Teihea to outou vahi haapuraa i te hopea o teie ao?

I TE taime e haamou ai Iehova i teie ao ino i Aramagedo, eaha te ohipa e tupu no te feia parau-tia ore? Te na ô ra te Maseli 2:21, 22: “O te feia afaro anaˈe hoi te parahi i nia i te fenua, e o te feia hapa ore anaˈe te faaea noa i reira. Area te feia ino, e haamouhia ratou mai nia i te fenua, e te feia haavarevare, e iriti-ê-hia ïa mai reira mai.”

Nafea râ te feia parau-tia e parahi noa ˈi i nia i te fenua? E vahi haapuraa anei to ratou? Ihea e tia ˈi i te mau taata parau-tia ia vai noa a tae mai ai te hopea o teie ao? E ite mai tatou i te pahonoraa ma te hiˈopoa e maha aamu Bibilia tei faaite nafea Iehova i faaora ˈi i ta ˈna mau tavini.

Mea faufaa anei te vahi?

Te na ô ra te Petero 2, 2:5-7 i nia i te faaoraraa o te mau patereareha o Noa e o Lota: “E ua faautua [te Atua] i te hoê ao i tahito ra, ua faaora râ ia Noa taata poro i te parau-tia e e hitu â taata i to ˈna hopoiraa mai i te diluvi i nia i te hoê ao taata faatura ore i te Atua. E ua faautua atoa oia i na oire o Sodoma e o Gomora ma te faariro atu ei rehu, a riro atu ai te reira ei faaararaa i te mau taata faatura ore i te Atua no a muri aˈe. E ua faaora oia ia Lota taata parau-tia, tei mauiui roa no te mau peu faufau a te feia ofati ture.”

Nafea Noa i ora mai ai i te diluvi? Ua parau te Atua ia Noa: “Ua faaoti au e haamou i te taata atoa, no te mea ua î te fenua i te haavîraa uˈana o ratou te tumu, no reira e faatae au i te haamouraa i nia ia ratou e te fenua atoa. A hamani no oe i te tahi araka i te raau maitai.” (Gen. 6:13, 14) Ua hamani o Noa i te araka mai ta Iehova i faaue ia ˈna. Hitu mahana hou te diluvi, ua parau Iehova ia Noa ia faahaere i te mau animara i roto i te araka e ia tomo atoa o ˈna e to ˈna utuafare fetii. I te hituraa o te mahana, ua tapiri Iehova i te opani o te araka e “manii maira te ûa i nia i te fenua e 40 ao e 40 po.” (Gen. 7:1-4, 11, 12, 16) “I roto i taua araka ra i ora mai ai [o Noa e to ˈna utuafare] na roto atu i te pape.” (Pet. 1, 3:20) Ua ora mai o Noa e to ˈna utuafare no te mea tei roto ratou i te araka, aita roa ˈtu e haapuraa ê atu i nia i te fenua.—Gen. 7:19, 20.

I roto i te tupuraa o Lota, mea taa ê te mau faaueraa. Ua faaite e piti melahi ia ˈna i te vahi e ore o ˈna e haere atu. Ua horoa na melahi e piti i teie mau faaueraa ia Lota e to ˈna utuafare: “To mau taata atoa i roto i te oire [o Sodoma], a aratai ia ratou i rapae i teie vahi! E haamou hoi mâua i teie vahi.” Ua titauhia ia ratou ia “horo i te tuhaa fenua mouˈa.”—Gen. 19:12, 13, 17.

Te faaite mau ra te aamu o Noa e o Lota e “ua ite Iehova i te faaora i te feia e haamori ra ia ˈna anaˈe i te mau ati, i te faataa râ i te feia parau-tia ore ia haamouhia i te mahana haavaraa.” (Pet. 2, 2:9) I roto i na piti hiˈoraa, mea faufaa roa te vahi no te ora ˈtu. Ua titauhia ia Noa ia tomo i roto i te araka e no Lota, ia haere i rapaeau ïa i te oire o Sodoma. Mai te reira noâ anei? E nehenehe anei Iehova e faaora i te feia parau-tia noa ˈtu te vahi i reira ratou, ma te ore e faarue i to ratou vahi nohoraa? No te pahono i teie mau uiraa, e hiˈo mai tatou e piti atu â aamu.

Mea faufaa noâ anei te vahi?

I te tau o Mose, hou Iehova a tairi ai i te fenua o Aiphiti na roto i te ahururaa o te ati, ua faaue Iehova i te mau Iseraela ia parai i te toto o te animara o te oroa Pasa i nia i te teˈa o te tomoraa e i nia i te pou opani o to ratou fare. No te aha? No te mea “ia haere Iehova na roto i te fenua no te tairi i to Aiphiti a ite atu ai i te toto i nia i te teˈa o te tomoraa e na pou opani, e na nia ˈˈe mau â Iehova i te tomoraa, e eita oia e vaiiho i te ati pohe ia ô i roto i to outou mau fare.” I taua po ra, “tairi ihora Iehova pauroa te matahiapo i te fenua o Aiphiti, mai te matahiapo a Pharao o te parahi ra i nia i to ˈna terono e tae noa ˈtu i te matahiapo a te tîtî i roto i te fare tapearaa, e pauroa te fanauˈa matamua a te mau animara.” Ua ora mai te mau tamarii matahiapo a te mau Iseraela e aita i titauhia i te hoê noa ˈˈe Iseraela ia haere i te tahi atu vahi.—Exo. 12:22, 23, 29.

A hiˈo atoa na i te aamu o Rahaba, te hoê vahine taiata no Ieriko. Fatata te mau Iseraela i te haru i te Fenua tǎpǔhia. I to Rahaba taaraa e e tairihia te oire, ua parau o ˈna i na piti mata huna Iseraela e ua mǎtaˈu te taata no Ieriko no te mea fatata te mau Iseraela i te tomo mai i roto i te oire. Ua tapuni o ˈna i na piti mata huna ma te ani atu ia horeo mai i mua ia Iehova e e faaorahia o ˈna e to ˈna utuafare fetii taatoa i te taime e tairihia ˈi o Ieriko. Ua parau atura na mata huna ia Rahaba ia haaputuputu i to ˈna mau fetii i roto i to ˈna fare, tei patuhia i nia iho i te aua patuhia o te oire. Te taata râ e haere i rapaeau o te fare, e pohe ïa mai te feia o te oire. (Ios. 2:8-13, 15, 18, 19) Tera râ, ua parau Iehova ia Iosua i muri iho e e marua te patu o te oire. (Ios. 6:5) E ere faahou ïa e vahi haapuraa papu, mai ta na mata huna e piti i parau. E nafea ïa Rahaba e to ˈna mau fetii e faaorahia ˈi?

Tae atura te taime haruraa o Ieriko, ua faaoto atura te mau Iseraela i na pu tara e ua tuô atoa ratou. Ia au i te Iosua 6:20, “i te faarooraa iho â te mau faehau [Iseraela] i te taˈi o te pu tara e te huroraa ratou ma te reo puai, marua ihora te patu.” Aita roa ˈtu hoê aˈe taata e nehenehe e tapea i te maruaraa o te patu o te oire. Maoti râ te hoê semeio, ua faaea taua maruaraa ra i muri noa mai i te fare o Rahaba. Na ô atura Iosua i na mata huna e piti: “A tomo i roto i te fare o te vahine taiata e a aratai mai ia ˈna e to ˈna mau taata atoa i rapae, mai ta orua i horeo ia ˈna.” (Ios. 6:22) Ua ora mai te taatoaraa o te feia tei faaea noa i roto i te fare o Rahaba.

Eaha te mea faufaa roa ˈˈe?

Eaha te haapiiraa ta tatou e nehenehe e huti mai i roto i te faaoraraa o Noa, o Lota, o te mau Iseraela i te tau o Mose e o Rahaba? Nafea te reira e tauturu mai ai ia taa teihea to tatou vahi haapuraa i te hopea o teie ao?

Papu, ua ora o Noa no te mea ua tomo o ˈna i roto i te araka. Tera râ, no te aha o ˈna i tomo ai i roto i te araka? E ere anei no to ˈna faaroo e to ˈna auraroraa i te Atua? Te na ô ra te Bibilia: “E rave ihora Noa i te mau mea atoa mai ta te Atua i faaue ia ˈna. Ua na reira iho â oia.” (Gen. 6:22; Heb. 11:7) E o tatou nei? Te auraro ra anei tatou i te mau faaueraa atoa a te Atua? Ua riro atoa o Noa ei “taata poro i te parau-tia.” (Pet. 2, 2:5) Mai ia Noa, te poro ra anei tatou ma te itoito rahi noa ˈtu aita te mau taata i roto i ta tatou tuhaa fenua e tâuˈa ra i te parau apî oaoa?

Ua ora mai o Lota i te haamouraa o Sodoma no te mea ua horo o ˈna i rapaeau o te oire. Hau atu, ua ora mai o ˈna no te mea e taata parau-tia o ˈna i mua i te Atua e no te mea ua mauiui roa o Lota i te iteraa i te mau peu ino mau ta te mau taata no Sodoma e Gomora i rave. E no tatou? Te mauiui ra anei tatou no te mea te rave ra te mau taata e rave rahi ohipa hairiiri? Aore ra aita anei tatou e huru ê faahou i tera mau ohipa ino no te mea ua matau roa tatou i te reira? Te imi ra anei tatou “i te mau ravea atoa a itehia ˈtu ai [tatou] e te Atua i roto i te hau ma te viivii ore e te hapa ore”?—Pet. 2, 3:14.

Ua ora mai te mau Iseraela i Aiphiti e o Rahaba i Ieriko no te mea ua faaea ratou i roto i to ratou fare. Ua titauhia ia ratou ia faatupu i te faaroo e ia auraro i te Atua. (Heb. 11:28, 30, 31) A feruri na i te utuafare Iseraela taitahi o tei hiˈo noa i ta ratou mau tamarii matahiapo a faaroo ai ratou i te mau “auê rahi” i roto i te fare taitahi o to Aiphiti. (Exo. 12:30) A feruri atoa na ia Rahaba e to ˈna utuafare a tauahi ai ratou te tahi i te tahi no te mea te piri noa mai ra te haruru o te maruaraa o te patu. Ua titauhia ia Rahaba ia faatupu i te hoê faaroo papu no te auraro i te faaueraa e no te faaea noa i roto i to ˈna fare.

Fatata roa te hopea o te ao ino a Satani. I teie taime, aita tatou e ite e nafea Iehova e paruru ai i ta ˈna mau tavini i te mahana rahi o to ˈna riri. (Zeph. 2:3) Tera râ, e nehenehe tatou e tiaturi e noa ˈtu te vahi i reira tatou e ta tatou huru tupuraa i tera taime, na to tatou faaroo e to tatou auraro ia Iehova e faaora mai ia tatou. A tiai ai i tera taime, e titauhia ia tatou ia faaite i te hoê feruriraa maitai no nia i “te mau piha i roto” ia au i te parau tohu a Isaia.

“A tomo i roto i to outou mau piha i roto”

Te na ô ra Isaia 26:20: “Haere, to ˈu nunaa, a tomo i roto i to outou mau piha i roto, a tapiri i te opani. A tapuni maa taime e ia ore roa te riri rahi tahoo.” E au ra e ua tupu teie parau tohu i te taime matamua i 539 hou te tau o Iesu i te taime i haruhia ˈi to Medai e to Peresia ia Babulonia. I to ratou tomoraa ˈtu i te oire, ua faaue o Kuro, te arii no Peresia, ia faaea noa te huiraatira i roto i to ratou fare no te mea ua faauehia ta ˈna mau faehau ia haapohe i te feia na rapaeau.

I teie mahana, te mau “piha i roto” o teie parau tohu, o na 100 000 tiahapa amuiraa Ite no Iehova ïa na te ao nei. Mea faufaa roa teie mau amuiraa i roto i to tatou oraraa. E mea faufaa atoa i te taime a tupu ai “te ati rahi.” (Apo. 7:14) Ua horoahia te faaueraa i te mau tavini a te Atua ia tomo i roto i te mau “piha i roto” e ia vai tapuni noa tae roa ˈtu i te taime e ore roa ˈi “te riri rahi tahoo.” Mea faufaa roa ïa ia faaite noa tatou i te hoê feruriraa maitai no nia i te amuiraa e ia faaoti papu i te vai piri noa i te mau taeae e tuahine. Mea faufaa ïa no tatou ia pee ma te aau atoa i teie faaueraa a Paulo: “E manaˈo anaˈe te tahi i te tahi, a turai atu ai te tahi i te tahi ia faaite i te here e ia rave i te ohipa maitai roa, eiaha e faarue i ta tatou mau putuputuraa, mai ta vetahi i matau, ia faaitoito râ te tahi i te tahi, e ia rahi atu â a ite ai [tatou] i taua mahana ra e fatata mai ra.”—Heb. 10:24, 25.

[Hohoˈa]

Eaha ta tatou e haapii mai i te mau ohipa faaoraraa a te Atua ravehia i tahito ra?

[Hohoˈa]

Eaha te mau “piha i roto” i teie mahana?