No te aha ratou e na reira ˈi?

I TE mau matahiti atoa, e mau tausani Ite no Iehova na te ao nei o te haaputuputu nei i te mau tairururaa. I reira, te fanaˈo ra ratou i te auhoaraa e te faaroo ra i te hoê porotarama maitai roa o te haapiiraa Bibilia. Te rave ra vetahi i te mau tutavaraa rahi no te haere i teie mau tairururaa. Ei hiˈoraa, i te matahiti i mairi aˈenei, i Malawi, ua haere e piti hoa faaipoipo, e 60 tiahapa matahiti to raua, e ta raua tamaiti e ta ˈna vahine e ta raua aiû, e 80 kilometera te atea, i te hoê tairururaa na nia i te pereoo tataahi. Ua faarue ratou i to ratou oire iti i te hora ono i te poipoi e ua tapae atura i te vahi tairururaa 15 hora i muri iho.

I Mozambique, e toru mahana to te hoê pǔpǔ haereraa na nia i te pereoo tataahi i te hoê tairururaa. I te hoê po, a puhapa ˈi ratou i rapae, ua faaroo ratou i te mau liona i te uururaa i pihai iho mai. Noa ˈtu e ua taora ˈtu ratou i te vahie ura no te tiahi i te mau liona, ua faaea noa ratou na pihai iho e ao noa ˈtura. Ua farerei te tahi atu Ite o te haere ra i taua tairururaa ra, i te hoê liona i nia i te purumu. Ua faaea noa oia ma te maniania ore e ma te hauti ore e haere noa ˈtura te liona. I te tairururaa, ua faatia ˈtura teie mau Ite ma te oaoa e mea nafea ratou i te ‘faaoraraahia i te vaha o te liona.’—Timoteo 2, 4:17.

E rave rahi mau Ite no Iehova e rave ra i te mau tutavaraa rahi no te haere i te mau tairururaa, aore ra i te mau putuputuraa no te haamoriraa a te amuiraa i te mau hebedoma atoa. No te aha? Na te mau tumu parau i muri nei e tauturu ia outou ia taa e no te aha e mea faufaa roa te haaputuputuraa.