Te faatia ra te feia poro i te Basileia

Mau parau apî oaoa no Europa Hitia o te râ mai

E RAVE rahi mau ohipa oaoa e tupu ra i roto i te aua teotaratia no Europa Hitia o te râ. Mea faahiahia mau â te tairururaa rahi i tupu i Zagreb, i te 16-18 no atete 1991, i to te mau 7 300 Ite farii-popou-raa i to ratou mau taeae no e 15 nunaa mai. Ia amui-paatoa-hia ratou, e 14 684 feia o tei putuputu mai. Ua riro mau â te reira ei faaiteraa no te here e te autahoêraa i roto i te hoê fenua o tei aueuehia e te mau fifi!

Te rohi nei te mau Ite i Europa Hitia o te râ no te faaite i te parau apî maitai o te Basileia o Iehova ia vetahi ê, ua ite hoi ratou e te reira anaˈe te tiaturiraa hoê roa no te hau mau. I te tahi mau vahi, e ere i te mea ohie no ratou ia tapea i to ratou tiaraa amui ore. Noa ˈtu râ, mea pinepine te mau taata i te faaroo mai, e te faatia ra te mau Ite i te mau aamu faahiahia roa.

I roto i te hoê oire, ua faaroo te hoê tamahine e 16 matahiti i te parau apî maitai na roto i te arai o te Ite no Iehova hoê roa o taua oire ra. Ua haamatahia ˈtura te hoê haapiiraa bibilia tamau, e ua rahi noa ˈtura to ˈna mauruuru no te parau mau. No to ˈna hinaaro rahi e faaite atu ia vetahi ê i te mau ohipa faahiahia o ta ˈna i haapii, ua tamata oia i te paraparau e to ˈna mau hoa haere haapiiraa tera râ ua farerei oia i te patoiraa e te mau faaoooraa. Ua patoi mai iho â râ te hoê hoa haere haapiiraa ia ˈna tera râ ua maere oia e ua putapû oia i to ˈna faaoromai, inaha, aita te tamahine haapii bibilia i riri noa ˈtu te mau faainoraa atoa. I muri aˈe, ua horoahia te hoê faaiteraa hohonu roa ˈtu â i taua tamahine nei, e ua taa ˈtura ia ˈna e mea hape roa to ˈna haerea. Ua haamatahia ˈtura te hoê haapiiraa bibilia e o ˈna, e ua tutava ihora te tamahine haapii bibilia matamua e to ˈna hoa apî i te tufa i to raua oaoa e o vetahi ê, noa ˈtu te patoiraa a to raua mau metua, ta raua orometua haapii, e te tahi atu mau tamarii haere haapiiraa.

Ei faahopearaa no ta raua pororaa, ua farii aˈera te tahi atu tamahine i te parau mau. E toru atura ïa ratou i teie nei i roto i te piha haapiiraa, e ua riro teie na tamahine tootoru nei ei mau hiˈoraa maitatai i te pae no te ineineraa ia tauturu atu ia vetahi ê e te faaiteraa i te here i te tahi e te tahi. Ua apiti maira te tahi atu tamahine ia ratou.

I teie nei, e maha atura ratou i nia i te iri parahiraa o te aua fare haapiiraa i reira ratou e tauaparau ai no nia i te Bibilia. E ua maere vetahi i te iteraa e ua maraa to ratou numera. Ua opua ihora te tahi atu tamahine o te pǔpǔ haapiiraa, tei putapû i to ratou haerea maitai, e apiti atoa mai i roto i te haapiiraa bibilia. Ua tamau noa ˈtura teie na tamahine e pae i te titau ia vetahi ê, te mau tamarii haere haapiiraa e te mau orometua haapii, ia na reira atoa. Noa ˈtu râ, ua tamau noa te mau tamahine i te farerei i te patoiraa rahi a to ratou mau metua. Ua tamata te mau metua i te faahepo i te mau tamahine ia faaea i ta ratou haapiiraa bibilia na roto i te vavahiraa i ta ratou mau buka e na roto i te hamani-ino-raa ia ratou.

Eaha ˈtura te faahopearaa o teie faaiteraa o tei haamata e te hoê noa tamahine apî tei anaanatae? Ua bapetizo te hoê o te mau tamahine i te tairururaa mataeinaa o te matahiti 1990, e na tamahine e maha i te tairururaa haaati i tupu i te tau uaaraa tiare o te matahiti 1991. Ua riro mau â te reira ei oaoaraa rahi! I teie mahana, te tavini nei teie na tamahine e pae atoa ra ei mau pionie tamau! I te oire i reira teie ohipa i te tupuraa, te vai ra i teie nei e 11 feia poro, e 8 tei roto i te taviniraa pionie.

Te turu nei Iehova e te haamaitai nei oia i to ˈna mau Ite i Europa Hitia o te râ. Te vai faahou ra te mau taata aau rotahi o te haere rahi mai i roto i taua tuhaa o te fenua ra.