‘Ia haapii i te ite i te Atua e ia Iesu’
“TEIE te ora mure ore, ia haapii ratou i te ite ia oe, o oe te Atua mau hoê ra, e ta oe i tono mai, o Iesu Mesia.” (Ioane 17:3, ia au i te Tatararaa a te ao apî) O ta Iesu ïa i faahiti i roto i ta ˈna pure i to ˈna Metua i te raˈi ra, e mea na reira to ˈna faaiteraa i te hoê titauraa faufaa roa e noaa mai ai te ora mure ore. No te aha ïa te Tatararaa a te ao apî e huri ai i teie irava na roto i te parau ra ‘ia haapii i te ite i te Atua’ maoti i te parau ra “ia ite . . . i te Atua,” mai ta te rahiraa o te mau tatararaa a te Bibilia e faataa ra?—A hiˈo atoa i te nota i raro i te api i te Ioane 17:3.
Te parau heleni i hurihia i ǒ nei na roto i te parau ‘haapii i te ite’ aore ra “ite” o te hoê ïa huru o te parau haa ra gi·noʹsko. E na roto i te huriraa a te Tatararaa a te ao apî, ua tutavahia i te horoa i te taatoaraa o te auraa o teie parau. Te auraa tumu o te parau ra gi·noʹsko o te “iteraa” ïa, teie râ, e rave rahi mau auraa taa ê to taua parau heleni nei. A tapao na i te mau tatararaa i muri nei:
“GINŌSKŌ (γινώσκω) te auraa ra, te haapiiraa i te ite, te noaaraa i te ite, te fariiraa, te taaraa, aore ra te taaraa i te auraa taatoa.” (Titionare tatararaa i te mau parau a te Faufaa Apî [beretane] W. E. Vine) No reira, aita ‘te Bibilia i tauihia’ i te huriraahia te parau gi·noʹsko na roto i te parau ‘e haapii i te ite,’ mai ta te feia faahapa i te Tatararaa a te ao apî e faahua parau nei. I roto i te hoê tuatapaparaa no nia i te mau auraa taa ê o teie parau, te faataa ra o James Hope Moulton, taata tuiroo i te pae no te tuatapaparaa i te auraa o te mau parau, e: “E tupuraa maoro to te taunei, γινώσκειν, oia hoi ‘te haapiiraa ia noaa te ite.’”—Te tarame a te Faufaa apî Heleni, (beretane).
Te faataa ra te buka Tuatapaparaa tarame no nia i te Faufaa Apî Heleni (beretane) i te parau gi·noʹsko i roto i te Ioane 17:3, “e titau ra i te hoê ohipa rave-tamau-hia.” Te itehia ra te tahi atu faataaraa no nia i teie parau heleni i roto i te buka Tuatapaparaa i te parau i roto i te Faufaa Apî (beretane), a Marvin R. Vincent. Te na ô ra oia e: “Te ora mure, o te ite ïa, aore ra te maimiraa i te ite, inaha, te tapao ra te taunei i te hoê ohipa o te ore e mau, te hoê taaraa o te haere tamau noa i mua.” (Na ˈna e haapapu ra.) Te faahiti ra te buka a A. T. Robertson, Hohoˈa parau i roto i te Faufaa Apî (beretane), e ia hurihia te parau na roto i te tatararaa ra “e tia ia tamau noa i te ite.”
No reira, i roto i te reo heleni tumu, te titau ra te mau parau a Iesu i roto i te Ioane 17:3 i te hoê tutavaraa tamau ia noaa mai te ite no nia i te Atua mau e ta ˈna Tamaiti, o Iesu Mesia, e ua faataa-maitai-hia te reira i roto i te huriraa a te Tatararaa a te ao apî. E noaa ia tatou i teie ite na roto i te tuatapaparaa i te Parau a te Atua ma te tuutuu ore e na roto i te auraroraa e te faaauraa i to tatou oraraa i ta ˈna mau ture. (A faaau e te Hosea 4:1, 2; 8:2; Timoteo 2, 3:16, 17.) Eaha ïa haamauruururaa maitai e tiai ra i te feia e haapii i te huru iho o te Atua e to ta ˈna Tamaiti e a tutava ˈtu ai i te pee i to raua hiˈoraa? Te ora mure ore!