Ia haapii na tatou i te parau huna moˈa o te paieti
“I pohe atoa hoi te Mesia iho no outou; e ua vaiiho hoi i te haapaoraa na outou, ia pee outou i to ˈna taahiraa avae.” — PETERO 1, 2:21.
1. Eaha ta Iehova i hinaaro ia au i te ‘parau huna moˈa o te paieti ra’?
E ERE faahou te “parau moe rahi to te paieti” i te hoê parau itea-ore-hia (Timoteo 1, 3:16). Auê hoi taa-ê-raa e te mau miterio o te haapaoraa hape, mai te Toru Tahi, o te vai noa mai mai te mau ohipa taa-ore-hia! Aita hoê aˈe taata e nehenehe e taa i te reira. Area, ua haapao o Iehova e ia horoahia i te parau huna moˈa i itehia i nia ia Iesu Mesia, i te faaiteiteraa rahi roa ˈˈe. Ua riro o Iesu iho, na roto i to ˈna itoito i roto i te pororaa i te Basileia o te Atua, ei hiˈoraa faahiahia mau. Mai ta tatou e hiˈopoa i teie nei, e nehenehe tatou e huti e rave rahi mau haapiiraa no nia i te poroi e no nia i te huru o ta ˈna pororaa.
2. No te aha te taviniraa a Iesu i tuuhia ˈi i nia aˈe i te hoo (Mataio 20:28)?
2 Ia hoˈi mai na tatou i nia i te tuhaa matamua: Iesu, o tei “itea mai i roto i te taata nei”. (Timoteo 1, 3:16.) I roto i te Mataio 20:28, te taio nei tatou e “aita (...) [Iesu] i haere mai ia tavinihia to ˈna, ei tavini râ, e ia horoa i to ˈna ora ei hoo no te taata e rave rahi”. Na te reira ohipa e tuu ra i ta ˈna taviniraa i nia ˈˈe i te hoo. No te aha hoi te reira? No te mea i Edene, ua patoi te hoê taata haavarevare, te Ophi, i te tiaraa o te mana arii teitei o Iehova i nia i te huitaata nei, e ua faatiaturi oia e mea ino te poieteraa a te Atua e aita hoê aˈe taata, i roto i te faahemaraa, e nehenehe e tapea i to ˈna haapao maitai i te Atua Teitei (Ioba 1:6-12; 2:1-10). Ua faaite te taviniraa hapa ore a Iesu, taata tia e te “Adamu hopea”, e e taata haavare mau te taata patoi ra o Satani (Korinetia 1, 15:45). Hau atu, ua haapapu o Iesu ma te hanahana e e mau huru atoa to ˈna no te riro mai, i roto i te rima o te Atua, ei “[Tumu matamua] e ei Ora”, te taata tei tia ia “haava mai (...) i to te ao atoa nei ma te parau-tia”, ia farii-faahou-hia te mana arii o Iehova. — Ohipa 5:31; 17:31.
3. Eaha ta Iesu i rave no te pahono taatoa atu i te patoiraa i horoahia e Satani?
3 Ua patoi taatoa o Iesu i te faahaparaa ino mau a Satani. I roto i te taatoaraa o te Aamu, aita hoê aˈe taata i tavini i te Atua e te hoê paieti rahi mai te reira te huru, e te reira noa ˈtu te mau haamauiuiraa i te pae tino e i te pae feruriraa, te mau ruturaa e te mau faaoooraa. No te mea e o o ˈna te Tamaiti a te Atua, ua faaoromai te Mesia i te haama e te mau faainoraa. I roto i taua mau ati atoa ra, e oia atoa i mua i te hoê pohe ino e te haama hoi, ua vai aueue ore noa oia i roto i to ˈna haapao maitai i to ˈna Metua. I roto i te Philipi 2:8, 9, ua papai o Paulo e, no te mea ua faaite o Iesu i to ˈna haapao-maite-raa ‘e tae noa ˈtura i te pohe i te pohe satauro ra. I faateitei roa ˈtu ai te Atua ia ˈna, e ua horoa hoi i te iˈoa i hau ê roa i te mau iˈoa atoa nei no ˈna’. Ua faaite o Iesu e e taata haavare ino mau o Satani.
4. No te aha Iesu i nehenehe ai e parau ia Pilato e ua haere mai oia i roto i te ao nei no te faaite i te parau mau?
4 No reira, i muri noa i te tahi tau matahiti pororaa puai mau, ua nehenehe atura ïa Iesu e parau ma te itoito i mua ia Ponotio Pilato e: “Te parau maira oe e e Arii au. I fanau mai ai au, e i haere mai ai hoi au i te ao nei, e faaite i te parau mau. No te parau mau oia ra, e faaroo ïa i tau reo.” (Ioane 18:37). Na roto i te hoê paieti faaau ore, ua poro Iesu i te parau mau o te Basileia o te Atua i roto ia Palesetina atoa. Ua haapii oia i ta ˈna mau pǐpǐ ia nehenehe atoa ratou ia riro mai ei mau taata poro itoito mau. Aita anei to ˈna hiˈoraa e turai nei ia tatou ia pee atoa i to ˈna mau taahiraa avae?
Ia vaiiho na tatou e ia haapiihia tatou e to tatou Hiˈoraa
5. Eaha ta tatou e nehenehe e haapii no nia i te paieti ma te tiatonu i to tatou mata i nia ia Iesu?
5 Mai te peu e e faatupu tatou ma te paieti i te hinaaro o Iehova, e nehenehe atoa ta tatou e haapapu e e haavare mau te Diabolo. Noa ˈtu eaha to tatou mau ati, eita roa ˈtu ïa e nehenehe e faaauhia i te mau mauiui e te mau faainoraa ta Iesu i faaoromai. Ia vaiiho na ïa tatou e ia haapiihia tatou e te Taata tei riro ei Hiˈoraa no tatou. I roto i te Hebera 12:1, 2, te faaitoitohia nei tatou ia horo ma te faaoromai “ma te tiatonu maite to tatou mata ia Iesu, i te tumu e te faaoti i to tatou faaroo”. Taa ê atu ia Adamu, e ua tamatahia hoi to ˈna paieti e aita oia i upootia, o Iesu anaˈe te taata hoê roa i nia i te fenua nei tei tapea i to ˈna haapao maitai ma te tia i roto i te mau ati atoa. Ua haapapu oia tae roa ˈtu i te pohe e o o ˈna “o tei maitai roa ra, e te rave ore i te ino, e te viivii ore, e te taa ê hoi i te feia rave hara ra”. (Hebera 7:26.) A roaa ˈi ia ˈna i te hoê haapao maitai aueue ore, ua nehenehe atura ïa o ˈna e parau i ta ˈna mau enemi e: “O vai to outou e faaite i ta ˈu haavare?” Ua pahono oia i te faahitiraa i horoahia e Satani, ma te parau e: “Te arii o teie nei ao, aore râ a ˈna i roto ia ˈu nei.” E, ma te faaoti i te oreroraa parau hopea ta ˈna i faatae atu i ta ˈna mau pǐpǐ hou oia i haavarehia ˈi e i tapeahia ˈi, ua parau oia e: “E faaitoito râ, ua riro te re o teie nei ao ia ˈu.” — Ioane 8:46; 14:30; 16:33.
6. a) No te aha ua ite o Iesu e eaha te tamahanahanaraa e hinaarohia ra e te mau taata? b) Ua tae roa i teihea faito te mǎtaˈu o te paieti a Iesu?
6 A vai ai oia i nia i te fenua nei i roto i te hoê tino taata, “ua faahaehaa[hia oia] i raro iti aˈe i te mau melahi ra”, ua tamata o Iesu i te oraraa taata nei (Hebera 2:7). Ua haapii o ˈna i te ite i te mau paruparu o te taata; no reira, ua nehenehe atura ïa o ˈna e riro mai ei Arii e ei Haava no te huitaata no na tausani matahiti. Taua Tamaiti a te Atua ra, o tei parau e: “E haere mai outou ia ˈu nei, e te feia atoa i haˈa rahi, e tei teiaha i te hopoia, e na ˈu outou e faaora”, ua ite oia e eaha te tamahanahanaraa e hinaarohia e te mau taata (Mataio 11:28). Te parau nei Hebera 5:7-9 e: “Ua pûpû hoi oia i te pure i tana oraraa ra, i te aniraa ˈtu ia ˈna ma te oto rahi e te roimata, i tei tia ia faaora ia ˈna mai te pohe maira, ei faaroohia oia i ta ˈna i mǎtaˈu ra: e tamaiti noâ iho hoi oia, i ite oia i te auraro i to ˈna ra mau pohe. E no te mea ua haamoˈa-roa-hia [no nia i te faarooraa] oia, riro atura oia ei tumu no te ora mure ore no te feia atoa e faaroo ia ˈna ra.” Ua faaoromai o Iesu e tae roa i te taime a ite ai oia i te pohe taata nei, ma te ite atu i te hoê ‘haaparuparuraa i te poro avae’ i horoahia e te Ophi ino; noa ˈtu te reira, aita oia i topa (Genese 3:15). Mai te hiˈoraa o Iesu, ia ô roa mai te hoê mǎtaˈu paieti i roto ia tatou, tae noa ˈtu i te pohe mai te peu e e tapae roa i reira, ma te tiaturi e e faaroo mai te Atua ra o Iehova i ta tatou mau pure e e horoa mai oia i te ora no tatou.
Ua ora oia ‘no te parau-tia’
7. Ia au i te Petero 1, 2:21-24, eaha te hiˈoraa ta Iesu i vaiiho mai no tatou, e eaha te mana ta to ˈna haerea e tia ia faatupu i nia ia tatou?
7 I te mea e, ua iteahia oia i roto i te taata nei, ua faaite o Iesu i to ˈna haapao maitai ma te faaite i te parau huna moˈa o te paieti. Te taio nei tatou i roto i te Petero 1, 2:21-24 e: “I pohe atoa hoi te Mesia iho no outou; e ua vaiiho hoi i te haapaoraa na outou, ia pee outou i to ˈna taahiraa avae: o tei ore roa i rave i te hara, e aore roa e haavare i itea i to ˈna vaha: o tei ore i faaino atu, ia faainohia mai oia; e ia pohe oia ra, aore oia i parau tahoo atu; ua pûpû râ ia ˈna iho ia ˈna no ˈna te manaˈo tia ra: o tei maraa hoi ia ˈna iho ta tatou hara i to ˈna iho tino i nia i te satauro, ia haapao tatou, o tei matara mai i te hara ra, i te parau-tia: no to ˈna hoi iravarava i ora ˈi outou.” Ia feruri na tatou i nia i te haerea o Iesu, e e faaitoito rahi te reira ia tatou ia atuatu i te paieti, e ia faaite i te haapao maitai e ia ora, mai ta ˈna iho i ora, no te parau-tia.
8. Mea nafea, ia au i te hiˈoraa o Iesu, e nehenehe ai tatou e ora no te parau-tia?
8 Ua ora mau o Iesu no te parau-tia. Te itehia ra i roto i te Salamo 45:7 teie parau tohu no nia ia ˈna: “I hinaaro oe i te parau-tia, e te riaria ra oe i te ino.” Ma te faatuati i taua mau parau ra i nia ia Iesu, te parau nei te aposetolo Paulo i roto i te Hebera 1:9 e: “I hinaaro na oe i te parau-tia, e i faufau na oe i te parau ino.” Ia au i to tatou ite no nia i te parau huna moˈa o taua paieti ra, ia nehenehe na tatou, ia au i te hiˈoraa o Iesu, ia tamau noa i te here i te mea tia e ia riri i te mea ino! No nia i te tuhaa i te pae morare kerisetiano, tei rave-ino-hia i teie mahana e te ao a Satani, aore ra i roto i ta tatou mau taairaa e rave rahi e to tatou mau taata-tupu, i roto mai e i rapae mai i te faanahonahoraa a te Atua, ia tutava na tatou i te ora no te parau-tia ma te paruru i te mau faaueraa tumu teitei a Iehova. Hau atu, ia nehenehe na tatou e au noa i te Parau a te Atua, ia roaa ia tatou i te aravihi a te Atua o te faaitoito ia tatou ia patoi atu i te Diabolo e i ta ˈna mau raveraa!
9. Eaha ˈtu â te mea i turai ia Iesu ia vai itoito noa i roto i ta ˈna taviniraa, e eaha te tia mau â ia rave no nia i te mau tiai mamoe haavare i te pae faaroo?
9 Te vai atoa ra te tahi atu mea o tei turai ia Iesu ia vai itoito noa i roto i ta ˈna taviniraa. Eaha ïa ohipa? Te taio nei tatou i roto i te Mataio 9:36 e: “E ia hiˈo aˈera oia i te rahi o te taata, aroha ˈtura oia ia ratou, no te mea, ua purara ratou e ua faarue-taue-hia, mai te mamoe tiai ore ra.” No reira, ua “haapii atura [o Iesu] ia ratou i te parau e rave rahi”. (Mareko 6:34.) No te na reira, e tia ia faaite i te ohipa ino e te paieti ore a te mau tiai mamoe haavare i te pae faaroo. Teie râ ta Iesu i parau no nia ia vetahi o ratou, ia au i te Mataio 15:7-9 e: “E te mau haavare e, te au maite na outou i ta Isaia i parau ia outou na, a na ô ai ra, Te ati mai nei teie nei feia ia ˈu i to ratou vaha, e te faatura mai nei ia ˈu i to ratou utu; tei te atea ê râ to ratou aau ia ˈu. E mea faufaa ore râ ta ratou e pure ia ˈu nei, a haapii ai i tei tuuhia mai e te taata anaˈe ra.”
Te hoê parau huna ino mau
10. I teie nei mahana, e tano te parau no te “ino moe ra” i nia i teihea pǔpǔ taata, e ua faahapahia taua pǔpǔ ra i te aha?
10 Mai to Iesu patoiraa i te mau upoo faatere haapaoraa o to ˈna ra tau, oia atoa i teie mahana, te peapea nei tatou i te vairaa o te hoê miterio tei taa ê roa i te parau huna moˈa o te paieti. I roto i te Tesalonia 2, 2:7, te pii nei o Paulo i te reira, te “ino moe ra”. I te senekele I, o te hoê ïa miterio, no te mea e faaite-noa-hia oia i muri roa iho i te poheraa o te mau aposetolo. I teie nei mahana, ua tano te reira i te pǔpǔ faatere o te amuiraa faaroo kerisetiano, o te anaanatae rahi nei i te politita maoti hoi i te pororaa o te parau apî maitai o te Basileia tia a te Atua. E itehia i rotopu ia ˈna te haavare. Ua riro te feia poro no te mau pǔpǔ iti porotetani o te faaite nei ia ratou na roto i te afata teata ei hiˈoraa hairiiri mau. E mau taata haavare ratou o te eiâ na roto i te horoaraa i te tute rahi i te feia e turu ra ia ratou, te haamau nei i te tahi faatereraa mai to te feia ona mirioni, te taai nei ratou e te mau vahine faaturi, te hamanii nei i te mau roimata haavarevare ia itehia ta ratou hape i rave e te tamau nei ratou i te taparû i te moni, ia rahi noa mai ta ratou moni. Te pûpû nei te Vaticana i te hoê hohoˈa mai te reira atoa te huru, ia hiˈohia to ˈna mau auraa i te pae politita haama ore, te faaiteiteraa i ta ˈna taoˈa moni ma te teoteo e ta ˈna mau ohipa eiâ i te pae no te moni.
11. Eaha te mea e tupu i nia i te upoo faatere o te amuiraa faaroo kerisetiano e i nia ia Babulonia Rahi i roto i to ˈna taatoaraa?
11 E ere atura i te mea maere i te haapapuraahia e o te pǔpǔ faatere o te amuiraa faaroo kerisetiano te “taata [paieti ore ra]”. (Tesalonia 2, 2:3.) E ite-maitai-hia e e haamou-roa-hia taua tuhaa faatere o te vahine faaturi ra o Babulonia Rahi, e oia atoa te toea o te haapaoraa hape. Ia au i ta tatou e taio i roto i te Apokalupo 18:9-17, e parau ïa te feia faatere e te feia hoo taoˈa (oia atoa te feia e haapao i te moni) ma te taˈi e: “Auê te oire rahi.” E tatara-roa-hia te ahu o Babulonia Rahi e ta ˈna mau miterio; e itehia te hoê taa-ê-raa papu maitai e te parau huna moˈa o te paieti e te mea e faahanahana nei ia ˈna.
12. Eaha ta Iesu i rave no to ˈna here i te parau-tia?
12 Ua turai te here no te parau-tia e te riaria i te faainoraa i te ture, ia Iesu, ia aro papu atu no te turu i te haamoriraa mau. Te taime matamua oia i haere ai i Ierusalema na nia i to ˈna tiaraa Tamaiti na te Atua, tei faatavaihia, ua tiahi oia i rapae i te hiero i te feia hoo e te feia taui moni, ma te parau e: “E hopoi ê atu i tena na mau mea: eiaha e faariro i te fare o tau Metua ei fare hooraa taoˈa.” (Ioane 2:13-17). I muri aˈe, ma te haere faahou i roto i te hiero, ua parau Iesu i te mau ati Iuda o tei patoi ia ˈna e: “O te diabolo to outou na metua, i faatia ˈi â outou i te hinaaro o to outou metua ra: e taparahi taata oia mai te matamua mai â: aore oia i haapao i te parau mau, no te mea aore e parau mau i roto ia ˈna. Ia parau oia i te parau haavare ra, ua parau ïa i te parau au ia ˈna ihora, e haavare oia, e e metua hoi no te haavare.” (Ioane 8:44). E ere anei i te mea itoito i to Iesu parauraa ˈtu i mua i taua mau taata manaˈo etaeta i te pae faaroo e e feia haavare ratou e e mau tamarii a te Diabolo ratou?
13. a) I hea roa i faataa-maitai-hia ˈi te riri o Iesu no te faatura-ore-raa i te ture? b) No te aha mea tano iho â e ia faautuahia te upoo faatere taiva o to tatou nei tau i te hoê haavaraa mai ta Iesu i faahiti no te mau papai parau e no te mau Pharisea?
13 Aita i faataa-maitai-aˈe-hia te riri o Iesu no te faatura-ore-raa i te ture mai ta te Mataio pene 23 e faataa ra, i reira oia e faautua etaeta ai i te mau papai parau e te mau Pharisea, ma te parau e e mau huaai a te ophi ratou. I roto i taua pene ra, te faahiti nei oia i te parau ra “auê [hoi] outou [e]” e hitu taime e te faaau nei oia i taua mau upoo faatere haapaoraa i te mau “vairaa tupapau i faateateahia”, ma te parau faahou e ua ‘î roa ratou i te mea faufau, te haavare e te ino’. Te hinaaro mau nei o Iesu e faaora i te feia i faatîtîhia i raro aˈe i taua faatura-ore-raa i te ture ra. Ua tuô oia e: “Atae hoi oe, e Ierusalema e, e Ierusalema! (...) e rave rahi to ˈu haaputuraa i to tamarii, mai te moa e haaputu i to ˈna fanauˈa i raro aˈe i to ˈna pererau ra; aita râ i tia ia outou. Ei teie nei, to outou utuafare e tuuhia ˈi i te ano.” (Irava 37, 38). Ua tano maitai te hoê faautuaraa mai te reira te huru no te upoo faatere haapaoraa no to tatou nei tau, e ua ite-maitai-hia to ˈna faatura-ore-raa i te ture. Oia mau, ia au i ta tatou e nehenehe e taio i roto i te Tesalonia 2, 2:12, ‘aore oia i faaroo i te parau mau, o tei navenave i te parau-tia ore ra.’ Ua taa ê roa ïa to ˈna faatura-ore-raa i te ture i te paieti ta Iesu i faatupu ma te haapao maitai a vai ai oia i nia i te fenua nei.
Ia parau anaˈe na tatou i te mau haavaraa a te Atua
14. I te mea e te haafaufaa rahi nei tatou i te parau huna moˈa o te paieti, e turai ïa te reira ia tatou ia aha?
14 Te faufaa rahi ta tatou e horoa ra no te parau huna moˈa o te paieti, e tia te reira ia turai ia tatou ia tamau â i te pee maite i te mau taahiraa avae o Iesu. Mai ia ˈna, e tia ia tatou ia poro ma te itoito i te mea ta Isaia 61:2 e faataa ra mai “te matahiti hinaarohia e Iehova; e te mahana tahooraa na to tatou Atua.” Hau atu, ia nehenehe noa na tatou e apiti atu ma te itoito no te “haamahanahana i te feia i mihi ra”! Mai te tau atoa o Iesu, e tia ia roaa i te itoito i to tatou nei tau no te faaite i te mau haavaraa a Iehova, e oia atoa te mau poroi puai mau e vai ra i roto i Te Pare Tiairaa, o te faaite hua ra i te mau parau, e Te Apokalupo: ua fatata roa to ˈna tatararaa rahi hopea nei! (farani). E tia ia tatou ia poro ma te aravihi e te haapao maitai, e ia roaa te hoê parau “rapaauhia i te miti ra”, ta te mau hoa o te parau-tia e au ra (Kolosa 4:6). Ia huti na tatou i te haapiiraa i te hiˈoraa o te paieti i vaiihohia e Iesu; e, i te tau mau ra, e nehenehe tatou e faaite e ua oti ia tatou te ohipa ta Iehova i horoa mai ia tatou ra! — Mataio 24:14; Ioane 17:4.
15. Eaha te ohipa i tupu mai te matahiti 1914 no nia i te parau huna moˈa a te Atua?
15 I iteahia i roto i te taata nei, ua riro o Iesu ei hiˈoraa faahiahia mau. Aita e feaaraa e ua tupu mau te parau huna moˈa o te paeiti ia ˈna ra. Ma te itoito, ua faahanahana oia i te iˈoa o Iehova, e ua haamauruuru to ˈna Metua tane i to ˈna haapao maitai na roto i te hoê huru faahiahia mau. Teie râ, aita te parau huna moˈa a te Atua i vai noa i reira. Mai te matahiti 1914 mai â, te ora nei tatou i “te mahana o te Fatu ra”. (Apokalupo 1:10.) Mai ta te Apokalupo 10:7 e haapapu ra, o te tau ïa ‘e tupu faaoti roa te parau aro a te Atua i ta ˈna i faaite mai, ia au i te parau apî maitai’. Ua poro te mau reo no nia i te raˈi e: “O te basileia ra o teie nei ao ua riro ei basileia no to tatou Fatu e no ta ˈna ra Mesia, e e vai ïa te hau ia ˈna e a muri noa ˈtu.” (Apokalupo 11:15). Ua haaparahi o Iehova i te Arii mesia o Iesu Mesia i nia i to ˈna terono hanahana no te faatere e o ˈna atoa.
16. No te aha e nehenehe ai e parau e ua faaite oioi te Arii tei faakorona-apî-hia, o Iesu Mesia, e te hinaaro nei oia e ia faaohipahia te paieti i nia i te raˈi?
16 No te mea e te faatere ra o ˈna e te Atua i roto i te Basileia i faaineine-apî-hia, ua pii-atoa-hia o Iesu Mesia o Mihaela (oia hoi te auraa “Mai te Atua ra te huru?”). Aita roa ˈtu te hoê enemi a Iehova e nehenehe e riro mai te Atua, ta te Arii hoi i haapapu, i te taime iho â i faaariihia ˈi oia, ma te huri i nia i te fenua nei te Ophi matamua, o Satani, e ta ˈna mau melahi (Apokalupo 12:7-9). Oia mau, mai ta ˈna atoa i faaohipa i te paieti i roto i te roaraa o to ˈna oraraa i nia i te fenua nei, te rave atoa ra o Iesu e ia faaohipahia te paieti i nia i te raˈi. Eita o Iesu Mesia, tei faahanahanahia i teie nei, e faaea i te haa hou te taime oia e faaore roa ˈi i te haapaoraa hape e oia atoa te toea o te faanahonahoraa itehia e itea-ore-hia a Satani.
17. Eaha te ohipa e tupu ra mai te matahiti 1914 o te faatupu i te Mataio 25:31-33?
17 Mai te matahiti 1914, ua haamaramarama te tupuraa o te parau tohu a Iesu tei faahitihia i roto i te Mataio 25:31-33 i te hoê maramarama hanahana mau i te parau huna moˈa a te Atua. Te parau nei Iesu i ǒ nei e: “Ia tae maira te Tamaiti a te taata ma ta ˈna hanahana, e te mau melahi moˈa atoa ra, ei reira oia e parahi ai i nia iho i to ˈna terono hanahana; e e haaputuhia to te mau fenua atoa i mua i to ˈna aro: e na ˈna e faataa ia ratou mai te tiai mamoe e faataa i te mamoe i te puaaniho ra: e e tuu oia i te mamoe i tana rima atau, e te puaaniho i te rima aui.” Mai to ˈna tiaraa papu i roto i te mau raˈi, e hopoi mai taua Arii hanahana ra, te Haava e te Paruru o te paieti, i te tahooraa, na mua roa i nia i te taata e faatura ore ra i te ture e i nia i te tahi atu mau tuhaa o Babulonia Rahi, e i muri iho i nia i te toea o te faanahonahoraa ino a Satani i nia i te fenua e oia atoa i nia i te mau “puaaniho”, e turu ra ia ˈna. E hurihia ˈtu ai o Satani i roto i te abuso (Apokalupo 20:1-3). Area te “feia parau-tia”, te mau “mamoe”, e roaa ïa ia ratou te ora mure ore (Mataio 25:46). Ia nehenehe na tatou e imi i te paieti e ia itehia tatou i rotopu i taua mau taata tia ra!
18. Ia au i te parau huna moˈa o te paieti, eaha te haamaitairaa oaoa roa no tatou nei?
18 Te faaitoito nei te Apokalupo 19:10 ia tatou ia ‘haamori i te Atua’. No te aha hoi? Te parau ra te irava i muri iho e: “O te parau hoi ia Iesu ra, o te varua ïa o te tohu.” E rave rahi o te mau parau tohu i faauruahia i te tau tahito teie e faaite ra ia Iesu! I te mea e ua tupu taua mau parau tohu ra, ua maramarama roa ïa te parau huna moˈa a te Atua. No reira, te oaoa nei tatou ia ite e o Iesu te parau huna moˈa o taua paieti ra. E haamaitairaa rahi te reira no tatou, te mau afai parau o te Basileia o te Atua, i te peeraa ma te haehaa i to ˈna mau taahiraa avae. Oia, ua riro ei hanahana rahi i te taaraa e i te faaiteraa, i roto i to ˈna taatoaraa, i te parau huna moˈa a te Atua ia au i te parau apî maitai.
Eaha ta outou e pahono atu?
◻ Eaha te mau haapiiraa ta tatou e nehenehe e huti mai no nia i te hiˈoraa o te paieti i vaiihohia mai e Iesu?
◻ Nafea, ia au i te hiˈoraa o Iesu, tatou e nehenehe ai e ora no te parau-tia?
◻ Eaha te parau huna hairiiri mau teie e horoa nei i te hoê taa-ê-raa papu maitai e te parau huna moˈa o te paieti?
◻ I te mea e te haafaufaa rahi nei tatou i te parau huna moˈa o te paieti, e turai ïa te reira ia tatou ia aha?
[Hohoˈa i te api 25]
No te mea e ua riro oia ei paruru no te paieti e ei taata poro itoito no te Basileia, ua nehenehe Iesu e parau ia Pilato e: “I fanau mai ai au, e i haere mai ai hoi au i te ao nei, e faaite i te parau mau.”
[Hohoˈa i te api 27]
Ua ite-maitai-hia te paieti o Iesu a faahapa ˈi oia i te mau papai parau e te mau Pharisea.