‘Ia anaana to outou maramarama’
1 Tei roto te ao i te poiri morare e pae varua. Na roto i te faaiteraa i te mau “parau faufaa ore” o te poiri, e tauturu te maramarama o te parau mau ia tatou ia ape i taua mau ofai turori ra. No reira ïa te aˈoraa a te aposetolo Paulo ‘ia au to tatou haerea i te tamarii maramarama.’—Eph. 5:8, 11.
2 Mea taa ê roa “ta te [maramarama] i faatupu” i te poiri o te ao. (Eph. 5:9; MN) E faatupuhia te reira na roto i te oraraa i te hoê oraraa o te riro ei hiˈoraa faahiahia o te Kerisetianoraa, na roto i te riroraa ei huru taata ta Iesu e farii, na roto atoa i te faaiteraa i te tahi mau huru maitatai mai te haavare ore, te ati-maite-raa taatoa e te anaanatae i te parau mau. E tia ia itehia taua hotu ra i roto i ta tatou mau ohipa o te mau mahana atoa e i roto i ta tatou taviniraa atoa.
3 E anaana anaˈe i te mau taime atoa: Ua parau Iesu i ta ˈna mau pǐpǐ e: ‘Ia anaana to outou maramarama i mua i te aro o te taata nei.’ (Mat. 5:16) Mai ia ˈna, e faaite tatou i te maramarama o Iehova na roto i te pororaa i to ˈna Basileia e ta ˈna mau opuaraa. E anaana tatou mai te mau tiarama ia haere tatou e hiˈo i te taata i ǒ ratou e ia haaparare tatou i te parau mau i te vahi raveraa ohipa, i te fare haapiiraa, i to tatou vahi faaearaa, i te mau vahi atoa e nehenehe ai tatou.—Phil. 2:15.
4 Ua faaite Iesu e e riri vetahi i te maramarama. (Ioa. 3:20) Eita ïa tatou e toaruaru e aita te rahiraa o te taata e farii e ia ô “te maramarama o te evanelia hanahana o te Mesia” i roto ia ratou. (Kor. 2, 4:4) Eita Iehova, o te hiˈo i roto i te mau mafatu, e hinaaro i te feia e rave i te parau-tia ore i rotopu i to ˈna nunaa.
5 Ia pee tatou i te mau eˈa o Iehova, e fanaˈo tatou i te maramarama pae varua, ta tatou atoa hoi e nehenehe e faatae atu ia vetahi ê ra. Na roto i te hiˈoraa i to tatou haerea, e taa ia vetahi e ‘e maramarama ora to tatou,’ o te turai hoi ia ratou ia taui ia riro mai ratou iho ei mau taata hopoi i te maramarama.—Ioa. 8:12.
6 Na roto i te vaiihoraa i to tatou maramarama ia anaana, te arue ra tatou i te Atua Poiete. Te tauturu atoa ra tatou i te mau taata aau rotahi ia ite ia ˈna e ia noaa te tiaturiraa o te ora mure ore. (Pet. 1, 2:12) I te mea e tei ia tatou ra te maramarama, e faaohipa anaˈe i te reira no te tauturu i to tatou taata-tupu ia haere mai i rapae i te poiri pae varua e ia faatupu i te mau ohipa a te maramarama.