Te mau Ite no Iehova—Te faanahonahoraa i muri mai i te iˈoa

I TE 6 no atopa 1990, ua hitimahuta te nahoa fatata e 5 000 taata o tei putuputu mai i te Piha Tairururaa a te mau Ite no Iehova i te oire no Jersey, i New Jersey, Hau amui no Marite, no te putuputuraa matahiti a te Watch Tower Bible and Tract Society. Ua faaara maira te taata orero peretiteni, o John E. Barr, i te feia i amui mai e ua matara te hoê ripene video e 55 minuti, oia hoi Te mau Ite no Iehova—Te faanahonahoraa i muri mai i te iˈoa. Teie ïa te ripene video matamua tei faaineinehia e te Taiete, e ere râ hoi te ripene hopea.

Te faaite nei teie ripene video e mea nafea te nunaa o Iehova i te faanahoraahia no te faaite haere i te iˈoa o te Atua e no te haaparare i ‘te parau apî maitai o te basileia.’ (Mataio 24:14) Ua tuuhia te tapao i nia i te pu rahi no Brooklyn, i New York, e te mau fare a te Vahi faaapuraa e faaamuraa animala a te Taiete Watchtower. Hau atu i te 500 000 ripene na roto i te reo Beretane o tei faaineinehia, e te vai ra i teie nei (aore ra fatata roa i te ineine) na roto e 26 reo ê atu.a

Mea nafea to te taata fariiraa i teie ripene?

Mea nafea to te mau taata e ere i te Ite no Iehova fariiraa i teie ripene? Ua papai te hoê taata tapihoo tauihaa e:

“E ripene faahiahia mau teie. Ua maere roa vau i te maramarama e te aravihi o te taviriraa hohoˈa. Mea ohie roa i te moehia ia ˈu e e ripene teie, e manaˈo hoi au e e hohoˈa teata teie. E riro mau â teie ripene ei mauhaa faufaa no te faataa i te opuaraa a ta outou pu no New York. Te haapopou atu nei au ia outou no teie taoˈa hau aˈe i te faahiahia.”—J. J.

Ua faufaa-atoa-hia te feia e haapii nei i te Bibilia e te mau Ite no Iehova na roto i te mataitairaa i te ripene video. Te faataa ra te mau parau i muri nei e eaha te tumu:

“Te haapii nei au i te Bibilia e te hoê taurearea e 20 matahiti e te haere nei oia i te fare tuatoru. Ua haapeapea oia no nia i te inoraa o te huru o te ao nei. I muri aˈe râ i to ˈna mataitairaa i te ripene e to ˈna iteraa i teie mau taeae apî haerea maitai no te Betela, te vai ra ta ratou te hoê opuaraa mau i roto i te oraraa, ua taui roa to ˈna huru taatoa. Ua haere mai oia i ta matou Mahana tairururaa taa ê e ua ani mai oia e haapii i te Bibilia e piti taime i te hebedoma. Ua ani mai te tahi atu taata haapii bibilia, te hoê orometua haapii no te haapiiraa tuarua, i te ripene vidéo no te faaite atu i to ˈna mau fetii. Ua manaˈo hoi ratou e ua riro noa te mau Ite no Iehova ei faanahonahoraa paruparu, te au-ore-hia, e te nainai roa. Ua hitimahuta ratou i te parareraa o ta ratou ohipa na te ao nei e to tatou manuïaraa, auaa maoti o Iehova.”—J. B.

“Eita te mau parau e nehenehe e faaite i to ˈu oaoa i te taime a taˈi ai te hoê vahine o te haapii ra i te Bibilia na muri ia ˈu no to ˈna oaoa e to ˈna mauruuru i muri aˈe i to ˈna mataitairaa i teie ripene vidéo. Ua parau oia ma te taˈi e: ‘Nafea te hoê taata e ore ai e ite e teie te faanahonahoraa a te Atua mau ra o Iehova? Aita vau i ite e te vai ra taua huru nunaa ra.’ E ua parau maira oia e: ‘Te hinaaro nei au e bapetizo.’”—C. D.

“Ua manuïa matou i te faaohiparaa i te ripene video e te feia haapii bibilia. Inapo ra, ua haere mai te tane a te hoê vahine e haapii ra i te Bibilia e ta ˈu vahine. E taata patoi roa oia i te parau mau. Ua mataitai oia i te ripene video. I muri iho, ua ani mai oia i te mau uiraa e ua haere atu oia e te hoê Bibilia e te buka haapiiraa E nehenehe oe e ora e a muri noa ˈtu i roto i te paradaiso i nia i te fenua nei. Ua tutui hoi oia na mua ˈˈe i te mau buka bibilia atoa a ta ˈna vahine i te auahi!”—D. H.

Ua au roa atoa te mau taurearea i teie ripene video, mai ta te mau parau i muri nei e faaite ra:

“E ono matahiti e te afa to ˈu. Mea au roa na ˈu te tuhaa no nia i te mau Bibilia e te taime a haere oioi ai te mau afata.”—K. W.

“Ua parau ta matou mau tamarii apî e mea au aˈe i te mau hohoˈa atoa ta ratou i ite i te afata teata.”—R. C.

“I muri aˈe i to ˈna mataitairaa i te ripene video no te piti o te taime, ua ani maira ta mâua tamaiti e pae matahiti, o tei mataitai maite i te ripene taatoa e, ‘E nehenehe anei e mataitai i te mau mahana atoa?’ Ua parau atoa maira ta mâua tamahine e toru matahiti e, ‘Te hinaaro nei au e haere i te Betela no te hamani i te mau buka!’”—M. E.

“Te na nia iho noa nei ta ˈu mau tamarii, o Robin raua o Shannan, 12 e 9 matahiti, i te mataitai i teie ripene. I muri aˈe i to ta ˈu tamahine hopea mataitairaa i te ripene, ua parau oia, ‘Mea au roa na ˈu ia haere e poro. Mea arearea roa.’ Te manaˈo nei matou e ua ohipa teie ripene video i nia i to matou oraraa utuafare. Mea tamǎrû mau â ia tuama i te afata teata no te mataitai i te hoê porotarama ma te haapeapea ore!”—N. B.

“E 13¹/₂ matahiti to ˈu. Ua faaite mai te ripene video apî ia ˈu e aita vau i haafaufaa mau i te mau ravea faahiahia atoa no ǒ mai ia Iehova ra. E faufaa taa ê mau â te riroraa ei melo no te nunaa o te Atua.”—K. W.

“E 16 matahiti to ˈu, e ua tauturu mai teie ripene video ia ˈu ia haapapu atu â i roto i to ˈu feruriraa e e ohipa teie e ravehia nei e ati noa ˈˈe te ao nei.”—A. M.

“Ua tapao ta mauâ mau tamarii e aita ratou e anaanatae faahou ra i te mau porotarama afata teata no te mea ua ite ratou eaha mau na te hoê faaanaanataeraa teotaratia. Ua haapuai atoa te reira i to ratou hinaaro ia rave i te taviniraa ma te taime taatoa.”—L. M.

Ua putapû atoa te feia atoa mea maoro to ratou riroraa ei Ite no Iehova i te mea o ta ratou i mataitai.

“Mai te peu e ua haaputapû hohonu te ripene video ia tatou te nunaa o Iehova, eaha ˈtu ïa o vetahi ê? Ia rahi anaˈe te haafifiraa o teie nei ao, e rave au i te hoê hora i nia i to ˈu taime e e haere atu vau e mataitai i te Betela ma te ore e faarue i te mahanahana o to ˈu fare!”—K. B.

“I muri aˈe i to ˈu iteraa i te haapao maitai e te papuraa o te ohipa tataitahi e ravehia, e hinaaro roa vau e haere i roto i to ˈu piha no te tapeapea i ta ˈu mau buka bibilia.”—L. P.

Te faaitoito atoa ˈtu nei matou ia outou ia rave i te taime no te mataitai i te ripene video Te mau Ite no Iehova—Te faanahonahoraa i muri mai i te iˈoa. E horoa mai te reira i te hoê hiˈoraa taa ê no nia i te oraraa e e tauturu atoa mai ia tiaturi i te hoê oraraa papu no a muri aˈe.

[Nota i raro i te api]