‘Ia anaana to outou maramarama’
1. Eaha ta tatou fanaˈoraa taa ê e faaite?
1 Mai te poipoi e tae roa ˈtu i te po, e faahanahana te mau hihi mahana e maramarama maira i te Atua ra ia Iehova. Area o tatou, te titau maira Iesu ia noaa te “maramarama ora.” (Ioa. 8:12) E fanaˈoraa taa ê e e hopoia atoa te reira. Ua faaue Iesu: “To outou maramarama, ia anaana ïa i mua i te aro o te taata,” oia hoi ia fanaˈo vetahi atu. (Mat. 5:16) I roto i teie nei ao poiri mau i te pae varua, ia faaitehia teie maramarama mai tei ore i hinaarohia aˈenei! Mai te Mesia, e nafea ia faaanaana i to tatou maramarama?
2. Mea nafea to Iesu faaiteraa i te faufaaraa ia faaite i te maramarama pae varua?
2 Ma te poro: Ua faaohipa Iesu i to ˈna taime, puai e ta ˈna mau faufaa ia ite te taata i te maramarama o te parau mau i te mau vahi atoa, i ǒ ratou anei, i te vahi taata aore ra i nia i te mouˈa. Ua taa ia ˈna e e faufaa-maoro-hia ratou i te maramarama mau pae varua. (Ioa. 12:46) No te farerei hau atu â taata, ua faaineine Iesu i ta ˈna mau pǐpǐ ia riro ei “maramarama o teie nei ao.” (Mat. 5:14) E anaana to ratou maramarama ma te hamani maitai i to ratou taata-tupu e te faaite i te pue parau mau pae varua.
3. E nafea ia faaite i to tatou mauruuru mau no te maramarama o te parau mau?
3 Te haapao maite ra te nunaa o te Atua i te hopoia ia haa mai “te tamarii o te maramarama” e te poro ra ratou i te vahi taata. (Eph. 5:8) E nehenehe te taio-noa-raa i te Bibilia e i te tahi atu â papai Kerisetiano i mua i te taata, i te ohipa anei aore ra i te haapiiraa, e faatupu i te tahi tauaparauraa Bibilia. Mai tera to te hoê tuahine apî haamataraa i te hoê haapiiraa Bibilia e vaiihoraa i te buka no 12 hoa haapiiraa!
4. No te aha e titau-atoa-hia ˈi te haerea maitai?
4 Ma te haerea maitai: E anaana to tatou maramarama maoti atoa to tatou haerea o te mau mahana atoa. (Eph. 5:8, 9) I te ohipa, i te haapiiraa e i te tahi atu vahi taata, e ite-maitai-hia to tatou haerea Kerisetiano a nehenehe atu ai tatou e faaite i te pue parau mau Bibilia. (Pet. 1, 2:12) Ei hiˈoraa, no te haerea maitai o te hoê tamaroa e pae matahiti, ua farerei roa ˈtu to ˈna orometua i to ˈna na metua. Ua parau oia: “Aita vau i ite aˈenei i te hoê tamarii e tiaturi papu ra i te faufaaraa ia haa ia au i te mea tia!” E aratai ta tatou taviniraa e to tatou haerea maitai i te taata i te “maramarama ora” e e faahanahana i to tatou Atua.