Mai te aha te puai o to outou tiaturiraa i te tia-faahou-raa?
“Tei ia ˈu te tia-faahou-raa e te ora, o te faaroo mai ia ˈu ra, pohe noâ oia e ora â ïa.”—IOANE 11:25.
1, 2. No te aha e tia i te hoê taata o te haamori ra ia Iehova ia tiaturi i te tia-faahou-raa?
MAI te aha te puai o to outou tiaturiraa i te tia-faahou-raa? Te faaitoito ra anei te reira ia outou i mua i te mǎtaˈu i te pohe e te tamahanahana ra anei te reira ia outou ia pohe te feia herehia e outou? (Mataio 10:28; Tesalonia 1, 4:13) Mai e rave rahi mau tavini a te Atua i mutaa ihora, o tei faaruru i te hui, te faaoooraa, te haamauiuiraa, e te fare tapearaa, te haapuaihia ra anei outou e te tiaturiraa i te tia-faahou-raa?—Hebera 11:35-38.
2 Oia, eiaha roa ˈtu te hoê taata aau rotahi o te haamori ra ia Iehova, ia feaa no nia i te tia-faahou-raa, e e tia i to ˈna tiaturi ia ohipa i nia i to ˈna huru oraraa. E mea faahiahia ia feruri e i te taime faataahia e te Atua, e tuu mai te miti, te pohe, e o Hade i te feia i roto ia ratou ra, e e nehenehe teie feia o te faatiahia mai e ora e a muri noa ˈtu i nia i te hoê fenua paradaiso.—Apokalupo 20:13; 21:4, 5.
Te mau feaaraa no nia i te hoê oraraa no a muri aˈe
3, 4. Eaha ta te mau taata e rave rahi e tiaturi noa ra no nia i te oraraa i muri aˈe i te pohe?
3 Ua haapii maoro na te Amuiraa faaroo kerisetiano e e ora to muri aˈe i te pohe. Ua faahiti te hoê tumu parau i roto i te vea ra U.S. Catholic e: “I te roaraa o te mau tau, ua tutava na te mau Kerisetiano i te faaruru i te mau inoinoraa e te mau mauiui o teie oraraa na roto i te tiairaa i te tahi atu oraraa, hoê oraraa hau e te maitai, fanaˈo e te oaoa.” Noa ˈtu e i roto e rave rahi fenua a te Amuiraa faaroo kerisetiano, aita te taata e tâuˈa ra i te faaroo e te faaino atoa ra i te reira, te manaˈo noa ra e rave rahi e te vai ra te tahi mea i muri aˈe i te pohe. Aita râ ratou e papu roa ra i te reira.
4 Ua faahiti te hoê tumu parau i roto i te vea ra Time e: “Te tiaturi noa ra te taata i [te hoê oraraa i muri aˈe i te pohe]: ua poiri noa ˈtu â to ratou manaˈo no nia i te auraa mau o te reira, e aita ratou e faaroo pinepine roa ra i ta ratou mau orometua ia faahiti i te reira.” No te aha aita te mau tia faaroo e paraparau pinepine ra no nia i te hoê oraraa i muri aˈe i te pohe, mai na mua ˈˈe? Te na ô nei te taata ite faaroo ra o Jeffrey Burton Russell e: “Te manaˈo nei au e te hinaaro ra [te mau tia faatere haapaoraa] e ape i te tumu parau, no te mea te manaˈo nei ratou e e tia ia ratou ia faaû atu i te feaaraa o te taata.”
5. Eaha te manaˈo o te mau taata e rave rahi i teie mahana no nia i te haapiiraa o te po auahi?
5 I roto e rave rahi ekalesia, te vai ra te hoê raˈi e te hoê po auahi ura i roto i te oraraa i muri aˈe i te pohe. E mai te peu e te taiâ nei te mau tia faatere haapaoraa i te paraparau no nia i te raˈi, e taiâ roa ˈtu â ïa ratou i te paraparau no nia i te po auahi. Ua faahiti te tumu parau o te hoê vea e: “I teie mau mahana, o te mau ekalesia atoa, o te tiaturi ra hoi i te faautuaraa mure ore i roto i te hoê po auahi mau . . . teie e faaiti nei i te faufaaraa o teie manaˈo.” Oia mau, aita te rahiraa o te feia tuatapapa faaroo i teie nei tau e tiaturi faahou ra i te po auahi mai te hoê vahi haamauiuiraa mau, ia au i tei haapiihia i te Anotau no Ropu. Te farii nei râ ratou i te hoê tatararaa “maitai aˈe” o te po auahi. Ia au e rave rahi feia e titau ra i te mau mea apî, aita te feia hara e haamauiui-mau-hia ra i roto i te po auahi, tera râ, te mauiui nei ratou no to ratou “taa-ê-raa mai e te Atua i te pae varua.”
6. Nafea to vetahi iteraa e e faaroo navai ore to ratou i to ratou faarururaa i te ati?
6 Te tauturu ra paha te haapiiraa paruparu a te ekalesia no te ore e faaturori i te mau manaˈo hohonu i teie nei tau, ia vetahi ia ape i te au-ore-raa, teie râ, e mau mirioni taata haere pure aau rotahi teie e uiui nei e eaha ta ratou e tiaturi. No reira, i mua i te pohe, e pinepine teie mau taata i te manaˈo e aita to ratou e faaroo. E au to ratou huru mai to te vahine e e rave rahi mau melo utuafare to ˈna tei pohe i roto i te hoê ati riaria. I to ˈna aniraahia e ua tamahanahana mai anei to ˈna faaroo ia ˈna, ua pahono maira oia ma te faataupupu e, “E paha.” Noa ˈtu râ e e pahono mai oia ma te papu e ua tauturu mai to ˈna faaroo ia ˈna, eaha te faufaaraa o te reira mai te peu e aita i niu-maitai-hia ta ˈna mau tiaturiraa? E manaˈo faufaa teie no te mea, i te tupuraa mau, mea taa ê roa te haapiiraa a te rahiraa o te mau ekalesia no nia i te hoê oraraa no a muri aˈe i te haapiiraa a te Bibilia.
Te manaˈo o te Amuiraa faaroo kerisetiano no nia i te oraraa i muri aˈe i te pohe
7. (a) Eaha te tiaturiraa e haapiihia ra e te rahiraa o te mau ekalesia? (b) Nafea to te hoê taata tuatapapa faaroo faataaraa i te haapiiraa o te nephe pohe ore?
7 Noa ˈtu to ratou mau taa-ê-raa, fatata pauroa te mau haapaoraa a te Amuiraa faaroo kerisetiano e farii nei e e nephe pohe ore to te taata o te ora ia pohe te tino. Te tiaturi nei te rahiraa e ia pohe anaˈe te hoê taata, e haere paha to ˈna nephe i nia i te raˈi. Te mǎtaˈu nei vetahi e e haere paha to ratou nephe i roto i te po auahi ura aore ra i te vahi tamâraa hara. E mea faufaa roa râ te manaˈo o te hoê nephe pohe ore i roto i ta ratou hiˈoraa i te hoê oraraa no a muri aˈe. Ua faataa te taata tuatapapa faaroo ra o Oscar Cullmann i te reira, i roto i te hoê tatararaa tei neneihia i roto i te buka ra Pohe-ore-raa e tia-faahou-raa (Beretane). Teie ta ˈna i papai: “Mai te peu e e tia ia tatou ia ani i te hoê Kerisetiano matauhia i teie mahana . . . e eaha to ˈna manaˈo no nia i te haapiiraa o te oraraa faataahia o te taata i muri aˈe i te pohe i roto i te Faufaa Apî, taa ê atu i te tahi mau pahonoraa, e pahonohia mai iho â e: ‘Te pohe-ore-raa o te nephe.’” Ua parau faahou râ o Cullmann e: “Ua riro teie manaˈo farii-rahi-hia ei hoê o te mau manaˈo hape rahi roa ˈˈe o te Kerisetianoraa.” Ua ite o Cullmann e i to ˈna parau-matamua-raa i te reira, ua faatupu oia i te peapea. Tera râ, ua tano oia.
8. Eaha te tiaturiraa ta Iehova i tuu i mua i te tane e te vahine matamua?
8 Aita te Atua ra o Iehova i poiete i te mau taata no te haere i nia i te raˈi i muri aˈe i to ratou poheraa. Aita roa ˈtu oia i opua i te omuaraa e e tia ia ratou ia pohe. Ua poietehia o Adamu raua o Eva ei mau taata tia roa e ua horoahia ia raua te ravea no te faaî i te fenua i te mau taata parau-tia. (Genese 1:28; Deuteronomi 32:4) Ua faaarahia i to tatou nau metua matamua e e pohe raua mai te peu noa e eita raua e auraro i te Atua. (Genese 2:17) Mai te peu e e auraro noa raua i to raua Metua i nia i te raˈi, e tamau noa ïa raua i te ora e a muri noa ˈtu i nia i te fenua nei.
9. (a) Eaha te parau mau no nia i te nephe o te taata? (b) Eaha te tupu i nia i te nephe ia pohe oia?
9 Te mea peapea râ, aita o Adamu raua o Eva i auraro i te Atua. (Genese 3:6, 7) Na te aposetolo Paulo e faataa ra i te mau faahopearaa peapea i noaa mai: “No te taata hoê ra i ô mai ai te [hara] i te ao nei, e no te [hara] hoi te pohe; e ua taea-atoa-hia te taata atoa e te pohe i te mea ua hara paatoa.” (Roma 5:12; MN) Aita o Adamu raua o Eva i ora e a muri noa ˈtu i nia i te fenua nei, ua pohe râ raua. Eaha tei tupu i muri iho? E mau nephe pohe ore anei to raua o te nehenehe e faahaerehia i teie nei i roto i te hoê po auahi ura no ta raua hara? Aita roa ˈtu, te parau ra te Bibilia e i te omuaraa, i to ˈna poieteraahia, “riro aˈera” o Adamu “ei [“nephe,” MN] ora.” (Genese 2:7) Aita i horoahia te hoê nephe no te taata; ua riro oia ei nephe, ei taata ora. (Korinetia 1, 15:45) E ere o Adamu anaˈe te “nephe ora,” mai tei faaitehia i roto i te reo Hebera mea na reira te huriraahia te Genese, e “mau [“nephe,” MN] ora” atoa râ te mau animala! (Genese 1:24) I to Adamu raua o Eva poheraa, ua riro raua ei mau nephe pohe. I te pae hopea, ua tupu te mau parau ta Iehova i parau ia Adamu, i nia ia raua, e: “E amu oe i ta oe maa ma te hou i nia i to rae, e hoˈi noa ˈtu oe i raro i te repo, no reira mai hoi oe; e repo hoi oe, e e hoˈi faahou atu â oe i te repo.”—Genese 3:19.
10, 11. Eaha ta te Buka parau paari Katolika apî e faˈi ra no nia i te haapiiraa o te nephe a te Bibilia, e nafea te reira ia faaauhia e ta te Bibilia e parau ra?
10 Te vahi faufaa, te farii nei te Buka parau paari Katolika apî (Beretane) i te reira. I roto i ta ˈna tumu parau ra “Nephe (i roto i te Bibilia),” te na ô ra oia e: “Aita e [vahiraa e piti tuhaa] to te tino e te nephe i roto i te FT [“Faufaa Tahito,” aore ra mau Papai Hebera].” Te parau faahou ra oia e i roto i te Bibilia, te parau ra “nephe” “e ere roa ˈtu ïa te auraa e ua faataa-ê-hia te nephe i te tino aore ra i te taata taitahi.” Oia mau, e pinepine te nephe “o te mea ora taitahi ïa, animala anei aore ra taata.” E parau tamǎrû teie huru parau haavare ore, e uiui râ paha te hoê taata ma te tano e no te aha aita te rahiraa o te feia haere pure i ite i teie mau mea.
11 E nehenehe hoi te feia haere pure e ape i te haapeapea e i te mǎtaˈu ahiri ratou i ite i te parau mau ohie a te Bibilia e: “O [te nephe] tei rave i te hara ra, o [oia] te pohe,” eita râ oia e mauiui i roto i te po auahi! (Ezekiela 18:4; MN) Noa ˈtu e mea taa ê roa teie manaˈo i ta te Amuiraa faaroo kerisetiano e haapii ra, ua tano roa te reira i te mau parau faauruahia a te taata paari ra o Solomona, e: “Ua ite te feia e ora nei, e pohe ratou, aita râ a te feia i pohe ra e parau itea. Aita hoi a ratou e utua toe [i roto i teie oraraa] i te fenua nei; ua aramoina hoi ratou. O tei itea ia oe ta to rima e rave ra, a rave ma to puai atoa ra; aore hoi e ohipa, aore e imiraa, aore hoi e ite, aore hoi e paari, i te apoo [te menema matauhia o te huitaata nei] ta oe e haere na.”—Koheleta 9:5, 10.
12. Nohea mai te haapiiraa o te nephe pohe ore a te Amuiraa faaroo kerisetiano?
12 No te aha ïa te Amuiraa faaroo kerisetiano e haapii ai i te hoê mea taa ê roa i ta te Bibilia e parau ra? Te parau ra te Buka parau paari Katolika apî, i roto i ta ˈna tumu parau ra “Nephe, taata, pohe-ore-raa,” e ua itea i te mau Metua matamua o te Ekalesia e aita te Bibilia e turu ra i te tiaturiraa o te hoê nephe pohe ore, maoti râ “te mau rohipehe e te mau philosopho e te rahiraa o te mau tutuu o te manaˈo Heleni . . . I muri iho, ua hinaaro aˈe te feia tuatapapa e faaohipa i te manaˈo o Platon aore ra i te mau faaueraa tumu a Aristote.” Te parau ra te tumu parau ra e ua faaôhia mai “te mana o te manaˈo o Platon e ta ˈna haapiiraa philosopho apî”—tae noa ˈtu te tiaturiraa o te nephe pohe ore—i te pae hopea “i roto roa i te tuatapaparaa faaroo kerisetiano.”
13, 14. No te aha e ere i te mea tano ia tiaturi e na te mau philosopho Heleni etene e haamaramarama mai?
13 E tia anei i te feia e parau ra e e Kerisetiano ratou ia huri atu i nia i te mau philosopho Heleni etene no te haapii i te tahi mea faufaa mai te tiaturiraa o te oraraa i muri aˈe i te pohe? Eita roa ˈtu. I to Paulo papairaa i te mau Kerisetiano e faaea ra i Korinetia, i Heleni, teie ta ˈna i parau: “O te paari hoi o teie nei ao, e mea maamaa ïa i te Atua; ua oti hoi i te papaihia e, Te haafifi nei oia i te feia paari i to ratou iho paari. E ua papaihia hoi, Ua ite [“o Iehova,” MN] i te manaˈo o te feia paari, e e mea faufaa ore ïa.” (Korinetia 1, 3:19, 20) E feia haamori idolo te feia Heleni i tahito ra. Nafea ïa ratou e nehenehe ai e riro ei tumu no te parau mau? Teie ta Paulo i ani atu i to Korinetia: “E eaha to te hiero o te Atua ra atiraa ˈtu i te idolo? o te hiero hoi [tatou] o te Atua ora ra; ta te Atua i parau maira e, E parahi mau vau i [rotopu] ia ratou, e hahaere au i [rotopu] ia ratou; e ei Atua vau no ratou, e ei taata hoi ratou no ˈu.”—Korinetia 2, 6:16; MN.
14 Ua faaitehia na mua te mau parau mau moˈa na roto i te arai o te nunaa Iseraela. (Roma 3:1, 2) I muri aˈe i te matahiti 33 T.T., ua horoahia na roto i te arai o te amuiraa kerisetiano faatavaihia i te senekele matamua. Ua parau o Paulo, no nia i te mau Kerisetiano o te senekele matamua, e: “Ua faaite mai râ te Atua ia tatou i [te mau mea i faaineinehia no te feia e here ra ia ˈna] i to ˈna [v]arua.” (Korinetia 1, 2:10; a hiˈo atoa i te Apokalupo 1:1, 2.) No roto mai te haapiiraa o te pohe-ore-raa o te nephe a te Amuiraa faaroo kerisetiano i te haapiiraa philosopho Heleni. Aita te reira e vai ra i roto i te mau faaiteraa a te Atua ia Iseraela aore ra i te amuiraa a te mau Kerisetiano faatavaihia i te senekele matamua.
Te tiaturiraa mau no te feia pohe
15. Ia au i te manaˈo o Iesu, eaha te tiaturiraa mau no te feia pohe?
15 Mai te peu e aita e nephe pohe ore, eaha ïa te tiaturiraa mau no te feia pohe? O te tia-faahou-raa iho â ïa, e haapiiraa tumu teie a te Bibilia e e parau tǎpǔ faahiahia mau atoa a te Atua. Ua faaite o Iesu i te tiaturiraa o te tia-faahou-raa i to ˈna parauraa ˈtu i to ˈna hoa ra o Mareta e: “Tei ia ˈu te tia-faahou-raa e te ora, o te faaroo mai ia ˈu ra, pohe noâ oia e ora â ïa.” (Ioane 11:25) E tiaturi ia Iesu, oia ïa te auraa e tiaturi i te tia-faahou-raa, eiaha râ i te hoê nephe pohe ore.
16. No te aha e mea tano ia tiaturi i te hoê tia-faahou-raa?
16 Ua faahiti na o Iesu na mua ˈˈe i te parau o te tia-faahou-raa i to ˈna parauraa ˈtu i te tahi mau ati Iuda e: “Eiaha e maere i te reira; te fatata mai nei hoi te hora e faaroo ai te feia atoa i roto i te apoo [“haamanaˈoraa,” MN] ra i tana reo, e e haere mai i rapae.” (Ioane 5:28, 29) E mea taa ê roa te mea o ta Iesu e faataa ra i ǒ nei, i te hoê nephe pohe ore o te ora mai ia pohe te tino e o te haere roa i nia i te raˈi. O te hoê ‘haereraa mai i rapae’ i mua nei o te feia i vai na i roto i te apoo, e rave rahi senekele aore ra e mau tausani matahiti te maoro. O te mau nephe pohe o te hoˈi faahou mai i te ora. Eaha ïa? Oia, e nehenehe ta te Atua e “faaora i tei pohe ra, e o tei parau i te mau mea aore ra, mai te mea e, te vai nei.” (Roma 4:17) Te tâhitohito ra paha te feia feaa i te manaˈo e e hoˈi faahou mai te taata mai te pohe mai, tera râ, te tuati maitai ra te reira e te mea ra e “e [“here,” MN] te Atua” e na ˈna e “faautua [“maitai,” MN] i te feia i imi papu ia ˈna.”—Ioane 1, 4:16; Hebera 11:6.
17. Eaha ta te Atua e faatupu na roto i te tia-faahou-raa?
17 Inaha, nafea te Atua e nehenehe ai e faautua maitai i te feia i ‘mau papu e tae noa ˈtu i te pohe’ mai te peu e eita oia e faahoˈi mai ia ratou i te ora? (Apokalupo 2:10) Na roto i te tia-faahou-raa, e nehenehe atoa te Atua e faatupu i ta te aposetolo Ioane i papai e: “No reira i faaitehia mai ai te Tamaiti a te Atua ra, ia haamou oia i te ohipa a te diabolo ra.” (Ioane 1, 3:8) I roto i te ǒ i Edene ra, ua riro o Satani ei taparahi taata o te nunaa taata taatoa i to ˈna aratairaa i to tatou nau metua matamua i roto i te hara e te pohe. (Genese 3:1-6; Ioane 8:44) Ua haamata o Iesu i te haamou i te mau ohipa a Satani i to ˈna horoaraa i to ˈna ora tia roa ei hoo aifaito, ia nehenehe te huitaata nei e tiamâ i te faatîtîraa o te hara no to Adamu patoiraa ma te opua i te auraro. (Roma 5:18) E riro faahou te tia-faahou-raa o te feia i pohe no te hara a Adamu, ei haamouraa o te mau ohipa a te Diabolo.
Te tino e te nephe
18. Eaha te huru o te tahi mau philosopho Heleni i mua i te mau parau a Paulo e ua faatiahia mai o Iesu, e no te aha?
18 I to te aposetolo Paulo parahiraa i Ateno, ua poro oia i te parau apî maitai i te hoê nahoa taata, tei rotopu atoa te tahi mau philosopho Heleni. Ua faaroo ratou i ta ˈna aparauraa no nia i te Atua mau hoê e i to ˈna titauraa ia ratou ia tatarahapa. Eaha râ tei tupu i muri iho? Ua faaoti o Paulo i ta ˈna aparauraa, ma te na ô e: “Ua haapaohia e [te Atua] te mahana e haava mai ai oia i to te ao atoa nei ma te parau-tia, i te taata i haapaohia e ana ra, o ta ˈna i faaite hua mai i te taata atoa nei, oia i faatia faahou mai ia ˈna mai te pohe maira.” Ua faatupu taua mau parau ra i te arepurepuraa. I to ‘ratou iteraa i te parau o te tia-faahou-raa i tei pohe ra, ua tâhitohito maira te tahi pae.’ (Ohipa 17:22-32) Te na ô ra te taata tuatapapa faaroo ra o Oscar Cullmann e: “E mea fifi aˈe paha no te mau Heleni, o tei tiaturi na i te pohe-ore-raa o te nephe, ia farii i te pororaa kerisetiano o te tia-faahou-raa, i te tahi atu mau taata. . . . Eita roa ˈtu te haapiiraa a te mau philosopho rahi ra o Socrate e o Platon e [tuati] e ta te Faufaa Apî.”
19. Mea nafea to te feia tuatapapa faaroo a te Amuiraa faaroo kerisetiano tamataraa i te faatuati i te haapiiraa o te tia-faahou-raa e te haapiiraa o te nephe pohe ore?
19 Noa ˈtu râ, i te tupuraa te ohipa apotata rahi i muri aˈe i te poheraa o te mau aposetolo, ua tutava te feia tuatapapa faaroo i te anoi i te haapiiraa kerisetiano o te tia-faahou-raa e te tiaturiraa o te nephe pohe ore a Platon. I muri iho, ua farii vetahi i te hoê ravea apî: I te poheraa, e taa ê (“e tiamâ,” mai ta vetahi e parau ra) te nephe i te tino. No reira, ia au i te buka ra Te mau tatararaa o te haapiiraa o te tia-faahou-raa (Beretane), a R. J. Cooke, i te Mahana Haavaraa “e tahoê-faahou-hia ˈi te tino tataitahi e to ˈna iho nephe, e te nephe tataitahi i to ˈna iho tino.” Te tahoê-faahou-raa i mua nei o te tino e to ˈna nephe pohe ore, e parauhia ïa e tia-faahou-raa.
20, 21. O vai ma tei haapii noa na i te parau mau no nia i te tia-faahou-raa, e nafea ratou i te faufaaraahia i te reira?
20 O teie noa haapiiraa papu ore te haapiiraa haamanahia a te mau ekalesia tumu. Noa ˈtu e e au ra paha e mea tano teie manaˈo no te hoê taata tuatapapa faaroo, aita râ te rahiraa o te feia haere pure i ite i te reira. Te tiaturi noa ra ratou e e haere roa ratou i nia i te raˈi ia pohe ratou. No reira, i te 5 no Me 1995, i roto i te vea ra Commonweal, ua faahapa te taata papai ra o John Garvey e: “E au ra e mea piri aˈe te tiaturiraa o te rahiraa o te mau Kerisetiano [no nia i te parau o te oraraa i muri aˈe i te pohe] i te haapiiraa philosopho apî a Platon, eiaha râ i te haapiiraa kerisetiano mau, e aita te reira i niuhia i nia i te Bibilia.” Oia mau, na roto i te haapaeraa i te Bibilia no te turu ia Platon, ua faaore te mau upoo faatere haapaoraa a te Amuiraa faaroo kerisetiano i te tiaturiraa o te tia-faahou-raa a te Bibilia, no ta ratou mau nǎnǎ.
21 Area te mau Ite no Iehova ra, te patoi nei ratou i te haapiiraa philosopho etene e te turu nei i te haapiiraa o te tia-faahou-raa a te Bibilia. Ua riro teie huru haapiiraa no ratou ei haapiiraa faaitoito, faahiahia, e te tamahanahana. I roto i te mau tumu parau i muri nei, e ite tatou e mea haamau-maitai-hia e mea tano atoa te haapiiraa Bibilia o te tia-faahou-raa, no te feia e tiaturi nei e ora i nia i te fenua nei e no te feia e faatia-faahou-hia no te ora i nia i te raˈi. No te faaineine ia outou no te hiˈopoa i teie nau tumu parau, te faaitoito nei matou ia outou ia taio maitai i te pene 15 o te rata matamua i papaihia i to Korinetia.
Te haamanaˈo ra anei outou?
◻ No te aha e tia ia tatou ia tiaturi papu i te tia-faahou-raa?
◻ Eaha te tiaturiraa ta Iehova i tuu i mua ia Adamu e ia Eva?
◻ No te aha e ere i te mea tano ia imi i te parau mau i roto i te haapiiraa philosopho Heleni?
◻ No te aha e tiaturiraa tano te tia-faahou-raa?
[Hohoˈa i te api 10]
I to raua hararaa, ua erehia to tatou nau metua matamua i te tiaturiraa o te ora mure ore i nia i te fenua nei
[Hohoˈa i te api 12]
Ua hema te feia ite a te Ekalesia i te tiaturiraa o te pohe-ore-raa o te nephe a Platon
[Faaiteraa i te tumu]
Musei Capitolini, Roma