Mea faufaa anei te Bibilia no tatou?
E OAOA iti rahi to Oxana, te hoê vahine Rusia apî, i to ˈna iteraa ˈtu i te hoê Bibilia e pûpûhia ra e te hoê taata hoo buka na nia i te aroâ i Moscou. Ua maere roa to ˈna hoa o John, no ǒ mai hoi oia i te hoê fenua i reira mea ohie roa ia noaa mai i te mau Bibilia, i te oaoa rahi o Oxana. “Ua hinaaro vau—e taata tiaturi ore hoi i te Atua—e hoo mai i teie Bibilia na ˈna,” o ta ˈna ïa e farii ra. Ua patoi o Oxana i te omuaraa, ua farii râ oia i te ô a John i te pae hopea.
E rave rahi taata, mai ia Oxana, o te hinaaro rahi nei e fanaˈo i te hoê Bibilia. E parau mau iho â râ te reira i roto i te mau fenua i reira ua opanihia te Bibilia e rave rahi matahiti te maoro. Ei hiˈoraa, te rohi nei te feia pia i teie vea no te faaruru i te mau aniraa i te mau Bibilia i roto i te mau repubilita tahito no Rusia, e tae noa ˈtu i roto i te tahi atu mau fenua o te ao nei. A tahi ra te mau taata e rave rahi i roto i teie mau vahi e nehenehe ai e tuatapapa maitai i te Bibilia—e te rahi noa ˈtura te feia e umehia nei e ta ˈna poroi puai.
Te feia faahapa e te feia feaa
I te tahi aˈe pae, i Europa apatoerau iho â râ, te vaiiho-noa-hia ra te Bibilia ia reporepohia i nia i te paepae o te vairaa buka. “Aamu tahito!” o ta vetahi ïa e parau ra, ma te parau atoa e, “Ua papaihia no te hoê anotau tei mahemo. Aita hoê aˈe faufaa no te taata no teie nei tau.” Ua tae roa te mau ekalesiatiko teitei i te faahiti tahaa i te mau parau e faahapa ra i te Bibilia. Te na ôhia ra i roto i te vea no Afirika Apatoa, The Star, e ua parau te arii epikopo no te Ekalesia no Beretane o Desmond Tutu e: “Te vai ra te mau tuhaa o te Bibilia aita to ratou e faufaa tamau.” Ua turai te mau parau mai teie te huru i te mau taata e rave rahi ia uiui e e tia anei ia ratou ia tiaturi i te Bibilia.
Te titauraa i te aratairaa
E tia i te feia faahapa e te feia tiaturi atoa ia farii e, hau atu i te tahi atu tau, te titau nei te ao nei i te mau ravea o te manuïa. “Ia ore te taata e haapii oioi noa nafea ia haavî i te mau tauiraa taue i roto i ta ˈna mau ohipa e tae noa ˈtu i roto i te totaiete taatoa,” o ta Alvin Toffler ïa i papai i roto i ta ˈna buka Hitimahutaraa i mua nei (beretane), “e roohia tatou . . . i te hoê topatariraa rahi.” Ua faahitihia teie faaararaa hau atu i te 20 matahiti i teie nei. Te tupu ra te topatariraa ta Toffler i faahiti na, i teie nei.
A fatata ˈi teie senekele i te hope, aita te mau haereraa i mua i te pae no te mau ravea aravihi apî e te mau tatararaa philosopho a te taata i manuïa i te horoa mai i te hoê ao papu. Ua mono te tiaturi ore i te mau tiaturiraa hopea nei i te hoê faanahoraa o te ao apî, e ua riro roa te oraraa o te mau taata e rave rahi ei aroraa no te ora i te mau mahana atoa.
Te faaite ra te mau numera e ua riro te faataa-ê-raa i te pae faanavairaa i rotopu i te feia moni e te feia veve ei apoo rahi. Te faaite ra te hoê tuatapaparaa apî e e 82,7 % o te faufaa o te ao nei, tei roto ïa i te rima o e 20 % anaˈe o to ˈna huiraatira. E maere anei tatou i te mea e ua parare roa te tamaˈi, te oˈe, te maˈi, te mau patoiraa, e te huanane, i roto e rave rahi mau fenua? Te faatupu nei te faateimaharaa e faaruru i te inoraa o te oraraa i te hepohepo rahi i nia i te huru o te taata. Ei faahopearaa, te topatari atoa nei te niu papu roa ˈˈe o te totaiete, oia hoi te utuafare fetii.
Noa ˈtu e te manaˈo nei e rave rahi mau taata, mai ia Toffler, e tei te taata te hopoia e “maimi i te mau ravea apî roa ia itea mai te papuraa,” ua itehia te haapapuraa e eita te taata e manuïa i te horoa mai i ta ratou iho mau ravea.
Hoê anaˈe ravea
Aita te Bibilia Moˈa, tei haamatahia i te papai tau 3 500 matahiti i teie nei, i taui i roto i te roaraa o te mau senekele. Ua vai aueue ore ta ˈna mau faaueraa tumu. Ei hiˈoraa, ua itehia te parau mau o te faahitiraa a Ieremia 10:23 i teie mahana hau atu i te tahi tau na mua ˈtu: “E ere tei te taata iho to ˈna haerea; e ere hoi tei taua taata e haere ra i te haapao i to ˈna taahiraa.” Mai te peu e eita e tia i te taata ia aratai i to ratou haerea, o vai ïa te nehenehe? Te faataa ra te Bibilia i te Pu aratairaa mau hoê roa: “O vau to Atua ra, o Iehova; o tei faaite ia oe i te mea e maitai ai oe ra; o tei aratai ia oe na te eˈatia maitai ia haere oe ra.”—Isaia 48:17.
Na roto i te mau api o te Bibilia, te horoa maira te Atua ra o Iehova i te haapiiraa no te tauturu ia tatou. Ua î roa ratou i te mau aˈoraa e faaite maira i te eˈa e tia ia tatou ia haere. Mea faufaa ta ˈna mau aˈoraa i teie mahana mai i te tau a papaihia ˈi oia. E tuatapapa te tumu parau i muri nei i te faufaaraa o te Bibilia no to tatou nei tau. I roto e rave rahi mau tuhaa, mai te oraora-maitai-raa e tae atu i te moni, te oraraa utuafare, e te haerea tataitahi, e ite outou e ua riro mau â te Bibilia ei mato aueue ore i roto i te arepurepu o teie nei ao.
[Hohoˈa i te api 4]
Ua riro te Bibilia ei tutau aueue ore i roto i teie ao arepurepu