Ua apiti atu vau i te tau auhune

FAATIAHIA E WINIFRED REMMIE

“TE RAHI mau nei te auhune, te iti nei râ te feia e rave.” Ua faahiti to tatou Fatu ra o Iesu i teie mau parau no to ˈna aroha hohonu no te feia o tei faaerehia e tei faaruehia mai te mau mamoe aore e tiai ra. Ua ite atoa vau i teie huru putapû hohonu, e i roto i na matahiti e 40 i mairi aˈenei, ua tutava vau i te pahono atu i te titauraa a te Fatu e rave i te ohipa auhune.—Mataio 9:36, 37.

Ua fanauhia vau i Afirika Tooa o te râ i roto i te hoê utuafare e hitu tamarii, e mau tamahine anaˈe. Mea maitai roa to matou nau metua, mea etaeta atoa râ raua; e feia faaroo roa atoa raua. Eiaha matou ia mairi i te pureraa e te haapiiraa Sabati i te mau hebedoma atoa. Aita râ te reira i haafifi ia ˈu no te mea mea au roa na ˈu te mau ohipa i te pae varua. Inaha, i te 12raa o to ˈu matahiti, ua nominohia vau no te aratai i te mau pǔpǔ haapiiraa Sabati.

To ˈu faaipoiporaa e to ˈu revaraa

I te matahiti 1941, i te 23raa o to ˈu matahiti, ua faaipoipo atura vau ia Lichfield Remmie, e taata haapao buka oia i te piha ohiparaa a te hau. E faufaa ta mâua i te pae materia, tera râ, no to mâua hiaai e ratere haere e to mâua hinaaro e haapue i te mau taoˈa materia, ua haere atura mâua i Liberia i te matahiti 1944 ra. Ua tupu atura te hoê ohipa faufaa roa i roto i te oraraa o ta ˈu tane, e i muri iho i roto i to ˈu iho oraraa, i te matahiti 1950 i to ˈna farereiraa ia Hoyle Ervin, te hoê mitionare a te mau Ite no Iehova. I muri aˈe e toru noa hebedoma haapiiraa, ua haamata ˈtura ta ˈu tane i te apiti atu i roto i te pororaa.

Ua riri roa vau i te taime a faaea ˈi ta ˈu tane i te haere i te pure. Inaha hoi, e Porotetani faaroo roa o ˈna e mea faatura atoa o ˈna i te tau Haapaeraa maa. Te taime matamua to ˈu iteraa ˈtu ia ˈna i te haereraa e poro, e ta ˈna pute i nia i te rima, ua hae roa vau. “Eaha hoi to oe?” o ta ˈu ïa i ani atu. “Te hoê taata rahi mai ia oe o te haere e poro na muri i teie mau taata maamaa!” Ua vai hau noa oia e te aueue ore i to ˈu taora-parau-raa ˈtu ia ˈna.

I te mahana i muri iho, ua haere maira te Taeae Ervin i to mâua fare no te haapii e o Lichfield. Mai ta ˈu i matau, ua tia noa ˈtu vau ma te faaatea mai ia ˈu. No te reira paha te Taeae Ervin i ani mai ai ia ˈu ahiri e aita vau i ite i te taio. Eaha? Aita vau i ite i te taio? Te faaino maira paha o ˈna ia ˈu! E faaite atu vau ia ˈna i to ˈu maramarama! E faahapa tahaa ˈtu vau i teie haapaoraa hape!

To ˈu fariiraa i te parau mau

Aita i maoro i muri iho, ua ite atura vau i te buka ra Ia riro te Atua ei parau mau (beretane) i nia i te amuraa maa o te piha faafaaearaa. ‘E upoo parau maamaa mau â teie,’ o ta ˈu ïa i manaˈo. ‘E parau mau iho â hoi te Atua, e ere anei?’ I to ˈu heheuraa i teie buka, ua ite atura vau i te tahi atu tumu no te amuamu. Te parauhia ra hoi e aita to te taata e nephe, tera râ, o o ˈna iho te nephe! E nephe atoa hoi te mau urî e te mau piifare! Ua inoino roa vau i teie nei parau. ‘E haapiiraa maamaa mau teie!’ o ta ˈu ïa i manaˈo.

I te hoˈiraa mai ta ˈu tane i te fare, ua patoi atura vau ia ˈna ma te riri. “Te na ô ra teie feia haavare e aita to te taata e nephe. E peropheta haavare ratou!” Aita ta ˈu tane i aimârô; maoti râ, ua pahono mǎrû noa mai oia e: “E Winnie, ua papai-pauroa-hia teie mau parau i roto i te Bibilia.” I muri iho, i to te Taeae Ervin faaiteraa mai ia ˈu ma te mǎrû i roto i ta ˈu iho Bibilia e o tatou iho te nephe e e pohe atoa to tatou nephe, ua hitimahuta roa vau. (Ezekiela 18:4) Te mea o tei haaputapû iho â râ ia ˈu, o te irava ïa i roto i te Genese 2:7, e na ô ra e: “Riro aˈera te taata [Adamu] ei taata [nephe] ora.”

Ua hape mau â vau! Ua taa ˈtura ia ˈu e ua haavare mai te mau upoo faatere haapaoraa ia ˈu e aita ˈtura vau i haere faahou i te pure. Maoti râ, ua haere atu vau i te mau putuputuraa kerisetiano a te mau Ite no Iehova. Mea putapû mau â ia ite i te here e vai ra i rotopu ia ratou! Teie ïa te haapaoraa mau.

Te auhune i Cape Palmas

Tau toru avaˈe i muri aˈe, ua fanaˈo aˈera ta ˈu tane i te hoê ravea no te eiâ i te hoê tino moni rahi i ta ˈna taiete—aita râ o ˈna i na reira. Ua faaooo maira to ˈna mau hoa ohipa ia ˈna: “E Remmie, e pohe veve noa oe.”

Teie râ, no to ˈna haerea tia, ua noaa ia ˈna i te hoê tiaraa teitei aˈe e ua tonohia ˈtura oia i Cape Palmas no te iriti i te hoê piha ohipa apî i reira. Ua poro mâua ma te itoito e i muri e piti noa avaˈe, ua noaa maira te hoê pǔpǔ iti o tei anaanatae rahi mai i te poroi o te Bibilia. I muri aˈe, i to Lichfield revaraa i te oire pu no Monrovia no te rave mai i te mau tauihaa no te piha ohipa apî, ua bapetizohia ˈtura oia. Ua titau atoa oia i te tauturu i te Taiete no te haapao i te feia i Cape Palmas o te anaanatae ra i te parau mau.

Ua pahono mai te Taiete na roto i te tonoraa mai i te Taeae e te Tuahine Faust i Cape Palmas. Ua riro te Tuahine Faust ei tauturu rahi no ˈu nei, e i te avaˈe titema 1951, ua faataipe ihora vau i to ˈu pûpûraa ia ˈu iho no Iehova na roto i te bapetizoraa. I teie nei hau atu i na mua ˈˈenei ra, ua faaoti au e ‘haaputu i te hotu no te ora mure ore.’ (Ioane 4:35, 36) I te avaˈe eperera 1952, ua haamata ˈtura vau i te taviniraa ma te taime taatoa ei pionie.

Ua haamaitai-oioi-hia ta ˈu mau tutavaraa e Iehova; i roto i te hoê matahiti, ua tauturu vau e pae taata e tae roa ˈtu i te pûpûraa e te bapetizoraa. Hoê o ratou, o Louissa Macintosh ïa, e tuahine fetii oia no te peretiteni no Liberia o taua tau ra, o W. V. S. Tubman. Ua bapetizohia oia e ua rave oia i te taviniraa ma te taime taatoa e ua tapea noa oia i to ˈna haapao maitai i te Atua e tae roa ˈtu i to ˈna poheraa i te matahiti 1984. E rave rahi taime to ˈna pororaa i te peretiteni.

I Buchanan no raro

I te matahiti 1957, i te tere o te tiaau mataeinaa, ua anihia maira mâua ta ˈu tane ia riro ei pionie taa ê. I muri aˈe i to ˈna tauaparauraa ma te pure, ua farii aˈera mâua i teie titauraa. Ua titau o Lichfield i te tahi mau avaˈe no te faanaho i ta ˈna mau ohipa i Cape Palmas, no reira, o vau tei haere na mua ˈtu i Buchanan no raro, te hoê tuhaa fenua tei ore i porohia aˈenei, no te haamata i te ohipa i reira.

I to ˈu tapaeraa ˈtu i reira, ua faaea ˈtura vau i te fare o te utuafare Maclean. I te mahana i muri iho, mai ta ratou i matau, ua arataihia ˈtura vau i mua i te mono raatira no te opu Pele. Ua farii popou mai te raatira e to ˈna utuafare ia ˈu, e ua poro atu vau i te hoê pǔpǔ iti taata i to ˈna ra fare. E ono o te mau taata o ta ˈu i paraparau atu i taua mahana ra, e tae noa ˈtu te mono raatira e ta ˈna vahine, o tei riro mai ei mau Ite no Iehova.

I muri aˈe, na ˈu atura i aratai i te haapiiraa o Te Pare Tiairaa i mua hau atu i te 20 taata. E tia ia ˈu ia turui atu i nia ia Iehova, e ua horoa mai oia i te puai e te aravihi e titauhia no te haapao i ta ˈna mau mamoe. Ia tupu anaˈe mai te rohirohi aore ra te manaˈo haaparuparu, e haamanaˈo ïa vau i te feia no tahito ra, te mau vahine iho â râ mai ia Debora e o Hulada, o tei amo i te mau hopoia a Iehova ma te mǎtaˈu ore.—Te mau tavana 4:4-7, 14-16; Te mau arii 2, 22:14-20.

I te avaˈe mati 1958, i muri aˈe e toru avaˈe i Buchanan no raro, ua tae maira ta ˈu rata e faaara maira i te tere o te tiaau haaati, o John Charuk. Ua tarahu ihora vau i te hoê fare o te nehenehe e farii i te hoê nahoa taata rahi. I muri iho, ua haere atura vau i Buchanan no nia no te farerei i te Taeae Charuk, aita râ oia i haere mai. I muri aˈe i to ˈu tiairaa e tae roa ˈtu i te po, ua hoˈi atura vau i Buchanan no raro ma te rohirohi.

Fatata i te tuiraa po, ua faaroo atura vau i te patoto i nia i te opani. I to ˈu iritiraa ˈtu, ua ite atura vau eiaha noa te tiaau haaati oia atoa râ ta ˈu tane, ua tano hoi to ˈna taeraa mai manaˈo-ore-hia e te tere o te Taeae Charuk. Mea nafea to raua iteraa mai ia ˈu? Ua farerei raua i te hoê taata aˈuaˈu animala e ua ani atura raua ia ˈna ahiri e ua matau anei oia i te hoê vahine o te poro ra i te taata no nia ia Iehova. “E,” o ta ˈna ïa i pahono mai, e ua aratai maira oia ia raua i to ˈu nei fare. Ua oaoa roa vau i te mea e e toru noa avaˈe to ˈu faaearaa i Buchanan no raro, ua anaana puai to ˈu maramarama!—Mataio 5:14-16.

Ua oaoa matou i te mea e e 40 taata o tei putuputu mai no te tere o te Taeae Charuk. I muri aˈe, ua haamauhia ˈtura te hoê amuiraa itoito, e ua patu matou i te hoê Piha no te Basileia nehenehe roa. Teie râ, e ere te oraraa i te mea ohie. Ei hiˈoraa, i te matahiti 1963, ua tupu aˈera te hamani-ino-raa i te pae faaroo i Kolahun, ua haruhia e ua tapeahia ˈtura ta ˈu tane i te fare auri. No te mea ua rutu-rahi-hia o ˈna, ua mau atura oia i te fare maˈi.

Aita i maoro roa i muri aˈe i to ˈna matararaa mai i te fare maˈi, i taua matahiti noa râ, ua tupu te hoê tairururaa i Gbarnga. I te mahana hopea, ua haaati aˈera te mau faehau i te feia i ruru mai e ua faaue maira ratou ia aroha matou i te reva. I te mea e aita matou i farii, ua faahepo maira te mau faehau ia afai matou i to matou rima i nia e ia tiatonu atu te mata i nia i te mahana. Ua tupai atoa ratou i vetahi o matou e te poro o ta ratou pupuhi. Ei tautururaa ia ˈu ia tapea i to ˈu taiva ore i te Atua, ua himene vau i roto ia ˈu iho i te himene o te Basileia ra “Eiaha e mǎtaˈu atu ia ratou!” I muri aˈe, ua taora ˈtura te mau faehau ia matou i roto i te hoê fare auri reporepo. E toru mahana i muri iho, ua tuuhia ˈtura te mau Ite ěê, e ua afai-ê-hia ˈtura mâua o Lichfield i Sierra Leone. Ua tuu-atoa-hia ˈtura te mau Ite no te fenua i te mahana i muri iho.

Te tahi atu mau hopoia taa ê e te mau haamaitairaa

Ua tonohia mâua no te apiti atu i te amuiraa no Bo, i te pae apatoa no Sierra Leone. Ua tavini mâua i reira e vau matahiti e i muri iho ua tauihia ˈtura mâua i Njala. I to mâua faaearaa i Njala, ua nominohia ˈtura ta ˈu tane no te tavini ei mono tiaau haaati, e ua fanaˈo vau i te haamaitairaa e pee atu ia ˈna i roto i teie taviniraa o ta ˈna i rave. I muri aˈe, i te afaraa o te mau matahiti 1970, ua tonohia ˈtura mâua i te amuiraa no Freetown Hitia o te râ.

Ua fanaˈo vau i te haamaitairaa o te iteraa e rave rahi o te feia o ta ˈu i haapii i te Bibilia ia farii i te haamoriraa mau. Ua hau atu ta ˈu e 60 mau tamarii e mau mootua i te pae varua o tei riro ei mau “episetole haamaitai.” (Korinetia 2, 3:1) Ua titauhia vetahi ia rave i te mau tauiraa rahi, mai ia Victoria Dyke, e peropheta vahine hoi oia i roto i e pǔpǔ faaroo Aladura. I muri aˈe i te faataaraahia ˈtu te Ioane 1, 5:21, ua faarue ihora oia i ta ˈna mau taoˈa tahutahu atoa e ta ˈna mau idolo. Ua faataipe oia i to ˈna pûpûraa na roto i te bapetizoraa e ua riro maira oia ei pionie taa ê, e ua tauturu oia e rave rahi o to ˈna mau fetii ia farii i te parau mau.

I te avaˈe eperera 1985, ua pohe ta ˈu tane, tau avaˈe noa na mua ˈˈe i te 44raa o te oroa haamanaˈoraa o to mâua faaipoiporaa. E ere râ o vau anaˈe. Ua tamau noa vau i te tavini i to ˈu Tauturu, o Iehova, ei tavini ma te taime taatoa. E te ite nei au i te hoê taairaa taa ê e te feia o ta ˈu i tauturu ia ite ia ˈna. Ua riro ratou ei fetii no ˈu i roto i te hoê auraa taa ê. Te here nei au ia ratou e te here nei ratou ia ˈu. Ia roohia vau i te maˈi, e haere oioi noa mai ratou e haapao ia ˈu, e e tauturu atoa ˈtu vau ia ratou.

Eita ïa e feaaraa, ahiri e e tia ia ˈu ia haamata apî faahou, e oaoa roa vau i te raveraa i ta ˈu mauhaa ooti no te apiti atu i roto i te ohipa auhune ei hoa rave ohipa na Iehova.

[Hohoˈa i te api 23]

Winifred Remmie i teie mahana