Ua faahaehaa vau ia ˈu e ua itea mai ia ˈu te oaoa

I TE matahiti 1970, e 23 matahiti to ˈu e e vahine nounou tiaraa atoa. E tiaraa faatere to ˈu i ta ˈu vahi raveraa ohipa i te hoê pu haapao pereoo i Ivrea, i Italia. Te hinaaro ra vau e riro ei taata teitei. Tera râ, te hepohepo ra vau e te peapea atoa ra. No te aha?

Te haamâuˈa ra ta ˈu tane i to ˈna taime i roto i te mau vahi inuraa ava no te hauti i te pere e to ˈna mau hoa, e ua vaiiho noa oia e na ˈu e amo i te rahiraa o te mau hopoia utuafare. Ua ino roa ˈˈera to mâua faaipoiporaa. E tatamaˈi noa na mâua no te tahi mau ohipa haihai roa. Ua ahoaho roa to ˈu feruriraa i te mau manaˈo iino.

‘Aita e taata e anaanatae ra ia oe,’ o ta ˈu ïa e manaˈo na. ‘Te imi noa nei ratou i te ravea ia faufaahia ratou i to oe tiaraa.’ E parau na vau ia ˈu iho: ‘Aita e Atua, no te mea ahiri e te vai ra oia, eita oia e faatia i te mauiui e te ino rahi. Te oraraa, o te hoê noa ïa hororaa e aratai tia ˈtu i te pohe.’ Aita vau e taa ra i te tumu o teie huru tupuraa.

Te haamata ra te mau ohipa i te taui

I te hoê mahana i te matahiti 1977, ua patoto maira e piti Ite no Iehova i to mâua opani. Ua titau aˈera ta ˈu tane o Giancarlo ia raua ia tomo mai, e ua haere atura ratou i roto i te piha fariiraa taata no te tauaparau. Ua hinaaro hoi oia e faariro ia raua ei feia tiaturi e ua tupu noa mai te mau mea mai ia ˈna ra te huru, tera râ, na raua i faataui i to ˈna manaˈo!

I muri iho, ua haamata ˈtura o Giancarlo i te taui i to ˈna oraraa. Mea faaoromai aˈe oia, e ua horoa hau atu â oia i te taime e te ara-maite-raa no ˈu nei e no ta mâua tamahine. Ua tamata oia i te paraparau ia ˈu no nia i te mau mea o ta ˈna e haapii ra, tera râ, e tâpû noa vau i te tauaparauraa ma te taora parau atu.

I te hoê mahana, a haere mai ai te mau Ite i te fare, ua parahi mai au e ua faaroo atura ia raua. Ua paraparau raua no nia i te hopea o teie faanahoraa o te mau mea e no nia i te Basileia o te Atua, te Paradaiso i nia i te fenua nei, e te tia-faahou-raa o te feia pohe. Ua hitimahuta roa vau! Aita vau i taoto e toru po! Te hinaaro ra vau e ite hau atu â, tera râ no to ˈu teoteo, aita vau i uiui atu i ta ˈu tane. I te hoê râ mahana, ua parau maira oia ia ˈu ma te papu e: “I teie mahana, e faaroo mai oe i ta ˈu parau. E nehenehe ta ˈu e pahono i ta oe mau uiraa atoa.” E ua faataa maira oia i te mau parau mau a te Bibilia.

Ua faaite mai o Giancarlo e o Iehova te iˈoa o te Poiete, e o te here To ˈna ateributi matamua, e ua tono mai Oia i Ta ˈna Tamaiti ei hoo ia noaa ia tatou te ora mure ore, e i muri aˈe i te haamouraa o te feia iino i Aramagedo, e faatia faahou mai o Iesu Mesia i te feia pohe i roto i ta ˈna Faatereraa hoê tausani matahiti. Ua parau mai oia e e haere tia ˈtu te feia e faatiahia mai i te faito taata tia roa i te pae feruriraa e i te pae tino e e nehenehe ta ratou e ora e a muri noa ˈtu i roto i te Paradaiso i nia i te fenua nei.

I te mahana i muri iho, ua haere atura vau na muri i ta ˈu tane i te Piha no te Basileia no te taime matamua. I muri aˈe, ua na ô atura vau ia ˈna: “Te here nei teie mau taata te tahi e te tahi. Te hinaaro nei au e tamau noa i te haere mai i ǒ nei no te mea e feia oaoa mau ratou.” Ua haamata ˈtura vau i te haere tamau atu i te mau putuputuraa, e ua faaterehia ˈtura ta ˈu haapiiraa bibilia. Ua feruri maite vau i te mea o ta ˈu e haapii ra e ua taa ˈtura ia ˈu e ua itea mai ia ˈu te nunaa mau o te Atua. I te matahiti 1979, ua faataipe ta ˈu tane e o vau iho nei i to mâua pûpûraa ia Iehova na roto i te bapetizoraa.

Te taviniraa ma te taime taatoa

I te hoê tairururaa haaati tei tupu i muri iho i taua matahiti ra, ua horoahia mai te hoê oreroraa parau e faaitoito ra i te ohipa pororaa ma te taime taatoa. Ua putapû roa ˈˈera to ˈu hinaaro e rave i teie taviniraa, e ua faataa ˈtura vau i teie ohipa ia Iehova na roto i te pure. Tera râ, ua hapû atura vau, e aita ˈtura ta ˈu opuaraa i manuïa. I roto i na matahiti e maha i muri iho, e toru ta mâua tamarii i noaa mai. E piti o tei roohia i te mau fifi o tei haamǎtaˈu i to raua oraraa i te mau taime taa ê. Auaa râ hoi, ua ora mai raua.

I teie nei, aita ta ˈu e nehenehe faahou e faataime i ta ˈu mau opuaraa no te tavini ma te taime taatoa. Ua vaiiho vau i ta ˈu ohipa no te haamau maitai aˈe i to ˈu feruriraa i nia i ta ˈu mau hopoia ei vahine e ei metua vahine. Ua faanaho aˈera mâua ta ˈu tane i te ora i nia i te hoê anaˈe moni ohipa, oia hoi te auraa, e haapae i te mau taoˈa faufaa ore. Teie râ, ua haamaitai rahi mai Iehova ia matou, ma te ore e vaiiho ia matou i roto i te veve aore ra i te ereraa.

I te matahiti 1984, ua haamata ˈtura ta ˈu tamahine, e 15 matahiti to ˈna i reira e tei bapetizo-apî-hia, i te tavini ma te taime taatoa ei pionie. I taua taime ra, ua nominohia ta ˈu tane ei matahiapo. E o vau? I te mea e aita ta ˈu e nehenehe e riro ei pionie i taua taime ra, ua haamau aˈera vau i te tapao e horoa e 30 hora i te avaˈe i roto i te ohipa pororaa. Ua naeahia ia ˈu teie tapao e ua manaˈo atura vau: ‘Maitai roa! Mea itoito roa oe.’

Ua riro faahou râ te teoteo ei fifi no ˈu. (Maseli 16:18) Ua manaˈo noa vau e mea maitai roa vau e aita e faufaa ia haere faahou atu â vau i mua i te pae varua. Ua topatopa ˈtura vau i te pae varua, e ua haamata ˈtura vau i te erehia i te mau huru maitatai o tei noaa mai ia ˈu. Ua horoahia maira te aˈo o ta ˈu e titau ra.

I te matahiti 1985, e piti tiaau ratere e ta raua vahine o ta matou i farii i to matou fare, i to ratou haereraa mai e farerei i ta matou amuiraa. Ia ˈu i ite i teie mau kerisetiano haehaa o tei haapae ia ratou iho, ua turai te reira ia ˈu ia feruri maite. Ua rave au i te mau maimiraa i nia i te tumu parau o te haehaa, ma te faaohipa i te mau buka a te Taiete Watch Tower. Ua feruri au i te haehaa rahi ta Iehova i faaite i roto i to ˈna mau taairaa e te mau taata hara. (Salamo 18:35) Ua ite au e e tia ia ˈu ia taui i to ˈu huru feruriraa.

Ua taparu aˈera vau ia Iehova ia tauturu mai ia ˈu ia faatupu i te haehaa ia nehenehe au e tavini ia ˈna mai ta ˈna e hinaaro ra e ia aratai ia ˈu ia faaohipa i te mau ô o ta ˈu e fanaˈo ra no te faahanahana ia ˈna. Ua faaî atura vau i te hoê parau aniraa no te taviniraa pionie, e ua haamata ˈtura vau i te tavini ia ˈna i roto i te taviniraa ma te taime taatoa i te avaˈe mati 1989.

E nehenehe ta ˈu e parau i teie nei e te fanaˈo ra vau i te oaoa mau e i to ˈu faahaehaaraa ia ˈu, ua rahi atu to ˈu oaoa. Ua itea mai ia ˈu te tumu mau no te oraraa—te tautururaa i te feia e erehia ra ia ite e aita Iehova, te Atua mau, i atea roa i te feia o te imi ia ˈna.—Faatiahia e Vera Brandolini.

[Hohoˈa o Vera Brandolini i te api 26]