E haapapu anaˈe na e o vai te “taata paieti ore”
“E i reira taua taata paieti ore ra e faaitehia ˈi, o ta te Fatu ïa e rave e pau roa ˈtu.” — TESALONIA 2, 2:8.
1, 2. No te aha e mea faufaa roa ia ite tatou e o vai mau na te taata paieti ore?
TE ORA nei tatou i te hoê anotau i reira e itehia ˈi te paieti ore. Te tupu nei teie ohipa i roto i te mau fenua atoa. I te mau vahi atoa o te ao nei, te itehia nei taua mǎtaˈu ra e faatupuhia e te feia e ore e taiâ ra, e ati mau te reira no to tatou tino e no ta tatou mau faufaa. Tera râ, te vai nei te hoê taata mea ino aˈe to ˈna paieti ore i tei manaˈohia e o te ohipa ra mai te mau senekele mai â. Te pii ra te Bibilia ia ˈna “te taata paieti ore”.
2 E tia mau ia tatou ia ite papu e o vai taua taata o te haavahavaha nei i te ture. No te aha râ? No te mea ua opua oia e faaino i to tatou mau taairaa maitai e te Atua, e to tatou tiaturiraa no te ora mure ore. Eaha ta ˈna huru raveraa? Te imi ra oia i te ravea ia faarue tatou i te parau mau no te rave i te mau parau haavare, ia ore tatou e haamori faahou i te Atua “ma te varua e te parau mau”. (Ioane 4:23.) Te faaite maitai maira te mau ohipa a taua taata paieti ore ra e te patoi ra oia i te Atua, i ta ˈna mau opuaraa, e i to ˈna ra nunaa.
3. Mea nafea to te Bibilia hutiraa mai i to tatou ara-maite-raa i nia i te taata paieti ore?
3 I roto i te Tesalonia 2, 2:3, te faahiti maira te Bibilia i te parau no taua taata paieti ore ra. Ma te faauruahia e te varua o te Atua, ua papai aˈera te aposetolo Paulo e: “Eiaha roa outou e vare i te taata atoa; o te taiva te tupu na na mua e tae ai i [te mahana o Iehova, mahana i reira oia e haamou ai i te amuiraa o te mau mea nei], e e faaitehia mai hoi taua taata hara ra.” Te tohu ra o Paulo i ǒ nei e, na mua ˈˈe te hopea o te amuiraa o te mau mea nei, e haamata ïa te taivaraa e e fa mai te hoê taata paieti ore. Hau atu, te faˈi nei o Paulo i te irava 7 e: “Te ohipa noa nei â taua ino moe ra i teie nei.” No reira, i te senekele I o to tatou nei tau, ua haamata aˈera taua taata paieti ore ra i te faaite mai ia ˈna.
Tumu o te taata paieti ore
4. O vai te metua e te turu o te taata paieti ore ra?
4 O vai te tumu o te taata paieti ore, e o vai teie e turu nei ia ˈna? Te pahono ra o Paulo e: “O taua taata e au to ˈna haerea mai i te ravea puai a Satani ra, ma te mana, e te tapao, e te semeio haavare ra, e ma te mau parau-tia ore haavare atoa ra, i rotopu i te feia e pohe ra, no te mea aore ratou i farii i te parau mau ma te hinaaro, ia ora ratou.” (Tesalonia 2, 2:9, 10). O Satani ïa te metua e te turu o taua taata paieti ore ra. Hau atu, te taa ra ia ˈna aore ra aita, te patoi nei te taata paieti ore ia Iehova, i ta ˈna mau opuaraa e i to ˈna ra nunaa, mai ia Satani ra te huru.
5. Eaha te hopearaa e tiai maira i te taata paieti ore e te feia e pee ra ia ˈna?
5 Te feia e pee ra i taua taata paieti ore ra, e apiti atoa ïa ratou i to ˈna ra hopea, te haamouraa. Ua papai aˈera o Paulo e: “E i reira taua taata paieti ore ra e faaitehia ˈi, o ta te Fatu ïa e rave e pau roa ˈtu (...) e e haamou roa ˈtu i te anaana o to ˈna taeraa maira.” (Tesalonia 2, 2:8). No te taata paieti ore e no to ˈna mau taata (“te feia e pohe ra”), fatata roa te hora o te haamouraa i te tae mai, “ia fa mai te Fatu ra o Iesu mai te raˈi mai, ma tana mau melahi mana atoa ra, ma te auahi ura ra, i te tuuraa mai i te pohe i te feia aore i ite i te Atua, e tei ore i faaroo i te evanelia o to tatou Fatu o Iesu Mesia ra: o te utuahia mai ïa i te pohe mure ore”. — Tesalonia 2, 1:6-9.
6. Eaha te haamaramaramaraa hau atu ta Paulo e horoa ra no nia i te taata paieti ore?
6 I mua rii noa, ua parau o Paulo no taua taata paieti ore ra e: “O tei mârô mai e te faateitei roa ia ˈna iho, i te mau mea atoa i parauhia e, e Atua, e tei haamorihia ra; e ua parahi Atua noa mai oia i roto i te hiero o te Atua, i te faaite-hua-raa mai ia ˈna iho e, e [a]tua oia.” (Tesalonia 2, 2:4). Ua faaara ïa o Paulo e e faatupu o Satani i te hoê taata paieti ore, o tei haamorihia ma te tano ore hoi, e ma te faateitei ia ˈna na nia i te ture a te Atua.
Nafea ia ite e o vai te taata paieti ore
7. No te aha tatou e faaoti ai e aita o Paulo e parau ra no te hoê anaˈe taata, e te faahohoˈahia ra te taata paieti ore ia vai?
7 Te parau ra anei o Paulo no te hoê anaˈe taata? Aita, no te mea ua parau oia e e itehia taua “taata” ra i to ˈna ra anotau e e vai noa oia e tae roa i te taime e haamou ai Iehova ia ˈna i te hopea o te amuiraa o te mau mea nei. Ua vai aˈena ïa taua taata ra mai te mau senekele mai â. Oia mau, aitâ hoê aˈe taata, i te auraa mau o te parau, i ora maoro aˈenei mai teie te huru. No reira, e tia i te parau ra “taata paieti ore” i te faahohoˈa i te hoê pǔpǔ taata.
8. O vai te taata paieti ore, e eaha te tahi mau huru taa ê e haapapu ra ia ˈna?
8 O vai ïa ratou? Te haapapu maira te mau ohipa e tupu ra e o te upoo faatere haapaoraa teoteo e te nounou o te amuiraa faaroo kerisetiano o tei faateitei ia ˈna, i roto i te roaraa o te mau senekele, ma te faatupu i ta ˈna iho ture. E nehenehe e itehia te reira na roto i te mau tausani haapaoraa e pǔpǔ faaroo ěê i roto i te amuiraa faaroo kerisetiano, te vai ra ta ratou tataitahi te hoê upoo faatere haapaoraa, e te aro noa nei ratou e o vetahi ê no nia i te tahi mau tuhaa o te haapiiraa aore ra o te peu. E tapao faaite taua amahamaharaa ra e aita taua mau taata e pee ra i te ture a te Atua. E ere ratou no ǒ mai i te Atua ra. (Hiˈo Mika 2:12; Mareko 3:24; Roma 16:17; Korinetia 1, 1:10.) Te mea anaˈe o te taai ra i taua mau haapaoraa ra, oia hoi aita ratou e mau papu ra i te haapiiraa bibilia. Ua ofati mau hoi ratou i teie faaueraa e: “Eiaha ia hau to outou manaˈo i te taata i tei papaihia ra.” — Korinetia 1, 4:6; hiˈo Mataio 15:3, 9, 14.
9. Eaha te mau tiaturiraa o te ore e tuea i te mau Papai ta te feia paieti ore i rave no te mono atu i te mau parau mau bibilia?
9 No reira, taua taata paieti ore ra, o te hoê ïa anairaa taata: te upoo faatere haapaoraa o te amuiraa faaroo kerisetiano. E hopoia ta to ˈna mau melo paatoa, te mau pâpa, te mau perepitero, te mau patereareha aore ra te feia poro evanelia porotetani, i roto i te mau hara i ravehia e te amuiraa faaroo kerisetiano. Ua taui ratou i te mau parau mau a te Atua na roto i te mau parau haavare etene ma te haapii i te mau tooma e ere no roto i te mau Papai, mai te pohe-ore-raa o te nephe taata, te po auahi, te vahi tamâraa hara e te Toru Tahi. Te faahohoˈahia nei ratou i te mau faatere haapaoraa ta Iesu i parau e: “O te Diabolo to outou na metua, i faatia ˈi â outou i te hinaaro o to outou metua ra (...). e haavare oia, e e metua hoi no te haavare.” (Ioane 8:44). Te faaite atoa ra ta ratou mau peu e te haavahavaha ra ratou i te ture, no te mea te apiti nei ratou i roto i te mau ohipa e ofati ra i te mau ture a te Atua. I taua mau taata ra, ua parau aˈera o Iesu e: “Aita roâ vau i ite ia outou. E haere ê atu outou, e te feia rave parau ino.” — Mataio 7:21-23.
Te faateitei nei ratou ia ratou iho na nia ia vetahi ê
10. Eaha te mau taairaa ta te taata paieti ore i atuatu e te mau faatere politita?
10 Te haapapu maira te Aamu e ua faaite taua pǔpǔ a te taata paieti ore ra i te teoteo e te faateitei, e ua tae roa i te faahepo atu i to ˈna mau hinaaro i te feia faatere o te ao nei. Ma te rave ei hororaa i te ‘toroa arii o te tiaraa no ǒ mai i te Atua ra’, ua faaite mai te upoo faatere haapaoraa ia ˈna mai te arai faufaa i rotopu i te Atua e te mau arii. Ua faaarii oia e ua faatopa oia i te mau arii e te mau emepera e ua nehenehe atoa oia e turai i te nunaa ia orure i te feia faatere aore ra ia turu atu ia ratou. No te haapoto-noa-raa, ua rave taua upoo faatere haapaoraa ra no ratou i te mau parau i faahitihia e te mau perepitero faatere o te mau ati Iuda, tei ore i farii ia Iesu, ma te parau e: “Aita o matou Arii, maori râ o Kaisara anaˈe ra.” (Ioane 19:15). Tera râ, mea maramarama maitai te haapiiraa a Iesu: “E ere i to teie nei ao to ˈu basileia”, o ta ˈna ïa i parau atu. — Ioane 18:36.
11. Mea nafea to te upoo faatere haapaoraa faateiteiraa ia ˈna na nia roa i te taata?
11 No te faateitei atu â ia ˈna na nia i te nunaa, ua maiti taua pǔpǔ paieti ore ra i te hoê ahu taa ê, mea pinepine e peni ereere. Hau atu, ua tuu to ˈna mau melo e rave rahi huru faaunaunaraa no te faateitei ia ratou, ma te tamau i te korona, te satauro e te mitra. (Hiˈo Mataio 23:5, 6.) Area o Iesu e ta ˈna mau pǐpǐ, aita ïa to ratou e ahu mai teie te huru; ua ahu ratou i te ahu mai te taatoaraa o te taata. Ua rave atoa te mau melo o te upoo faatere haapaoraa i te mau piiraa mai te “Metua”, “Metua Peata”, “Perepitero teitei”, “Perepitero teitei roa”, “To ˈna Arii” e “To ˈna Mana teitei”, na roto i teie mau piiraa ratou i ‘faateitei ai ia ratou na nia i te mau taata atoa’. Tera râ, no nia i te mau parau faaahaaha i te pae faaroo, ua horoa o Iesu i teie haapiiraa i muri nei: “Eiaha roa outou e faametua i te hoê taata o teie nei ao.” (Mataio 23:9). Mai ia Elihu atoa, i to ˈna aˈoraa i te feia faahua tamahanahana ia Ioba, ua parau oia e: “E ore au e haapaia noa ˈtu i te taata i teie nei, e ore au e parau faaahaaha noa ˈtu i te taata.” — Ioba 32:21.
12. Ia au i te mau parau a Paulo, o vai ta te upoo faatere haapaoraa e tavinira mau ra?
12 A faaite ai o Paulo i to ˈna ra anotau e ua haa aˈena te taata paieti ore ra, ua haapapu oia no nia i te feia e pee ra i te haerea taiva o taua “taata” nei ma te parau e: “E aposetolo haavare hoi te reira, e rave ohipa haavare ïa, i te faahua aposetoloraa na te Mesia ia ratou iho. Eita hoi e maerehia; o Satani hoi tei faahua melahi atoa ia ˈna iho no te maramarama. E ere hoi i te mea maere rahi, ia faahua tavini tana mau tavini no te parau-tia; e faaauhia to ratou hopea i ta ratou ohipa.” — Korinetia 2, 11:13-15.
Patoiraa i te haamoriraa viivii ore
13. Eaha te taivaraa i tohuhia e Paulo?
13 Ua parau o Paulo e e tupu apipiti noa taua taata paieti ore ra e te taivaraa. Te faaiteraa matamua ta Paulo e horoa ra ia nehenehe tatou e ite e o vai taua pǔpǔ taata paieti ore ra, teie ïa “o te taiva te tupu na na mua e tae ai i [te mahana o Iehova] [i reira oia e haamou ai i te amuiraa o te mau mea iino]”. (Tesalonia 2, 2:2, 3.) Eaha te auraa o te parau “taiva”? I roto i te taatoaraa o te parau, e ere noa ïa te auraa e, na roto i te paruparu i te pae varua, te faaatea ïa tatou ia tatou iho i te parau mau aore ra te faarue ra tatou i te reira. Te auraa o te parau heleni i iritihia i ǒ nei na roto i te parau ra “taiva”, teie ïa “ino” aore ra “patoi”. E rave rahi iritiraa e parau nei “orure hau”. No reira ïa e nehenehe e taiohia i roto i te Parole vivante (papairaa na Kuen) e: “Eita te reira e tupu na mua ˈˈe i te orureraa rahi.” Te faaohipa ra La Bible en français courant i te parau “orure hau hopea”. No reira, te faaite ra te taatoaraa o te parau e, na roto i te parau ra “taiva”, te faaite ra o Paulo i ǒ nei i te hoê patoiraa i te haamoriraa mau.
14. Eaha te taime i tupu mau ai te taivaraa?
14 Mea nafea taua taivaraa, taua orure hau ra, i te tupuraa? I roto i te Tesalonia 2, 2:6, te parau ra o Paulo no te ohipa e “tapea” ra, i to ˈna ra anotau, i te taata paieti ore. Eaha ïa taua ohipa ra? O te mana a te mau aposetolo no te tapea i te mau ohipa. I te mea e tei reira ratou e no te mau semeio ta te varua moˈa i faatia ia ratou ia rave, aita te taivaraa i parare i taua anotau ra (Ohipa 2:1-4; Korinetia 1, 12:28). Teie nei râ, i te hopea o te senekele I, ua pohe te mau aposetolo, e ua moe ïa taua mana ra.
Te haamata ra te pǔpǔ o te upoo faatere haapaoraa
15. Eaha te faanahonahoraa i ravehia e Iesu no te amuiraa kerisetiano?
15 Ua tupu maitai te amuiraa ta Iesu i haamau, i roto i te roaraa o te senekele I i raro aˈe i te aratairaa a te mau matahiapo (tiaau) e a te mau tavini tauturu (Mataio 20:25-27; Timoteo 1, 3:1-13; Tito 1:5-9). E mau taata aravihi e te ite i te pae varua ratou, i maitihia i roto i te amuiraa, e, mai ia Iesu atoa, aita ratou i haere i te haapiiraa teitei no te haapii no nia i te Atua. No reira, ua uiui te mau enemi o Iesu e: “No hea ra te ite o teie nei taata, aore hoi oia i haapiihia?” (Ioane 7:15). Ua parau atoa te mau faatere haapaoraa i taua parau ra no nia i te mau aposetolo. Te taiohia ra i roto i te Ohipa 4:13 e: “E ia hiˈo atura ratou ia Petero raua o Ioane i te mǎtaˈu ore, e ite aˈera hoi e, e pue taata haapii-ore-hia raua e te itea ore, umere atura ratou; ua ite hoi ratou e, ia Iesu atoa ra hoi raua.”
16. No nia i te faanahonahoraa o te amuiraa, nafea te taivaraa i te faatupuraa i te hoê tauiraa ia faaauhia i te hiˈoraa kerisetiano o te senekele I?
16 Tera râ, ua faaô mai te taivaraa i te mau manaˈo no ǒ mai i te upoo faatere no te haapaoraa ati iuda ra e, i muri iho, no ǒ mai i te faanahonahoraa i te pae faaroo o te Roma etene. I te roaraa o te tau, ua faaruehia ihora te faaroo mau e, taa ê atu i te manaˈo o te mau Papai, ua fa mai te pǔpǔ o te upoo faatere haapaoraa. Ua haamata ihora te hoê pâpa i faatoroahia i te faatere i te hoê pǔpǔ o te mau karadino, o tei maitihia i rotopu i te mau hanere epikopo e arii epikopo, no roto mai hoi ratou iho i te mau tiaraa o te mau perepitero i haapiihia i roto i te mau fare haapiiraa perepitero. No reira ïa, i muri noa ˈˈe i te senekele I, ua faahepo aˈera te hoê upoo faatere haapaoraa apotata ia ˈna i te amuiraa faaroo kerisetiano. Aita taua pǔpǔ e pee ra i te hiˈoraa o te mau matahiapo e o te mau tavini tauturu o te senekele I, no te mea te pee nei oia i te mau peu i ravehia i roto i te mau haapaoraa etene.
17. I teihea anotau iho â râ te mana o te taata paieti ore i te faaetaetaraahia?
17 I te omuaraa o te senekele III, ua itehia te pǔpǔ o te mau taata faaroo i te tuuraahia i te parahiraa i raro roa o te feia faaroo i roto i te nunaa. Te rave riirii maira te taata paieti ore ra, te apotata, i te faatereraa o te mana. Taua mana ra, e faaetaetahia ïa e ana i roto i te roaraa o te faatereraa o te emepera roma o Constantin, i muri aˈe iho â râ i te apooraa no Nicée, i te matahiti 325. I taua anotau ra, ua tahoê maite te Ekalesia e te Hau. Mea na reira to te taata paieti ore ra, te upoo faatere haapaoraa o te amuiraa faaroo kerisetiano, haamauraa i roto i te roaraa o te mau senekele i te hoê huaai apotata e orure i te Atua mau ra, o Iehova. E pee ïa taua mau apotata ra e tae roa i to tatou nei mahana i ta ratou iho mau ture e mau faanahonahoraa, eiaha râ ta te Atua.
Te tahi mau haapiiraa etene
18. Eaha te mau haapiiraa faaino ta te taata paieti ore i tipee i te etene?
18 I te roaraa o te tau, e tipee atoa te taata paieti ore i te tahi mau haapiiraa a te mau etene. Ei hiˈoraa, e rave te hoê atua Toru Tahi miterio e te taa ore i te parahiraa o Tei parau e: “O vau o Iehova, o to ˈu ïa iˈoa, e ore au e horoa i to ˈu ra hanahana no vetahi ê.” “O vau o Iehova, e aitâ ˈtu; aitâ ˈtu Atua maori râ o vau.” (Isaia 42:8; 45:5). E aratai te mau haapiiraa a te taata, e mau haapiiraa etene anaˈe, o tei fariihia maoti te mau parau mau bibilia, i te tahi atu parau faaino: te haamoriraa ia Maria. Te vahine ta te Bibilia e faaite maira ia tatou mai te hoê vahine haehaa, e riro oia no te amuiraa faaroo kerisetiano ei “Metua vahine no te Atua”. No reira, o te upoo faatere haapaoraa, te tumu o taua mau haapiiraa hape, tei riro ei ‘zizania’ parare roa ˈˈe ta Satani i ueue no te tamata i te haapohe i te huero maitai ra i ueuehia e te Mesia. — Mataio 13:36-39.
19. Mea nafea to te amuiraa faaroo kerisetiano amahamaharaa i roto i te roaraa o te mau senekele, e eaha te ohipa i tamau-noa-hia i te faatupu?
19 I muri iho e tupu mai te mau mârôraa e te mau faataa-ê-raa manaˈo, i reira ïa te amuiraa faaroo kerisetiano e amahamaha ˈi no te riro mai ei rave rahi hanere pǔpǔ faaroo. Ma te itehia i te tahi mau taa-ê-raa, e tamau noa taua mau haapaoraa atoa ra i te faataa ê i te upoo faatere haapaoraa e te feia faaroo i roto i te nunaa. Mea na reira ˈtura to te pǔpǔ o te taata paieti ore ra i te vai-tamau-noa-raa e tae roa mai i to tatou nei mau mahana, i reira oia e tamau noa i te faateitei ia ˈna na nia i te nunaa ma te ahu mai i te mau ahu e faataa ê maitai ia ˈna e ma te rave i te mau piiraa teoteo mau. Aita ïa o Paulo i faarahi roa ia ˈna i parau e e faahanahana te pǔpǔ a te taata paieti ore ra e e faateitei ia ˈna i nia roa i te hoê tiaraa atua.
Te faatereraa a te pâpa
20. Eaha ta te tahi mau vea katolika e parau ra no nia i te pâpa?
20 E itehia i roto i te faatereraa a te pâpa te hoê hiˈoraa tano maitai no taua faahanahanaraa ra. Ia au i te titionare ekalesiatiko a Ferraris, i neneihia i te fenua Italia, te tapea ra te pâpa i “te hoê mana e te hoê tiaraa teitei no reira, e ere oia i te hoê taata noa, mai te Atua atoa râ, e te Auvaha o te Atua”. Te vai ra ia ˈna e toru korona, oia hoi to te “arii o te raˈi, to te fenua e to te po auahi”. Te na ô faahou ra taua buka ra e: “Ua riro te pâpa mai te Atua i nia i te fenua nei, te tamaiti huiarii hoê roa o te feia haapao maitai a te Mesia, te arii rahi roa ˈˈe o te mau arii paatoa.” Te na ô faahou ra taua vea ra e: “E nehenehe ta te pâpa, i te tahi taime, e patoi atu i te ture a te Atua.” Hau atu, te parau ra te Titionare apî katolika (beretane) no nia ia ˈna e: “E mana teitei aˈe ta to ˈna mau tia i nia i te tahi mau melo o te tino faatere.”
21. Eaha te taa-ê-raa e itehia ra no nia i te mau ohipa a te pâpa ia faaauhia i te mau ohipa a Petero e a te hoê melahi?
21 Ma te taa ê atu i te mau pǐpǐ a Iesu, e tuu pinepine te pâpa i te mau ahu moni rahi e mea au roa hoi na ˈna ia haamori-rahi-hia oia e te taata. E faatia oia ia ratou ia tuturi i mua ia ˈna, ia apa i to ˈna tapea rima e ia amo ia ˈna i nia i to ratou tapono ma te tauturuhia e te hoê parahiraa i hamani-taa-ê-hia. Auê hoi huru teoteo ta te mau pâpa i faaite i roto i te roaraa o te mau senekele! Te reira te taa-ê-raa i te huru haehaa o Petero tei parau ia Korenelio, te raatira roma tei haamairi i raro i to ˈna pae avae ma te tahopu ia ˈna, e: “A tia, e taata atoa hoi au nei.” (Ohipa 10:25, 26). Auê hoi taa-ê-raa atoa i te melahi o tei horoa i te Apokalupo ia Ioane! Ua tipapa ihora te aposetolo i mua i taua melahi ra no te haamori ia ˈna, ua parau maira râ oia ia ˈna e: “Eiaha roa, e taetaeae tavini hoi au no oe, e no to mau taeae i te mau peropheta ra, e no te feia i haapao i te parau i roto i teie nei buka; o te Atua te haamori.” — Apokalupo 22:8, 9.
22. Na teihea ture o te mau Papai e tauturu ia tatou ia ite e o vai te taata paieti ore?
22 I to outou manaˈo, mea etaeta anei te haavaraa o te pǔpǔ o te upoo faatere haapaoraa? E nehenehe tatou e ite i te reira ia faaohipa tatou i te ture ta Iesu i horoa no te haapapu e o vai te mau peropheta haavare: “E ite outou ia ratou i to ratou hoturaa.” (Mataio 7:15, 16). Eaha te mau hoturaa a te upoo faatere haapaoraa i roto i te roaraa o te Aamu, e te reira tae roa i te senekele XX? Eaha te hopearaa ta te taata paieti ore e farerei, e o vai te apiti atu i taua hopearaa ra? No nia i taua taata paieti ore ra, eaha te hopoia i horoahia na te feia e mǎtaˈu mau ra i te Atua? E haamaramarama mai te mau tumu parau i mua nei i taua mau uiraa ra.
Uiraa no te faahaamanaˈoraa
◻ Eaha te taata paieti ore, e afea râ taua taata ra i te ite-papu-raahia?
◻ Ia au i ta te Bibilia e parau ra, o vai te tumu o taua pǔpǔ ra?
◻ Mea nafea te upoo faatere haapaoraa i te faateiteiraa ia ˈna na nia i te nunaa?
◻ Eaha te mau peu e eaha te mau haapiiraa apotata i fariihia e te upoo faatere haapaoraa?
◻ Eaha te taa-ê-raa e itehia ra i roto i te haerea o te mau pâpa e to Petero e to te hoê melahi?
[Hohoˈa i te api 7]
Ma te taa ê i te mau pâpa, aita te aposetolo Petero i faatia i te hoê taata ia tuturi i mua ia ˈna.