“Te parau hua nei te mau raˈi . . .”

I roto i te area e 150 mirioni kilometera i te vahi o ta outou e parahi ra i teie nei, te anaana ra te mahana ma te ura o te auahi i roto i te raˈi. Haamorihia mai te hoê atua i roto e rave rahi tausani matahiti, ua riro râ hoi to tatou hoa no te raˈi ra ei haapapuraa no te mana o to ˈna Poiete, “o tei hamani i te mau raˈi e te fenua nei.” (Salamo 115:15) Mea faufaa roa to ˈna anaana e to ˈna mahanahana ia tupu te ora i nia i te fenua. E e î roa tatou i te faahiahia i mua te mau ohipa i itehia mai e te mau aivanaa no nia i te mahana.

Te parauhia ra e te faatupu nei te mahana i te mau faito ito rahi. Te taa ra anei ia outou e aita i naeahia hoê tausani mirioniraa o te veavea e te maramarama o ta ˈna e faatupu ra o te tapae maira i nia i te fenua? Tera râ, te naeahia nei teie faito haihai i tau 240 000 000 000 000 puaahorofenua!

Nafea te mahana ia hamani i teie rahiraa ito? Na roto ïa i te hoê auahi ito rahi i roto i to ˈna pu o te faatupu nei i te ito na roto i te faauraraa tau 3.6 mirioni tane tuea hydrogène i te mau tetoni atoa. Auaa râ hoi no te huitaata nei, ua navai maitai te taoˈa ura i roto i te mahana no te tamau noa i te ohipa e rave rahi miria matahiti.

Te faatupu nei te tahi atu mau mea i itehia mai e te mau aivanaa i te mau uiraa. Ei hiˈoraa, te hautiuti tamau noa ra te mahana, mai te hoê api auri e tupaipaihia e te hamara. No te aha? A hiˈo atoa na: Ua riro te pu ura o te mahana ei tuhaa ǎhu roa ˈˈe, e atea noa ˈtu te hoê tuhaa i teie pu, e hau atu ïa to ˈna toetoe. Teie râ, ia naeahia te tuhaa rapaeau o te reva o te mahana, oia hoi te korona, e taui ïa te reira. Mea ǎhu aˈe te korona i te mau tuhaa piri atu i te pu ura. No te aha?

Hau atu, ia ohu anaˈe te mahana—mai te fenua atoa—e ohu te mau tuhaa taa ê i te mau vitivitiraa taa ê. Ei hiˈoraa, e ohu te tuhaa nia ˈˈe ma te oioi aˈe i te mau tuhaa no roto mai. No te aha? E mea nafea hoi te reira e tupu ai? Te vai atoa ra te mau tafetafeta o te mahana. E haere e e hoˈi mai teie mau tafetafeta i nia i te mahana ia au i te hoê tereraa tamau i nia i te hoê maororaa e 11 matahiti. No te aha ratou e taui ai ia au i teie tereraa tamau?

Noa ˈtu e mea rahi atu â te tia ia haapii no nia i te mahana, e turai te mau mea o ta tatou i ite ê na ia tatou ia mǎtaˈu i te Poiete ra o Iehova. I te mau taime atoa tatou e ite ai i te mahana, te faahaamanaˈohia ra tatou e “te parau hua nei te mau raˈi i te hanahana o te Atua! e te faaite nei te reva i te ohipa a tana rima!”—Salamo 19:1.