A haere mai i te tairururaa mataeinaa “Te feia amo i te maramarama”

“INAHA, e ati hoi te fenua nei i te pouri; e te mau [nunaa] i te pouri taotao.” (Isaia 60:2) E parau mau roa te reira i teie mahana! Ma te feaa ore, te tapea nei te haapaoraa hape i te taata i roto i te pouri no nia i te haamoriraa e fariihia ra e te Atua. Eaha te tumu? No te mea ‘ua haapouri’ o Satani, te atua o teie nei faanahoraa o te mau mea, ‘i te feruriraa o te feia tiaturi ore.’—Korinetia 2, 4:4.

Mea taa ê roa te mau Ite no Iehova i te feia o tei haapourihia e Satani. E tano te mau parau a te peropheta Isaia i nia ia ratou: “E hiti mai râ Iehova i nia ia oe, e itea noa mai hoi to ˈna hanahana i nia iho ia oe ra.” (Isaia 60:2) Ua mauruuru roa ratou i te haereraa mai i rapae i te pouri i roto i te maramarama faito ore o te Atua! E maramarama teie i te pae varua, te parau mau a te Parau a te Atua o te haamaramarama i te feruriraa, ia nehenehe atoa te feia o tei matapohia e ite i te parau mau.

Parau mau, e titauhia i te tauturu. Eita hoi te hoê taata o te taio noa i te Bibilia ma te ore e huti i te faufaa i roto i te mau tauturu no ǒ mai i te Atua e nehenehe e ite i te maramarama. No reira te Atua ra o Iehova i faanaho ai i “te tavini haapao maitai e te paari,” i tohuhia mai i roto i te Mataio 24:45-47. I teie mahana, te faahohoˈahia ra teie “tavini” e te Tino Aratai a te mau Ite no Iehova. I raro aˈe i te aratairaa a teie tino teie tairururaa mataeinaa “Te feia amo i te mararamara” i faanahohia ˈi.

Te tapao o teie tairururaa, o te tautururaa ïa i te mau tavini atoa a Iehova ia riro ei feia amo maramarama aravihi aˈe, ia au maite i te mau parau a Paulo i roto i te Philipi 2:15. I reira, te faaitoitohia ra te mau kerisetiano ia anaana mai “te mau tiarǎmǎ o te ao nei.”—Mataio 5:14, 16.

I te poipoi hora 10 mairi i te 20 minuti, e tauturu te hoê upaupa i te mau taata atoa ia faatano i to ratou mafatu e to ratou feruriraa, ia ineine ratou no te porotarama i te pae varua e vauvauhia mai. Tera mahana ta ˈna tumu parau tataitahi, e teie ïa te tumu parau no te mahana pae “A faaite i to maramarama e to parau mau.”—Salamo 43:3.

E vauvauhia mai i roto i te porotarama no te poipoi mahana pae i te oreroraa parau fariiraa, “E feia amo i te maramarama—No teihea tumu?” Oia mau, e ere te mau kerisetiano i te feia afai maramarama na nia i to ratou iho manaˈo, aore ra no te tahi tumu miimii. Area ra, te tavini nei ratou no te hoê â tumu no reira o Iesu Mesia, te Taata amo maramarama Rahi, i haere mai ai i nia i te fenua, oia hoi no te faaite i te parau mau e no te faahanahana i te iˈoa o te Poiete. Ma te tano roa, ua parau o Iesu no ˈna iho e: “Te parahi nei au i te ao nei, o vau te maramarama o teie nei ao.” (Ioane 9:5) No reira, ua vaiiho mai oia i te hoê hiˈoraa ia pee maite tatou i to ˈna mau taahiraa avae. (Petero 1, 2:21) E haamatara te avatea o taua mahana matamua ra i te hoê oreroraa parau e te hoê darama bibilia no nia i te Arii ra o Iosia, o te huti taa ê i te anaanatae o te mau taurearea.

Teie te tumu parau o te mahana maa, “O outou te maramarama o teie nei ao . . . Ia anaana to outou maramarama.” (Mataio 5:14, 16) E vauvauhia mai i roto i te porotarama no te poipoi i te hoê oreroraa parau tatuhaahia oia hoi “Ia anaana to outou maramarama.” E nehenehe te feia o tei pûpû ia ratou no Iehova e bapetizohia. E vauvau mai te porotarama no te avatea i te hoê oreroraa parau tatuhaahia maramarama maitai, “Te niniiraa i te maramarama no nia i te vairaa mai o te Mesia e te Apokalupo.”

Te tumu parau i maitihia no te sabati, te toru o te mahana e te mahana hopea o te tairururaa, teie ïa “A tamau noa i te haere ei mau tamarii o te maramarama.” (Ephesia 5:8) I roto i te porotarama no te poipoi, e hohorahia mai te hoê oreroraa parau tatuhaahia oia hoi “A aupuru i te tahi e te tahi i roto i te utuafare kerisetiano,” o te tuatapapa i te mau hopoia i roto i te utuafare. E rave-atoa-hia te hoê oreroraa parau e faataa mai e eaha te auraa ia auraro i te Atua e i te Mesia.

E naeahia te tairururaa i to ˈna taime faufaa roa ˈˈe i te sabati i te avatea na roto i te oreroraa parau huiraatira “A pee maite i te maramarama o te ao.” E faataa mai teie oreroraa parau i te hoê tuatapaparaa no nia i te Ioane 1:1-16 e e faaite atoa mai oia i te faufaaraa o te ite no nia i te Bibilia, ma te haamatara e o Iesu Mesia te maramarama o te ao. E hope teie tairururaa na roto i teie aˈoraa puai, “A tamau noa i te haere i roto i te maramarama.”

A faaite i to outou mauruuru no teie tamaaraa i te pae varua ta Iehova e horoa maira na roto i ta ˈna faanahonahoraa ite-mata-hia. A haere mai i te himene haamataraa i te poipoi mahana pae e tae roa ˈtu i te pure faaotiraa i te sabati i te avatea. A haapao maitai i te mau parau atoa o te vauvauhia na nia mai i te tahua oreroraa parau. A tapao i te parau ia nehenehe outou e haamau i to outou feruriraa e ia hiˈopoa faahou outou i ta outou mau nota a muri aˈe. I te pae hopea, a feruri e horoa ˈtu i te rima tauturu i roto i te tahi tuhaa ohipa. E fanaˈo ïa outou eiaha noa i te haamaitairaa o te noaaraa mai, i te haamaitairaa rahi atu râ o te horoaraa.—Ohipa 20:35.