Te faatia ra te feia poro i te Basileia

Ua anaana to ratou maramarama i Inidia

TE POROHIA ra te parau apî maitai o te Basileia i Inidia e 11 524 mau Ite oaoa. (Mataio 24:14) Ua riro te mau 1 066 taata o tei bapetizohia i te matahiti taviniraa 1991 ei feia poro i te Basileia, o tei faaanaana i to ratou maramarama i mua ia vetahi ê. Ua oaoa roa ratou i te iteraa e 28 866 feia o tei haere mai i te oroa Haamanaˈoraa i te poheraa o te Mesia!

◻ E rave rahi o tei faaroo i te tiaturiraa o te Basileia no te taime matamua na roto i te tahi pororaa i te taime faanaho-ore-hia. Ei hiˈoraa, ua paraparau atu te hoê Ite no nia i te Basileia i to ˈna mau hoa rave ohipa, e tamuta atoa ratou. Ua farii te hoê hoa ohipa e ua haamata atoa ˈtura oia i te faaanaana i to ˈna maramarama i mua i to ˈna mau fetii e to ˈna mau hoa. Ma te oaoa, ua faaite atoa ˈtu ratou i teie poroi faahiahia o te Basileia ia vetahi ê. Ia au i te mau tabula, i roto noa i tau matahiti, ‘hau atu i te 30 taata o tei farii i te parau mau.’ Ua haamaitai Iehova ia ˈna e i to ˈna mau taeae apî i te pae varua no to ratou faaanaanaraa i to ratou maramarama.

◻ Ua faaanaana te hoê taeae apî no te tahi atu amuiraa i to ˈna maramarama na roto i te pororaa i te taime faanaho-ore-hia i te tahi atu mau taurearea haere haapiiraa. Ua anaanatae mai vetahi i te tiaturiraa o te Basileia, e ua faataa pinepine oia i te Bibilia ia ratou e mairi roa ˈtu i te tuiraa po. Ua rave aˈera hoê, e katolika oia, i te hoê tiaraa papu no te parau mau noa ˈtu e ua faaarahia oia e te perepitero e e faautuahia oia mai te peu e e tamau noa oia i te haere na muri i taua Ite ra. Ua papu râ i taua taurearea ra e te haapii ra te mau Ite ia ˈna i te parau mau a te Bibilia, e ua tamau noa oia i te haapii. I te pae hopea, ua bapetizo oia e te tavini ra oia i teie nei ei tavini tauturu i roto i te amuiraa. Te oaoa nei oia i te tiaturiraa no roto mai i te maramarama faahiahia o te parau mau!—Roma 12:12.

◻ Te tahi atu o tei faaroo i teie taurearea Ite, ua matauhia ïa oia ei taurearea tiaturi ore i te Atua o tei faaooo noa na i te feia o te tiaturi ra i te Atua, tera râ, i te hoê mahana, ua apiti mai oia i te aparauraa e ua ani oia e rave rahi mau uiraa. Ua maere roa oia i te horoaraahia mai te mau pahonoraa papu i ta ˈna mau uiraa atoa e ua faaoti aˈera oia e ua riro mau â te Bibilia ei Parau na te Atua. Ua haere noa oia i mua i roto i ta ˈna haapiiraa bibilia e ua bapetizohia ˈtura o ˈna. Ua patoi to ˈna metua tane ia ˈna, no roto hoi oia i te faaroo Hindou, e ua tiavaru roa oia ia ˈna i to ˈna fare. Tera râ, ua haamauruuruhia te tiaraa papu o teie taurearea no te parau mau i te taime a farii ai e piti o to ˈna mau taeae e e piti o to ˈna mau hoa i te parau mau e i to ratou bapetizoraahia. Te tavini ra hoê o to ˈna mau taeae i teie nei i te amaa no Inidia.

◻ Ua apiti atoa mai te hoê taata faanaho ohipa i te fare haapiiraa i roto i te mau aparauraa e te taurearea Ite no Iehova. E taata puhipuhi avaava oia e e taata inu hua atoa i te ava. I te hoê taime, ua hinaaro oia e taparahi e piti taurearea haere haapiiraa o tei haapii i te parau mau e taua Ite ra. No te mea ua farii raua i te parau mau, aita raua i amui atu i roto i te faaearaa ohipa a te fare haapiiraa e aita atoa i farii i te horoa i to raua toto i roto i te titauraa toto faanahohia e taua taata faanaho ohipa ra. Te oaoa nei teie taata apî i teie mahana i te riroraa ei Ite no Iehova o te amo ra i te maramarama.

◻ Ia taiohia te taatoaraa, ua tauturu te taurearea matamua o tei faaanaana i to ˈna maramarama e 15 o to ˈna mau hoa ia pûpû ia ratou no Iehova e ia bapetizo na roto i te pororaa ˈtu ia ratou ma te faanaho-ore-hia.

Mea oaoa roa ia ite e rave rahi mau taata i roto i teie fenua rahi ia farii i te tiaturiraa a te Bibilia no nia i te ao apî a te Atua e ia apiti mai i roto i te autaeaeraa na te ao atoa nei ta te Atua ra o Iehova e haaputuputu nei no te ora e a muri noa ˈtu i raro aˈe i to ˈna Basileia.