‘A imi i te hau e a tamau maite’
“Ia faarahihia Iehova, o tei mauruuru i te maitai o tana tavini.” — SALAMO 35:27.
1. Eaha te hau ta tatou e fanaˈo ra?
AUÊ te oaoa e ia vai hau noa i roto i teie ao amahamaha! Auê te faahiahia e ia haamori ia Iehova, “te Atua hau iho,” e ia fanaˈo i te mau haamaitairaa o ta ˈna “faufaa no te hau”! Auê te haumǎrû e, i roto i te mau fifi atoa o te oraraa, ia ite i te “hau a te Atua, o tei hau ê atu i te ite taata nei” e ia tamata i ‘te ati o te hau’ e tahoê ra i te nunaa o te Atua noa ˈtu eaha te fenua, te reo, te nunaa aore ra te tiaraa i te pae totiale! — Tesalonia 1, 5:23; Ezekiela 37:26; Philipi 4:7; Ephesia 4:3.
2, 3. a) A mau maite ai te nunaa a te Atua i roto i to ˈna taatoaraa, eaha te nehenehe e roohia i te tahi mau kerisetiano? b) Eaha ta te Bibilia e faaitoito ra ia tatou ia rave?
2 Te poihere nei te mau Ite no Iehova i teie hau. Teie râ, eiaha ratou e manaˈo e, i te mea e ua noaa mai, eita ïa e moe faahou. Eita te hau e noaa ohie noa mai no te mea e te tahoê atura tatou e te hoê amuiraa aore ra tei roto tatou i te hoê utuafare kerisetiano. A faaoromai ai te toea faatavaihia e to ratou mau hoa o “te mau mamoe ê atu” ei nǎnǎ hoê e tae roa ˈtu i te hopea, e nehenehe te taata tataitahi e erehia i te hau e e faarue i te hororaa kerisetiano. — Ioane 10:16; Mataio 24:13; Roma 11:22; Korinetia 1, 10:12.
3 Ua faaara te aposetolo Paulo i te mau kerisetiano faatavaihia o to ˈna ra tau: “E ara, e au mau taeae, o te aau ino faaroo-ore-atoa-hia i roto i te hoê o outou na, i te faarueraa i te Atua ora ra.” (Hebera 3:12). E tano atoa teie faaararaa na te feia rahi roa. Te aˈo ra hoi te Bibilia i te mau kerisetiano e: “E imi oia i te hau, e aruaru atu i te reira. Tei te feia parau-tia hoi to te Fatu ra mata, e tei ta ratou pure hoi to ˈna tariˈa; e mata ê râ to te Fatu i te feia i rave i te ino ra.” — Petero 1, 3:10-12; Salamo 34:14,y 15.
‘Te hinaaro o te tino’
4. Na te aha e nehenehe e haapeapea i to tatou hau e te Atua?
4 Eaha te nehenehe e tapea ia tatou ia imi i te hau? Te faahiti ra o Paulo i te hoê mea i te na ôraa e: “O te haapao hoi i ta te tino ra, o te pohe ïa; area o te haapao i ta te Varua ra, o te ora ïa e te hau. No te mea o taua hinaaro o te tino ra, e mea au ore ïa i te Atua.” (Roma 8:6, 7). Na roto i te parau ra “tino,” te faahiti ra o Paulo i to tatou hapa ei taata tia ore e oia atoa to tatou hinaaro e rave i te hara no roto mai i to tatou tupuna. Ia hema tatou i te mau hinaaro o te tino hapa ra, e erehia ïa tatou i te hau. Ia rave te hoê kerisetiano i te peu taatiraa viivii, ia haavare oia, ia eiâ, ia faataero oia ia ˈna, aore ra ia ofati oia i te ture a te Atua na roto i te tahi atu raveraa, e eita o ˈna e tatarahapa, e ofati ïa o ˈna i te hau e vai ra i rotopu ia ˈna e o Iehova (Maseli 15:8, 29; Korinetia 1, 6:9, 10; Apokalupo 21:8). Hau atu, ia vaiiho o ˈna i te mau taoˈa materia ia riro ei mea faufaa roa ˈtu â i te mau mea pae varua, e faaino mau â te reira i to ˈna hau e te Atua. — Mataio 6:24; Ioane 1, 2:15-17.
5. Eaha te mea e titauhia ra i roto i te imiraa i te hau?
5 I te tahi aˈe pae, te na ô ra o Paulo e: “Area o te haapao i ta te Varua ra, o te ora ïa e te hau.” Tei roto te hau i te hotu o te varua, e ia haamataro tatou i to tatou mafatu ia haafaufaa i te mau mea i te pae varua, ma te pure ia noaa mai te varua o te Atua no te tauturu ia tatou, i reira ïa tatou e haapae ai i te “hinaaro o te tino.” (Galatia 5:22-24.) I roto i te Petero 1, 3:10-12, ua taaihia te hau i te parau-tia (Roma 5:1). Te na ô ra o Petero e no te tapea maite i te hau, e tia ia ‘haapae i te ino, e ia rave i te maitai.’ E nehenehe te varua o te Atua e tauturu ia tatou ‘ia tapi i te parau-tia’ e ia faaherehere i to tatou hau e te Atua. — Timoteo 1, 6:11, 12.
6. Eaha te hopoia a te mau matahiapo no nia i te hau o te amuiraa?
6 Te tapiraa i te hau, o te tapitapiraa rahi ïa a te mau matahiapo i roto i te amuiraa. Ei hiˈoraa, ia tamata te hoê taata i te faaô mai i te mau peu viivii i roto i te amuiraa, e hopoia na te mau matahiapo te parururaa ia ˈna na roto i te tamataraa i te aˈo i te taata hara. Ia farii oia i te aˈo, e noaa faahou ïa ia ˈna i to ˈna hau (Hebera 12:11). Ahiri aita ra, e titauhia paha ia tiavaru ia ˈna ia paruruhia te mau auraa hau i rotopu i te amuiraa e o Iehova. — Korinetia 1, 5:1-5.
Te hau e to tatou mau taeae
7. Ua faaara o Paulo i to Korinetia no nia i teihea huru o te ‘hinaaro o te tino’?
7 E nehenehe ‘te hinaaro o te tino’ e faaino roa eiaha noa i to tatou hau e te Atua, to tatou atoa râ auraa maitatai e te tahi atu mau kerisetiano. Ua papai atu Paulo i to Korinetia e: “Tei ta te tino â hoi outou i teie nei; te vai ra hoi te feii, e te mârô, e te amahamaha i roto ia outou na, e ere anei tei ta te tino â outou, e mai ta te taata atoa ra ta outou haerea?” (Korinetia 1, 3:3). Te patoi ra te feii e te mârô i te hau.
8. a) Eaha te nehenehe e roohia i te taata e faatupu i te feii e te mârô i roto i te amuiraa? b) E vai hau tatou e te Atua i teihea titauraa?
8 Mea ino mau ia faahuehue i te hau o te amuiraa na roto i te faatupuraa i te feii e te mârô. Ma te faahiti i te hoê huru maitai i taaihia i te hau ei hotu o te varua, teie te faaararaa a te aposetolo Ioane: “Ia parau te hoê taata e, Te hinaaro nei au i te Atua; e aore oia i aroha i tana taeae, e haavare oia: o tei ore i aroha i tana taeae tei hiˈohia e ana ra, eaha e tia ˈi ia ˈna ia hinaaro i te Atua, tei ore i hiˈohia e ana ra?” (Ioane 1, 4:20). Oia atoa, ia faatupu te hoê taata i te feii aore ra te mârô i rotopu i te mau taeae, e nehenehe anei oia e vai hau noa e te Atua? Eita ïa! Te aˈohia ra tatou e: “Ia maitai â, ia mahanahana roa, ia hoê â aau, e parahi ma te hau; e tia ïa te Atua no ˈna te aroha e te hau i rotopu ia outou.” (Korinetia 2, 13:11). Oia, ia tamau â tatou i te parahi ma te hau i rotopu ia tatou, i reira ïa te Atua no ˈna te aroha e te hau e tia ˈi i rotopu ia tatou.
9. Nafea tatou e ite ai e e nehenehe te peapea e te mârô e tupu i te tahi taime i rotopu i te mau kerisetiano?
9 E ere ïa te auraa e eita te mau kerisetiano e peapea i te tahi taime. Ei hiˈoraa, i te mau hebedoma i muri aˈe i te Penetekose, ua tupu te tahi aimârôraa i roto i te amuiraa kerisetiano apî no nia i te tufaraa maa i te mahana (Ohipa 6:1). I te hoê taime, ua tupu te hoê tatamaˈiraa i rotopu ia Paulo e o Baranaba o tei faatupu i “te mârô rahi ia raua iho.” (Ohipa 15:39.) Ua aˈo atu Paulo ia Euodia e ia Sunetuhe, mea papu e e mau tuahine maitatai e te itoito, “ia hoê â a raua parau i te Fatu nei.” (Philipi 4:2.) Eita ïa e maerehia e ua horoa o Iesu i te mau aˈoraa faataa-maitai-hia no te faaafaro i te mau peapea e haafifi i te hau i rotopu i te mau kerisetiano e ua haamatara atoa oia i te faufaaraa ia faatitiaifaro oioi noa i teie mau huru fifi (Mataio 5:23-25; 18:15-17)! Eita hoi o ˈna e horoa i teie aˈoraa ahiri e aita o ˈna i manaˈo e e tupu te fifi i rotopu i ta ˈna mau pǐpǐ.
10. Eaha te nehenehe e tupu mai i roto i te amuiraa, e eaha te hopoia e titauhia i te feia atoa i ô i roto i teie ohipa?
10 No reira, i teie mahana, e riro paha e e faaino mai te hoê hoa kerisetiano ia tatou na roto i te hoê parau rii tano ore aore ra ta tatou e faariro ei parau faaino. Mea riri roa paha na tatou te hoê huru au ore o te tahi atu taata. E nehenehe hoi e piti huru taata e patoi te tahi e te tahi. E patoi uˈana ˈtu paha te hoê taata i te hoê faaotiraa a te mau matahiapo. I rotopu i te tino matahiapo iho, te vai ra paha te hoê matahiapo e manaˈo puai roa to ˈna o te tamata i te faatere i te tahi atu mau matahiapo. Noa ˈtu e e nehenehe teie mau huru ohipa e tupu, e tia noâ ia tatou ia imi e ia tapi i te hau. E tia mau â ia arai i teie mau fifi ia au i te huru raveraa kerisetiano no te tapea maite i “te ati ra i te hau.” — Ephesia 4:3.
11. Eaha ta Iehova i horoa mai no te tauturu ia tatou ia imi i te hau te tahi e te tahi?
11 Te na ô ra te Bibilia e: “Ia faarahihia Iehova, o tei mauruuru i te maitai o tana tavini.” (Salamo 35:27). Oia, te hinaaro nei Iehova e ia vai hau noa tatou. No reira, ua horoa mai oia e piti ravea faahiahia roa no te tauturu ia tatou ia tapea maite i te hau i rotopu ia tatou e o ˈna atoa. Hoê, o te varua moˈa ïa, ua riro hoi te hau ei hotu no te varua, mai te tahi atu mau huru oia hoi te faaoromai, te maitai, te mǎrû e te hitahita ore (Galatia 5:22, 23). Te tahi ra, o te paari ïa no ǒ mai i te Atua, te na ôhia ra hoi e: “Area te paari no nia maira, e mea anoi-ore-hia ïa, e te mamahu, e te mǎrû, e te faaroo ohie, ua î i te aroha e te hamani maitai.” — Iakobo 3:17, 18.
12. Eaha te tia ia rave ahiri e ua haafifihia to tatou hau e to tatou mau taeae?
12 No reira, ia haafifihia to tatou hau e o vetahi ê, e tia ia tatou ia pure ia noaa mai te paari no nia maira o te faaite i te ohipa te tia ia rave, e e tia atoa ia ani i te varua moˈa no te faaitoito ia tatou ia rave i te mea tia (Luka 11:13; Iakobo 1:5; Ioane 1, 3:22). Ia au maite i ta tatou pure, e nehenehe tatou e hiˈo i roto i te pu o te paari o te Atua, te Bibilia, ia itea mai te aratairaa, e oia atoa, e hiˈo atu i roto i te mau buka bibilia e vai ra ia itea mai te mau aˈoraa e faaite mai nafea ia faaohipa i te mau Papai (Timoteo 2, 3:16). E titau atoa paha tatou e maimi i te tauturu a te mau matahiapo i roto i te amuiraa. Te tuhaa hopea, o te peeraa ïa i te aratairaa e horoahia mai. Te na ô ra te Isaia 54:13 e: “E te mau tamarii atoa na oe ra, e haapiihia ïa e Iehova, e e hau rahi to te mau tamarii na oe ra.” Te auraa ra, ua taaihia to tatou hau i to tatou faaohiparaa i te mea ta Iehova e haapii maira ia tatou.
“E ao to tei faatupu i te parau hau ra”
13, 14. a) Eaha te auraa o te parau “tei faatupu i te hau”? b) Nafea tatou e riro ai ei feia faatupu i te hau?
13 Ua parau o Iesu i roto i ta ˈna Aˈoraa i nia i te mouˈa e: “E ao to tei faatupu i te parau hau ra; e parauhia ratou i te tamarii na te Atua.” (Mataio 5:9). “Tei faatupu i te parau hau,” e ere noa ïa te hoê taata mǎrû. Te auraa o te parau tumu heleni ra, o te feia ïa e “faatupu i te hau.” Te taata e faatupu i te hau, mea aravihi ïa oia no te faahoˈi faahou i te hau ia tupu te peapea. Te mea faufaa roa ˈtu â, e tutava te taata faatupu i te hau ia ore roa ˈtu te hau ia haafifihia i te omuaraa iho. ‘E mana te hau i roto i te mafatu.’ (Kolosa 3:15). Ia tutava te mau tavini a te Atua no te riro ei feia faatupu i te hau, mea iti roa ïa te mau fifi e tupu mai i rotopu ia ratou.
14 No te riro ei taata faatupu i te hau, mea titauhia ia farii tatou i to tatou iho mau paruparu. Ei hiˈoraa, te vai ra paha te hoê kerisetiano o te riri ohie noa aore ra e mauiui ohie noa e e inoino oioi noa oia. Ia tupu anaˈe te fifi, e riro paha to ˈna manaˈo horuhoru i te haamoe ia ˈna i te mau faaueraa a te Bibilia. E tupu iho â te reira inaha e feia tia ore anaˈe tatou (Roma 7:21-23). Teie râ, tei roto te mârô, te iria e te feii i te anairaa o te mau peu a te tino (Galatia 5:19-21). Ia ite tatou e te vai ra teie mau huru i roto ia tatou nei — aore ra ia faaite mai te tahi atu taata ia tatou — e tia ia tatou ia pure ma te aau mehara e ma te tamau ia tauturu mai te varua o Iehova ia rahi te hitahita ore e te mǎrû i roto ia tatou nei. Oia mau, e tia i te taata tataitahi ia tutava no te faatupu i teie mau maitai ei tuhaa no to ˈna huru taata apî. — Ephesia 4:23, 24; Kolosa 3:10, 15.
15. Mea nafea te paari no nia maira ia patoi atu i te manaˈo etaeta tia ore?
15 I te tahi taime, e haapeapeahia te amuiraa aore ra te tino matahiapo e te hoê taata manaˈo etaeta, o te onoono noa ia faatiahia to ˈna manaˈo. Parau mau, i nia i te ture a te Atua, e tia i te hoê kerisetiano ia faaite i te manaˈo puai, o te ore roa ˈtu e fati. E ia hiˈo anaˈe tatou e e manaˈo maitai to tatou o te nehenehe e haamaitai ia vetahi ê, e ere ïa i te mea hape ia faaite i to tatou manaˈo ma te papu maitai, ia faaite râ tatou i te mau tumu tatou e na reira ˈi i te parau. Teie râ, eita tatou e hinaaro e riro mai te feia ‘patoi’ o teie nei ao (Timoteo 2, 3:1-4). E faatupu te paari no nia maira i te hau e te feruriraa maitai. E tia i te feia e rave ra i te ohipa ma te manaˈo etaeta e te mârô, ia haapao i te aˈoraa a Paulo i to Philipi oia hoi ‘eiaha roa ei mea e ravehia ma te teoteo ra.’ — Philipi 2:3.
16. Mea nafea te aˈoraa a Paulo i roto i te buka Philipi ia tauturu ia tatou ia haapae i te faatiatiaraa ia tatou iho?
16 I roto i teie nei rata, te aˈo maira o Paulo, e ‘ma te aau haehaa,’ ia ‘faariro tatou ia vetahi ê ei feia teitei aˈe ia tatou nei.’ Aita roa ˈtu ïa te reira e tuea ra e te manaˈo faatiatia ia ˈna iho. Eita te hoê kerisetiano paari e manaˈo na mua e faahepo i to ˈna iho mau manaˈo, e huna i ta ˈna hape ia ore oia ia haama aore ra e paruru i to ˈna iho tiaraa e to ˈna mana. Eita ïa te reira e tuea e te aˈoraa a Paulo ia ‘haapao te kerisetiano, eiaha noa i ta ˈna anaˈe iho maitai, i ta vetahi ê atoa râ maitai.’ — Philipi 2:4; Petero 1, 5:2, 3, 6.
Te mau parau e faatupu i te hau
17. Eaha te faaohiparaa hape o te arero o te nehenehe e faaino i te hau o te amuiraa?
17 E haapao maitai te taata e tapi ra i te hau i to ˈna arero. Te faaara ra o Iakobo e: “Te arero nei, e melo iti haihai ïa, e faaahaaha rahi râ ta ˈna. A hiˈo na i te rahi o te vahie e amâ i te auahi iti haihai ra!” (Iakobo 3:5). Te paraparauraa ino, te faahaparaa ia vetahi ê na muri i to ratou tua, te mau parau faaino e te au ore, te amuamu e te mutamuta, e te faatiatiaraa ia vetahi ê ma te haavare no te huti i te maitai no ˈna iho — e mau peu anaˈe teie a te tino o te faaino i te hau a te nunaa o te Atua. — Korinetia 1, 10:10; Korinetia 2, 12:20; Timoteo 1, 5:13; Iuda 16.
18. a) Ia faaohipa hape noa ˈtu te hoê taata i to ˈna arero, eaha te tia ia ˈna ia rave, e oia atoa te taata o ta ˈna i faaino? b) Ia parau noa ˈtu te hoê taata i te parau mauiui na roto i te riri, e nafea te mau kerisetiano paari?
18 Oia mau, te na ô ra o Iakobo e: “Area te arero nei, aore ïa e taata e vi ai te reira.” (Iakobo 3:8). E riro atoa hoi te mau kerisetiano paari i te parau i te tahi mau parau o ta ratou e tatarahapa i muri iho. Te tiaturi nei hoi tatou paatoa e e faaore mai vetahi pae i ta tatou hape mai ta tatou e faaore i ta ratou ra (Mataio 6:12). I te tahi taime, e nehenehe tatou e faahiti i te parau rii mauiui mau ia riri taue tatou. I reira, e haamanaˈo te taata faatupu i te hau e, “o te parau mǎrû ra tei faaore i te riri; area te parau faaooo ra, o te riri ïa te tupu.” (Maseli 15:1.) Mea pinepine, e navai noa ia huti o ˈna i te aho e ia ore oia ia pahono atu i te mau parau iria na roto i te tahi atu parau iria. I muri iho, ia topa anaˈe te hau, e ite te taata faatupu i te hau mafatu mahorahora maitai nafea ia haamoe i te mau parau i faahitihia i te taime iria ra. E e ite atoa te kerisetiano haehaa nafea ia faaite i to ˈna tatarahapa e ia tamata i te tamǎrû i te mau mauiui o ta ˈna i faatupu. E tapao no te puai morare ia nehenehe anaˈe tatou e parau ma te aau mehara e, “Ua hape au.”
19. Eaha te haapiiraa ta Paulo e ta Iesu e horoa maira no nia i te huru horoaraa i te aˈo?
19 I te tahi taime, e faaohipahia te arero no te aˈo atu ia vetahi ê. Ua aˈo o Paulo ia Petero i mua i te taata no to ˈna haerea tano ore i Anetiohia. E ua aˈo etaeta ˈtu o Iesu i roto i ta ˈna mau poroi i na amuiraa toohitu ra (Galatia 2:11-14; Apokalupo, pene 2, 3). Ia tuatapapa tatou i teie mau hiˈoraa, e haapii ïa tatou e eita e tia ia horoa i te aˈoraa mǎrû roa e inaha, eita te aˈo e matara maitai. Teie râ, aita o Iesu e o Paulo i riro ei feia etaeta roa aore ra ei feia ino. Aita raua i aˈo atu ia vetahi ê no te haamâha i to raua riri. Ua tutava mau â raua i te tauturu i to raua mau taeae. Ia ite te taata horoa i te aˈoraa e aita o ˈna e haavî maitai ra i to ˈna arero, e feruri paha ïa o ˈna ia faaea rii e ia tamǎrû ia ˈna hou oia e paraparau ai. Ahiri aita ra, e nehenehe oia e faahiti i te mau parau etaeta roa e e faaino roa ˈtu â i te fifi o ta ˈna e tamata ra i te faatitiaifaro. — Maseli 12:18.
20. Na te aha e aratai i te mau mea atoa o ta tatou e parau i to tatou mau taeae aore ra no nia ia ratou?
20 Mai tei faahiti-ê-na-hia, e taairaa piri roa to te hau e te here, o te mau hotu o te varua. Ia riro noa te mea ta tatou e parau atu i to tatou mau taeae — aore ra no nia ia ratou — ei tapao faaite no to tatou here no ratou, e turu ïa te reira i te hau i roto i te amuiraa (Ioane 15:12, 13). ‘Ei parau mǎrû maitai anaˈe â ta tatou, ia rapaauhia i te miti ra.’ (Kolosa 4:6.) Ei parau monamona maitai e tia ˈi, o te haaputapû i te mafatu. Teie te aˈoraa a Iesu: “Ia vai â te miti i roto ia outou, e tamau hoi i te hau outou outou iho.” — Mareko 9:50.
‘E rohi anaˈe’
21. Eaha te mea e itehia no nia i te mau tavini o te Atua i te mau putuputuraa hebedoma e i roto i te mau tairururaa?
21 Teie ta te papai salamo i papai: “Inaha hoi, te maitai e te popou, ia parahi atoa te mau taeae ma te au maite!” (Salamo 133:1). Oia mau, mea au roa na tatou ia parahi e to tatou mau taeae, i te mau putuputuraa o te hebedoma iho â râ e i roto i te mau tairururaa rahi aˈe. I taua mau taime ra, e ite-maitai-hia to tatou hau e te feia no rapaeau mai.
22. a) Eaha te hau haavare ta te mau nunaa e manaˈo e ua naeahia ia ratou, e eaha te faahopearaa? b) Eaha te hau mau ta te faufaa a te Atua no te hau e hopoi mai?
22 Fatata roa, e manaˈo te mau nunaa e ua naeahia ia ratou te tahi hau ma te tuu ia Iehova i te hiti. Teie râ, ia parau ratou e “E hau, e aita e ino,” e roohia te feia atoa o tei ore i hau e te Atua i te haamouraa taue (Tesalonia 1, 5:3). I muri iho, e haamata te Tamaiti Hui Arii rahi no te Hau i te faaora i te huitaata i te mau faahopearaa ino atoa no roto mai i te ereraahia te taata i te matamua ra i te hau e te Atua (Isaia 9:6, 7; Apokalupo 22:1, 2). I reira, e tupu te hau na te ao atoa nei maoti te faufaa a te Atua no te hau. E fanaˈo atoa hoi te mau animala o te fenua i te peapea ore. — Salamo 37:10, 11; 72:3-7; Isaia 11:1-9; Apokalupo 21:3, 4.
23. Ia farii popou tatou i te tiaturiraa no te ao apî hau mau, eaha te tia ia tatou ia rave i teie nei iho â?
23 Auê ïa taime hanahana e! Te hiaai ra anei outou i tera taime? ‘A tapi ïa i te hau i te taata atoa nei.’ A imi i te hau i teie nei, e to outou mau taeae, e o Iehova iho â râ. Oia, “o te reira mau mea ta outou e tiai na, e faaitoito (...) ia roohia mai outou e ana ma te hau, ma te porao ore e te hapa ore.” — Hebera 12:14; Petero 2, 3:14.
Te haamanaˈo ra anei outou?
◻ Eaha te mea e nehenehe e faaino i to tatou hau e o Iehova?
◻ Eaha te mau peapea te tia paha ia faaafarohia i roto i te amuiraa?
◻ Eaha ta Iehova i horoa mai no te tauturu ia tatou ia imi e ia tapi i te hau?
◻ Eaha te mau haerea a te tino o te nehenehe e haapeapea i te hau o te amuiraa, e nafea ia patoi atu i te reira?
[Hohoˈa i te api 17]
E rahi te hau i rotopu i te feia i haapiihia e Iehova ra
[Hohoˈa i te api 19]
Auê te oaoa e ia ite i te hau i rotopu i te mau taeae e tavini ra ma te tahoê