Ua itehia te “taata paieti ore”
“A haere ê mai na outou i rapae, e au mau taata e, ia ore outou ia riro ei rave atoa i ta ˈna ra mau hara, (...) ia pohe atoa i to ˈna ra mau pohe.” — APOKALUPO 18:4.
1, 2. a) Nafea e nehenehe ai e ite e o vai te taata paieti ore? b) Eaha te manaˈo o te Atua no nia i te feia e faahua parau nei e te haamori nei ratou ia ˈna, o ratou râ te tumu o te mau faataheraa toto (Mataio 7:21-23)?
UA FAAITE atea te Parau a te Atua i te haereraa mai o te hoê ‘taata paieti ore ra’. Ua tohu atoa oia e na Iesu Mesia, te Taata no te raˈi i faataahia no te faatupu i te mau haavaraa a te Atua, e ‘haapau roa ˈtu e e haamou roa ˈtu’ i taua taata ino ra (Tesalonia 2, 2:3-8). Mai ta te mau tumu parau na mua ˈtu i faaite mai, o te upoo faatere haapaoraa o te amuiraa faaroo kerisetiano taua taata paieti ore ra. Mea roa i teie nei, ua faarue oia i te mau parau mau no roto i te Parau a te Atua no te rave mai i te mau haapiiraa etene, mai te Toru Tahi, te po auahi e te pohe-ore-raa o te nephe. Hau atu, te patoi nei ta ˈna mau ohipa i te mau ture a te Atua. Te faahohoˈahia ra te mau melo o te upoo faatere haapaoraa i te mau taata ta Paulo i faaara ia Tito, ma te parau e: “Te parau nei ratou e ua ite i te Atua, area ta ratou ohipa, te parau nei ïa aore i ite ia ˈna, e feia faufau, e te faaroo ore, e te mau ohipa maitatai nei, aore roa ïa e au i reira.” — Tito 1:16.
2 Ua parau o Iesu e: “E ara râ i te orometua haavare, o tei haere mai ia outou ma te huru o te mamoe ra, area o roto ra, e luko taehae ïa. E ite outou ia ratou i to ratou hoturaa”. E faahotu mai te mau peropheta haavare i te mau “huero ino”. (Mataio 7:15-17.) Ua riro te hapa rahi a te upoo faatere haapaoraa i roto i te mau faataheraa toto ei haapapura e te faahotu ra oia i te mau hotu ino. I roto e rave rahi senekele, ua turu oia i te mau tamaˈi faaroo, te Tiribuna ekalesiatiko haava i te hairesi e te mau tamaˈi, o tei faatahe i te toto o te tahi tau mirioni taata. Ua pure ratou e ua haamaitai atoa i na pae e piti i roto i te mau tamaˈi i reira te mau melo o te mau haapaoraa tataitahi i taparahi atu te tahi e te tahi. Area o Paulo, ua nehenehe oia e faaite e: “Aore roa o ˈu viivii i te toto o te taata atoa nei.” (Ohipa 20:26). E ere ïa mai te reira te huru no te mau melo o te upoo faatere haapaoraa. Te parau nei te Atua ia ratou e: “E ia pinepine noa ta outou pure, e ore au e faaroo atu; ua îî hoi to outou rima i te toto.” — Isaia 1:15.
3. Eaha te mau ohipa e tupu ra i roto i te ao atoa nei, teie e piri roa mai nei?
3 Te piri roa maira te taime te Atua e faatupu ai i ta ˈna haavaraa i nia i te taata paieti ore. Fatata roa, mai ta Iesu i tohu, “e ati rahi hoi (...), aitâ ïa ati mai te matamehai mai o teie nei ao, e tae roa aˈenei i teie nei mahana, e e ore roa hoi a muri atu”. (Mataio 24:21.) E haamata taua tauiraa faaau ore na roto i te faautuaraa o Babulonia Rahi, te hau emepera o te haapaoraa hape i roto i te ao nei, o te amui nei i te mau haapaoraa o te amuiraa faaroo kerisetiano. “E pau oia [i te mau tuhaa politita] i te haru, e e veve roa, e e amu i to ˈna tino, e e tutui ia ˈna i te auahi”. (Apokalupo 17:16.) E hope te ati rahi na roto i te haamouraa o te toea o te ao a Satani i Aramagedo, “te tamaˈi i taua mahana rahi o te Atua Puai hope ra”. — Apokalupo 16:14, 16; 19:11-21.
Te faaheporaa ia aroha i to ˈna taata-tupu
4. Eaha te tia i te feia e haamori nei i te Atua “ma te varua e te parau mau” ia haamanaˈo?
4 I te mea e fatata roa taua mau ohipa faufaa roa i te tupu i nia i te fenua atoa nei, eaha ïa te tia i te feia ‘e haamori ra i te Metua ma te varua e te parau mau’ ia rave (Ioane 4:23)? Na mua roa, e tia ia ratou ia haamanaˈo i ta Iesu i parau: “I haapao outou i ta ˈu ra parau, e vai herehia ˈtu â outou e au; mai ia ˈu i haapao i te parau a tau Metua ra, e te vai herehia nei â vau e ana. (...) [T]eie ta ˈu parau, Ia aroha outou ia outou iho, mai ia ˈu e aroha ˈtu ia outou na. Ia horoa te taata i to ˈna iho ora no to ˈna ra mau taua, aita roa e taata aroha ê atu i tei reira. O outou to ˈu taua ia haapao outou i te mau parau atoa ta ˈu i parau atu ia outou na.” — Ioane 15:10-14; Ioane 1, 5:3.
5, 6. a) Eaha te faaueraa ta Iesu i horoa i ta ˈna mau pǐpǐ, e na te reira e faaite e o ratou te feia haamori mau ra i te Atua? b) Ua riro te reira ei faaueraa apî i roto i teihea auraa?
5 E tia ˈtura ïa i te mau kerisetiano mau ia here i to ratou taata-tupu, to ratou mau taeae e mau tuahine kerisetiano iho â râ no te mau fenua atoa (Ohipa 10:34; Galatia 6:10; Ioane 1, 4:20, 21). Oia, e tia i te mau kerisetiano ia faaite i te hoê ‘aroha hohonu te tahi no te tahi’. (Petero 1, 4:8.) Te haapapu nei te here ta ratou e faaite nei i roto i te ao atoa nei e e feia haamori mau i te Atua ratou, no te mea ua parau o Iesu e: “E tuu atu vau i te parau apî na outou, E aroha outou ia outou iho, mai ia ˈu e aroha ˈtu ia outou na, e aroha atoa hoi outou ia outou iho. O te mea teie e ite ai te taata atoa e, e pǐpǐ outou na ˈu, ia aroha outou ia outou iho.” — Ioane 13:34, 35.
6 I roto i teihea auraa taua faaueraa i riro ai ei mea apî? Aita anei i horoahia i te mau ati Iuda, i raro aˈe i te Ture a Mose, i teie nei aˈoraa: “E aroha râ oe i te taata tupu mai to aroha ia oe iho na”? (Levitiko 19:18.) Oia, na roto râ i teie mau parau: “mai ia ˈu e aroha ˈtu ia outou na”, te ani nei Iesu hau atu â. E aratai to ˈna here ia ˈna ia horoa i to ˈna ora no vetahi ê, e e tia i ta ˈna mau pǐpǐ ia ineine i te na reira atoa (Ioane 15:13). Ua tuuhia ïa te here i te hoê faito teitei aˈe, no te mea aita taua tusia ra i titauhia i raro aˈe i te Ture a Mose.
7. Eaha te haapaoraa, i te XXraa o te senekele, o tei auraro i taua ture o te aroha ra?
7 O vai te haapaoraa, i te senekele XX, o tei faaroo i taua ture ra o te aroha? E ere roa ˈtu te mau haapaoraa o te amuiraa faaroo kerisetiano, no te mea ua taparahi to ratou mau melo ratou ratou iho i roto i na tamaˈi e piti o te ao nei e i roto i te tahi atu mau aroraa o tei haapohe te tahi tau ahuru mirioni taata. Area, i nia i te fenua atoa nei, te auraro nei te mau Ite no Iehova i te ture o te aroha. I mua i te mau tamaˈi a te mau nunaa, ua tapea ratou i te hoê tiaraa papu, oia hoi te oreraa e faaô i roto i te mau ohipa o teie nei ao, no te mea ua parau Iesu e eiaha ta ˈna mau pǐpǐ ‘e faaô i roto i te ohipa a to teie nei ao’. (Ioane 17:16) No reira ratou e nehenehe ai e parau e, mai ia Paulo, ‘aore roa ratou i viivii i te toto o te taata atoa nei’. No te faahohoˈa i taua parau ra, ia hiˈopoa anaˈe na tatou i te mau parau matamua o te hoê faaotiraa tei ravehia e te mau tavini a Iehova tei putuputu i te hoê tairururaa i Washington, i te 27 no novema 1921:
“Matou, te mau kerisetiano teie e tutava nei ma te aau rotahi no te pee i te mau haapiiraa a Iesu Mesia to matou Fatu e a ta ˈna mau Aposetolo, te parau nei matou e: ua riro te tamaˈi ei toea o te taparahiraa taata ino roa, te faaino nei oia i te morare e te faahaama nei i te mau nunaa kerisetiano; te opani nei te mau faaueraa tumu tei haapiihia e te Fatu ra o Iesu Mesia i te mau kerisetiano tei pûpû ia ratou ia apiti atu i te mau tamaˈi, i te mau faataheraa toto aore ra i te tahi atu huru o te haavîraa uˈana.”
8. Eaha ta te Aamu e parau ra no nia i te mau Ite no Iehova i roto i te Piti o te Tamaˈi rahi?
8 Mea nafea to te mau Ite faaohiparaa i taua faaueraa tumu ra i roto i te Pitiraa o te Tamaˈi rahi? I roto i taua aroraa ra, te aroraa taparahi taata roa ˈˈe i roto i te taatoaraa o te aamu o te taata, ua pohe te tahi tau 50 mirioni taata; aita râ hoê noa ˈˈe i taparahihia e te hoê Ite no Iehova. Ua horoa te upoo faatere haapaoraa no Helemani, fatata te taatoaraa, i to ˈna turu i te faatereraa nazi, na roto i te ohipa aore ra ma te ore e patoi i te reira. Tera râ, i raro aˈe i te faatereraa nazi, ua tapea te mau Ite no Iehova i te hoê tiaraa papu, oia hoi te oreraa e faaô i roto i te ohipa a teie nei ao, e ua patoi ratou i te faatura ˈtu ia Hitler aore ra i te faaô atu i roto i ta ˈna mau huru raveraa i te pae o te nuu. No reira, aita ratou i taparahi, i roto i taua aroraa ra, i te hoê noa ˈˈe o to ratou mau taeae i te pae varua no te tahi atu mau fenua, aore ra te tahi atu taata. I roto i te ao atoa nei, ua tapea te mau Ite o Iehova i to ratou tiaraa, oia hoi te oreraa e faaô i roto i te mau ohipa a teie nei ao.
9. Eaha te ohipa i tupu i nia i te mau Ite no Iehova i Helemani e i Auteteria i raro aˈe i te faatereraa nazi?
9 E rave rahi mau Ite o Iehova tei faatusia i to ratou ora no to ratou mau hoa, ma te auraro i te ture o te aroha. Teie te nehenehe e taiohia i nia i te mau Ite i roto i te buka ra Kirchenkampf in Deutschland (Te aroraa a te mau Ekalesia i Helemani), a Friedrich Zipfel: “E iva ahuru ma hitu i nia i te hanere o te mau melo o taua pǔpǔ iti i te pae faaroo o tei haamani-ino-hia e te faatereraa nazi. Ua taparahi-pohe-hia hoê tuhaa i nia i te toru i rotopu ia ratou aore ra ua pohe ratou i muri aˈe i te mau hamani-ino-raa, i te poiâ, te mau maˈi aore ra no te faaraveraa i te ohipa ma te faahepo. Ua riro te inoraa o taua mau faaheporaa ra o te ore e nehenehe e faaauhia ei faahopearaa no te hoê faaroo taiva ore o tei ore e tuea i te huru feruriraa o te faatereraa nazi.” I te fenua Auteteria, ua haapohehia 25 % o te mau Ite o Iehova, ua taparahi-haapohe-hia ratou, aore ra ua pohe ratou na roto i te mau maˈi aore ra i te rohirohi i roto i te mau aua nazi.
10. Eaha te tiaturiraa o te feia o tei pohe no te mea e ua auraro ratou i te ture o te aroha?
10 Te feia o tei hamani-ino-hia no te mea ua auraro ratou i te ture o te aroha, te vai ra ia ratou te haapapuraa e “e ere te Atua i te Atua parau-tia ore, a haamoe ai oia i ta [ratou] ohipa i rave, e to [ratou] hinaaro i to ˈna ra iˈoa”. (Hebera 6:10.) Ua ite ratou e “te mou nei hoi teie nei ao, e ta to te ao atoa e hinaaro nei; o tei haapao râ i to te Atua ra hinaaro, e tia ïa i te oraraa e a muri noa ˈtu”. (Ioane 1, 2:17.) Te vai ra ia ratou te tiaturiraa papu e e faatia-faahou-hia ratou, e nehenehe atura ïa e roaa ia ratou te ora mure ore. — Ioane 5:28, 29; Ohipa 24:15.
11. Ua taa ê te mau tavini a Iehova i te tahi atu mau taata i roto i teihea auraa, e eaha te parau tohu ta ratou e faatupu nei?
11 O te mau tavini a Iehova anaˈe teie e auraro nei i taua ture ra, tei faahitihia e Petero e te tahi atu mau aposetolo i mua i te hoê haavaraa rahi: “O te Atua ta matou e faaroo e tia ˈi eiaha te taata.” (Ohipa 5:29). O ta te mau Ite o Iehova ïa e rave nei. No te reira ratou e turuhia ˈi e “te [v]arua [moˈa] (...) ta te Atua i horoa mai i te feia i faaroo ia ˈna ra”. (Ohipa 5:32.) Mea na reira e roaa ˈi ia ratou te puai no te faatupu i te parau tohu i faahitihia i roto i te Isaia 2:2-4. Te tohu nei taua irava ra e, i to tatou nei tau, e haamauhia te haamoriraa mau e e haere mai te tahi mau taata o te mau nunaa e o te mau haapaoraa atoa no te faaohipa i te reira. E tia iho â râ i taua mau taata ra ia ‘tiapai ratou i ta ratou ˈoˈe ei auri arote, e ta ratou mau mahae ei tipi tope raau; e ore te hoê fenua e aa mai i te tahi fenua i te ˈoˈe, e ore hoi ratou e haapii faahou i te tamaˈi’. Te faaineine nei te mau tavini a Iehova no te ora ˈtu i roto i te hoê ao apî, te hoê ao e itehia te hau; no reira ratou e ore ai e haapii i te tamaˈi, te ture râ o te aroha. — Ioane 13:34, 35.
12. Eaha te tia i te feia e auraro nei i te ture o te aroha ia rave no vetahi ê?
12 Teie atoa te auraa o te aroha kerisetiano, oia hoi ‘i te aroharaa ˈtu i to taata-tupu, mai to aroha ia oe iho na’. Eita ïa te mau tavini a te Atua e nehenehe e tapea noa na ratou iho te mea ta ratou e ite ra (Mataio 22:39). Te vai ra â e rave rahi mau taata o te hinaaro nei e tavini i te Atua e e ora ˈtu i roto i te ao apî ta ˈna i tǎpǔ no te mau taata. I te mea e te vai noa ra te taime, mea hinaaro atoa na taua mau taata ra, ia haapii i te ture o te aroha e te tahi atu â mau parau mau e rave rahi no nia i te Mana Teitei o te ao nei, o te Atua ra o Iehova. E tia ia ratou ia haapii e o Iehova anaˈe te tia e ia haamorihia, e ia ite nafea ia haamori ia ˈna (Mataio 4:10; Apokalupo 4:11). Te feia i ite i taua mau mea ra, e hopoia ïa na ratou i te haapii atu i te tahi atu mau taata, ia nehenehe atoa ratou e fanaˈo i te haamaitairaa a Iehova. — Ezekiela 33:7-9, 14-16.
Ua itehia te taata paieti ore
13. I roto i ta tatou ohipa faaiteraa i roto i te ao atoa nei, eaha te tia ia tatou ia faaite, e no te aha?
13 Ua parau Iesu e: “E e parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” (Mataio 24:14). I roto i taua ohipa faaiteraa i roto i te ao atoa nei, e tia i te mau tavini a te Atua ia faaite i ta ˈna mau haavaraa no nia i te haapaoraa hape, no nia iho â râ i te upoo faatere haapaoraa o te amuiraa faaroo kerisetiano. I mua i te Atua, tera te tuhaa faahapa-rahi-roa ˈˈe-hia i te tahi atu, no te mea te faahua parau nei oia e tei roto oia i te kerisetianoraa. E tia ia faaitehia e o vai oia, ia nehenehe te feia e hinaaro ra e tavini i te Atua ia faaorahia mai raro aˈe i to ˈna mana e ia nehenehe ratou e rave i te mau taahiraa e hinaarohia no to ratou ora. Ua parau Iesu e: “Na te parau mau outou e faatiamâ.” — Ioane 8:32.
14. Eaha te poroi maramarama maitai no nia i te haapaoraa hape te tia ia faaitehia?
14 No reira, e tia i te mau Ite o Iehova ia faaite i taua poroi faauruahia e te Atua i te haapaoraa hape: “A haere ê mai na outou i rapae, e au mau taata e, ia ore outou ia riro ei rave atoa i ta ˈna ra mau hara, ia ore outou ia pohe atoa i to ˈna ra mau pohe. Ua taea hoi te raˈi i ta ˈna ra mau hara, e ua manaˈo te Atua i ta ˈna ra mau parau-tia ore. (...) e râ tahi-noa-hia to ˈna pohe, o te pohe, e te oto, e te oˈe, e e pau roa oia i te auahi: e puai hoi to te Fatu, to te Atua, o te faautua ia ˈna ra.” — Apokalupo 18:4-8.
15. Eaha te ohipa i tupu i te matahiti 1914 i te tau i haapaohia e Iehova, e eaha te ohipa i tupu i muri aˈe i te Tamaˈi rahi Matamua?
15 Te faaite nei te mau parau tohu bibilia e ua haamata te mau “anotau hopea” o te amuiraa o te mau mea nei i te matahiti 1914, matahiti faufaa mau (Timoteo 2, 3:1-5, 13; Mataio 24:3-13). Mai taua anotau ra, tei roto ïa tatou i te “tau hopea”. (Daniela 12:4.) I muri noa ˈˈe i te Tamaˈi rahi Matamua, i te tau faataahia e Iehova, ua haamata te mau Ite i te faaaano ma te itoito i te ohipa o te pororaa i te Basileia o te Atua, mai tei tohuhia i roto i te Mataio 24:14. Hau atu, ua horoa ratou i te hoê puai rahi roa ˈtu no te faaite e o vai te haapaoraa hape, te pǔpǔ iho â râ o te upoo faatere haapaoraa o te amuiraa faaroo kerisetiano apotata, te taata paieti ore ra.
16. I roto e hau atu i te 70 matahiti, eaha te maraaraa tei itehia i roto i te ohipa oia hoi te faaiteraa e o vai te taata paieti ore ra?
16 A hau atu i te 70 matahiti i teie nei e na roto i te hoê puai o te rahi noa ˈtura, te faaara nei te mau tavini a te Atua i te mau taata no nia i te ohipa haavare e ravehia nei e te taata paieti ore ra. I muri aˈe i te Tamaˈi rahi Matamua, te vai ra te tahi noa tausani Ite. I teie nei râ, ua riro ratou ei “fenua itoito” e ua hau atu i te toru mirioni e te afa o te mau tavini itoito tei faanahohia i roto hau atu i te 60 000 amuiraa na roto i te ao atoa nei (Isaia 60:22). Maoti ta ratou ohipa, o te parare noa ˈtura, te faaite nei te mau kerisetiano ma te itoito i te Basileia o te Atua mai te tiaturiraa otahi roa no te huitaata nei e, i te hoê â taime, te faaite nei ratou e eaha mau na te upoo faatere haapaoraa: te hoê taata haavare teie e patoi nei i te ture.
No te aha te hoê itoito rahi mai te reira?
17. No te aha te mau tavini a Iehova e faaite tahaa ai ma te itoito e o vai te taata paieti ore ra?
17 No te aha, e rave rahi matahiti i teie nei, te mau tavini a Iehova e faaite tahaa nei ma te itoito e o vai te taata paieti ore ra? No te mea, e tia ia paruruhia te mau mirioni taata i roto i te nunaa rahi o te mau mamoe a Iehova o tei haere aˈena i nia i te eˈa o te ora, i te ao a Satani, e oia atoa i te haapaoraa hape (Iaone 10:16; Apokalupo 7:9-14). Hau atu, mai te peu e eita e faaitehia e o vai te upoo faatere haapaoraa, eita ïa te feia aau rotahi o tei ore â i ô mai i roto i te nǎnǎ a te Atua, e ite e nafea ia haere mai i rapae au mai i taua eˈa ino ra. E tia ïa ia faaitehia i taua mau taata ra e te vai ra te ati, mai te feia i ora na i te tau o Iesu i faaitehia no nia i te haavare o te mau upoo faatere haapaoraa o to ratou tau. “E matapo aratai matapo ïa, ta ˈna i parau atu; e ia aratai te matapo i te matapo ra, e hiˈa apipiti ïa i roto i te pouohu.” — Mataio 15:14; hiˈo Korinetia 2, 4:4; 11:13-15.
18. Eaha te tia i te feia e imi nei i te parau mau ia ite?
18 No roto te upoo faatere haapaoraa i te ao a Satani (Ioane 8:44). Teie râ, o te hoê ao ïa ta te Poiete e fatata roa i te haamou (Petero 2, 3:11-13; Ioane 1, 2:15-17). No reira e taiohia ˈi i roto i te Parau a te Atua e: “O tei titau e ei taua oia no teie nei ao, ua taa maite ïa oia, e e enemi ïa no te Atua.” (Iakobo 4:4). Aita te upoo faatere haapaoraa e tâuˈa noa ˈˈe i taua faaararaa ra e te tamau nei oia i te faaô atu i roto i te mau ohipa a te mau nunaa. Te faatiaturi nei o ˈna i ta ˈna mau taata e turu ra ia ˈna e e haamau te mau tia politita i te hoê ao maitai aˈe; e tiaturiraa hape râ ta ratou e horoa ra, no te mea fatata roa te ao e faaterehia ra e Satani i te haamouhia. No reira, te haavarehia nei te feia e tuu nei i to ratou tiaturiraa i roto i te ao nei. Mea hinaaro na ratou e faaroo i te parau mau no nia i te mau ohipa e tupu mai i mua nei i roto i te ao e no nia i te mea e mono mai ia ˈna. — Maseli 14:12; 19:21; Mataio 6:9, 10; Apokalupo 21:4, 5.
19. Mea nafea te here ta vetahi mau melo o te upoo faatere haapaoraa no te ao i faaite-tahaa-hia aita i maoro aˈenei?
19 Aita i maoro roa, ua faaite tahaa te mau ravea haapurororaa parau apî i te haerea viivii o te tahi mau melo o te upoo faatere haapaoraa, ei hiˈoraa te huru oraraa tia ore e te taoˈa rahi a vetahi feia poro i roto i te afata teata. Ua papai te hoê taata i te hoê himene, oia hoi te upoo parau e “E tamau anei o Iesu i roto i te afata teata i te hoê [uati] Rolex [e 10 000 dala marite]?” Te parau nei taua himene ra i muri iho e: “Mai te peu e e hoˈi faahou mai oia i nia i te fenua nei, e faaô anei Iesu ia ˈna i roto i te politita, e nohoraa iti anei ta ˈna i Palm Springs [te hoê oire moni] e e imi anei oia i te ravea no te faatapuni i ta ˈna taoˈa rahi?” Hau atu, te rahi noa ˈtura te mau ekalesiatiko aita e faahapa nei i te ohipa mahu, a rave roa ˈi hoi ratou i te reira; e i teie nei tau i te fenua Marite, te aufau nei te Ekalesia katolika te tahi tau mirioni dala marite i te mau utuafare tei hamani-ino-hia ta ratou mau tamarii i te pae taatiraa e te mau perepitero. — Roma 1:24-27; Korinetia 1, 6:9, 10.
20. No te aha e tia ˈi te mau tavini a te Atua ia tamau â i te faaite i te haerea ino o te taata paieti ore?
20 Area te mau tavini a te Atua, eita ratou e nehenehe e tapo noa i to ratou mata i nia i te haerea ino o taua mau taata ra; e tia ia ratou ia faaite i te reira no te maitai o vetahi ê. Oia mau, e tia ia paruruhia te feia rahi roa o te mau mamoe ê atu i te feia e tamata nei i te turai ia ratou ia patoi i te mau ture a te Atua. Area te feia e “autâ noa e [e] pii hua [ra], i te mau parau faufau atoa i ravehia i roto ra”, e tia i te mau kerisetiano mau ia paimi e ia haaputuputu ia ratou ia fanaˈo ratou i te aratairaa paruru a te Tiai mamoe rahi, o te Atua ra o Iehova, e o “te tiai mamoe maitai”, oia hoi o Iesu Mesia. — Ezekiela 9:4; Ioane 10:11; Maseli 18:10.
21. Eaha te poroi ta te mau Ite no Iehova e tamau â i te poro?
21 No reira, aita te mau tavini a te Atua e haamarirau nei i te faaite e e faatupu Oia i to ˈna riri i nia i te ao a Satani atoa, oia atoa i nia i te taata paieti ore, te upoo faatere haapaoraa o te amuiraa faaroo kerisetiano. Te faaite nei ratou ma te puai i te poroi a te melahi tei faahitihia i roto i te Apokalupo 14:7: “A mǎtaˈu i te Atua, e faahanahana ˈtu ia ˈna; ua tae hoi i te hora faautuaraa na ˈna ra.” Aita e aramoinahia e ratou, i roto i ta ratou faaiteraa, te faaararaa ru i faahitihia i roto i te Apokalupo 18:4, no nia i te haapaoraa hape: “A haere ê mai na outou i rapae, e au mau taata e, ia ore outou ia riro ei rave atoa i ta ˈna ra mau hara, (...) ia pohe atoa i to ˈna ra mau pohe.”
Mau uiraa no te faahaamanaˈoraa
◻ Eaha te faahopearaa o te taata paieti ore, e no te aha?
◻ Eaha te tia i te mau tavini a Iehova ia rave no vetahi ê?
◻ No te aha te mau tavini a Iehova i ore ai i viivii i te toto o te mau taata atoa?
◻ Eaha te tia ia tatou ia rave no nia ia Babulonia Rahi?
◻ No te aha e tamau â tatou i te poro i te hoê poroi puai mau no nia i te taata paieti ore?
[Hohoˈa i te api 16]
Ua parau te mau aposetolo i mua i te hoê haavaraa rahi: “O te Atua ta matou e faaroo e tia ˈi eiaha te taata.”
[Hohoˈa i te api 17]
Mea hinaaro mau na te feia aau rotahi ia ite eaha te mau ohipa e tupu i mua no te ao nei e no te mau haapaoraa.