Mau uiraa a te feia taio

Te parau ra anei te Bibilia e ua ora mau iho â te mau animala tara hoê, o te faahitihia ra i roto i te tahi mau tatararaa?

Te faahiti nei te mau tatararaa a te Arii Iakobo, a Douay, e vetahi atu â, i te parau no te mau animala tara hoê. Aita râ te mau tatararaa apî o te huri ra i te reo Hebera ma te papu e na reira nei.—Salamo 22:21; 29:6; 92:10 (21:22; 28:6; 91:11, Douay).

I roto i te roaraa o te mau senekele, e rave rahi mau aai o tei parare no nia i te hoê animala e tino e e afii puaahorofenua to ˈna, e avae aili e e aero liona râ to ˈna. Peneiaˈe, te vahi taa ê roa o teie animala no roto mai i te aai ra, o to ˈna ïa tara hoê tei tavirivirihia i nia i to ˈna rae.a

“E tiaturi na te taata i mutaa ihora e te vai ra i roto i te tara hoê o teie animala te tahi raau tupohe i te taero, e i te Anotau no Ropu, ua hoohia te mau raau ueue tei parauhia hoi e ua hamanihia e teie mau tara no te mau tino moni rahi. Te manaˈo nei te rahiraa o te feia ite e no roto mai te hohoˈa o te animala tara hoê i te mau aamu i faarooroo-noa-hia na Europa no nia i te rhinocéros.” (The World Book Encyclopedia) Ua papaihia i nia i te tahi mau patu no Asura e no Babulonia te hohoˈa o te mau animala hoê anaˈe tara. Ua itehia i teie nei e teie mau animala, e ria ïa, e animala parauhia bouquetin, e puaatoro ufa, e e puaatoro paˈe, tei faahohoˈahia na te aoao, aita hoi teie hohoˈa e faaite ra i na tara toopiti.

Mea anaanatae teie parau no te feia tuatapapa i te Bibilia, no te mea e iva taime, te faahiti ra te mau Papai i te hoê animala na nia i te parau hebera ra reʼemʹ [reema]. (Numera 23:22; 24:8; Deuteronomi 33:17; Ioba 39:9, 10; Salamo 22:21; 29:6; 92:10; Isaia 34:7) No te hoê tau maoro, aita te feia huri i te Bibilia i taa papu e eaha teie animala. Ua huri te tatararaa Heleni a te Septante i te parau ra reʼemʹ ia au i te auraa ra e ‘hoê anaˈe to ˈna tara,’ aore ra tara hoê. Mea pinepine te tatararaa latino a te Vulgate i te huri i teie parau mai te “rhinocéros.” Area vetahi mau tatarararaa ra, te faaohipa nei ratou i te parau ‘puaatoro oviri,’ aore ra ‘puaa oviri.’ Ua tatara noa o Robert Young i te parau hebera na roto i te reo beretane ei “Reem,” ma te vaiiho i te taata taio i roto i te taa ore.

Ua faaore râ te feia ite no teie nei tau i te feaaraa no nia i te reʼemʹ. Te faaite ra na feia tuatapapa parau o Ludwig Koehler e o Walter Baumgartner e te auraa o teie parau, e “puaatoro oviri” ïa, e teie te tatararaa aivanaa, Bos primigenius. E “pǔpǔ haihai aˈe [teie] no roto mai i te pǔpǔ rahi o te mau animala e tara to ratou e e maiuu to nia i to ratou avae.” Te faataa ra Te buka parau paari Britannica apî e:

“Te faahiti ra te tahi mau pehepehe o te Faufaa Tahito i te hoê animala puai e te nehenehe e tara to ˈna tei parauhia reʼemʹ. Te tatarahia ra teie parau na roto i te mau parau ra ‘animala tara hoê’ aore ra ‘rhinocéros’ i roto e rave rahi mau tatararaa, teie râ, te faaohipa nei e rave rahi mau tatararaa apî i te parau ra ‘puaatoro oviri’ (auroch), tera hoi te auraa tano o te parau hebera ra reʼemʹ.”

I te mea e na roto i te reo Beretane matauhia, te auraa o te parau ra “ox” [“puaatoro”] oia ïa te hoê paˈe patehehia, te huri ra Te mau Papai Moˈa—Tatararaa a te ao apî i te mau taime atoa e ma te tano roa, i te parau ra reʼemʹ na roto i te parau “puaatoro oviri.” E au ra e aita faahou te mau aurochs (puaatoro oviri) i te senekele 17, ua itea mai râ i te mau aivanaa e mea ê roa oia i te animala tara hoê o te aai. E naeahia na te mau puaatoro aurochs tahito e 1.8 metera te teitei, e e 3 metera te roa. E 900 kilo to ˈna teiaha, e e nehenehe to ˈna nau tara tataitahi e hau atu i te 75 tenetimetera te roa.

Te tuea ra ïa te reira e te parau ra reʼemʹ, aore ra puaatoro oviri, e faahitihia ra i roto i te Bibilia. Ua matauhia oia no to ˈna puai e to ˈna huru vî ore (Ioba 39:10, 11) e tae noa ˈtu no to ˈna vitiviti. (Numera 23:22; 24:8) Mea papu maitai e e piti to ˈna tara, eiaha râ hoê anaˈe mai te animala tara hoê o te aai ra. Ua faahiti o Mose i to ˈna nau tara ia ˈna i faahohoˈa i na opu puai e piti o te faura mai na roto i na tamaiti toopiti a Iosepha.—Deuteronomi 33:17.

Aita ïa te Bibilia e turu ra i te manaˈo no te mau animala tara hoê tuiroo no roto mai i te mau aai. Te faataa ra oia i te hoê hohoˈa papu, noa ˈtu e ua taotiahia, o te hoê puaatoro oviri tahito puai e te mehameha, o tei ora na i te mau tau bibilia e tae roa mai i te mau tau tahito o tei ore i atea roa.

[Nota i raro i te api]

[Faaiteraa i te fatu o te hohoˈa i te api 31]

Taoˈa faufaa o te mau mea huru ê no te mau aai: 1 087 huriraa no roto mai i te mau buka aamu, a Richard Huber/Dover Publications, Inc.