Ua faaitehia te hoê parau huna moˈa

“Ua tia paatoa hoi e, e parau moe [huna moˈa] rahi to te paieti nei.” — TIMOTEO 1, 3:16.

1. Eaha te parau huna tei itehia i roto i te Timoteo 1, 3:16?

TE HAAPEAPEA ra anei outou no te mau ohipa maere? Mea au anei na outou, mai te rahiraa o te mau taata, i te imi atu i te mau parau huna? Mai te peu e mai te reira, a haere mai e o matou, no te mea e faahohonu tatou i te hoê o te mau parau huna rahi roa ˈˈe, te hoê parau huna e vai ra i roto i te Parau a te Atua a hia tausani matahiti i teie nei. E faaohipa taua parau huna moˈa ra i te hoê mana faufaa i nia iho i to tatou oraraa, no teie nei e no a muri atu. O te ‘parau aro [huna moˈa] no te paieti’, tei faahitihia i roto i te Timoteo 1, 3:16. Auê hoi tatou i te mauruuru ia Iehova, “o [T]ei faaite mai ïa i te parau moe [huna]”, o tei faaite mai ia tatou, na roto i to ˈna maitai, i taua parau huna faahiahia mau e oia atoa i to ˈna tatararaa! — Daniela 2:28, 29.

2. a) Eaha te taime matamua to Iehova parauraa no nia i te hoê parau huna moˈa, e eaha ta ˈna i tǎpǔ i taua taime ra? b) Eaha te mau uiraa te tia ia horoahia te hoê pahonoraa?

² Ua parau Iehova no te taime matamua no te hoê parau huna i muri aˈe to te Ophi haavareraa ia Eva e to Adamu peeraa ˈtu i ta ˈna vahine i roto i te patoiraa. Ua tǎpǔ aˈera o Iehova e e faararerare te “huaai”, aore ra te tamarii no muri mai, i te upoo o te Ophi (Genese 3:15). O vai taua Huaai ra? Nafea oia e upootia ˈi i nia i te Ophi? E haapapu anei oia e e parau mau ta te Atua e e faatia anei oia i ta ˈna opuaraa no te fenua nei?

3. Eaha te haapapuraa ta te mau parau tohu a te Atua i horoa no nia i te huru mau o te Huaai e no nia i te ohipa ta ˈna e faatupu?

³ I roto i te roaraa o te tau, ua horoa mai te mau parau tohu no ǒ mai i te Atua ra i te tahi mau haapapuraa no nia i te huru o te Huaai e no nia i te ohipa ta ˈna e faatupu: E na roto mai oia ia Aberahama, e horoahia ˈtu te basileia o Davida na ˈna e e piihia oia Tamaiti huiarii no te hau. ‘E te tupuraa o to ˈna mana i te rahi e to ˈna hau, aore ïa e hopea.’ (Isaia 9:6, 7; Genese 22:15-18; Salamo 89:35-37). Teie nei râ, mai ta te Roma 16:25 e parau ra “[ua] hunahia [teie parau huna moˈa] i te mau ui atoa mai tahito mai”.

Ua itehia te ohipa maere mau

4. Nafea, i te matahiti 29 o to tatou nei tau, te parau huna moˈa i haamatahia ˈi i te faaitehia?

⁴ I te pae hopea, e maha tausani matahiti i muri aˈe, ua faura mai te maramarama! Mea nafea ïa? I te matahiti 29 o to tatou nei tau, ua bapetizohia Iesu no Nazareta e Ioane i roto i te Ioridana, e ua faaroohia aˈera te reo o te Atua mai te raˈi mai, ma te parau e: “Tau Tamaiti here teie, ua mauruuru roa vau ia ˈna.” (Mat. 3:17). A tahi ra te Huaai tei tǎpǔhia i fa mai ai! Te haamatahia ra te parau huna moˈa i te faaitehia i roto i te hanahana atoa o ta ˈna mau huru taa ê atoa, i roto atoa e itehia ˈi te paieti.

5. Eaha te “paieti”, e eaha te mana ta ˈna e faatupu ra i nia i te feia e faaohipa ra i te reira?

⁵ Eaha ïa te auraa o te parau ra “paieti”? I roto i te mau Papai heleni kerisetiano, e itehia taua parau ra e 20 noa taime — e ua hau atu te afaraa i roto i na rata e piti a Paulo ia Timoteo. Te horoa nei te buka ra Tauturu no te hoê taa-maitai-raa i te Bibilia (farani) i te auraa o te “paieti” mai te “huru o te taata e haamoˈa ra, e haamori ra e e tavini ra i te Atua ma te faaite i te haapao maitai no to ˈna mana arii i roto i te ao nei”. No roto mai te haamoˈaraa i te hoê mafatu o te haafatata ˈtu i te Atua e te hoê faatura hohonu no to ˈna hanahana, no to ˈna huru mure ore e no te rahi o ta ˈna mau ohipa faahiahia; e oia atoa no te haamauruururaa ˈtu no te mau ô i te pae varua e i te pae materia e rave rahi ta ˈna e horoa nei no te mau taata e faaite ra i to ratou mauruuru. Oia mau, te feia atoa i rotopu ia tatou o te faaohipa ra i te paieti, e nehenehe ïa ratou e parau mai te taata papai salamo e: “E haamaitai ia Iehova, e tau varua! e tau Atua, e Iehova, oe tei rahi roa! ua vehîhia oe i te hanahana e te mana!” — Salamo 104:1.

6. a) I roto i teihea tuhaa te feia e haamori ra ia Iehova e taa ê ai i te mau melo o te amuiraa faaroo kerisetiano? b) Eaha ta Paulo i faaite i roto i te Roma 11:33, 34, e eaha te uiraa ta te reira e faatupu mai?

⁶ E tia ia faaite i to tatou ati-maite-raa ˈtu e te Atua na roto i te mau ohipa. No taua tumu ra, mea taa ê roa ïa te feia e haamori nei i te Atua mau ra, o Iehova, i te mau taata e parahi ra i roto i te mau fare pure, e vai ano noa ra, o te amuiraa faaroo kerisetiano. No e rave rahi mau taata, o te hoê hohoˈa noa te haapaoraa, mai te peu e e haapaoraa ta ratou; o te hoê ïa pereue ta ratou e tuu nei no te riro ei taata hanahana, area to ratou oraraa ra, te pee nei ïa i teie ao viivii e haaati ra ia ratou. Aita hoi ratou i ite e o vai mau te Atua. E tia paha i taua mau taata ra ia hiˈopoa i te mau parau ta Paulo i faatae atu i te feia no Ateno, o tei haamori i te hoê “atua [itea-ore-hia]”: “O ta outou hoi e haamori noa nei ma te ite ore ia ˈna, oia ta ˈu e parau atu ia outou nei.” (Ohipa 17:23). Teie ta Paulo e parau ra i roto i te Roma 11:33, 34 no nia i taua Atua faahiahia mau ra: “Auê te rahi hau ê atu o te paari e te ite o te Atua e! e te imiraa ore o tana faaauraa, e tana mau haerea i te itea ore ia imi e! O vai hoi tei ite i te aau o te Fatu? e o vai to ˈna aˈo atu?” Nafea ïa e nehenehe atu ai e ite i te mau haerea o te Atua? Ma te haapii i ‘te parau huna moˈa o te paieti’. Nafea ïa?

7. No te aha e nehenehe ai e parau e: “Ua tia paatoa hoi e, e parau moe rahi to te paieti nei”?

⁷ E hiˈopoa anaˈe na tatou i te Timoteo 1, pene 3. Te haamata nei te aposetolo Paulo ma te faahiti i te mau huru maitai e titauhia i te feia e hopoia ta ratou i roto i te fare a te Atua, ta ˈna e haapapu ra i te irava 15 i raro aˈe i te iˈoa o te “[amuiraa] o te Atua ora ra, o te pou e te tumu o te parau mau ra”. I te irava 16, te parau faahou ra oia e: “Ua tia paatoa hoi e, e parau moe rahi to te paieti nei.” Ma te parau mau, e parau moe rahi, no te mea ua tono mai Iehova i ta ˈna Tamaiti otahi i nia i te fenua nei no te faaite, no te haapapu e eaha mau na te paieti e eaha te tuhaa faufaa ta ˈna e rave i roto i te haamoriraa mau. Ua haamaramaramahia te parau huna moˈa o taua paieti ra i roto i te roaraa o te oraraa o Iesu i nia i te fenua nei. E tia i te mau taata atoa o te here nei ia Iehova ia patu i to ratou faaroo e to ratou oraraa i nia i te Mesia, o tei riro ei hiˈoraa no te paieti. Teie nei râ, eaha te mau haamaramaramaraa ta Iesu i horoa mai no nia i ‘te parau huna moˈa o te paieti’?

E ono tuhaa

8. a) Eaha na tuhaa e ono o te parau huna moˈa i horoahia e Paulo i roto i te Timoteo 1, 3:16? b) O vai taua “[oia]” o tei faaitehia ra?

⁸ Te pahono nei Paulo i taua uiraa ra i raro aˈe i te aratairaa a te Atua. I roto i te Timoteo 1, 3:16, te faahiti nei oia e ono tuhaa o taua parau huna moˈa ra: “[1] I itea mai [oia] i roto i te taata nei, e [2] i tiahia mai [oia] e te [v]arua, e [3] i hiˈohia [oia] e te mau melahi, e [4] i parau-haere-hia [oia] i ǒ te Etene, e [5] i faaroohia [oia] i te ao nei, e [6] ravehia ˈtura [oia] i nia i to ˈna ihora ao.” O vai ïa taua “[oia]” ra o tei iteahia mai? Ma te papu maitai, o te Huaai tei tǎpǔhia, o Iesu, o tei haere mai no te rave i te hinaaro o te Atua. Tei te ropuraa mau oia i te parau huna moˈa, o ta ˈna e faarahi mau nei.

9. Nafea tatou e nehenehe ai e haapapu e eita e tia ia taio i te Timoteo 1, 3:16 mai teie te huru: “I itea mai te Atua i roto i te taata nei”?

⁹ Te tamata nei te feia e tiaturi ra i te Toru Tahi i te haapouri i te taa-papu-raa o te parau huna moˈa ma te faahiti e o te Atua iho te “[oia]” i roto i te Timoteo 1, 3:16. No te mea ïa, ua papai te mau huriraa tahito i taua irava ra mai teie te huru: “I itea mai te Atua i roto i te taata nei.” Teie nei râ, eaha te parauhia nei i roto i te mau papai heleni papu aˈe? Te rave nei te taatoaraa i te mono iˈoa ra “[oia]”, e eiaha râ “Atua”. I teie nei mahana, te farii nei te feia aravihi no te hiˈopoa maite i te papai e te faaôraahia mai i te “Atua” i roto i taua irava ra, e hape ïa no te feia papai na nia iho. No reira, te horoa nei te tahi mau huriraa apî aˈe, mai Te Tatararaa Eukumene o te Bibilia, Te Bibilia no Ierusalema (farani) e te Tatararaa a te ao apî (farani), ma te tia mau i taua irava ra na roto i te parau e: “I itea mai [oia] i roto i te taata nei.” Oia mau, e ere o te Atua iho tei iteahia mai “i roto i te taata nei”. O ta ˈna râ Tamaiti herehia, ta ˈna poieteraa matamua, no nia ia ˈna to te aposetolo Ioane papairaa e: “I riro mai nei te Logo ei taata e ua tiahapa mai i ǒ tatou nei, (e ua ite matou i to ˈna hanahana, mai te hanahana e au i te Tamaiti fanau tahi a te Metua ra,) ua î i te maitai e te parau mau.” — Ioane 1:14.

“I itea mai [oia] i roto i te taata nei”

10. a) Nafea, a bapetizohia ˈi Iesu, te tuhaa matamua o te parau huna moˈa i te haamaramaramaraahia? b) No te aha Iesu i riro mai ai ei “Adamu hopea”?

¹⁰ I te bapetizoraahia o Iesu i maramaramahia ˈi te tuhaa matamua o te parau huna moˈa: Ua ‘iteahia [o Iesu] i roto i te taata nei’ ei Tamaiti faatavaihia na te Atua. Ua tuu atu o Iehova i roto i te opu o Maria te ora o ta ˈna Tamaiti Iesu, o tei ora i mutaa ihora i nia i te raˈi, ia nehenehe oia ia fanauhia mai ei taata, ei taata tia. No reira, mai ta te Korinetia 1, 15:45-47 e haapapu ra, riro aˈera Iesu mai te pitiraa aore ra te Adamu “hopea”, te hoê taata tia tei tuea maitai i te Adamu matamua. No teihea opuaraa? I roto i te Timoteo 1, 2:5, 6, te taiohia ra e “te Adamu hopea”, “o te taata ra o Iesu Mesia; o tei horoa ia ˈna iho ei hoo i te taata atoa”. Na nia i te niu fariihia o taua tusia taata tia ra, o Iesu atura ïa te Arai o te faufaa apî tei faatupuhia no na 144 000 taata tei piihia no te riro mai ei feia aiˈa e o o ˈna i roto i to ˈna Basileia. — Apokalupo 14:1-3.

11. Ua parare te mau haamaitairaa o te tusia taraehara o Iesu i nia ia vai?

¹¹ E huti anei te tahi atu mau taata i te tahi mau haamaitairaa i te pohe tusia o Iesu? Aita e feaaraa! I roto i te Ioane 1, 2:2, te parau nei te aposetolo no nia ia Iesu Mesia e: “E oia hoi te taraehara i ta tatou nei hara [oia hoi te mau hara o te mau kerisetiano faatavaihia mai ia Ioane]; e ere hoi i ta tatou anaˈe ra, i ta to te ao atoa nei râ.” No reira, e parare te mau haamaitairaa o te tusia taraehara a Iesu, o tei ore i taotia-noa-hia no te mau kerisetiano faatavaihia e 144 000, i nia i te ao o te mau taata atoa. E nehenehe te hoê “feia rahi roa” teie e ora nei i teie nei e te tahi tau miria taata o te faatiahia i roto i te Paradaiso i nia i te fenua nei, e fanaˈo i te ora mure ore no to ratou faaroo i roto i te tusia taraehara a Iesu. Mai tei tǎpǔhia i roto i te Apokalupo 7:9, 10, ua horoi aˈena te mau melo o te “feia rahi roa” i to ratou mau ahu e ua faateatea ma te faatupu i te faaroo i roto i te toto tei manii o te Arenio o Iesu Mesia. Ua fariihia ratou ei feia parau-tia mai te mau hoa o te Atua. Mea na roto i te oaoa ratou e ite ai i te mau tuhaa taa ê o te parau huna moˈa e e faaohipa ai ratou i te paieti ma te pee i te hiˈoraa o Iesu.

Te tahi atu â mau tuhaa

12. I roto i teihea auraa Iesu ‘i tiahia mai ai e te varua’?

¹² Eaha ˈtura ïa i teie nei no te pitiraa o te tuhaa tei faaitehia i roto i te Timoteo 1, 3:16? Mea nafea ïa to Iesu “i tiahia mai [ai] e te [v]arua”? No te mea ua faatia aˈera o Iehova i ta ˈna Tamaiti haapao maitai i te oraraa i te pae varua. Te faaite nei ïa te Atua e e taata tia roa o Iesu e e nehenehe oia e rave i te tahi mau tiaraa teitei roa ˈtu â. Mai ta te Roma 1:4 e parau ra, o Iesu tei “tapao faaitehia râ i te mana, e o te Tamaiti ïa a te Atua, i ta te [v]arua [moˈa] ra, i te tia-faahou-raa mai te pohe maira”. Te itehia nei te haapapuraa o taua parau i roto i te Petero 1, 3:18, i reira e taiohia ˈi: “I pohe na hoi te Mesia iho no te hara hoê poheraa, te taata parau-tia no te feia parau-tia ore, ia tae tatou ia ˈna i te Atua ra, i taparahi-pohe-mau-hia oia i te tino ra, i faaorahia râ e te [v]arua.” No outou iho, te aratai anei ra te hiˈoraa o te paieti i vaiihohia mai e Iesu ia outou i te Atua ra?

13. Ua fa mai Iesu i mua i teihea mau melahi i muri aˈe i to ˈna faatiaraahia, e eaha te poroi ta ˈna i afai atu no ratou?

¹³ Ia hoˈi mai na tatou i roto i te Timoteo 1, 3:16, i reira Paulo e parau faahou ai e ua “hiˈohia [Iesu] e te mau melahi”; o te toruraa ïa o te tuhaa o te parau huna moˈa. O vai mau na ïa taua mau melahi ra? No Iesu, ‘o tei horoa-faahou-hia te ora i roto i te varua’, ua papai o Petero i roto i te Petero 1, 3:19, 20 e: “O ta ˈna ïa i aˈo atu i te mau varua e vai i roto i te tapearaa i teie nei; o tei ore i faaroo i mutaa ihora, i te faaoromairaa roa o te Atua a tiai ai i te anotau ia Noa ra.” Te faaite ra Iuda 6 e taua mau varua ra, o “te mau melahi atoa o tei ore i haapao i to ratou iho toroa ra, faarue ihora râ i to ratou parahiraa” i roto i te mau raˈi. Ua rave aˈera ratou i te mau tino taata ia nehenehe ratou e faatupu i te mau taatiraa i te pae tino tia ore e te tahi mau vahine. Ua turai aˈera râ te diluvi i taua mau melahi ra ia hoˈi faahou i roto i te mau vahi varua, e ua hurihia ratou i roto i te pouri, e huru faahaehaaraa taatoa te reira (Petero 2, 2:4). I reira to Iesu haereraa e poro ia ratou i muri aˈe i to ˈna faatia-faahou-raahia. Ua afai anei oia na taua mau melahi iino ra i te hoê poroi no te faaora? E ere roa ˈtu! Ua faautua râ o Iesu i to ratou ino, o tei taa ê roa i te paieti. Oia atoa i teie mahana, e tia i te mau tavini atoa o te Atua o te hauti nei e te taatiraa i te pae tino viivii, ia huti i te haapiiraa o te haavaraa i faaitehia no nia i taua mau melahi ra.

14. Mea nafea to Iesu haamataraahia i te ‘parau-haere-hia i ǒ te Etene’?

¹⁴ Te maharaa o te tuhaa o te parau huna moˈa tei faaitehia i roto i te Timoteo 1, 3:16, oia hoi ua “parau-haere-hia [Iesu] i ǒ te Etene”. Nafea ïa te reira i te tupuraa? Na mua noa ˈˈe i to ˈna tapearaahia, ua parau Iesu i te mau aposetolo e: “E parau atu vau ia outou, O te faaroo mai ia ˈu ra e rave atoa oia i teie nei mau ohipa ta ˈu e rave nei, e e rahi atu â ta ˈna e rave i teie, no te mea te haere nei au i tau Metua ra.” (Ioane 14:12). I muri noa aˈe, i te Penetekose o te matahiti 33, ua ninii aˈera Iesu i te varua moˈa i nia i ta ˈna mau pǐpǐ, e ua haamatahia aˈera i te poro i te hoê parau apî maere mau i rotopu i te mau ati Iuda, oia hoi: “O taua Iesu nei â ta te Atua i faatia aˈenei i nia.” I muri iho, ua farii atoa te mau ati Samaria i te parau a te Atua e ua roaa atoa ia ratou i te varua moˈa (Ohipa 2:32; 8:14-17). E, i te matahiti 36, ua poro aˈera Petero ia Korenelio e i te tahi atu mau Etene tei haaputuputu i ǒ na. Mai te reira ˈtura to te parau apî maitai no nia ia Iesu i haamatahia i te ‘parau-haere-hia i ǒ te Etene’, oia hoi i rotopu i te feia e ere i te ati Iuda, o tei faatavai-atoa-hia e te varua moˈa.

15. Eaha te haapapuraa e ua ite maitai te mau kerisetiano matamua i te parau huna moˈa o te paieti?

¹⁵ Mai ta te Ohipa 12:24 e faatia ra, “tupu atura hoi te parau a te Atua, e aano roa ˈtura.” I roto i te Ohipa 17:6, te taiohia ra e, i roto i te fenua Heleni no te pae Apatoerau, ua tuô na te tahi feia patoi mai ta tatou e ite faahou ra i teie mahana i roto i taua fenua ra, e: “O te mau taata orure hau teie i te mau fenua atoa nei, a teie mai nei â hoi.” Aita i mairi e toru ahuru matahiti a nehenehe ai o Paulo, ma te papai atu mai Roma mai, e parau e ua “faaite-haere-hia [te parau apî maitai] i te taata atoa i raro aˈe i teie nei raˈi”. (Kolosa 1:23.) Ua ite maitai te mau kerisetiano no taua tau ra i te parau huna moˈa o te paieti, e ua faaohipa ratou i taua ite ra ma te itoito. O tatou iho, i to tatou nei tau faufaa i reira te Basileia i te pororaahia, ia nehenehe atoa tatou ia imi i te ite i taua parau huna moˈa e ia faaohipa i taua ite ra i roto i to tatou oraraa!

16. Eaha te paeraa o te tuhaa o te parau huna moˈa, e na teihea ohipa i faaite taa ê i te reira?

¹⁶ Na te pororaa i faatupuhia i te senekele I i faaite taa ê i te paeraa o te tuhaa o te parau huna moˈa i faaitehia i roto i te Timoteo 1, 3:16. Maoti hoi te paieti o te mau mitionare itoito rahi, paieti mai to te Mesia ra te huru, ‘i faaroohia ˈi o Iesu i teie nei i te ao nei’. Ua afai na te tahi mau taata mai ia Paulo e ia Timoteo i te parau apî maitai i Asie Mineure, i Europa, peneiaˈe atoa tae roa ˈtu i te fenua Paniora. Ua parare te poroi i Afirika no te pae hitia o te râ na roto i te vaha o te taata no Etiopia o tei bapetizohia, e ua faaaano o Petero i ta ˈna taviniraa i Babulonia.

17. No te aha Iesu i teie mahana ‘i faaroohia ˈi i te ao’ atoa nei?

¹⁷ Eaha ˈtura ïa no to tatou nei tau? Mai te matahiti 1919 mai â, te faaite nei te toea i faatavaihia i te hoê paieti o te riro ei hiˈoraa. Ua faatia taua mau kerisetiano i faatavaihia ra ma te paari maitai i nia i te niu o te faaroo tei haamauhia e Iesu. Mai te matahiti 1935 iho â râ, te haaputuputu nei ratou i te hoê nǎnǎ rahi o te oaoa nei i te manaˈo e ora ˈtu i te “ati rahi” no te fanaˈo i te ora mure ore i nia i te hoê fenua tei faarirohia ei paradaiso (Apokalupo 7:9, 14). Mea na reira, i roto i te ao atoa nei, te vai ra i teie mahana te tahi mau taata o te tiaturi nei i te parau apî maitai no nia ia Iesu. Ma te paieti, hau atu i te 3 700 000 Ite no Iehova teie e poro ra i nia i te fenua atoa nei, e te rahi noa ˈtura to ratou numera.

18. I roto i teihea auraa to Iesu ‘raveraahia i nia i to ˈna ihora ao’?

¹⁸ Ia au i te onoraa e te tuhaa hopea hoi o te parau huna moˈa, ua “ravehia ˈtura [o Iesu] i nia i to ˈna ihora ao”. Ua ‘faaorahia Iesu e te varua’, e i muri iho, i roto i te roaraa e maha ahuru mahana, ua fa mai oia i ta ˈna mau pǐpǐ i roto i te tahi mau tino taata e ua paraparau oia i “te parau o te basileia o te Atua”. I muri iho, haere atura oia i nia i te raˈi (Ohipa 1:3, 6-9). Ua pahonohia ta ˈna pure tei papaihia i roto i te Ioane 17:1-5; te parau nei oia e: “E tau Metua, (...) a haamaitai i to Tamaiti, ia haamaitai atoa hoi to Tamaiti ia oe (...). Ua haamaitai au ia oe i te ao nei (...). E teie nei, e tau Metua, e haamaitai mai oe ia ˈu i mua i to aro na i te maitai no ˈu ia oe hou teie nei ao ra.”

19. Ma te papu maitai, eaha te fariiraa tei horoahia no Iesu a hoˈi ai oia i nia i te raˈi?

¹⁹ A feruri na i te oaoa rahi tei tupu a hoˈi ai Iesu i nia i te raˈi. I te hoê tau na mua roa ˈtu, a poiete ai Iehova i te fenua, ‘ua pii noa te mau tamarii atoa a te Atua i te oaoa’. (Ioba 38:7.) Eaha ˈtu â ïa te oaoa rahi roa ˈtu â tei tupu i te nǎnǎ o te mau melahi a farii faahou ai ratou i rotopu ia ratou i te Paruru haapao maitai o te mana arii o Iehova!

20. No te aha i roaa ˈi ia Iesu te hoê iˈoa tei hau ê, e eaha ta ˈna i rave, a vai ai oia i nia i te fenua nei?

²⁰ I roto i te Hebera 1:3, 4, te parau ra Paulo no nia ia Iesu tei upootia e: “Oti aˈera ta tatou hara i te tamâhia e ana ia ˈna ihora, parahi ihora i raro i te rima atau o te Mana i te vahi teitei ra; e maitai hau ê hoi to ˈna i to te mau melahi, mai te iˈoa i noaa ia ˈna i hau ê i te maitai i to ratou ra.” Taua “iˈoa” ra, ua horoahia ïa i te Mesia no to ˈna upootiaraa i nia i te parau-tia ore. Oia mau, a vai ai oia i nia i te fenua nei, ua reni te Tamaiti a te Atua i te eˈa o te paieti. Hau atu, ua vaiiho mai oia i te hoê hiˈoraa te tia i te feia atoa o te hinaaro ra i te ora mure, ia pee. Ua faaitehia te parau huna moˈa o taua paieti ra i roto i to ˈna mau tuhaa atoa, a faateiteihia ˈi o Iesu i te pae atau o te Atua i roto i te mau raˈi.

Eaha ta outou e pahono atu?

◻ Eaha “te paieti”?

◻ I roto i teihea auraa to Iesu ‘itearaahia mai i roto i te taata nei’, e ‘i tiaraahia mai e te varua’?

◻ Ua fa Iesu i mua i teihea mau melahi, e eaha te poroi ta ˈna i afai atu no ratou?

◻ I roto i teihea auraa to te Mesia ‘parau-haere-raahia i ǒ te Etene’ e ‘i faarooraahia i te ao nei’?

◻ Afea ra to Iesu ‘raveraahia i nia i to ˈna ihora ao’, teie nei râ, na mua ˈˈe, eaha te ohipa ta ˈna i rave ia au i te paieti?