Eita outou e tatarahapa

E PITI mahana tei titauhia i te hoê tane e ta ˈna vahine no te tapae atu i reira. Ua haere noa raua na raro e 70 kilometera te atea, ma te amo i ta raua e piti tamaiti nainai na roto i te mau ururaau tei î i te mau toe ote toto e na roto i te mau anavai tei tahe puai i muri aˈe i te mau ûa vero. Ua papu maitai râ to raua hinaaro e ore e mairi i teie ohipa.

E piti vahine no Zaire o tei haere na raro i nia hau atu i te 500 kilometera, no te hoê tere e 14 mahana, no te tapae atu i reira. I Zaire atoa, ua haere atu te hoê taata e 70 matahiti i reira na nia i to ˈna pereoo taataahi e 260 kilometera te atea. Aita oia i haaparuparu i mua i te atea aore ra te fifi o te tere. Te mea faufaa roa ˈˈe no ˈna, eiaha roa ˈtu ïa o ˈna ia mairi i teie ohipa.

Te haere ra hoi ratou ihea? I te hoê ïa o te mau haaputuputuraa rahi roa ˈˈe a te mau Ite no Iehova i roto i to ratou mau fenua. E noa ˈtu te atâta o te tere, ua papu maitai ia ratou e e hoonahia ta ratou mau tutavaraa.

Ua rave anei outou i te mau faanahoraa no te tae atu i te tairururaa mataeinaa o te matahiti 1992 “Te feia amo i te maramarama”? Peneiaˈe eita outou e titauhia ia rave i te mau tutavaraa rahi mai ta teie mau taata haapao maitai i rave no te tae atu i te tairururaa. Teie râ, noa ˈtu e e ere i te mea ohie, te faaitoito atu nei matou eiaha roa ˈtu outou ia mairi i teie haaputuputuraa.

Ua faaineinehia te hoê porotarama faahiahia e te faufaa rahi. Mai te peu e te amuimui nei outou e te mau kerisetiano e te anaanatae nei outou i te iteraa nafea e noaa mai ai te hau mau, eaha te tiai ra ia tatou, aore ra nafea ia rave hau atu â i te hinaaro o te Atua, te tǎpǔ atu nei matou e eita roa ˈtu outou e tatarahapa. E nehenehe te mau Ite o to outou vahi e faaite atu ia outou ihea roa e afea te tairururaa fatata roa ˈˈe no outou e tupu ai.