A mǎtaˈu ia Iehova, o tei faaroo i te pure
“E tei faaroo i te pure ra, e tae atoa mai te taata atoa ia oe ra.” — SALAMO 65:2.
1. No te aha e tia ˈi ia tiai tatou e e titau Iehova i te tahi mau mea i te feia e hinaaro ra e haafatata ˈtu ia ˈna na roto i te pure?
O TE Atua ra o Iehova te ‘Arii mure ore’. O o ˈna atoa ‘o Tei faaroo i te pure’, e ‘e tae atoa mai te taata atoa ia ˈna ra’. (Apokalupo 15:3; Salamo 65:2.) Mai teihea râ huru taua mau taata ra e haere mai ai ia ˈna ra? Te faahepo maira te mau arii taata i te feia i fariihia i mua i to ratou aro ia faatura ratou i te tahi mau ture no nia i te huru e te haerea. E tia mau â ia tiai e e titau mai te Arii mure ore i te tahi mau ohipa i te taata atoa e hinaaro ra e haere mai i mua ia ˈna ma te pure ma te oto rahi e te aniraa ˈtu ma te haamaitai. — Philipi 4:6, 7.
2. Eaha te mau uiraa e uihia no nia i te pure?
2 Eaha ta te Arii mure ore e faahepo maira i te feia e haafatata ˈtu ia ˈna ma te pure? O vai te nehenehe e pure e ia faaroohia mai? E e purehia no teihea mea?
Nafea ia haafatata ˈtu i te Arii mure ore
3. Eaha te mau hiˈoraa e vai ra ia tatou ra no nia i te mau pure i faahitihia i te tau Tahito ra e te mau tavini a te Atua, e ua haafatata anei ratou ia ˈna na roto i te hoê arai?
3 Hou a riro ai oia ei taata hara, e faatupu na o Adamu, o tei riro na ei ‘tamaiti na te Atua’, i te mau aparauraa fatata roa e te Arii mure ore (Luka 3:38; Genese 1:26-28). Ma te feaa ore, i to Abela, tamaiti na Adamu, pûpûraa i te Atua te mau “mamoe [fanau tahi] maitai e te poria no roto i te nǎnǎ ra”, ua amui atoa oia i te mau pure e te mau faahanahanaraa i taua mau tusia ra (Genese 4:2-4). Ua patu o Noa, o Aberahama, o Isaaka e o Iakobo i te mau fata e ua haafatata ˈtu ratou ia Iehova ma te pure ia ˈna a pûpû ai ratou i te mau tusia ia ˈna (Genese 8:18-22; 12:7, 8; 13:3, 4, 18; 22:9-14; 26:23-25; 33:18-20; 35:1, 3, 7). E te faaite maira te mau pure a Solomona, a Esetera e a te mau taata papai salamo i faauruahia e te Atua, e aita to te mau ati Iseraela e arai ia haafatata ˈtu ratou i te Atua. — Te mau Arii 1, 8:22-24; Esetera 9:5, 6; Salamo 6:1, 2; 43:1; 55:1; 61:1; 72:1; 80:1; 143:1.
4. a) Eaha te ravea apî no te haafatataraa ˈtu i te Atua na roto i te pure i haamauhia i te senekele I? b) No te aha e mea tano mau â ia pure na roto i te iˈoa o Iesu?
4 Ua haamauhia i te senekele I o to tatou nei tau te hoê ravea apî no te haafatata i te Atua na roto i te pure. E tia ˈtura ïa i teie nei ia pure na roto i te arai a ta ˈna Tamaiti, o Iesu Mesia, o tei here taa ê i te huitaata. I te roaraa o to ˈna oraraa na mua ˈtu a riro mai ai ei taata, ua tavini o Iesu i te Atua ma te oaoa mai “te tamaiti faaamu” e tei te huitaata ra to ˈna oaoaraa (Maseli 8:30, 31). I nia i te fenua nei, ua tauturu aˈera Iesu ma te here i te mau taata i te pae varua, e ua faaora aˈera oia i te feia maˈi e ua faatia faahou atoa i te feia pohe (Mataio 9:35-38; Luka 8:1-3, 49-56). Na nia i te mau mea atoa, ua ‘horoa oia i to ˈna ora ei hoo no te taata e rave rahi’. (Mataio 20:28.) Mea tano maitai atura ïa e ia haafatata ˈtu te feia o te hinaaro ra e fanaˈo i te hoo, i te Atua, na roto i te arai o taua taata o te here rahi nei i te huitaata. I teie nei, tera anaˈe iho te ravea no te haafatata ˈtu i te Arii mure ore, i te mea ua parau o Iesu iho e: “Aore roa e taata e tae i te Metua ra, maori râ ei ia ˈu”, e: “Ta outou e ani atu i te Metua ma to ˈu ra iˈoa, na ˈna ïa e horoa mai ia outou na.” (Ioane 14:6; 16:23). Ia pûpûhia te mau aniraa na roto i te iˈoa o Iesu, e tapao ïa te reira e te farii nei tatou ia ˈna mai te ravea no te haafatata ˈtu i Tei faaroo i te pure.
5. Eaha te manaˈo hohonu o te Atua no nia i te ao o te mau taata, e eaha ta te reira e faatupu i nia i te pure?
5 E tia ia tatou ia mauruuru taa ê i te here ta Iehova i faaite ma te horoaraa i te hoo. Ua parau Iesu e: “I aroha mai te Atua i to te ao [o te mau taata], e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” (Ioane 3:16). Ua hohora-maitai-hia te hohonu o te here o te Atua i roto i teie mau parau a te papai salamo e: “Mai te teiteiraa o te mau raˈi i nia i te fenua nei, mai te reira te rahi o to ˈna aroha i te feia i mǎtaˈu ia ˈna ra: mai te hitia o te râ e taa ê i te tooa o te râ ra, o ta ˈna ia faataa-ê-raa i ta tatou mau hara ia tatou nei. Mai te aroha o te metua i ta ˈna ra mau tamarii, o to Iehova ïa aroha i te feia i mǎtaˈu ia ˈna ra. Ua ite hoi oia i to tatou huru; te manaˈo ra oia e, e repo tatou nei.” (Salamo 103:11-14). Auê te tamahanahana ia ite e te tae ra te mau pure a te mau Ite no Iehova i pûpûhia, i te hoê Atua here mai teie te huru, na roto i te arai o ta ˈna Tamaiti!
Te hoê haamaitairaa i taotiahia
6. Na roto i teihea huru e tia ia haafatata ˈtu ia Iehova na roto i te pure?
6 Eita te mau arii taata e faatia i te huru taata atoa ia tomo atu i roto i to ratou aˈorai ma te ore e faaitehia. Ua riro te hoê aparauraa e te hoê arii ei haamaitairaa faataahia na te tahi noa feia. Hoê â atoa ïa huru no te pure. Parau mau, e nehenehe te feia e haafatata ra i te Arii mure ore na roto i te arai o Iesu Mesia ma te hoê faaturaraa e au i to ˈna teitei hanahana, e tiaturi e e faaroohia mai ratou. E tia ia haafatata ˈtu i te Arii mure ore ma te faatura. E tia i te feia o te hinaaro ra ia faaroohia mai ratou ia faaite i “te mǎtaˈu (...) ia Iehova”. — Maseli 1:7.
7. Eaha te ‘mǎtaˈu ia Iehova’?
7 Eaha “te mǎtaˈu (...) ia Iehova”? O te hoê ïa faaturaraa hohonu i te Atua, amuihia mai e te mǎtaˈu faaora ia ore tatou e au-faahou-hia mai e ana. No roto mai taua mǎtaˈu faatura ia Iehova i te hoê mauruuru hohonu no to ˈna aroha (Salamo 106:1). To ˈna auraa, ia farii ïa ia ˈna mai te Arii mure ore, tei ia ˈna ra te tia e te mana no te faautua, no te haapohe atoa, i te taata atoa e auraro ore ra ia ˈna. E nehenehe te feia e faaite ra i te mǎtaˈu ia Iehova, e pure ia ˈna ma te tiaturi e e faaroohia mai ratou.
8. No te aha te Atua e faaroo ai i te mau pure a te feia e mǎtaˈu ra ia ˈna?
8 Ma te tanoraa mau, eita te Atua e farii i te mau pure a te feia ino, aore e haapao maitai e o tei î i ta ratou iho parau-tia (Maseli 15:29; Isaia 1:15; Luka 18:9-14). Teie râ, e faaroo oia i te feia e mǎtaˈu ia ˈna no te mea te faatura ra ratou i ta ˈna mau faaueraa tumu tia. E tia râ ia ratou ia rave hau atu â: te pûpûraa ia ratou na roto i te pure e te faataiperaa i taua euhe ra na roto i te bapetizoraa ia ratou i roto i te pape. Na te reira e horoa ia ratou i te haamaitairaa faito ore no te pure ia ˈna.
9, 10. E nehenehe anei ta te feia o tei ore i bapetizohia e pure ma te tiaturi e e faaroohia mai ratou?
9 Ia faaroohia mai e te Atua, e tia ia faaite na roto i te pure i te mau manaˈo hohonu ia au i te hinaaro o te Atua. Oia mau, e tia ia faaite i te aau rotahi, ia faaî atoa râ i te tahi atu â titauraa. ‘Aore e faaroo ra e ore roa oia e mauruuru, ta Paulo ïa e papai, no te mea o te haamori i te Atua ra, e faaroo oia e, e Atua, e tia ˈi, e o oia te faautua i te feia i imi papu ia ˈna ra.’ (Hebera 11:6). Tera râ, e nehenehe anei e faaitoito i te feia aita i bapetizohia ia pure ma te tiaturi e e faaroohia mai ratou?
10 Ma te ite papu e e haamaitairaa te pure o tei faataahia na vetahi ê, ua ani aˈera o Solomona ia Iehova ia faaroo noa oia i te feia ěê o tei pure tia ˈtu i To ˈna hiero, i Ierusalema (Te mau Arii 1, 8:41-43). Tau senekele i muri aˈe, ‘aita’ o Korenelio, te hoê taata paieti e ere i te ati Iuda, ‘i faaea i te pure i te Atua’. I te roaaraa ia ˈna te ite mau, ua pûpû aˈera oia ia ˈna i te Atua, o tei haamairi i te varua moˈa i nia iho ia ˈna. I muri aˈe i te reira, ua bapetizohia ihora o Korenelio e te tahi atu mau Etene (Ohipa 10:1-44). I to tatou mau mahana, e nehenehe e faaitoito i te mau taata atoa e haere ra i mua e tae roa ˈtu i te pûpû atu ia ˈna, ia pure, mai ta Korenelio i rave. Ia ore râ te hoê taata e haapii i te mau Papai ma te aau rotahi, aita e ite ra i te mau titauraa a te Atua no nia i te pure, e aita â e faaite ra i te hoê haerea e auhia mai e te Atua, eita ïa e nehenehe e parauhia e te mǎtaˈu ra oia ia Iehova, te tiaturi ra oia ia ˈna aore ra te imi ra oia ia ˈna ma to ˈna mafatu atoa. Aita oia i ineine no te faatae i te Atua ra i te mau pure ta ˈna e nehenehe e farii ma te au.
11. Eaha te ohipa i tupu i nia i te feia o tei haere i mua e tae roa ˈtu i te pûpû atu ia ratou, e eaha te tia ia ratou ia aniani?
11 E au ra e, te feia o tei haere ra i mua e tae roa ˈtu i te pûpû atu ia ratou, ua haaparuparu ïa ratou i muri iho. Mai te peu e aita ratou e here maitai ra i te Atua no te pûpû ia ratou no ˈna ma te ore e faaherehere, e tia ïa ia ratou ia uiui e e haamaitairaa faahiahia noâ ra anei ta ratou no te pure ia ˈna. E au ra e aita, no te mea e tia i te feia o te haafatata ˈtu i te Atua ia imi ia ˈna ma te aau rotahi, ia imi atoa i te parau-tia e te haehaa (Zephania 2:3). Te taata e mǎtaˈu mau ra ia Iehova, e tiaturi ïa oia ia ˈna, e pûpû oia ia ˈna no ˈna e e faataipe oia i taua euhe ra na roto i te bapetizoraa (Ohipa 8:13; 18:8). Tei te feia faaroo anaˈe tei bapetizohia te haamaitairaa taotia-ore-hia no te haafatata ˈtu i te Arii mure ore na roto i te pure.
Nafea ia ‘pure ma te varua moˈa’
12. Afea e nehenehe ai e parau e te ‘pure ra tatou ma te varua moˈa’?
12 I muri aˈe to te hoê taata pûpûraa ia ˈna no te Atua e to ˈna faataiperaa i taua euhe ra na roto i te bapetizoraa, e nehenehe ïa ta ˈna e ‘pure ma te varua moˈa’. No nia i taua ohipa ra, ua papai o Iuda e: “Area outou, e au mau here e, i te faatupuraa ia outou iho i to outou faaroo moˈa rahi ra, e te pureraa ma te [v]arua [moˈa], tamau maite outou i to outou iho hinaaro i te Atua, i te tiairaa i te aroha o to tatou Fatu ra o Iesu Mesia, e tae noa ˈtu i te ora mure ore ra.” (Iuda 20, 21). E pure te hoê taata ma te varua moˈa mai te peu e, e pure o ˈna i raro aˈe i te mana o te varua, aore ra puai ohipa, o te Atua, e ia au i Ta ˈna Parau. Te faaite maira te mau Papai, o tei papaihia i raro aˈe i te faauruaraa a te varua o Iehova, nafea ia pure e eaha te ani na roto i te pure. Ei hiˈoraa, e nehenehe tatou e pure i te Atua ma te tiaturi, ia horoa mai oia i to ˈna varua moˈa (Luka 11:13). Ia pure tatou ma te varua moˈa, e faaite ta tatou mau pure i te hoê huru mafatu e auhia e Iehova.
13. Ia pure tatou ma te varua moˈa, eaha ïa ta tatou e ape i te rave, e eaha te aˈoraa a Iesu ta tatou e auraro atu?
13 Ia pure tatou ma te varua moˈa, aita ta tatou mau pure i faaîhia i te mau parau rarahi faaahaaha. E ere atoa e mau parau tei faaineine-aˈena-hia e tei tamau-aau-hia. E ere i te mau pure auraa ore no te faahanahana i te Atua, no roto mai i te haamoriraa roma, e e ere atoa e mau faahanahanaraa e ere i te mea hohonu. Ua î te mau pure mai teie te huru i roto i te amuiraa faaroo kerisetiano e i roto i te toea o Babulonia Rahi, te hau emepera o te ao atoa nei o te haapaoraa hape. Tera râ, te mau kerisetiano mau, te pee ra ïa ratou i teie aˈoraa a Iesu: “E ia pure hoi oe ra, eiaha mai ta te feia haavare, o te hinaaro i te pure tia noa i te mau sunago, e te poro aroâ ra, ia hiˈohia ratou e te taata. (...) E ia pure outou ra, eiaha ia rahi te parau rii faufaa ore mai ta te mau Etene ra; o tei manaˈo e tei te rahi o te parau e itehia mai ai ratou. Eiaha roa e pee atu ia ratou.” — Mataio 6:5-8.
14. Eaha te mau fahitiraa parau aravihi o tei faaitehia no nia i te pure?
14 Taa ê noa ˈtu ia Iesu e te mau taata papai bibilia, ua faahiti te tahi atu mau taata i te mau faˈiraa aravihi no nia i te pure. Ei hiˈoraa, ua papai o John Bunyan (1628-1688), taata papai beretane, e: “Ua riro te pure ei hohoraraa i te mau manaˈo hohonu o te aau rotahi, feruri-maitai-hia e te aroha i mua i te Atua, na roto i te arai o te Mesia, na roto i te puai e te tauturu a te Varua, no te mea ua fafau te Atua i taua mau mea ra.” Ua parau o Thomas Brooks (1608-1680), orometua beretane o tei hinaaro e hoˈi faahou i nia i te viivii-ore-raa o te kerisetianoraa e: “Eita te Atua e hiˈo i te faahiahiaraa o ta outou mau pure, noa ˈtu e e mau pure nehenehe; eita atoa i te hamaniraa o ta outou mau pure, noa ˈtu e e mau pure roroa; eita atoa i te rahiraa o ta outou mau pure, noa ˈtu e rave rahi mau pure; eita atoa i te tanoraa o ta outou mau pure, noa ˈtu e e mau pure nahonaho. Eita, e hiˈo oia i te huru aau rotahi o ta outou mau pure.” I te pae hopea, e faahiti na tatou i teie â hiˈopoaraa a Bunyan, i te na ôraa e: “Ia pure tatou, mea au aˈe ia pure ma te aau tae e ma te ore e faahiti e rave rahi mau parau maoti i te faahiti e rave rahi mau parau e aita râ te aau i tae.” Teie râ, mai te peu e e aau rotahi to tatou e ia faaî tatou i te mau titauraa a te Atua, nafea tatou e nehenehe ai e papu e te faaroo ra te Arii mure ore i ta tatou mau pure?
E ore roa e patoihia
15. Ma te haapoto-noa-raa, eaha ta Iesu i parau i roto i te Luka 11:5-8?
15 E ore roa o Iehova e tapiri i to ˈna tariˈa i te mau pure a ta ˈna mau tavini o tei pûpû ia ratou no ˈna. Te papu-maitai-hia ra te reira na roto i te mau parau tamahanahana ta Iesu i parau i ta ˈna mau pǐpǐ a ani ai ratou ia ˈna ia haapii ia ratou ia pure. Ua parau oia e: “E taua to te hoê taata i ǒ outou na, a haere atu ai oia ia ˈna ra i te tuiraa po, a parau atu ai ia ˈna e, E hoa ino, ho mai na i e toru pane; ua tapae mai nei te tahi hoa o ˈu ia ˈu nei, i to ˈna haerea, e aita a ˈu ia tuu atu i mua i te aro; e ia parau mai oia i roto ra, ia na ô mai â, Eiaha e haapeapea mai ia ˈu, ua mau te opani, tei nia vau i te roi e tau mau tamarii atoa, eita vau e tia i nia e hopoi atu i te pane na oe. E faaite atu vau ia outou, Ia mârô ra taua taata ra, ore noâ oia i te tia i nia e horoa ˈtu i te maa i te mea e taua oia no ˈna, e tia râ oia i te mârô, a horoa ˈtu ai i ta ˈna i hinaaro ra.” (Luka 11:1, 5-8). Eaha ta teie faahohoˈaraa e haapii maira ia tatou?
16. No nia i te pure, eaha ta Iesu e hinaaro ra e ia rave tatou?
16 Mea papu roa e aita Iesu i hinaaro e parau e eita o Iehova e hinaaro ra e tauturu ia tatou. Te hinaaro nei râ Iesu e ia tiaturi taatoa tatou i te Atua e ia here maitai tatou ia ˈna no te pure atu ia ˈna ma te tuutuu ore. No reira oia i parau faahou e: “E parau atu hoi au ia outou, E ani, e noaa ïa ia outou; e imi, e ite ïa outou; e patoto, e iritihia ïa te opani ia outou. O te feia atoa hoi i ani ra, te noaa ra ïa; e o tei imi ra, te ite ra ïa; e e tei patoto ra, te iritihia ra ïa te opani ia ˈna.” (Luka 11:9, 10). E tia mau â ia tatou ia tamau maite i te pure ia hamani-ino-hia tatou, ia roohia tatou i te hoê haaparuparuraa tei aa hohonu i roto ia tatou aore ra ia farerei tatou i te tahi atu tamataraa. Ua ineine noa Iehova i te tauturu i ta ˈna mau tavini haapao maitai. E ore roa hoi oia e parau mai ia tatou e: “A faaea na i te haapeapea mai ia ˈu.”
17, 18. a) Na roto i teihea mau parau to Iesu faaitoitoraa mai ia tatou ia ani i te varua moˈa, e na te aha e horoa hau atu â i te faufaa i ta ˈna mau parau? b) Mea nafea to Iesu faaauraa i te mau raveraa a te mau metua taata i ta te Atua?
17 No te fanaˈo i te mau taairaa etaeta e o te Atua, te hinaaro nei tatou i to ˈna varua moˈa, aore ra puai ohipa. No reira Iesu i parau faahou e: “O vai ïa metua i ǒ outou nei e hopoi atu i te ofai na te tamaiti ia ani mai i te pane ra? e ia ani mai i te iˈa, e hopoi atu anei i te ophi eiaha te iˈa, ia ˈna? E ia ani mai hoi i te huero moa, e hopoi atu anei i te pata? E tena na, te ite na outou i te horoa i te mea maitai na ta outou tamarii, ino noa ˈi outou na, e rahi atu ïa to outou Metua i te ao ra i te horoa i te [v]arua [moˈa] i te feia i ani atu ia ˈna ra.” (Luka 11:11-13). I roto i te Mataio 7:9-11, te parauhia ra no nia i te horoaraa i te hoê ofai maoti i te pane. E faufaa rahi atu â ta teie mau parau a Iesu ia ite-anaˈe-hia e, i roto i te mau fenua i faahitihia i roto i te Bibilia o te tau Tahito ra, te huru o te pane, mai te rarahi e te hohoˈa ïa o te hoê ofai parahurahu e te menemene. E ua tia te hohoˈa o te tahi mau huru ophi i te iˈa, e te vai ra te hoê pata patia nainai uouo o te faahohoˈahia i te hoê huero moa. Ia ani anaˈe râ te hoê tamarii i te hoê pane, te hoê iˈa aore ra te hoê huero moa, o vai te metua tane e horoa ˈtu i te hoê ofai na ˈna, te hoê ophi aore ra te hoê pata patia?
18 I muri aˈe, ua faaau aˈera Iesu i te mau huru raveraa a te mau metua taata i ta te Atua i nia i te mau melo o To ˈna utuafare fetii e haamori ra ia ˈna. I te mea e, noa ˈtu to tatou huru ino no roto mai i to tatou tiaraa taata hara no ǒ mai i to tatou mau tupuna, te horoa nei tatou i te mau ô maitai na ta tatou mau tamarii, e nehenehe ïa tatou e tiaturi ma te papu e e horoa to tatou Metua i nia i te raˈi i te hoê ô faahiahia, oia hoi to ˈna varua moˈa, na ta ˈna mau tavini haapao maitai e ani atu ia ˈna i te reira ma te haehaa!
19. a) Eaha ta te mau parau a Iesu i faaitehia i roto i te Luka 11:11-13 e te Mataio 7:9-11 e haapapu ra? b) Mai te peu e e arataihia tatou e te varua moˈa, eaha to tatou huru hiˈoraa no nia i ta tatou mau tamataraa?
19 Te faaite maira te mau parau a Iesu e e tia ia tatou ia ani i te Atua rahi atu â o To ˈna varua moˈa. Mai te peu e e arataihia tatou e taua varua ra, eita ïa tatou e riro ei feia “mauruuru ore” no te mau ohipa e tupu ra i roto i to ratou oraraa e eita atoa ïa tatou e manaˈo e te faaino mau nei ta tatou mau tamataraa e ta tatou mau inoinoraa ia tatou (Iuda 16). Oia mau, “te taata ta te vahine e fanau nei, aita rea o ˈna pue mahana, e te î hoi i te peapea”, e e rave rahi teie e roohia nei i te mau haafifiraa aore ra te mau haamauiuiraa i roto i to ratou oraraa taatoa (Ioba 14:1). Eiaha roa râ tatou e faahohoˈa i ta tatou mau tamataraa mai te mau ofai, te mau ophi e te mau pata patia no ǒ mai i Tei faaroo i te pure. Ua riro oia ei faahohoˈaraa mau o te here e aita oia e tamata ra i te taata na roto i te mau mea iino. Te horoa mai nei râ oia na tatou i “te mau mea maitatai i ho-mai-hia mai, e te mau mea tia roa e maitai roa ˈi”. I te pae hopea, e ara oia e e faahopearaa oaoa to te feia e here ra e e mǎtaˈu ra ia ˈna (Iakobo 1:12-17; Ioane 1, 4:8). Ua ite te feia tei roto ratou i te parau mau e rave rahi matahiti i teie nei, na roto i te mau ohipa i tupu e, maoti te pure e te faaroo, ua riro vetahi o ta ratou mau tamataraa fifi roa ˈˈe ei maitai no ratou, e ua aratai te reira ia ratou ia faahotu hau atu â i te hotu o te varua o te Atua i roto i to ratou oraraa (Ioane 3, irava 4). I te tupuraa mau, e nehenehe anei ta tatou e ite mai i te hoê ravea hau roa ˈtu â i te maitai no te haapii i te tiaturi i nia i to tatou Metua i te raˈi ra, e ia faahotu i te hotu o te varua, oia hoi te here, te oaoa, te hau, te faaoromai, te mǎrû, te maitai, te faaroo, te mamahu e te hitahita ore? — Galatia 5:22, 23.
20. Eaha te mana ta te mau parau a Iesu i papaihia i roto i te Luka 11:5-13 e tia ia faatupu mai i nia ia tatou?
20 Te horoa maira te mau parau a Iesu i papaihia i roto i te Luka 11:5-13, i te haapapuraa oaoa e te here maira Iehova ia tatou e te ara maite ra oia i nia ia tatou. E tia i taua papuraa ra ia faaî i to tatou mafatu i te hoê mauruuru e te hoê here faito ore. E tia i te reira ia faaetaeta i to tatou faaroo e ia faarahi i to tatou hinaaro no te haere-pinepine-raa i te pae avae o te Arii mure ore e ia faaea maoro tatou i mua i to ˈna aro au maitai. Hau atu, te haapapu maira te mau parau a Iesu e eita roa ˈtu tatou e patoihia e te Atua. Te oaoa rahi nei to tatou Metua i te raˈi no te mea te tuu nei tatou i ta tatou mau hopoia i nia ia ˈna (Salamo 55:22; 121:1-3). E ia ani anaˈe tatou i to ˈna varua moˈa, e horoa mai oia i te reira ma te pipiri ore, tatou ta ˈna mau tavini haapao maitai o tei pûpû ia tatou no ˈna. Mai te reira te huru o to tatou Atua tei î i te here, e e nehenehe tatou e tiaturi ia ˈna ma te taatoa, no te mea te faaroo nei oia i ta tatou mau pure.
Te haamanaˈo ra anei outou?
◻ Na roto i to vai arai e tia ia tatou ia haafatata ˈtu i te Atua na roto i te pure, e no te aha?
◻ I roto i teihea auraa te pure e riro ai ei haamaitairaa taotiahia?
◻ Eaha te auraa ‘e pure ma te varua moˈa’?
◻ Nafea e nehenehe ai e haapapu, na roto i te ravea a te Bibilia, e te faaroo ra Iehova i te mau pure a ta ˈna mau Ite haapao maitai o tei bapetizohia?
[Hohoˈa i te api 25]
Te horoa nei te mau metua tane i te mau ô maitatai na ta ratou mau tamarii; e horoa atoa Iehova i te varua moˈa na te feia o te ani atu i te reira ia ˈna.