1; a faaau e te Petero 1, 2:18-20.

Mea rahi te parau e faahitihia ra i roto i te Bibilia no nia i te mau peu parau-tia i te pae tapihooraa. Noa ˈtu e te ere-rahi-hia ra i teie mahana, mea pinepine te haerea parau-tia i te fariihia e i te auhia ei huru maitai roa. Te reira ta te Bibilia e haafaufaa ra. Ua parau o Iesu e: “O tei haapao maitai i te mea iti ra, ua haapao maitai atoa i te mea rahi: e o tei ore i haapao i te mea iti ra, aore atoa ïa i haapao i te mea rahi.”—Luka 16:10; a faaau e te Maseli 20:10; 22:22, 23; Luka 6:31.

I roto i te hoê fenua no Afirika, e rave-pinepine-hia te eiâ e te taviri i roto i te pu tapihaa taiamani. Ua faaotihia ˈtura e tuu i te hoê taata ê no te faatere. Ua anihia i te mau faatere hau ia tapao i te iˈoa o te feia ta ratou e manaˈo e e tano no teie toroa. I te taime a putuputu ai te apooraa hau no te rave i te hoê faaotiraa, ua faaorehia ˈtura te mau iˈoa te tahi i muri aˈe i te tahi, no to ratou haerea tia ore. E ua tae atura ratou i te iˈoa hopea i nia i te tabula—oia hoi te taata i maitihia e te peretiteni.

“E ere hoi o ˈna no roto i ta tatou pǔpǔ politita!” o ta te hoê faatere hau ïa i patoi.

Ua pahono atura te peretiteni e e ere teie i te hoê toroa politita.

“E Ite no Iehova oia,” o ta te tahi atu ïa i parau.

“No reira hoi oia e maitihia ˈi no teie ohipa,” o ta te peretiteni ïa i parau. Ua na ô atura oia i muri iho e: “Ua ite tatou e e haerea parau-tia to ratou, e te reira mau te huru taata o ta tatou e imi nei. Ua ite tatou e e nehenehe tatou e tiaturi ia ˈna.”

Oia mau, mea pinepine te feia o te pee nei i te mau faaueraa tumu a te Bibilia i te ite e e fanaˈohia ratou i roto i teie nei ao.

A haafaufaa i te paari

Ua tuatapapa noa mai tatou i te hoê hiˈoraa iti o te auraa o te parau e ‘imi i te ite o te Atua.’ (Maseli 2:1-9) Te vai ra te hoê haapueraa aˈoraa papu e te ohie ia faaohipa i roto i te Bibilia. Ua riro noa te mau faaueraa tumu no nia i te mâraa, te itoito i te raveraa i te ohipa, te mau taairaa, te mau taatiraa o te tino, te faataaraa, te aufauraa i te tute, te arairaa i te mau huru taata taa ê, e te faarururaa i te veve ei mau tuhaa o te oraraa e hiˈopoahia ra i roto i te Bibilia. E mau mirioni taata o te haapapu e, te manuïaraa aore ra te toparaa o to ratou oraraa, tei te huru ïa o to ratou faaohiparaa i te mau faaueraa tumu a te Bibilia.

Noa ˈtu e mea papu te aravihi o te Bibilia no teie nei taime, te horoa atoa mai ra oia i te tiaturiraa no te mau haamaitairaa no a muri aˈe. Ei hiˈoraa, te tǎpǔ ra te Bibilia e e fatata roa te mau tumu o te ati e te mauiui i roto i teie nei ao i te titiaifaro na roto i te ohipa e ravehia e te Atua.—Daniela 2:44; Petero 2, 3:11-13; Apokalupo 21:1-5.

No reira, te faaitoito nei matou ia outou ia haapii hau atu â no nia i te Bibilia. Mai te peu e aita ta outou Bibilia, a imi ïa i te tahi. E oaoa roa te feia nenei i teie vea i te tauturu ia outou. Mai te mau taata e rave rahi i fanaˈo i te faaohiparaa i te mau manaˈo ohie no roto mai i te Bibilia, e nehenehe atoa outou e tauturuhia ia farii i te faufaa o te Parau a te Atua, i teie nei iho e e a muri atu.

[Hohoˈa i te api 7]

Ua riro te Bibilia ei aratai ohie no te fanaˈo i te hoê oraraa utuafare oaoa