Ia au i te Bibilia

Aita anei e faufaa faahou to te Faufaa Tahito?

◼ “Te poro ra te Faufaa Tahito i te riri e te tahoo, ‘e mata ra e mata ïa, e niho ra e niho ïa’. Ua mono-paatoa-hia te reira e te Faufaa apî, o te haapii ra i te aroha e te faaoreraa i te hara.”

◼ “Aita te Faufaa Tahito e tano faahou nei no te mau kerisetiano o teie anotau; aita ˈtura ïa e faufaa ia taio faahou i te reira.”

O TE REIRA anei to outou manaˈo? Aore ra ua faaroo aˈena anei outou i teie mau huru manaˈo? Aita anei e faufaa faahou to te Faufaa Tahito (te mau Papai hebera) e na te Faufaa Apî anei (te mau Papai heleni kerisetiano) i mono atu i te reira? Eaha ta te Bibilia iho e parau ra?

Parau mau, te faaite nei iho â te Faufaa Apî e te faufaa a te Ture, te hoê parau fafau ta te Atua i faaau ia Iseraela i tahito ra, ua ore ïa, e aita te reira e tano faahou ra no te mau kerisetiano (Ephesia 2:15; Hebera 8:13). E tuhaa teie faufaa a te Ture no te Faufaa Tahito. Tera râ, e ere te reira anaˈe to roto i te Faufaa Tahito, mea rahi atu â!

Te vai ra e toru tuhaa i roto i te Faufaa Tahito, no reira oia i riro ai ei mea faufaa rahi mau no te mau kerisetiano o teie tau: 1) e mau tuatapaparaa tia roa, 2) e mau pehepehe no te faaitoito, e 3) te tahi mau buka tohu o te nehenehe e haapaari i te faaroo. E hiˈopoa anaˈe na i te reira.

Te aamu o te Bibilia

Te vai ra i roto i na buka matamua 17 o te Faufaa Tahito, oia hoi mai te Genese e tae atu i te buka a Esetera, te tuatapaparaa no nia i te mau auraa e vai ra i rotopu i te Atua e te taata nei, mai te poieteraahia mai oia e tae roa ˈtu i te Vraa o te senekele hou to tatou nei tau. Tera râ, mai ta teie mau parau a te aposetolo Paulo e faaite nei, e ere te reira i te aamu tahito noa: “Roohia ihora ratou i taua mau mea ra [tei papaihia i roto i te Faufaa Tahito] ei hiˈoraa, e ei aˈo mai hoi ia tatou [te mau kerisetiano] i te feia i roohia mai i te hopea o te mau tau nei, i papaihia ˈi.” — Korinetia 1, 10:11.

No te aha râ o Paulo i manaˈo ai e no te mau kerisetiano atoa teie mau tuatapaparaa, inaha te ora nei ratou tau senekele i muri aˈe? No te mea noa ïa e i roto i te roaraa o te tau, aita to te taata huru i taui, aita atoa hoi te Atua i taui (Malaki 3:6). Te faataa ra te pǐpǐ ra o Iakobo e i ǒ Iehova “aore roa e hirohirouri ia ˈna ra, aore hoi e huru-ê-raa e vahi iti noa ˈˈe”. (Iakobo 1:17.) Te tauiui nei hoi te ata ia au i te tiaraa o te mahana: e mea poto roa oia i te avatea, e mea roaroa roa hoi i te taperaa mahana. Area ia Iehova ra, e ore oia e tauiui noa.

No reira ˈtura ïa tatou e nehenehe ai e haapii rahi mai i nia i te mau huru raveraa a Iehova i te mau patereareha, i nia ia Iseraela i te miti Uteute e i roto i te medebara, oia atoa i nia e rave rahi atu â mau taata. Ei hiˈoraa, mai te peu e ua riri te Atua i to ˈna iteraa ˈtu i te mau Iseraela ia haamori i te idolo aore ra ia rave i te peu taiata, eita atoa ïa oia e mauruuru ia rave te tahi mau kerisetiano i taua huru haerea nei (Korinetia 1, 10:1-12). Noa ˈtu e aita te mau kerisetiano i raro aˈe i te faufaa a te Ture, te horoa maira râ oia na roto i ta ˈna mau ture tumu i te mau haamaramaramaraa faufaa roa no nia ia Iehova.

Te mau pehepehe e te mau parau tohu

Na buka e pae i muri mai, mai te buka a Ioba e tae atu i te Sire a Solomona, e mau pehepehe ïa. E ere râ teie mau buka i te mau buka nehenehe anaˈe, tei roto atoa râ ia ratou te tahi mau faaitoitoraa i te pae varua e ua niu-pinepine-hia hoi ratou i nia i te mau tuatapaparaa. Eita anei te mau Salamo e haaputapû ia tatou? E o vai tei ore i ite papu i te faufaa o te mau aˈoraa a te mau Maseli no nia i te haerea tia, te pohe hae e te tahi atu â mau huru o te mau auraa i rotopu i te huitaata (Maseli 11:1; 14:30)? Ma te papu maitai, e mea faufaa mau teie mau buka i teie mahana mai te tau i papaihia ˈi ratou.

Na 17 buka hopea o te Faufaa Tahito, mai te Isaia e tae atu i te Malaki, e mau buka tohu ïa. Tei roto ia ratou te mau pororaa a te mau peropheta hebera i tahito ra, e te tahi mau haapapuraa tano mau i horoa-atea-hia mai, tau senekele na mua ˈˈe, no nia i te haereraa mai o te Mesia i te fenua nei. I roto i te Faufaa Apî, te faaite ra te mau Evanelia, e ua tupu tau ahuru o taua mau parau tohu ra i roto i te mau tuhaa haihai roa. Ma te papu maitai, ia ite-anaˈe-hia ia tatou i te huru tia roa o teie mau parau tohu, e riro to tatou faaroo ia Iesu Mesia i te itoito mai, o ˈna hoi ta te Atua i tono mai no te faaora ia tatou.

E ore anei e tuea?

E tuea anei râ te Faufaa Tahito e te Faufaa Apî noa ˈtu to raua mau taa-ê-raa? E rave anaˈe na i te hoê hiˈoraa: E aˈo te hoê metua tane i ta ˈna na tamarii tamaroa toopiti na roto i te hoê raveraa taa ê ia au i to raua huru tataitahi. Ia au i teie hiˈoraa, mea taa ê i roto i te Faufaa Tahito to Iehova huru aˈoraa ˈtu ia Iseraela, te hoê nunaa taata pûpûhia na ˈna mai to ratou fanauraahia mai, e i roto i te Faufaa apî to ˈna aˈoraa ˈtu i te amuiraa kerisetiano, te hoê pǔpǔ tei maiti e pûpû atu ia ratou no ˈna.

Te faaite mai nei te hoê hiˈopoaraa hohonu no nia i te Bibilia e aita teie na tuhaa e piti e patoi nei te tahi i te tahi, ua tuea maitai râ raua toopiti atoa ra. Ua riro atoa raua ei mea maitai “ia au roa te taata no te Atua i te mau ohipa maitatai atoa ra”. — Timoteo 2, 3:16, 17.

Ei hiˈoraa, te faatia mau ra anei te Faufaa Tahito e na tatou iho e tahoo atu, inaha te faautua nei hoi te Faufaa Apî i te reira? Aita roa ˈtu! Te faaitoito nei râ raua toopiti ia aroha i to ˈna mau enemi, ei faaiteraa e na te Atua e tahoo (faaau e te Deuteronomi 32:35, 41 e te Maseli 25:21, 22 e te Roma 12:17-21). Te mea mau râ, ia faahiti anaˈe te Faufaa Tahito i te parau ‘e mata ra e mata ïa e niho ra e niho ïa’, e ere ïa i te mea e na te taata iho te tahoo, na te hoê râ tiribuna i haamanahia e faaoti no nia i te mea e au ia faahoˈihia ma te afaro, no te ino i faatupuhia. — Exodo 21:1, 22-25.

Aita ˈtura ïa te faufaa o te Faufaa Tahito i ore, aita atoa oia e patoi nei i te toea o te mau Papai. Te haapapu maira te Bibilia e te ohipa noa ra oia e mea faufaa atoa hoi no te mau kerisetiano o teie tau mai te Faufaa Apî. A haamanaˈo na i teie mau parau a Iesu Mesia e na ô ra e: “E ore te taata e ora i te maa anaˈe ra, i te mau mea atoa râ i haapaohia e te Atua.” Te faahiti atoa ra hoi te reira i te mau Papai hebera mai te mau Papai heleni kerisetiano atoa. — Mataio 4:4; hiˈo Deuteronomi 8:3.