Ua roaa ia ˈna te ohipa ta ˈna i opua
Taa ê atu i te rahiraa o te mau taurearea aita ta ratou e ohipa e titau ra i roto i to ratou oraraa, ua roaa i te hoê potii apî italia te ohipa ta ˈna i opua, e i roto i teie tumu parau te faatia ra oia i te ohipa ta ˈna i rave.
FATATA hoê avae toe e tiahia ˈi to ˈu 14 matahiti. O vau te matahiapo i roto e maha tamarii. Ua amahamaha to ˈu utuafare i te pae haapaoraa no te mea e ere to ˈu metua tane i te Ite no Iehova.
I te riroraa mai to ˈu mama ei Ite, tau avae noa to ˈu. I reira iho â, to ˈna raveraa ma te anaanatae mau i ta ˈna hopoia oia hoi te haapiiraa i ta ˈna mau tamarii “ia paari ma te aˈo a te Fatu ra.” (Ephesia 6:4; Maseli 22:6.) Te haamanaˈo ra vau i to ˈu vai-tamarii-rii-raa ra, ua haapii tamau oia i te Bibilia ia matou, ua tauturu oia ia matou ia faaineine i te mau putuputuraa e ua haere atoa matou na muri ia ˈna i te mau hebedoma atoa i roto i te taviniraa i tera e tera fare. Ua poro atoa matou i te fare haapiiraa.
I to matou iho â apîraa ra, ua faaitoito o mama i te faatupu i roto i to matou mafatu i te hinaaro ia riro mai ei pionie, oia hoi tavini i te taime taatoa, na roto i te taioraa mai ia matou i te mau aamu o te mau Ite o tei riro ei pionie i roto e rave rahi mau matahiti. Hau atu â, ua horoa mai oia i te hiˈoraa maitai. Inaha, e ore roa o mama e ani mai ia matou i te tahi ohipa ta ˈna e ore e rave.
Mai te peu e i roto e rave rahi taime te faaroo mai nei te mau taata ma te aau tae i te hoê tamarii tei patoto atu i to ratou opani, i te tahi râ taime e riri roa ratou i te taata paari e aratai ra ia ˈna. I te hoê taime, te poro ra vau i tera e tera fare e te hoê matahiapo; e 8 aore ra e 9 to ˈu matahiti i reira. Ua iriti maira te hoê vahine i to ˈna opani e ua haamata ˈtura vau i te paraparau. Ma te au ore mau, ua parau atura oia i te taeae: “Aita outou e haama i te faaue i teie mau tamarii rii ia haere e poro!” Ua pahono oioi atura vau ia ˈna: “Aita, e mama, mai te peu tei ǒ nei au, no te mea ïa ua hinaaro vau i te reira.” Hitimahuta roa ˈtura o ˈna e ua rave oia i te mau vea ta ˈu i pûpû atu.
I te 10raa o to ˈu matahiti, ua rave au i te taviniraa ma te taime taatoa i te tau faafaaearaa haapiiraa i te avae tiurai, aita â hoi au i bapetizohia ˈtura. No te raveraa i te reira, ua haapae vau i te hoê mea iti: eita vau e haere faahou e hopu i te miti. Aita roa ˈtu vau i tatarahapa noa ˈˈe, no te mea ua ite au i te hoê oaoa rahi mau i te hopearaa o taua avae ra.
Ua bapetizohia vau i te avae tiunu, i te 12 e te afaraa o to ˈu matahiti. I te tau veavea i muri iho, ua rave faahou vau i te taviniraa pionie. I muri iho, maoti te hoê porotarama maitai, ua nehenehe vau e poro rahi atu â i te tau faafaaearaa haapiiraa no Noela. Ua faaitoito vau no te mea i te omuaraa o te matahiti haapiiraa, ua faatupu vau i te hoê opuaraa. I muri aˈe i to ˈu aparauraa e o Iehova na roto i te pure, ua opua vau e faaoti ma te maitai i ta ˈu matahiti haapiiraa e ia noaa iho â ta ˈu parau tuite B.E.P.C., e i muri aˈe e rave ïa vau i te taviniraa ma te taime taatoa.
Mai to ˈu iho â opuaraa e na reira, ua farerei aˈera vau e rave rahi mau fifi. No te mea hoi ua noaa ia ˈu i te fare haapiiraa te tahi mau nota maitatai i roto i te tahi mau tuhaa haapiiraa, ua faahepo te mau orometua ia ˈu ia tamau noa â i ta ˈu haapiiraa. E mea fifi mau teie tamataraa no te mea mea au roa na ˈu te haapiiraa. Tera râ, aita i moehia ia ˈu te opuaraa ta ˈu i faatupu, te parau ta ˈu i tǎpǔ ia Iehova.
I te iteraa te tahi atu mau orometua haapii e te hinaaro ra vau e faaea i te haapiiraa, ua haapeapea rahi atu â ratou ia ˈu. Ua na reira atoa te hoê orometua haapii o tei ore hoi i haapao noa mai ia ˈu. No te haapapuraa i te reira, ua horoa vau i te mau matahiapo ra ta ˈu aniraa no te taviniraa pionie e iva avae na mua ˈˈe. Oia mau, aita te mau tamataraa i iti mai, tera râ mai taua taime ra aita vau i tâuˈa faahou atu i te reira. Ua tauturu atoa mai ta ˈu opuaraa papu maitai ia faaruru atu i te mau faaheporaa a ta ˈu mau hoa haapiiraa i nia ia ˈu.
Ua hope te haapiiraa i te avae tiunu, e i te avae tiurai ua riro mai au ei pionie tauturu. Ua haamaitai-rahi-hia vau; tera ra ua tupu tauê mai te hoê fifi ê atu. Te tihepuhia ra te taata rave ohipa i te fare hamaniraa tauihaa i reira to ˈu metua tane e rave ai i te ohipa, e te hinaaro ra hoi oia ia rave vau i te ohipa i reira i te mahana taatoa. Ua taupupu roa vau, ua tauturu maira o Iehova ia ˈu. Oia mau, no te mea hoi aitâ i naeaehia ˈtura to ˈu 14 matahiti, aita ïa vau i ravehia e teie fare.
I te avae atete, ua parau mai to ˈu metua tane e: “I te avae atopa, e haere mai oe e rave i te ohipa na muri ia ˈu.” Mai te peu e haere noa ˈtu vau i taua fare hamaniraa ra, e ore roa ta ˈu e nehenehe faahou e rave i te taviniraa ma te taime taatoa; na nia aˈe, mea tapǔpǔ te ohipa, e mairi atoa ïa vau i te mau putuputuraa. Ua faaite vau i teie ohipa ia Iehova na roto i te pure.
Ua pahono oioi mai Iehova — fatata i taua iho â taime ra ua itehia ia ˈu te hoê ohipa afa mahana! No reira, ua nehenehe au e riro mai ei pionie ma te taime taatoa i te mahana matamua no setepa 1987. No to ˈu oaoa rahi, aita e itehia ia ˈu te mau parau no te faataa i te oaoa o ta ˈu e ite nei. Ua ite au e te turu maira o Iehova ia ˈu e te pure nei au ia tamau noa oia i te haamaitai i ta ˈu mau tutavaraa. — Na te hoê o ta matou mau feia taio.