A faaineine ia outou no te faaoraraa e no te tomoraa ˈtu i roto i te hoê ao apî
“E haamanaˈo i te vahine a Lota.” — LUKA 17:32.
1. Eaha te hiˈoraa o te aamu o te hoê faaoraraa i ravehia e te Atua ta tatou e hiˈopoa, e no te eaha mea maitai taua hiˈopoaraa ra no tatou?
I MURI aˈe i to ˈna parauraa no nia i te faaoraraa faahiahia ta Iehova i rave no Noa e no to ˈna utuafare fetii, te faahiti ra te aposetolo Petero i te tahi atu hiˈoraa o te aamu. Te faahaamanaˈo ra oia e ua paruruhia te taata parau-tia ra o Lota a faarirohia ˈi Sodoma e Gomora ei rehu auahi, mai ta tatou e taio i roto i te Petero 2, 2:6-8. Ua paruruhia te mau parau rii o taua tuhaa o te aamu no to tatou maitai (Roma 15:4). E nehenehe te hoê hiˈopoa-maite-raa o te mau ohipa o tei tuati i taua faaoraraa ra e tauturu ia tatou ia faaineine no te faaoraraa e no te tomoraa ˈtu i roto i te ao apî tǎpǔhia e te Atua.
To tatou haerea i nia i te huru oraraa o to te ao nei
2. Eaha te haerea o te feia no Sodoma e Gomora o tei turai i te Atua ia haamou ia ratou?
2 No te aha taua mau oire ra e to ratou feia i haamouhia ˈi? Te parau ra te aposetolo Petero no ta ratou “parau viivii”. (Petero 2, 2:7.) Mai ta te parau heleni i tatarahia na roto i teie parau e haapapu maira, te rave noa ra te feia no Sodoma e Gomora i te ino ma te faaite-roa-raa mai i te faatura ore, e te hoê paieti ore papu maitai, no te ture e te tia mana. Te parauhia ra i roto i te Iuda 7 e ‘ua faariro ia ratou iho i te peu taiata’ e ‘te hinaaro tia ore’. Ua ite-papu-hia to ratou faufau a haaati ai te feia no Sodoma, ‘o te taata apî e te ruhiruhia, te taata atoa o taua oire ra’, i te fare o Lota e a pii mai ai ia Lota ia aratai i na taata toopiti ia ratou ra no te haamâha i to ratou hinaaro faufau i te taati i te pae tino. E no te mea ua patoi atu o Lota i ta ratou mau aniraa faufau, ua haamǎtaˈu aˈera ratou ia ˈna. — Genese 13:13; 19:4, 5, 9.
3. a) No te aha Lota e to ˈna utuafare fetii i noho ai i roto i te hoê oire viivii roa i te pae morare mai ia Sodoma? b) Eaha to Lota manaˈo no nia i te haerea faufau o te feia no Sodoma?
3 I te omuaraa, mea haere mai o Lota e noho i roto i te fenua o Sodoma no te mea e nehenehe taua oire ra e faahoona ia ˈna. I muri iho, ua faaea ihora oia i roto roa i te oire (Genese 13:8-12; 14:12; 19:1). Tera râ, aita oia i farii i te mau peu faufau a te mau taata o te oire, o tei ore hoi i faariro ia ˈna mai te hoê o ratou, mea papu roa e no te mea aita oia e to ˈna utuafare i amuimui e o ratou. I roto i te Petero 2, 2:7, 8, e taio tatou e: “[Ua] mauiui [o Lota] i te parau viivii a te feia parau iino ra: (mauiui atura hoi te aau parau-tia o taua taata parau-tia ra i te parahiraa i roto ia ratou, i te hiˈoraa e te faarooraa ˈtu i tera mahana, i tera mahana, i ta ratou parau-tia ore.” Mea fifi roa no Lota i te ora i roto i taua mau huru tupuraa ra, no te mea e taata parau-tia hoi oia, e mea faufau roa na ˈna te haerea o te feia no Sodoma.
4. a) Nafea te mau huru tupuraa no teie nei mahana e faahaamanaˈo ai i te mau huru tupuraa i vai na i Sodoma i tahito ra? b) Mai te peu e hoê â to tatou huru e to te taata parau-tia ra o Lota, eaha ïa to tatou manaˈo no nia i te viiviiraa o te ao nei?
4 I to tatou mau mahana atoa, ua ino te morare a te totaiete taata. I roto e rave rahi mau fenua, te rahi noa ˈtura te feia e faatupu ra i te mau taatiraa i te pae tino hou a faaipoipo ai aore ra e te hoê taata taa ê atu i to ˈna hoa faaipoipo. E rave rahi atoa mau taurearea haere haapiiraa o te rave nei i teie huru oraraa e o te faaooo nei i te feia e ore ra e rave mai ia ratou. Te faaite tahaa nei te mau mahu ia ratou e te porote nei ratou na nia i te mau purumu o te mau oire rarahi no te ani e ia fariihia ratou. Te apiti atoa ra te upoo faatere haapaoraa i taua mau ohipa ra. I mua i te aro o te mau taata, mea iti te mau Ekalesia o te faatoroa ra i te mau mahu e te feia faaturi matau-maitai-hia. I te tupuraa mau râ, e te faaite pinepine maira te mau parau apî i te reira, aita e faufaa ia faaatea roa no te ite i te mau mahu, te feia faaturi e te feia taiata i rotopu i te upoo faatere haapaoraa. No te reira, ua tauihia te tahi mau faatere haapaoraa i roto i te tahi atu mau oire e ua faahepo-atoa-hia ratou ia vaiiho i te toroa i muri aˈe i te mau ohipa haama i te pae taatiraa tino. Eita roa ˈtu te feia e hinaaro ra i te parau-tia e au ra i taua huru haerea ino ra; mea ‘riaria na ratou i te ino’. (Roma 12:9.) Te haapeapea taa ê nei ratou no te mea te faaino nei te haerea o te feia e faahua tavini ra i te Atua i to ˈna iˈoa e te turai nei i te mau taata ite ore ia fariu ê, ma te haafaufau, i te mau huru haapaoraa atoa. — Roma 2:24.
5. E nehenehe te haamouraahia o Sodoma e o Gomora e Iehova e pahono i teihea uiraa?
5 Te ino noa ˈtura te huru tupuraa i tera matahiti e i te tahi atu matahiti. E hope anei te reira i te hoê mahana? Mea papu maitai! Te faaite maitai maira te faautuaraa ta Iehova i tuu i nia i na oire tahito ra o Sodoma e Gomora e e faatupu oia i ta ˈna haavaraa i te taime ta ˈna i haapao. E haamou roa oia i te feia ino e e faaora oia i ta ˈna mau tavini haapao maitai.
O vai aore ra eaha te mea te tia ia ravehia na mua roa ˈˈe i roto i te oraraa?
6. a) Eaha te haapiiraa tano maitai ta tatou e huti mai no nia i te aamu o te mau taurearea o tei tia ia faaipoipo i te mau tamahine a Lota? b) Nafea te mau tamahine a Lota i te tamataraahia na roto i te haerea o na taata o tei fatata roa i te riro mai ei tane na raua?
6 O te feia anaˈe o te faaite ra i te paieti mau te faaorahia. No te reira, a feruri na i te mau parau ta te mau melahi a Iehova i parau ia Lota hou te haamouraa o Sodoma e Gomora, no nia i taua paieti ra: “O vai ma anaˈe â to to oe ra fetii i toe i ǒ nei? e hunoa, e ta oe ra mau tamarii tamaroa, e ta oe ra mau tamahine, o ta oe atoâ ra i roto i te oire, e rave, e aratai i rapae; te rave nei hoi mâua i teie nei vahi e haamou.” Paraparau atura hoi o Lota i te mau pue taurearea e faaipoipo i ta ˈna ra pue tamahine. E rave rahi taime, ua na ô aˈera ia raua e: “A tia, e haere ê outou i rapae, te rave nei hoi Iehova i teie oire e haamou.” No te mau auraa tei tahoê ia raua i te utuafare fetii o Lota, ua horoahia na teie nau taurearea te tumu hoê roa ia faaorahia raua, tera râ, e tia ia raua ia ohipa. E tia ia raua ia horoa i te mau tapao faaite papu o te auraroraa ia Iehova. Tera râ, “mai te tahoata ra râ [Lota] i taua na hunoa no ˈna ra”. (Genese 19:12-14.) E nehenehe e feruri eaha te mau manaˈo hohonu a te mau tamahine a Lota i to raua iteraa i te ohipa i tupu. Ua tamatahia ihora to raua haapao maitai i te Atua.
7, 8. a) Eaha te huru o Lota a onoono ai te mau melahi ia ˈna ia horo e to ˈna utuafare fetii, e no te aha e ere i te ohipa tano? b) E roaa te faaoraraa o Lota e o to ˈna utuafare fetii maoti i te aha?
7 I te poipoi aˈe, i te aahiata, ua parau onoono maira te mau melahi ia Lota. Na ô maira ia ˈna e: “A tia i nia, a aratai i to vahine e na tamahine toopiti na oe i itea i ǒ nei, o te pohe atoa hoi oe i te poheraa o teie nei oire.” Noa ˈtu teie mau faaararaa, ua “faatautau noa” o Lota (Genese 19:15, 16.) Eaha te tumu? Eaha te mea e tapea ra ia ˈna? O ta ˈna mau faufaa anei i Sodoma — na teie mau mea hoi i huti mai ia ˈna i taua vahi ra? Mai te peu e eita oia e faarue i teie mau mea, e haamouhia oia e o Sodoma.
8 Ma te aroha, ua haru ihora te mau melahi i te rima o te mau melo o to ˈna utuafare fetii e ua aratai oioi atura ia ratou i rapae au i te oire. I to ratou taeraa i rapae ia Sodoma, horoa ihora te melahi a Iehova i teie faaueraa e: “Ia peepee ia ora oe; eiaha e hiˈo i muri eiaha roa e faaea i teie atoa vahi atea, e haapuora ˈtu oe i nia i te mouˈa, oi pau atoa hoi oe.” Te feaapiti noa ra o Lota. I te pae hopea, i muri aˈe i to ˈna faatiaraahia ia haere i te hoê vahi piri rii mai, ua horo ihora oia e to ˈna utuafare fetii (Genese 19:17-22). Eita e nehenehe faahou e tiai; e roaa to ratou ora maoti to ratou auraro.
9, 10. a) No te aha eita e navai ia faaea te vahine a Lota i pihai iho i ta ˈna tane no te haapapu i to ˈna faaoraraa? b) Eaha te tahi atu â tamataraa te poheraa o te vahine a Lota i riro no ˈna e no ta ˈna mau tamahine?
9 Tera râ, aitâ i roaa roa ˈtura te faaoraraa o Lota e o to ˈna utuafare fetii i te taime a haere ai ratou i rapae ia Sodoma. Te na ô ra te aamu i roto i te Genese 19:23-25 e: “Ua hiti aˈera te mahana i nia i te fenua, e ua tae Lota i roto i te oire ra o Zoara; i haamairi mai ai Iehova iho i te gopherita e te auahi no ǒ ia Iehova, no nia i te raˈi i nia iho i Sodoma e Gomora; taihitumu roa aˈera oia i taua na oire ra, e taua fenua atea atoa ra, e te taata atoa no taua na oire ra, e te mau mea i tupu i nia i te fenua ra.” Tera râ, teihea te vahine a Lota?
10 Parau mau, ua horo oia e ta ˈna tane, tera râ, i roto ia ˈna iho, hoê anei to ˈna manaˈo e ta ˈna tane? Aita hoê aˈe mea i roto i te aamu bibilia e horoa maira i te manaˈo e ua farii o ˈna i te haerea viivii a te feia no Sodoma. Teie nei râ, mea puai aˈe anei to ˈna here no te Atua i te mau taairaa e tapea ra ia ˈna i to ˈna utuafare e i ta ˈna mau faufaa materia e vai ra i reira? (Hiˈo Luka 17:31, 32.) Ua faaite mai te tamataraa i te mea e vai ra i roto i to ˈna mafatu. E au ra e ua fatata o Lota e to ˈna utuafare fetii i te tapae i Zoara, aore ra i te tomo atu i roto i taua oire ra, a fariu ai ta ˈna vahine, ma te auraro ore i te faaueraa a te Atua, e a hiˈo ai oia i muri. Te faaite ra te aamu e riro atura oia ei “pou miti”. (Genese 19:26.) Ua tamata-faahou-hia ïa te haapao maitai o Lota e o ta ˈna nau tamahine. E manuïa anei te aroha a Lota no ta ˈna vahine tei pohe aore ra te mau manaˈo hohonu a ta ˈna nau tamahine no to raua metua vahine tei pohe i nia i to ratou here no Iehova, o tei faatupu i taua ati ra? E tamau noa anei ratou i te auraro i te Atua noa ˈtu ua taiva te hoê fetii tei piri roa e o ratou? Ua faaite o Lota e ta ˈna nau tamahine i te hoê tiaturiraa taatoa ia Iehova; aita ratou i fariu noa ˈˈe i muri.
11. Eaha ta tatou i haapii e tae roa mai i teie nei no nia i te faaoraraa ta Iehova e faatupu?
11 Oia mau, ua ite Iehova i te faaora i te feia paieti i roto i te ati. Ua ite oia i te faaora i te mau utuafare fetii paatoa o tei tahoê i roto i te faaohiparaa i te haamoriraa viivii ore; ua ite atoa oia i te faaora i te feia tataitahi. E faaite oia i te hoê haapao-maitai-raa i te feia e here mau ra ia ˈna. “Ua ite hoi oia i to tatou huru; te manaˈo ra oia e, e repo tatou nei.” (Salamo 103:13, 14). Te faaherehere nei râ oia i taua faaoraraa ra no te feia paieti, no te feia e faaite ra i te hoê paieti mau, no te feia e auraro ia ˈna no te mea e faaite ratou i to ratou haapao maitai ia ˈna.
Te mau faanahonahoraa tei î i te here no te hoê faaoraraa rahi atu â
12. Eaha te mau faanahonahoraa î roa i te here ta Iehova e rave hou a faatupu ai i te faaoraraa ta tatou e tiai ra ma te ru?
12 Na roto i te mau haamouraa ta ˈna i faatupu i te mau mahana o Noa e o Lota, aita o Iehova i haapohe i te feia ino atoa e a muri noa ˈtu. Ia au i te aamu bibilia, ua horoa noa oia i te hoê hiˈoraa no te mau ohipa e tupu i muri aˈe. Hou taua mau ohipa ra e tae mai ai, ua hinaaro Iehova i te rave hau atu â no te feia e here ra ia ˈna. E tono mai oia ia Iesu Mesia, ta ˈna Tamaiti otahi, i nia i te fenua nei. I reira, e tamâ Iesu i te iˈoa o te Atua i te mau faainoraa atoa ma te faaohipa i te huru paieti o ta Adamu, e taata parau-tia hoi, i tia e i nehenehe hoi e faaite i te Atua; e rave râ Iesu i te reira i roto i te mau huru tupuraa fifi roa ˈˈe. E pûpû oia i to ˈna ora taata parau-tia ei tusia ia roaa faahou mai i te mau huaai a Adamu o te faaohipa i te faaroo, te mea i erehia e Adamu. I muri aˈe, e maitihia te hoê “nǎnǎ iti” o te feia haapao maitai e te Atua, no te faatere i pihai iho i te Mesia i roto i to ˈna Basileia i nia i te raˈi, e e hutihia mai te “feia rahi roa” mai roto mai i te mau nunaa atoa no te riro ei niu o te hoê totaiete taata apî (Luka 12:32; Apokalupo 7:9). E ia faaotihia taua ohipa ra, e faatupu te Atua i te faaoraraa rahi tei faahohoˈahia e te mau tupuraa i tuatihia i te diluvi ra e i te haamouraa o Sodoma e Gomora.
Mea ru ia ohipa ma te papu maitai
13, 14. No te mea e ua rave o Petero i te haamouraa o te feia paieti ore o tei ora i te mau mahana o Lota e o Noa ei hiˈoraa, eaha ïa ta te reira e haapii maira ia tatou?
13 Ua ite te feia e haapii ra i te Parau a te Atua e ua faaora Iehova i ta ˈna mau tavini e rave rahi taime. Tera râ, aita te Bibilia e parau ra no nia i taua mau faaoraraa paatoa ra e: ‘Mai tera anotau ra, oia atoa te haerea mai o te Tamaiti a te taata nei.’ No te aha te aposetolo Petero, tei faauruahia e te varua moˈa, i faahiti noa ˈi e piti hiˈoraa? No te aha mea taa ê te mau ohipa i tupu i te mau mahana o Lota e o Noa?
14 Te faaite maira Iuda 7 i te reira ma te papu. “Mai ia Sodoma hoi e Gomora, e te mau oire atoa i pihai ihora, (...) o tei haapaohia ïa ei hiˈoraa, i te raveraa i te pohe i te auahi pohe ore ra”. Ua roohia ïa te feia o taua mau oire ra o tei rave i te mau hara ino, i te hoê haamouraa mure ore, mai te haamouraa e faahope i te amuiraa o te mau mea e vai nei (Mataio 25:46). E tuu-atoa-hia te diluvi o te tau o Noa i roto i te mau haamouraa mure ore (Petero 2, 2:4, 5, 9-12; 3:5-7). No reira, na roto i te haamouraa i te feia paieti ore o tei ora na i te mau mahana o Lota e o Noa, ua horoa Iehova i te haapapuraa e e faaora oia i ta ˈna mau tavini na roto i te haamou-roa-raa e a muri noa ˈtu i te feia e rave ra i te parau-tia ore. — Tesalonia 2, 1:6-10.
15. a) Eaha te faaararaa ru tei faataehia ˈtu i te feia e rave ra i te ino? b) No te aha te parau-tia e faatupuhia ˈi i nia i te feia paatoa e tamau ra i roto i te parau-tia ore?
15 Aita o Iehova, mai ta ˈna mau tavini, e mauruuru ra i te pohe o te taata ino. Teie te titauraa ta ˈna e horoa ra i te taatoaraa na roto i te arai o ta ˈna mau Ite: “E fariu mai outou, e fariu mai outou, i ta outou mau parau ino ra; eaha hoi outou i hinaaro ai i te pohe?” (Ezekiela 33:11). Tera râ, ia ore anaˈe te tahi mau taata e faaite i te hinaaro no te pahono atu i taua titauraa ra o tei î i te here, e a tamau noa ˈi ratou i te ora i to ratou oraraa miimii, e tia ïa ia Iehova ia haava, no te faaturaraa o to ˈna iˈoa moˈa e no to ˈna here i ta ˈna mau tavini haapao maitai tei hamani-ino-hia e te feia paieti ore.
16. a) No te aha tatou e nehenehe ai e papu e ua fatata roa mai te faaoraraa i tohuhia? b) E faaorahia te feia paieti i te aha, e e tomo atu ratou i roto i te aha?
16 Ua fatata roa mai te taime faataahia e te Atua no te faaora i te feia paieti! Te vai tahaa nei te mau haerea e te mau huru tupuraa tei riro, ia au i te parau a Iesu, ei tapao no to ˈna taeraa mai e no te hopea o te amuiraa o te mau mea nei. Ua haamata te mau tuhaa huru rau o taua tapao ra i te itehia ua hau e 75 matahiti i teie nei. Tera râ, ua haapapu Iesu e eita roa “teie nei ui” e mou hou te Atua e faatupu ai i ta ˈna haavaraa i nia i teie ao ino. Ia tae i te taime e manaˈo ai Iehova e ua navai te pororaa o te poroi o te Basileia e ati noa ˈˈe teie nei ao ia ite te mau fenua atoa, i reira ïa te hopea o teie nei ao ino e tae mai ai, e e tupu ai te faaoraraa o te feia paieti (Mataio 24:3-34; Luka 21:28-33). E faaorahia ratou i te aha? I te mau tamataraa te tia ia ratou ia faaoromai no ǒ mai i te feia ino ra, e i te mau huru tupuraa e haapeapea ra ia ratou i tera mahana e tera mahana no te mea te au ra ratou i te parau-tia. I te tahi aˈe pae, e nehenehe taua faaoraraa ra e faaô atu ia ratou i roto i te hoê ao apî i reira te maˈi e te pohe e ore ai.
Te tauturu maira te Atua ia tatou no to tatou faaoraraa
17. a) Eaha te uiraa faufaa ta tatou e tia ia uiui ia tatou iho? b) Nafea tatou e nehenehe ai e faaite e hoê â to tatou “mǎtaˈu [paieti]” e to Noa?
17 E tia ia tatou iho ia aniani i teie uiraa: ‘Ua ineine anei vau no te haavaraa a te Atua?’ Mai te peu e te tiaturi nei tatou ia tatou iho aore ra i to tatou huru manaˈo no nia i te parau-tia, aita ïa tatou i ineine. Mai te peu râ e te atuatu nei tatou i te hoê “mǎtaˈu [paieti]” mai to Noa, te turai ra ïa to tatou faaroo ia tatou ia pee i te eˈa ta Iehova e faaite maira, e e aratai te reira ia tatou i te faaoraraa. — Hebera 11:7.
18. I te pae o te faaineineraa e horoahia ra na tatou ia faaorahia tatou e ia tomo atu i roto i te ao apî, no te aha mea faufaa ia haapii tatou i te faatura mau i te mana i te pae teotaratia?
18 Ua faataahia te feia e fanaˈo ra mai teie atu nei i te parururaa a Iehova na roto i teie mau parau pehepehe i roto i te Salamo 91:1, 2 e: “O tei parahi i raro aˈe i te tapoˈi o te Teitei ra, e taoto ïa i raro aˈe i te mǎrǔ o te Puaihope ra. Te parau nei au ia Iehova, To ˈu ïa haapuraa e to ˈu pare, tau Atua, e ta ˈu e tiaturi nei.” Te vai ra te hoê pǔpǔ taata o te fanaˈo ra i te parururaa a te Atua, mai te mau manu apî i raro aˈe i te mau pererau puai o te hoê o to ratou mau metua. Te tuu taatoa nei taua mau taata ra i to ratou tiaturiraa i nia ia Iehova, ma te farii e o o ˈna te Teitei, te Puai Hope. No reira ratou e faatura ˈi i te mana teotaratia e e auraro ai i te reira, noa ˈtu e te faaohipahia ra te reira e to ratou mau metua aore ra e “te tavini haapao maitai e te paari”. (Mataio 24:45-47.) Mai te reira anei te huru no tatou tataitahi? Te haapii ra anei tatou, mai ia Noa, i te faatupu ‘i te mau mea atoa ta te Atua e faaue mai ia tatou’ e na roto i te ravea ta ˈna i faanaho (Genese 6:22)? Ia na reira tatou, te farii ra ïa tatou i te faaineineraa ta Iehova e horoa maira no te faaora e no te faaô ia tatou i roto i te hoê ao apî e te parau-tia.
19. a) Eaha to tatou mafatu taipe, e no te aha mea faufaa ia haapao maitai tatou ia ˈna (Maseli 4:23)? b) Nafea tatou e nehenehe ai e huti i te maitai no nia i te hiˈoraa o Lota i roto i to tatou haerea i mua i te mau unauna a te ao nei?
19 Te titau atoa nei taua faaineineraa ra e ia ara tatou i to tatou mafatu taipe. “O Iehova râ tei tamata i te aau [mafatu] o te taata nei.” (Maseli 17:3). E aratai oia ia tatou ia taa e te mea faufaa roa ˈˈe, e ere ïa to tatou huru ia hiˈohia na rapae atu, to tatou râ huru i roto, to tatou mafatu. Noa ˈtu e aita tatou e farii ra i te haavîraa uˈana aore ra te mau peu viivii i te pae morare mai te ao e haaati ra ia tatou, e tia ia tatou ia haapao maitai eiaha tatou ia hutihia aore ra ia faaanaanataehia e taua mau mea ra. Mai ia Lota, e tia ia tatou ia haapeapea i te manaˈo-noa-raa e te ravehia nei te tahi mau ohipa ma te ore e tâuˈa i te ture. Aita te feia e riaria ra i te ino e imi ra i te hoê ravea no te rave i te reira; tera râ, te feia e ore e riaria i te ino, e nehenehe maitai ta ratou e ore e faaohipa i te reira ma te atuatu i te hinaaro i roto i to ratou feruriraa. “O outou o tei hinaaro ia Iehova ra, ia riaria outou i te ino.” — Salamo 97:10.
20. a) Eaha te mau aˈoraa a te Bibilia e faaara maira ia tatou no nia i te hoê oraraa tei niuhia i nia i te mau taoˈa materia? b) Na te aha e haapapu mai e ua ô hohonu roa te mau aˈoraa faufaa a te Bibilia no nia i te nounou taoˈa, i roto i to tatou mafatu?
20 Ma te here, te haapii maira Iehova ia tatou ia faarue i te haerea viivii atoa i te pae morare e oia atoa te hoê huru oraraa niuhia i nia i te mau taoˈa materia. Te aˈo nei ta ˈna Parau e ‘ia mauruuru tatou i te maa e te ahu’. (Timoteo 1, 6:8.) Ua tia ia Noa e ta ˈna mau tamaiti ia vaiiho i to ratou mau fare i muri ia ratou i to ratou tomoraa ˈtu i roto i te araka. Ua tia atoa ia Lota e to ˈna utuafare fetii ia faarue i to ratou fare e ta ratou mau faufaa no te faaora i to ratou oraraa. Ua taati-maite-hia tatou i te aha? “E haamanaˈo i te vahine a Lota.” (Luka 17:32). Te horoa ra Iesu i teie aˈoraa e: “E mata na râ outou i te imi i te basileia o te Atua, e te parau-tia na ˈna.” (Mataio 6:33). O te reira anei ta tatou e rave ra? Mai te peu e na te mau faaueraa parau-tia a Iehova e aratai ra ia tatou e mai te peu e o te pororaa o te parau apî maitai o to ˈna Basileia te ohipa matamua i roto i to tatou oraraa, e tapao ïa te reira e te farii mau ra tatou i te faaineineraa ta Iehova e horoa ra i to ˈna nunaa no te faaora e no te faaô atu ia ˈna i roto i to ˈna ao apî.
21. No te aha tatou e nehenehe ai e papu ma te tia e ua fatata roa te faaoraraa tǎpǔhia e Iehova?
21 I te feia paieti o te ite i te tupuraa o te tapao o to ˈna taeraa mai i roto i te puai o te Basileia, ua parau Iesu e: “E nânâ i to outou mata i nia, e faateitei i to outou upoo, te fatata maira hoi to outou ora.” (Luka 21:28). Te ite ra anei outou i taua tapao ra i te tupuraa i roto i te mau tuhaa iti atoa? Ia papu maitai ia outou e te fatata maira te faaoraraa i tǎpǔhia e Iehova! Ia tiaturi rahi atu outou e “ua ite maori te Fatu [Iehova] i te faaora i te feia paieti i roto i te ati ra”. — Petero 2, 2:9.
Eaha ta outou i haapii?
◻ Mai ia Lota, eaha ïa to tatou manaˈo hohonu no nia i te huru oraraa o te ao nei?
◻ Eaha te mau tamataraa i farereihia e Lota e to ˈna utuafare fetii a horo ai ratou i rapae ia Sodoma?
◻ Mea nafea te mau hiˈoraa i ravehia e Petero e faaite ai e mea ru ia haere papu tatou i te pae o Iehova?
◻ No te faaineine i to ˈna nunaa no te faaoraraa, eaha te mau aˈoraa faufaa ta Iehova e haapii ra ia ˈna?
[Hohoˈa i te api 29]
E paruruhia te feia e tavini ra i te Atua, mai te mau manu apî i raro aˈe i te parururaa o te mau pererau puai o te hoê o to ratou mau metua.