Te faatia ra te feia poro i te Basileia

Ua faatiamâ te parau mau bibilia i te hoê paretenia i Bolivia

E RAVE rahi feia aau mehara o te faarue nei i te haapaoraa hape, o te haapii nei i te parau mau a te Bibilia, e o te haamori nei ia Iehova, te Atua mau. Hau atu i te 7 600 taata o tei na reira i Bolivia, e i rotopu ia ratou, te vai atoa ra te hoê paretenia.

I te ivaraa o to ˈna matahiti, ua farerei o M—— i te hoê Ite no Iehova no te taime matamua. Ua iriti atu oia i te opani i to te Ite haereraa mai i to ˈna fare, e no te taime matamua, ua faaroo atura oia i te iˈoa o te Atua, o Iehova, i te faahitiraahia. Aita teie iˈoa i moehia ia ˈna i roto i te roaraa o te mau matahiti.

I te mea e o ˈna anaˈe te tamahine i roto i to ˈna utuafare, ua faaotihia ˈtura e e riro mai oia e paretenia. “Ua oaoa roa vau i te mea e e tavini vau i te Atua—o ta ˈu ïa i manaˈo i reira,” o ta M—— ïa e parau ra. Teie râ, ua ore roa to ˈna oaoa i to ˈna iteraa i te ohipa tia ore e te huru pae tahi o te ravehia ra i te fare paretenia. Te na ô ra oia e: “Eita roa ˈtu paha e moehia ia ˈu i teie mau taime taiâraa e te mau tupairaa i te pae tino e i te pae varua mauiui mau, o tei turai ia ˈu ia hiˈo i te Atua, eiaha mai te hoê Atua here, mai te hoê râ Atua o te faautua ma te aroha ore.”

Te na ô faahou ra oia e: “Mai te taime a riro mai ai au ei paretenia, aita i itehia mai ia ˈu i te iˈoa ra Iehova i roto i te Bibilia. Ua ite noa mai au te iˈoa ‘Yahweh,’ e ua hitimahuta roa vau. I te hoê mahana, ua haere roa ˈtu vau i rapae no te imi i teie mau taata o te faahiti ra i te parau no Iehova, aita râ vau i ite ia ratou.

“Ua mairi te taime, e i te hoê mahana, i to ˈu hoˈiraa ˈtu e hiˈo i to ˈu utuafare, ua ite atura vau i te hoê iri papairaa e na ô ra ‘Piha no te Basileia a te mau Ite no Iehova.’ Ua hinaaro vau e parau atu ia ratou e e peropheta haavare ratou, aita râ hoê aˈe taata i roto i te piha. Ua hoˈi faahou atu vau i te sabati. Te faaterehia ra te hoê putuputuraa, e e rave rahi o tei maere roa i te iteraa i te hoê vahine tei ahuhia i te ahu paretenia i roto i te amuiraa. I muri aˈe i te putuputuraa, ua tamata vau i te haere oioi atu i rapae. Tera râ, ua haere mai te hoê Ite e aroha ia ˈu, e ua ani atura vau ia ˈna e, ‘No te aha outou e haavahavaha ˈi i te Atua Moˈa na roto i te amoraa i teie iˈoa?’ Ua faatupu atura ta ˈu uiraa i te hoê aparauraa bibilia, e ua rave atura vau i te mau faanahoraa ia haere mai oia e farerei ia ˈu i te fare o to ˈu utuafare fetii. Ua tiahi to ˈu mau metua ia ˈna. Ua farerei faahou râ mâua e piti avaˈe i muri aˈe, e ua titau maira oia ia ˈu i to ˈna fare no te haapii i te Bibilia. Ua putapû roa vau i te mau haamaramaramaraa o ta ˈna i faaite mai, ma te haapapu mai e e tia i te mau kerisetiano ia faaohipa i te iˈoa o te Atua. Ua horoa mai teie haapapuraa i te puai o ta ˈu e titau ra no te haapae i te mau mea faufaa ore atoa o ta ˈu i haapii ei paretenia.

“Te haamanaˈo ra vau e rave rahi mau ohipa i tupu i to ˈu oraraa i te fare paretenia. Ei hiˈoraa, i te hoê taime, aita ta ˈu maa i navai. No reira, ua papai atu vau i to ˈu mau metua no te ani e ia hapono mai ratou i te tahi maa na ˈu, aita râ vau i ite e e taiohia te mau rata i te fare paretenia. I te tamaaraa i muri iho, ua tuuhia maira i te hoê haapueraa faraoa e te pata monamona i mua ia ˈu, e ua faahepohia vau ia amu pauroa. I teie nei râ, ua rahi roa ta ˈu maa. Ua faaite atura vau i to ˈu mau hoa, e ua na ô maira te tahi e ia faahuˈahuˈa vau i te faraoa o te ore e pau ia ˈu e ia hue atu vau i nia i te tahua. Ua na reira ˈtura vau, e ua haru ihora te hoê paretenia ia ˈu i reira iho e ua taue atura ia ˈu i nia i te tahua, ma te faaue etaeta mai e miti e ia mâ roa te tahua taatoa. E piha rahi hoi teie. I to ˈu auraroraa i teie faaueraa, ua faaroo atura vau i te mau ata faaooo—aita hoi e aroha.

“Ua oaoa roa vau i te tiamâraa mai i teie mau mea atoa. Ma te papu maitai, ua titau teie faatiamâraa i te mau haapaeraa. A tahi, ua tiahi to ˈu metua tane ia ˈu i te fare. Noa ˈtu râ, hou vau i faarue ai i te fare paretenia, ua fanaˈo vau i te haamaitairaa e tauturu i te tahi atu mau paretenia apî ia ite i te parau mau. Te oaoa nei au i te parauraa e ua pûpû vetahi i to ratou oraraa no te Atua ra o Iehova!

“I muri aˈe i to ˈu faarueraa i te fare paretenia, mea fifi roa no to ˈu metua tane ia taa e no te aha vau e patoi ai i te mau ohipa aufau-maitai-hia, o te haapau râ i te taime. Inaha, te hinaaro ra vau ia rahi to ˈu taime no te tavini i te Atua. Te tavini nei au ei pionie tamau, e e oraraa ohie roa to ˈu e te oaoa rahi atoa râ. E te oaoa nei au i te mea e ua apiti mai to ˈu metua vahine e to ˈu mau taeae ia ˈu i roto i te taviniraa a Iehova.”

Oia mau, e faatiamâ te parau mau a te Bibilia i te taata i te mau haapaoraa hape o teie nei ao, e e hopoi atoa mai oia i te oaoa tamau.—Ioane 8:32.