Te haere ra te pereoo no te raˈi a Iehova i mua
“Area te mau pereoo ra, faaroo atura vau i te hoê i te piiraa, E te pereoo e.” — EZEKIELA 10:13.
1. Eaha te faurao a Iehova?
I TEIE tau o te mau manureva manina maitai, te manaˈo nei paha te feia faatere o teie nei ao e te fanaˈo ra ratou i te faurao aravihi roa ˈˈe i itehia aˈenei. Teie râ, e 2 600 matahiti i teie nei, ua faaite mai te Atua ra o Iehova e te vai ra ta ˈna te hoê faurao hau roa ˈˈe i te faahiahia, ta te hoê taata hamani matini i ore aˈenei i ite. E pereoo rahi e te hanahana mau teie! Mea huru ê anei ia faahoro te Poiete o te ao atoa nei i te hoê pereoo? Aita, no te mea mea taa ê roa te pereoo no te raˈi a Iehova i te tahi pereoo i hamanihia e te taata.
2. Mea nafea te Ezekiela pene 1 ia faataa i te pereoo no te raˈi a Iehova, e e huti na mua te peropheta i to tatou ara-maite-raa i nia ia vai?
2 I te pene 1 o te parau tohu a Ezekiela, te itehia ra o Iehova e faahoro ra i te hoê pereoo iti rahi no te raˈi. Te tere ra teie pereoo e maha huira riaria mau ra o ˈna anaˈe iho e e nehenehe ta ˈna e rave i te mau ohipa maere mau. Ua ite o Ezekiela i teie pereoo no te raˈi i roto i te hoê orama i te matahiti 613 hou to tatou nei tau, a vai ai oia i te pae o te pape no Babulonia ra. E huti na mua te peropheta i to tatou ara-maite-raa i nia i te feia e apee ra i te pereoo no te raˈi a Iehova. A taio ai tatou, e tamata anaˈe na i te ite atoa i te hohoˈa ta Ezekiela i ite.
Na mea ora e maha
3. Eaha ta te mau mata e maha o na kerubi tataitahi e maha e faahohoˈa ra?
3 Te na ô ra o Ezekiela e: “E ua hiˈo ihora vau, e inaha, e puahiˈohiˈo i te taeraa mai no te pae i apatoerau ra, e te hoê ata rahi, e te auahi i te haafifi-atoa-raa i roto ra, e te anaana i te haaati-atoa-raa; (...) E te vai atoa ra i ropu mai na mea ora e maha ra te huru.” (Ezekiela 1:4, 5). E maha pererau e e maha mata to teie na mea ora e maha, aore ra kerubi, tataitahi. E mata liona to ratou, e haapapu ra i te parau-tia o Iehova; e mata puaatoro, e faahohoˈa ra i te puai o te Atua; e e mata aeto, oia hoi To ˈna paari. E mata taata atoa to ratou, ei faaiteraa i te here o Iehova. — Deuteronomi 32:4; Ioba 12:13; Isaia 40:26; Ezekiela 1:10; Ioane 1, 4:8.
4. No te aha e maha mata to te mau kerubi, e eaha te huru o te tere o te mau kerubi?
4 Te hiˈo ra te mau mata o te kerubi tataitahi i roto i te hoê o na aveia e maha. E nehenehe atura ïa te mau kerubi e taui vave noa i to ratou tere e e pee atu ai i te mata e hiˈo ra i roto i te aveia e hinaarohia ra. Teie râ, eaha te vitivitiraa o teie mau kerubi? Inaha, e nehenehe ratou e tere i te vitivitiraa o te anaparaa uira ra (Ezekiela 1:14)! Aita hoê pereoo hamanihia e te taata o tei naeahia i teie tere.
5. Mea nafea to Ezekiela faataaraa mai i te mau huira o te pereoo e to ratou haaatiraa?
5 Faura taue mai nei te mau huira o te pereoo. Mea ê roa ïa to ratou huru! Te na ô ra te mau irava 16 e te 18 e: “E to ratou huru e ta ratou ohipa, mai te mea e, e pereoo i ropu i te tahi pereoo. E to ratou haaatiraa, e teitei rahi to te reira, e mea riaria hoi; e to ratou haaatiraa, ua îî ïa i te mata e ati noa ˈˈe ratou e maha atoa ra.” Hoê huira na te hiti i te kerubi tataitahi, oia hoi ïa e maha huira e tano i na vahi e maha. Mea pura te mau huira mai te tarisisa ra te huru, oia hoi te hoê ofai ateate aore ra maramarama peni rearea aore ra matie. Te faarahi roa ˈtura te reira i te anaana e te haviti o teie orama hanahana mau. I te mea e “ua îî” roa te haaatiraa o te mau huira “i te mata e ati noa ˈˈe ratou,” aita ïa ratou e horo matapo noa i roto i tera aore ra i tera aveia. Mea teitei roa te mau huira, ia nehenehe ratou e tere i nia i te hoê atearaa rahi i roto noa i te hoê ohuraa. E nehenehe ta ratou, mai na kerubi toomaha ra, e tere mai te anaparaa uira ra.
Te huira i ropu i te tahi huira
6. a) Te vai ra to te pereoo te mau huira i roto i te huira, mea nafea ïa? b) E faatano te mau huira i te aveia o to ratou tere i nia i te aha?
6 Te vai ra te tahi atu mea huru ê roa. E huira to roto i te mau huira tataitahi — hoê huira hoê â tiametera o te ô maitai na ropu i te huira matamua. Mea na roto noa ïa i teie ravea e nehenehe ai e parau e e haere te mau huira “na nia i na hiti atoa e maha” (Irava 17). I te reira iho taime, e nehenehe te mau huira e taui i te aveia no te mea tei mua te hoê pae o te huira i te aveia tataitahi. E faatano te mau huira i te aveia o to ratou tere i nia i to te mau kerubi e maha. I nia i na huira e maha, e nehenehe te tino o te pereoo o te Atua e horo na nia i te hoê niu ite-ore-hia e au i te hoê pahi puai o te tere na nia i te hoê pute mataˈi rahi a hee mǎrû noa ˈi oia na nia i te pape.
7. No hea mai te puai o te mau huira?
7 No hea mai te puai o te mau huira ia nehenehe ratou e pee i te mau tauiraa atoa o te tere o na kerubi e maha? No roto mai ïa i te varua moˈa o te Atua Mana hope ra. Te na ô ra te irava 20 e: “E te mau vahi atoa i haerehia e te varua ra, ua haere atoa ratou (...) te vai ra hoi te varua o taua mau mea ora ra i roto i te mau pereoo.” Tei roto atoa te puai itoito ite-ore-hia o te Atua e vai ra i roto i te mau kerubi, i teie mau huira.
8. Eaha te iˈoa o te mau huira e no te aha?
8 Te piihia ra te mau huira na roto i te parau ra “pereoo” [huira ohipa] (Ezekiela 10:13). E tano hoi teie parau no te ohipa ta te huira tataitahi e rave. E taviri o ˈna aore ra e ohu o ˈna. Ia faataahia teie tuhaa o te pereoo no te raˈi na roto i teie mau huru parau, te hutihia ra ïa te ara-maite-raa i nia i te oioiraa o te tere o te pereoo no te raˈi. Noa ˈtu e e ohu te mau huira ma te vitiviti, e nehenehe noâ ratou e ite i te vahi ta ratou e haere ra no te mea ua î roa ratou i te mata e ati noa ˈˈe ratou.
9. Mea nafea to Ezekiela faataaraa i te mea e vai ra i nia ˈˈe i na huira vitiviti e maha o te pereoo?
9 I teie nei râ e hiˈo anaˈe na eaha to nia iho mai i teie e maha huira teitei rahi e te tere oioi. Te na ô ra te irava 22 o te Ezekiela pene 1 e: “E mai te reva nei te huru i te vairaa mai i nia ˈˈe i te upoo o taua mau mea ora ra, mai te kerehe riariahia ra te huru, i te hohoraraahia na nia ˈˈe i to ratou mau upoo ra.” Mea ateate te reva, noa ˈtu to ˈna paari, “mai te kerehe riariahia ra te huru.” Te anaana ra oia mai te mau tausani taiamani i raro aˈe i te mau hihi o te mahana. Mea riaria mau â!
Te Taata faahoro pereoo hanahana
10. a) Mea nafea te terono e Tei parahi i nia i te terono i te faaiteraahia mai? b) Ua haaatihia te Taata faahoro pereoo i te hanahana, eaha ïa ta te reira e faaite ra?
10 Ua faaea ihora te pereoo ia nehenehe te Taata faahoro e paraparau ia Ezekiela. I nia ˈˈe i te reva, te vai ra te huru o te hoê terono, mai te ofai saphira, aore ra nimamu pao roa. I nia i te terono, e hohoˈa taata to Tei parahi i nia iho ra. E nehenehe hoi te hohoˈa o te hoê taata e tauturu ia Ezekiela ia taa maitai i teie faaiteraa no ô mai i te Atua ra. Teie râ, ua î roa teie hohoˈa taata ra i te hanahana, mai te anaana o te hesemala te huru, te hoê anoiraa anapanapa o te ario e te auro. Auê ïa nehenehe mehameha mau e! Mai te tahi aoao o teie hohoˈa taata ra, e haere roa ˈtu teie hanahana nehenehe mau ra mai nia mai e tae roa ˈtu i raro. Ua haaati-roa-hia teie hohoˈa taatoa i te hanahana. Te faaite ra te reira e e hanahana faito ore to Iehova. Hau atu, te apeehia ra te Taata faahoro pereoo e te hoê anuanua haviti mau. Auê ïa hau e te peapea ore ta te anuanua e afai mai i muri aˈe i te vero! Maoti teie haerea hau mau, e tapea noa Iehova i to ˈna mau ateributi oia hoi te paari, te parau-tia, te puai e te here i roto i te hoê faito tia roa.
11. Eaha te huru o Ezekiela i mua i te orama o te pereoo e te terono o Iehova?
11 Ua haaatihia te pereoo e te terono o Iehova i te maramarama e te mau peni nehenehe mau ra. Auê ïa taa-ê-raa e o Satani, te arii o te poiri e te vahi moe! Eaha ˈtura te huru o Ezekiela i mua i teie mau mea atoa? Te na ô ra oia e: “E tei te iteraa ˈtu vau ra, ua tipapa ihora vau i raro te mata, faaroo atura vau i te reo o te hoê i parau maira.” — Ezekiela 1:28.
Eaha ta te pereoo e faahohoˈa ra
12. Te faahohoˈa ra te pereoo no te raˈi a Iehova i te aha?
12 Te faahohoˈa ra teie pereoo faahiahia mau ra i te aha? Te faanahonahoraa a te Atua ra o Iehova i te raˈi. Te amui ra oia i te taatoaraa o ta ˈna mau mea poietehia varua i roto i to ˈna vahi ite-ore-hia — te mau seraphi, te mau kerubi e te mau melahi. I te mea e o Iehova te Atua Teitei roa ˈˈe, te auraro nei ta ˈna mau mea poietehia varua atoa ia ˈna, e te faahoro nei oia ia ratou ia au i te auraa ra e te faatere nei oia ia ratou e te faaohipa nei ia ratou ma te hamani maitai e ia au maite i ta ˈna opuaraa. — Salamo 103:20.
13. a) No te aha e nehenehe ai e parau e te faahoro ra Iehova i ta ˈna faanahonahoraa? b) Mea nafea te orama o te pereoo e maha huira a Iehova ia ohipa i nia ia outou?
13 Te faahoro ra Iehova i ta ˈna faanahonahoraa mai te mea ra e tei nia oia i te hoê pereoo, ma te turai ia ˈna ia haere i te vahi atoa ta to ˈna varua e faaue ra ia ˈna ia haere. Aita oia e horo haere noa ra ma te haapaoraa ore, ma te ore e hiˈopoahia aore ra e arataihia e te hoê taata maramarama. Aita te Atua e vaiiho noa ra i teie faanahonahoraa ia haere i te hoê vahi o ta ˈna iho e hinaaro e haere. Te pee nei râ oia i ta ˈna mau aratairaa. Ma te tahoê, te haere paatoa nei ratou i mua no te rave faahope roa i te mau opuaraa a te Atua. Auê ïa faanahonahoraa faahiahia mau i te raˈi ra teie e faaitehia mai nei na roto i teie orama no nia i te pereoo e maha huira no te raˈi a Iehova e haere ra i mua! Ia au i te reira, te faataahia ra te faanahonahoraa a Iehova mai te hoê afata e maha pae aifaito maitai.
Faatoroahia ei taata tiai
14. O vai te faahohoˈahia ra e te peropheta o Ezekiela?
14 O vai râ tei faahohoˈahia e te peropheta o Ezekiela? Ia au i te mau ohipa i tupu i roto i te aamu, mea papu maitai e ua apiti atu te pǔpǔ o te mau Ite no Iehova faatavaihia i te varua, i te pereoo no te raˈi ra. No reira, te faahohoˈa maitai ra o Ezekiela i te toea faatavaihia a te mau Ite no Iehova mai te matahiti 1919 mai â. I te pae varua, ua ohipa mai te faanahonahoraa a te Atua i nia i te raˈi i nia i te toea faatavaihia i taua matahiti ra, no te faaora faahou ia ratou ei mau Ite no Iehova na te ao atoa nei. (A faaau e te Apokalupo 11:1-12.) Ua tere atura teie faanahonahoraa e au i te hoê pereoo ra i reira, mai ta ˈna e tere ra i teie mahana. Inaha, te ohu nei to ˈna mau huira e haere ra i mua i te hoê tere vave roa. Te faahoro oioi nei Iehova ma te haere i mua!
15. Eaha ta te reo o te Taata faahoro i te pereoo no te raˈi e parau ra, e eaha te hopoia i horoahia ˈtu na Ezekiela?
15 Ua hinaaro o Ezekiela e ite e no te aha te pereoo no te raˈi i haere mai ai i mua ia ˈna e e faaea ˈtu ai. Ua taa ˈtura ia ˈna i to ˈna faarooraa ˈtu i te hoê reo no ǒ mai i Tei parahi i nia i te pereoo ra. No to ˈna mǎtaˈu i te iteraa ˈtu i teie ohipa maere mau, ua tipapa ihora o Ezekiela. A faaroo na i te reo o te Taata faahoro i te pereoo no te raˈi i te na ôraa mai e: “E te tamaiti a te taata na, tia hua mai to avae, e parau atu vau ia oe.” (Ezekiela 2:1). Ua tono atura Iehova ia Ezekiela ei taata tiai no te faaara i te tamarii a Iseraela orure hau. Ua faaue-atoa-hia oia e paraparau na nia i te iˈoa o te Atua. Te auraa o te iˈoa Ezekiela ra, oia ïa “E haapuai te Atua.” No reira, ua haapuai te Atua i te pǔpǔ a Ezekiela e ua tono atura ia ratou ma te faatoroa ia ratou ei taata tiai i mua i te amuiraa faaroo kerisetiano.
16, 17. a) Mea nafea te orama o te pereoo no te raˈi i te tautururaa ia Ezekiela? b) I to tatou nei mahana, mea nafea te maramarama no nia i te orama o te pereoo no te raˈi i te ohiparaa i nia i te pǔpǔ a Ezekiela e te feia rahi roa?
16 E orama faahiahia e te maere mau ta Ezekiela i ite, teie râ, ua faaineine atoa te reira ia ˈna no ta ˈna hopoia ei taata tiai no te faaite hua i te faaararaa no nia i te haamouraa o Ierusalema e fatata maira. Hoê â huru no te pǔpǔ o te taata tiai i teie mahana. Ua ohipa puai mau â to ratou maramarama no nia i te orama o te pereoo a Iehova no te raˈi e haere ra i mua, i nia i te toea faatavaihia. I te matahiti 1931, ua rahi atu â to ratou ite no nia i te orama a Ezekiela, mai tei faaitehia i roto i te buka Vindication, Buka Hoê. Ua î roa ˈtura ratou i te faahiahia e inaha, mai te numera o te 15 no atopa 1931 e tae atu i to te 1 no atete 1950, ua tuuhia i nia i te poro atau o te api matamua o Te Pare Tiairaa, te hoê hohoˈa no te pereoo no te raˈi a te orama a Ezekiela. Ua ohipa atura te pǔpǔ a Ezekiela no te haapao i te hopoia i horoahia mai, e ua tavini ratou ei taata tiai, ma te faaite hua i te faaararaa a te Atua. Ua fatata roa mai te taime no te haamouraa rahi i nia i te amuiraa faaroo kerisetiano no ǒ mai ia Iehova e parahi ra i nia i te terono o to ˈna pereoo no te raˈi!
17 I teie mahana, ua apiti atu “te feia rahi roa” o te mau mamoe i te toea faatavaihia (Apokalupo 7:9). Ma te tahoê, te faaite puai nei ratou i te faaararaa no te haamouraa e fatata maira i nia i te amuiraa faaroo kerisetiano e teie amuiraa taatoa o te mau mea a te Diabolo ra. Te haere oioi ra teie ohipa faaararaa i mua, e ia au i tei papaihia i roto i te Apokalupo 14:6, 7, te turu nei te mau melahi i teie ohipa.
Te haereraa i mua e te pereoo no te raˈi
18. Eaha te tia ia rave ia fanaˈo tatou i te turu tamau a te mau melahi, e e tia ia tatou ia ineine noa i te aha?
18 Te haere ra te mau melahi auraro ma te au maite ei tuhaa no te faanahonahoraa a te Atua i nia i te raˈi ma te tauturu atoa i te mau tavini a Iehova i nia i te fenua ia nehenehe ratou e rave faahope roa i ta ratou hopoia no te faaiteraa i te mau faaararaa no nia i te haavaraa a te Atua. Ia hinaaro tatou i te paruru e te aratairaa tamau a teie mau melahi puai e tavini ra i te Atua, e tia atoa ia tatou ia haere i mua ma te au maite e ia haere i te hoê â tere e te mau huira taipe. Hau atu, ei tuhaa no te faanahonahoraa itehia a Iehova e haere ra i te hoê â tere e to ˈna pereoo no te raˈi, e tia ia tatou ia ineine noa i te pee i te aratairaa a te varua o te Atua. (A faaau e te Philipi 2:13.) Mai te peu e e Ite no Iehova tatou, e tia ia tatou ia pee i te hoê â aveia e te pereoo no te raˈi. Eiaha ïa tatou e rave i te ohipa o te ore e tuea. Ia horoahia mai te aratairaa te tia ia tatou ia haere, e tia ia tatou ia pee i te reira. I reira, eita ïa te amuiraa e amahamaha. — Korinetia 1, 1:10.
19. a) Mai te mau huira o te pereoo no te raˈi e mau mata to ratou e ati noa ˈˈe, e tia i te nunaa o te Atua ia ara i te aha? b) Eaha to tatou haerea i teie tau arepurepu?
19 Te faaite ra te mau mata e ati noa ˈˈe i te mau huira o te pereoo o te Atua i te araraa. Mai te faanahonahoraa i te raˈi e vai ara noa ra, e tia atoa ia tatou ia vai ara noa no te turu i te faanahonahoraa a Iehova i nia i te fenua. I roto i te amuiraa, e nehenehe tatou e faaite i teie turu na roto i te rave-amui-raa ˈtu i te ohipa e te mau matahiapo (Hebera 13:17). I roto i teie anotau arepurepu, mea hinaaro mau â na te mau kerisetiano ia tapiri noa i te faanahonahoraa a Iehova. Eita tatou e hinaaro e tiaturi i ta tatou iho huru faataaraa i te mau ohipa, inaha, eita ïa tatou e pee faahou te pereoo no te raˈi a Iehova. Ia tamau noa tatou i te ani e, ‘Te haere ra te pereoo no te raˈi na nia i teihea eˈa?’ Ia haere tatou ia au i te tere o te faanahonahoraa itehia a te Atua, e pee atoa ïa tatou i te faanahonahoraa ite-ore-hia.
20. Eaha te aˈoraa maitai roa ta te aposetolo Paulo e horoa ra i roto i te Philipi 3:13-16?
20 No nia i teie manaˈo, ua papai o Paulo e: “E au mau taeae, aore au i manaˈo ia ˈu iho nei, e ua noaa, hoê roa a ˈu mea e rave nei, i te haamoeraa i te mau mea i muri ra, e te titauraa ˈtu hoi i tei mua, te nenei tia ˈtu nei au i te tapao, ia noaa te berabeio i te parauraa a te Atua no nia maira i te Mesia nei ia Iesu. E teie nei, e na reira to tatou manaˈo, to te feia atoa i paari ra: e e manaˈo ê to outou i te tahi mea ˈtu, na te Atua e faaite mai ia outou i te reira. Ta tatou râ vahi i noaa maira, e na reira tatou i te haere na taua tapao nei â ma te haapao maite â hoi i te mea hoê â.” — Philipi 3:13-16.
21. Ia pee tatou i teihea peu matauhia e nehenehe ai tatou e haere i mua i te pae varua na muri iho i te faanahonahoraa a te Atua?
21 I ǒ nei, e ere te auraa o te parau ra “mea hoê â” [peu matauhia] i te hoê huru tupuraa ino mea fifi roa ia matara mai. Te pee nei te mau tavini a Iehova i te hoê peu matau-noa-hia ia haere ratou i mua i te pae varua. O te hoê ïa peu matauhia no te rave i te haapiiraa bibilia tataitahi, te taeraa ˈtu i te mau putuputuraa a te amuiraa, te poro-tamau-raa i te parau apî maitai o te Basileia e te faaiteraa i te mau huru maitai o te faanahonahoraa a te Atua i nia i te raˈi. Maoti teie peu matauhia e nehenehe ai ratou e pee i te mau aratairaa a te faanahonahoraa i faaauhia i te pereoo no te raˈi a Iehova. Na roto i te tamau-noa-raa i te na reira, e naeahia ia tatou i ta tatou tapao, noa ˈtu e o te haamaitairaa anei no te pohe-ore-raa i nia i te raˈi aore ra te ora mure ore i roto i te paradaiso i nia i te fenua nei.
22. a) Ia faanahohia te toea faatavaihia e te feia rahi roa ma te autahoê, eaha te tia ia rave? b) Eaha te mea o te ore e mahere ia Iehova?
22 Mai ta te Ioane 10:16 e faaite ra, e faanahohia te mau “mamoe ê atu” e te pǔpǔ a Ezekiela ma te autahoê. Mea faufaa atura ïa ia taa maitai i te feia atoa i roto i te faanahonahoraa a Iehova i te auraa taatoa e te hohonuraa o te orama i papaihia i roto i te Ezekiela pene 1 ia hinaaro ratou e pee maite i te pereoo no te raˈi a te Atua. E tauturu te orama no nia i teie pereoo ia tatou ia taa maitai e e tia ia tatou ia haere ia au maite i te faanahonahoraa a te Atua, tei itehia e tei ore e itehia. Eiaha atoa ia moehia e “te hiˈo nei te mata o Iehova i to te ao atoa nei, ia horoa mai oia i te etaeta i te feia i tia te aau ia ˈna.” (Paraleipomeno 2, 16:9). Aita hoê mea iti haihai roa ta Iehova e ore e ite, te mau mea iho â râ no nia i ta ˈna opuaraa e faatiamâ i to ˈna tiaraa ei Arii teitei no te ao atoa nei.
23. E te pereoo no te raˈi a Iehova e haere ra i mua, eaha te tia ia tatou ia rave?
23 Ma te papu maitai, te haere ra te pereoo no te raˈi a Iehova i mua i teie mahana. Fatata roa te mau mea atoa i te faahanahanahia ia au maite i te Taata hanahana e faahoro ra i teie pereoo — e teie mau mea atoa no te faatiamâ ia ˈna ei Fatu Teitei no te ao atoa nei. Te turu nei te mau seraphi, te mau kerubi e te mau melahi no ˈna ra ia tatou i roto i ta tatou ohipa pororaa na te ara. Ia haere anaˈe na tatou i mua, na muri i te faanahonahoraa a Iehova i nia i te raˈi ra. Nafea râ tatou ia tapea i te hoê â tere e teie pereoo no te raˈi e haere oioi ra?
Nafea outou ia pahono?
◻ Eaha te mau huru maitai e faahohoˈahia ra e te mau mea ora e maha ta Ezekiela i ite?
◻ Te faahohoˈa ra te pereoo no te raˈi a Iehova i te aha?
◻ Te faahohoˈa ra te peropheta a te Atua o Ezekiela ia vai?
◻ Mea nafea te maramarama no nia i te pereoo no te raˈi a Iehova i te ohiparaa i nia i te pǔpǔ a Ezekiela e te feia rahi roa?